არჩილ თალაკვაძე – რეზოლუცია არ ეფუძნება სიმართლეს, აბსოლუტურად გამრუდებულია იმასთან შედარებით, რაც სინამდვილეში ხდება, პუნქტები, რაც რეზოლუციაშია, არის ჩვენი საზოგადოებისა და ქვეყნის შეურაცხყოფა
Read Time:2 Minute, 6 Second
ევროპარლამენტის რეზოლუცია არ ეფუძნება სიმართლეს და აბსოლუტურად გამრუდებულია იმასთან შედარებით, რაც სინამდვილეში ხდება, – ამის შესახებ საქართველოს პარლამენტის ვიცე-სპიკერმა, არჩილ თალაკვაძემ პირველი არხის გადაცემაში „დღის თემა“ განაცხადა.
თალაკვაძის თქმით, პუნქტები, რაც რეზოლუციაშია, არის ჩვენი საზოგადოებისა და ქვეყნის შეურაცხყოფა.
„რეზოლუცია იქნა მიღებული რომელიც პრინციპში მთლიანად ეხება პატიმრობაში მყოფ მიხეილ სააკაშვილს. უპირველესად უნდა ითქვას, რომ ეს რეზოლუცია არ ასახავს რეალობას, არ ეფუძნება სიმართლეს და აბსოლუტურად გამრუდებულია იმასთან შედარებით, რაც სინამდვილეში ხდება. ჩვენმა საზოგადოებამ ძალიან კარგად იცის, რა მოცემულობა გვაქვს და სინამდვილეში ის პუნქტები, რაც რეზოლუციაში ვნახეთ, არის ასევე ჩვენი საზოგადოებისა და ჩვენი ქვეყნის შეურაცხყოფა.
მეორე, როდესაც ვთქვი, აბსოლუტურად გამრუდებულია-მეთქი. მინდა, მაგალითი მოვიყვანო, რომ ჰაერზე არ ვისაუბროთ. რეზოლუციაში წერია, რომ სააკაშვილის პატიმრობა ძირს უთხრის საქართველოს დემოკრატიულ ინსტიტუტებს. ალბათ ეს რომ არ ეწეროს ევროკავშირის რეზოლუციაში, არავინ დაიჯერებდა ასეთ ცინიკურ განცხადებას. თუ რამე ძირს უთხრის დემოკრატიულ ინსტიტუტებს ჩვენს ქვეყანაში, ეს არის პირველ რიგში ის მოთხოვნები, რომელიც გვესმის მიხეილ სააკაშვილთან დაკავშირებით. რა მოთხოვნები გვესმის – დიახ, გაქვთ სასამართლო და სასამართლომ გადაწყვიტა ეს საკითხი, იგივე გადაწყვეტილება მიიღო ევროსასამართლომაც იმ საქმეებზე, რაზეც არის სააკაშვილი გასამართლებული, მაგრამ არაუშავს, გადადეთ გვერდზე სასამართლო და პოლიტიკურად ჩაერიეთ მართლმსაჯულებაშიო. ვინც გააზრებულად დაუჭირა მხარი ამ რეზოლუციას ევროპარლამენტში პირადი ინტერესების გამო, თუნდაც მათ ვიწროპარტიული ინტერესების გამო, მათ უღალატეს ევროპას“, – განაცხადა არჩილ თალაკვაძემ.
კითხვაზე, „რეზოლუციას მხარი დაუჭირა 557-მა ევროპარლამენტარმა, მათ უღალატეს ევროპას?“ რაზეც არჩილ თალაკვაძემ განაცხადა:
„არა. ვინც პირადი ინტერესებით გააკეთა ამის კოორდინაცია, ინიცირება და ვინც იყო მოთავე ამ რეზოლუციის, უღალატეს და გეტყვით, რატომ. ევროპა დგას სამ ძირითად პრინციპზე, რისიც გვჯერა და სჯერა ევროპაში მცხოვრებ ადამიანებს. ეს არის დემოკრატია, კანონის უზენაესობა და ადამიანის უფლებები. შეხედეთ, რეზოლუციაში რა წერია. დემოკრატიული გზით არჩეულმა ხელისუფლებამ კანონსა და კონსტიტუციაზე დაფუძნებით სასამართლოთი მიიღო გადაწყვეტილება და ადამიანი დღეს არის პატიმრობაში. რეზოლუცია კი გვეუბნება – არ აქვს მაგას მნიშვნელობა, თქვენი დემოკრატია რას ამბობს და ხალხს უნდა, ამას მნიშვნელობა არ აქვს, არამედ ჩვენ რასაც გეტყვით, კუბილიუსი, რასა, ფოტიგა რასაც იტყვიან, ის უნდა შეასრულოს საქართველომ. ეს ერთი. მეორე – კანონის უზენაესობა ერთ-ერთი უმთავრესი პრინციპია ევროპისთვის და რას გვეუბნება რეზოლუცია? გვესმის, რომ სასამართლომ გადაწყვიტა ამ კაცის პატიმრობა, სხვათა შორის, საერთოდ არ ახსენებენ ევროსასამართლოს, რომელიც იქ შუაგულ ევროპაშია და გადაწყვეტილება მიიღო ევროსასამართლომ, თქვა, რომ პირდაპირ სააკაშვილი იყო სათავეში იმ უმძიმესი კანონდარღვევბის, რაც მოხდა, თუნდაც სანდრო გირგვლიანთან დაკავშირებით, მიუხედავად იმისა, რომ სასამართლომ ეს გადაწყვეტილება მიიღო და სამართლიანად მიიღო, რადგან ემთხვევა საქართველოს სასამართლოს და ევროსასამართლოს მოსაზრება, გადაწყვეტილება ამ საქმესთან დაკავშირებით, ეს არ გვაინტერესებს, ეს უნდა გადავდოთ გვერდით და თურმე სამართალი კი არ არის მთავარი, არამედ მთავარია, ვის ეხება ეს საკითხი და მაშინ შეიძლება, რომ სხვანაირად გადავწყვიტოთ ეს საკითხი და გაათავისუფლეთო. და მესამე, როდესაც ლაპარაკია ადამიანის უფლებებზე, ეს რეზოლუცია გვეუბნება, რომ ყველა პატიმარი არის თანასწორი, მაგრამ ზოგიერთი უფრო თანასწორიო“, – განაცხადა არჩილ თალაკვაძემ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
Comments
0
0
