ბურჭულაძე პრემიერს: მიმიფურთხებია ყველა ადამიანისთვის, ვინც თქვენ, თქვენს მომყვანს და მიმდევრებს ხელს ჩამოართმევს
ბოდიში რომ დამიგვიანდა ამის შეტყობინება და ბოდიში რომ უფრო თქვენთვის შესაფერისი სიტყვებით ვერ შეგამკეთ. – მსოფლიო ბანი პაატა ბურჭულაძე საქართველოს პრემიერ მინისტრის, ირაკლი ღარიბაშვილის დღევანდელ განცხადებას სოციალურ ქსელში ეხმაურება.
“ღრმადპატივცემულ” საქართველოს პრემიერ მინისტრს ბატონ ირაკლი ღარიბაშვილს!
“ღრმადპატივცემულო” ბატონო პრემიერ მინისტრო, აქამდეც მქონდა ამის სურვილი რომ მეთქვა თქვენთვის მაგრამ თავს ვიკავებდი, თუმცა დღეს აუცილებლად უნდა გაცნობოთ და გულრწფელად გითხრათ რომ მიმიფურთხებია ყველა იმ ადამიანისთვის ვინც თქვენ, თქვენს მომყვანს და დამსმელს და თქვენს მიმდევრებს ხელს ჩამოართმევს. ბოდიში რომ დამიგვიანდა ამის შეტყობინება და ბოდიში რომ უფრო თქვენთვის შესაფერისი სიტყვებით ვერ შეგამკეთ.
“უღრმესი პატივისცემით” პაატა ბურჭულაძე.
საქართველოს პრემიერ-მინისტრმა ირაკლი ღარიბაშვილმა მედიასთან საუბარში განაცხადა, რომ საქართველო არ უერთდება ეკონომიკურ და სხვა სახის სანქციებს რუსეთის მიმართ, რომლებიც ევროკავშირმა, აშშ-მა, დიდმა ბრიტანეთმა და მსოფლიოს სხვა ქვეყნებმა დააწესეს, მის მიერ უკრაინაში წარმოებული საომარი ოპერაციის საპასუხოდ.
ირაკლი ღარიბაშვილი მიღებულ გადაწყვეტილებას “ქვეყნისა და მოსახლეობის ეროვნული ინტერესებით” ხნის.
“როგორც პრემიერ-მინისტრმა ჩვენი ქვეყნის და ჩვენი ხალხის წინაშე მინდა განვაცხადო შემდეგი, რომ მე არაფერს გავაკეთებ, არცერთ გადაწყვეტილებას არ მივიღებ ისეთს, რომელიც რაიმე ფორმით დააზიანებს ჩვენი ქვეყნის ეროვნულ ინტერესებს. შესაბამისად, ჩვენ, რა თქმა უნდა, გავეცანით საერთაშორისო პარტნიორების ქმედებებს, რომელიც მოჰყვა უკრაინაში საომარი მოქმედებების დაწყებას – მე ვგულისხმობ ეკონომიკურ და ფინანსურ სანქციებს და მინდა მკაფიოდ განვაცხადო და ერთმნიშვნელოვნად, რომ საქართველო, ჩვენი ეროვნული ინტერესების გათვალისწინებით და ჩვენი ხალხის ინტერესების გათვალისწინებით, არ აპირებს მონაწილეობა მიიღოს ფინანსურ და ეკონომიკურ სანქციებში, ვინაიდან აღნიშნული მხოლოდ დააზიანებს, გაცილებით უფრო მეტად ჩვენს ქვეყანას და ჩვენს მოსახლეობას. შესაბამისად, მე, როგორც პასუხისმგებელი ჩვენი ქვეყნის, მოსახლეობის წინაშე, მთავრობის მეთაური, რომელიც პასუხისმგებელია როგორც საშინაო, ასევე საგარეო პოლიტიკაზე, ეროვნულ ინტერესებზე დაყრდნობით ვიხელმძღვანელე, მხოლოდ ჩვენი ქვეყნის ინტერესებით“, – განაცხადა ირაკლი ღარიბაშვილმა, რომელიც საბჭოთა ოკუპაციის დღესთან დაკავშირებით იუნკერთა მემორიალთან იმყოფებოდა. მან ამ საკითხზე მედიასთან შესაბამისი კითხვის გარეშე, თავის ინიციატივით ისაუბრა.