თამარ გაბუნია აცხადებს, რომ მომდევნო ეტაპზე ფარმაცევტების ტესტირება იგეგმება
Read Time:2 Minute, 16 Second
ძალიან მნიშვნელოვანია ის ჯგუფები, რომლებიც მეტად აქტიურად დაექვემდებარება ტესტირებას, – ამის შესახებ საქართველოს ჯანდაცვის მინისტრის პირველმა მოადგილემ, თამარ გაბუნიამ საქართველოს პირველი არხის საინფორმაციო პროგრამა „მოამბეში“ განაცხადა.
„ძალიან მნიშვნელოვანია ის ჯგუფები, რომლებიც მეტად აქტიურად დაექვემდებარება ტესტირებას – სამედიცინო პერსონალი, თავშესაფარში მცხოვრები პირები და იქ დასაქმებული ადამიანები, ტრანზიტის გარდა, დიდი მანქანების მძღოლები, რომლებიც ქვეყანაში შემოდიან და ქვეყანას მალევე ტოვებენ, თუმცა, რაღაც პერიოდი დაყოვნება უწევთ. მეორე ეტაპზე, მაისის მეორე ნახევარში იგეგმება ტესტირების ჯგუფების კიდევ უფრო გაფართოება და აქ ვფიქრობთ სამედიცინო სფეროს ახალი ჯგუფის დამატებას ფარმაცევტების ნაწილში“, – განაცხადა გაბუნიამ.
გადაცემის წამყვანის შეკითხვაზე, მოხდება თუ არა სურსათის მაღაზიებში მომუშავე პერსონალის ტესტირება, რადგან შეზღუდვების ნელ-ნელა მოხსნასთან ერთად, შესაძლოა, მაღაზიებში მოქალაქეთა გადაადგილება და მობილობა მაღალი იყოს, თამარ გაბუნიამ განაცხადა, რომ ყველა დასაქმებული ადამიანი ტესტირებას ვერ დაექვემდებარება.
„თეორიულად, ინფიცირების რისკი ყველას გვაქვს, მაგრამ იმისთვის, რომ ტესტირება შედეგიანი იყოს, ძალიან მნიშვნელოვანია, სწორად შეირჩეს მაღალი რისკის ჯგუფები. რა თქმა უნდა, ყველა დასაქმებული ტესტირებას ვერ დაექვემდებარება. იმის შანსი, რომ ტესტირების შედეგად რამეს ვიპოვით, ძალიან დაბალია. თუმცა, გარდა იმისა, რომ ჩვენ მაღალი რისკის პროფესიების ტესტირებას დავიწყებთ, ასევე ვიმუშავებთ სტრატეგიაზე, ზოგადად ბიზნესისთვის იმ რეკომენდებული ტესტირების შესახებ, რაც შესაძლებელია, იყოს უკვე მათი რუტინული ეპიდუსაფრთხოების პროგრამის ნაწილი და რაც უსაფრთხოს გახდის გარემოს, სადაც თანამშრომლები იმუშავებენ.
ჩვენ ვმუშაობთ საერთაშორისო რეკომენდაციების კვალდაკვალ და ვაკვირდებით, როგორ განვითარდება მოვლენები ამ მიმართულებით. ვფიქრობ, ცოტა ხანში ჩვენც გვექნება უფრო მკაფიო რეკომენდაციები იმის შესახებ, თუ სად იქნება პირველი ადგილი სამედიცინო სფეროს მიღმა, სადაც უფრო აქტიურად უნდა ჩატარდეს ასიმპტომური პირების ტესტირება“, – განაცხადა გაბუნიამ.
შეკითხვაზე, მოსალოდნელია თუ არა ტესტირების მეორე ეტაპზე მედიაც მოხვდეს, რადგან ითქვა, რომ ესეც მაღალი რისკის პროფესიაა, თამარ გაბუნიამ განაცხადა, რომ ჯერჯერობით ტესტირების პროცესში მედიის ჩართვაზე საუბარი არ არის.
„ესეც მხოლოდ იმ მიზეზის გამო, რომ ძალიან ცოტაა მხარდამჭერი მტკიცებულება იმისა, რომ მედიის წარმომადგენლებს კორონავირუსით ინფიცირების უფრო მაღალი რისკი აქვთ, ვიდრე დავუშვათ, რომელიმე სხვა საჯარო მოხელეს, ან თუნდაც, მე, ვისაც ხშირად მიხდება ურთიერთობა შეიძლება, კარანტინში მყოფ პირებთან, სამედიცინო პერსონალთან, ან სხვა პირებთან“, – განაცხადა თამარ გაბუნიამ.
თამთა სანიკიძის შეკითხვაზე, რას უკავშირდება ტესტირების გაფართოება ახლა, კრიზისულ პიკის პერიოდს თუ ტესტების მარაგებს, რომელიც ქვეყანაში ორი დღის წინ ჩამოვიდა, თამარ გაბუნიამ განაცხადა, რომ აქ ორი ძირითადი მომენტია მთავარი – გაფართოვდა ტესტირების საჭიროება და ამის საპასუხოდ პროგრამაში მეტი მიმწოდებელი ჩაერთო.
„საკმარისი მარაგები აქამდეც გვქონდა, რომ ამ რაოდენობის ტესტირება მანამდეც ჩაგვეტარებინა. დღეში 800 ტესტი არ არის ისეთი შეუძლებელი რაოდენობა და ამის მარაგი მანამდეც იყო, მაგრამ აქ ორი ძირითადი მომენტია მთავარი. ერთი ის, რომ გაფართოვდა ტესტირების საჭიროება და ამის საპასუხოდ პროგრამაში მეტი მიმწოდებელი ჩაერთო. ანუ, აქ ორივე ფაქტორია – საჭიროებაც გაიზარდა და ამის კვალდაკვალ გაიზარდა შესაძლებლობებიც. კარგი ამბავია ისიც, რომ მარაგებიც შევივსეთ. დღეიდან, არსებული მარაგები უფრო მეტი ტესტის ჩატარების შესაძლებლობას მოგვცემს. ანუ, ეს სამივე ფაქტორი, რა თქმა უნდა, ერთმანეთს აძლიერებს და ამ შემთხვევაში გვაქვს სურათი, რაც საშუალებას გვაძლევს, უფრო ფართოდ გამოვიყენოთ შესაძლებლობები, მაგრამ მიზნობრივი ტესტირება არის ჩვენი სტრატეგია. გაფართოება, რა თქმა უნდა, გონივრულ ფარგლებში და მიზანმიმართულად მოხდება. ეს არის წარმატების მთავარი ფაქტორი“, – განაცხადა თამარ გაბუნიამ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
Comments
0
0
