მიხეილ ყაველაშვილი: დღეს “გლობალური ომის პარტია” მართავს რადიკალური ოპოზიციის თითქმის 99%-ს

“შეგვიძლია, ანალოგიური პარალელი გავავლოთ  2008 წლის ომთან დაკავშირებითაც, რას იძახდა ოფიციალურად ეს ხალხი  და კულუარულად რას მოუწოდებდნენ სააკაშვილს. გასაგებია, სააკაშვილის ექსცენტრულობა და გარკვეულ ვითარებებში სხვადასხვა მოქმედებები, თუმცა მას დამოუკიდებლად ეწარმოებინა მსგავსი პოლიტიკა რუსეთის წინააღმდეგ, ეს გამორიცხულია. ამას ვხედავდით ყველა და ვგრძნობდით კიდევაც, რა და როგორ ხდებოდა.

იმის პარალელიც შეგვიძლია გავავლო, რა ხდებოდა 2008 წლის ომამდე, როგორი პროპაგანდა იყო. ახლაც, გავიხსენოთ უკრაინის ომის დაწყებიდან, როგორი პროპაგანდა დაიწყო, იყო ხელისუფლებაზე ზეწოლა, ექსპერტების ჩართულობა, ტელევიზიებში  ყველა ავრცელებდა ერთ ნარატივს – ნახეთ, რა შანსს უშვებს საქართველო, რომ რუსეთი სუსტია და ა.შ.

დღეს „გლობალური ომის პარტია“ მართავს რადიკალური ოპოზიციის თითქმის 99%-ს.  ეს საზოგადოებას აძლევს იმის შესაძლებლობას, რომ კიდევ ერთხელ კარგად გააანალიზოს მიმდინარე პროცესები. საზოგადოების ინფორმირებასთან ერთად, საქართველო, მისი ხელისუფლება, საზოგადოება ნელ-ნელა წინ დგამს ნაბიჯს.

რა თქმა უნდა, რამდენიმე წლის წინ სამართლიანობის აღდგენაზე და 2008 წლის ომის გამოძიებაზე რომ გვქონდა საუბარი, ძალიან რთული იყო, ისეთი ზეწოლის ქვეშ ვიყავით მთელი ქვეყანა. დღესაც ვხედავთ, არასამთავრობო სექტორიდან, ოპოზიციიდან, გარეთა ძალებიდან როგორი ზეწოლაა და კიდევ გააქტიურდება, მაგრამ  ახლა უფრო მყარად ვართ, უფრო  მეტი შესაძლებლობა აქვს ხელისუფლებას, საზოგადოებაც ინფორმირებულია რომ ნაბიჯ-ნაბიჯ დავიწყოთ სამართლიანობის აღდგენაზე საუბარი.

ჩვენი ქვეყანა წინ ვერ წავა, ვერ შედგება და ვერ იქნება სრულყოფილი, თუ სახელს არ დავარქმევთ ყველაფერს, რაც აქამდე განხორციელდა, მით უმეტეს, როცა ეს ეხება უმაღლეს ხელისუფალს, რომელიც მართავდა ქვეყანას. მისი უშუალო მონაწილეობით დაიკარგა ტერიტორიები, ამდენი დევნილი მივიღეთ და ამდენი ადამიანი გარდაიცვალა, ამის პატიება შეუძლებელია. არცერთ პოლიტიკოსს არ აქვს უფლება იყოს ხელისუფლებაში, თუ ამ მოვლენებს სამართლიანად არ გამოიძიებს და ყველაფერს არ დაარქმევს თავის სახელს“, – განაცხადა ყაველაშვილმა.