ლილუაშვილი სააკაშვილზე: ის მარტო არასდროს იმყოფებოდა, ის გადაადგილდებოდა თანმხლებ პირებთან ერთად, რაც აყვანისას იყო მომატებული საფრთხე
“თქვენ ელოდებით ჩემგან სერიოზულ პასუხს ამ არასერიოზულ შეთავაზებაზე? თან ამას აკეთებს ყოფილი პრეზიდენტი. მისი ეს წამონასროლი ფრაზა აბსოლუტურად გამოხატავს მის ემოციას ამ სამსახურისადმი” – ასე უპასუხა სახელმწიფო უსაფრთხოების სამსახურის ხელმძღვანელმა, გრიგოლ ლილუაშვილმა “ღამის კურიერთან” ინტერვიუში მიხეილ სააკაშვილის განცხადებასთან დაკავშირებულ შეკითხვას, რომლის მიხედვით, სუსის შენობაში ღამის კლუბი უნდა გაიხსნას.
“თქვენ ელოდებით ჩემგან სერიოზულ პასუხს ამ არასერიოზულ შეთავაზებაზე? თან ამას აკეთებს ყოფილი პრეზიდენტი. მისი ეს წამონასროლი ფრაზა აბსოლუტურად გამოხატავს მის ემოციას ამ სამსახურისადმი. ვინაიდან ეს სამსახური არ მისცემს არასოდეს არცერთ დამნაშავეს, არცერთ დესტრუქტორს თავისი ქმედების განხორციელების საშუალებას და ჩვენ ამას წარმატებით ვაკეთებთ და სწორედ ეს გახლავთ მათი და კონკრეტულად ამ პიროვნების განაწყენების მთავარი საფუძველი,” – განაცხადა გრიგოლ ლილუაშვილმა.
მიხეილ სააკაშვილის საქმესთან დაკავშირებულ შეკითხვას – თუ როდიდან ჰქონდა ინფორმაცია სუს-ს, რომ ექსპრეზიდენტი საქართველოში იმყოფებოდა, გრიგოლ ლილუაშვილმა, უპასუხა, რომ უწყებას ინფორმაცია იმ მომენტიდანვე ჰქონდა, რა დროსაც მიხეილ სააკაშვილმა არაკანონიერად გადმოკვეთა სახელმწიფო საზღვარი.
“ტარდებოდა დაკავების ოპერატიული ღონისძიება და შეირჩა სწორედ ის ადგილი და დრო, სადაც ის იმყოფებოდა მარტო და ნაკლები იყო შანსი ფიზიკური დაპირისპირებისა. მთავარი თქვენთვის არის ის თუ როდის გახდა ცნობილი თუ შედეგი, რომელიც სახეზეა? ის მარტო არასდროს იმყოფებოდა, ის გადაადგილდებოდა თანმხლებ პირებთან ერთად, რაც აყვანისას იყო მომატებული საფრთხე, მე ისიც მინდა გითხრათ, რომ შსს-მ ოპერაცია ჩაატარა ძალიან მაღალ დონეზე, შეძლეს კარის გაღება გასაღებით, ეს მიუთითებს იმაზე, რომ ყველა დეტალი მაქსიმალურად იყო დაზღვეული სავარაუდო გართულებისგან,”- განაცხადა გრიგოლ ლილუაშვილმა.
კითხვაზე მომატებული საფრთხეში იგულისხმება, თუ არა ის, რომ მიხეილ სააკაშვილის თანმხლები პირები შეიარაღებულები იყვნენ, გრიგოლ ლილუაშვილმა უპასუხა:
“ამას გამოძიება დაადგენს, შეიძლება თანმხლები პირები, უშუალოდ მის მანქანაში არ ფლობდნენ შეიარაღებას, მაგრამ შეიძლება თანმხლებმა პირებმა გარკვეული დისტანციით გადაადგილება აწარმოონ, ასე რომ ეს რისკები იყო გათვლილი.”