დიმიტრი ხუნდაძე წულუკიანს – მინდა გკითხოთ მცხეთის განვითარების გეგმაზე, რომელიც „ცისფერი მთების“ გრელანდიად იქცა – ქალაქი და საზოგადოება პრაქტიკულად ტყვეობაშია და ბოქლომის გასაღები ჯიბეში ვის უდევს, არ ვიცი
Read Time:1 Minute, 7 Second
ქალაქი და საზოგადოება პრაქტიკულად ტყვეობაშია და ბოქლომის გასაღები ჯიბეში ვის უდევს, არ ვიცი – ქალაქი არაჯანსაღი ლობიზმის მსხვერპლია, – ამის შესახებ „ქართული ოცნების“ წევრმა დიმიტრი ხუნდაძემ პარლამენტის პლენარულ სხდომაზე კულტურის მინისტრ თეა წულუკიანისადმი მიმართვისას განაცხადა.
ხუნდაძემ წულუკიანს მცხეთის განვითარების გენერალურ გეგმასთან დაკავშირებით კითხვით მიმართა და აღნიშნა, რომ არსებული გეგმა „ცისფერი მთების“ გრელანდიად იქცა და ის „კერძო ინტერესებსაა მორგებული“.
„მინდა შევეხო საკითხს და გკითხოთ მცხეთის მორატორიუმისა და გენერალური განვითარების გეგმასთან დაკავშირებით, რომელიც „ცისფერი მთების“ გრელანდიად იქცა და ეს უკვე მე-7 წელია გრძელდება. ქალაქი და საზოგადოება პრაქტიკულად ტყვეობაშია და ბოქლომის გასაღები ჯიბეში ვის უდევს, არ ვიცი. ქალაქის გენერალური განვითარების გეგმა უნდა ემსახურებოდეს ორ ძირითად მიზანს – კულტურული მემკვიდრეობის დაცვას და უნდა შემუშავდეს წესები, როგორ უნდა განვითარდეს ქალაქი. მაგრამ აქამდე ნამუშევარი აცდა მთავარ მიზანს და ვფიქრობ, ეს არის კერძო ინტერესებს მორგებული გეგმა, სადაც საუბარია გაურკვეველი ლოკაციის ხელოვნურად შექმნილ კარიბჭეებზე. ამას შემიძლია ბიზნეს კარიბჭეები ვუწოდო. სხვათა შორის „იუნესკოს“ დასკვნაშიც არანაკლებად მძიმე შეფასებებია ამასთან დაკავშირებით – საუბარია მაღალი კლასის სასტუმროებზე, რასაც ასევე ეწინააღმდეგება „იუნესკო“ და არ არის არანაირი წესები, როგორ უნდა განვითარდეს ქალაქი. ფაქტობრივად, ქალაქი არაჯანსაღი ლობიზმის მსხვერპლია. ეს ლობისტები რომ ასე ინტენსიურად არ იყვნენ ამ საკითხით დაკავებულები, ვფიქრობ, გელათის საკითხიც არ დარჩებოდათ ყურადღების მიღმა და ის ზიანი არ იქნებოდა, რაც მივიღეთ.
თქვენ ეს ბრალეულობა არ გეხებათ, იმიტომ, რომ თქვენამდე შეიქმნა ეს უღრანი ტყე – ზოგის უყურადღებობით, ზოგის განზრახულობით, მაინტერესებს, როგორ აფასებთ ამ პროცესს და რას გეგმავთ თქვენი ჩართულობის კუთხით“,- განაცხადა დიმიტრი ხუნდაძემ
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
Comments
0
0
