ალი მოჯანი-სომეხი ხელოვანების გამოსვლა თბილისში – ქალაქში, რომელიც თავად წარმოადგენს კულტურებისა და ისტორიების გზაჯვარედინს – გვახსენებს, რომ კავკასია უფრო მეტად კულტურული თანაცხოვრებისა და დიალოგის სივრცეა, ვიდრე მხოლოდ გეოპოლიტიკური კონკურენციის არენა

საქართველოს პრეზიდენტმა, მიხეილ ყაველაშვილმა ასტანაში ვიზიტი შეაჯამა.მიხეილ ყაველაშვილის განცხადებით, მაღალ დონეზე იყო ორგანიზებული რეგიონული ეკოლოგიური სამიტი, სადაც ყურადღება დაეთმო გარემოს დაცვით საკითხებს და ამ მიმართულებით არსებულ გამოწვევებს.„სამიტი ძალიან მაღალ დონეზე იყო ორგანიზებული. ჩემს სიტყვაშიც გადავუხადე მადლობა ყაზახეთის მთავრობას და მის პრეზიდენტს, რომელმაც უზრუნველყო გაერო-სთან ერთად ასეთი მაღალი დონის სამიტის ორგანიზება. გარემოს დაცვითი მიმართულებით ნამდვილად არსებობს გამოწვევები, არა მარტო სახელმწიფოებისთვის, არამედ საზოგადოებებისა და მოქალაქეებისთვის.ძალიან საინტერესო თემებს შევეხეთ ყველანი. წარმოდგენილი იყვნენ შუა აზიის ქვეყნების პირველი პირები და კავკასიის ქვეყნების, სამხრეთ კავკასიის პირველი პირები.სამიტი ორი დღე გაგრძელდება. ბრძანდებოდნენ ჩვენი მინისტრებიც, ჩვენი წარმომადგენლები, რომლებიც შემდეგ გააგრძელებენ ამ პროცესში მონაწილეობას. ჩვენ ჩვენი როლი გვაქვს, ძალიან ვუფრთხილდებით ჩვენს გარემოს. სამიტამდე დავათვალიერეთ პავილიონი, სადაც შუა აზიის ქვეყნები იყვნენ წარმოდგენილი ახალი პროექტებით, რომლებიც ასევე ძალიან საინტერესოა. მნიშვნელოვანია, რომ საქართველო მონაწილეობდა ასეთი მაღალი დონის სამიტში და იმედს ვიტოვებთ, რომ ეს პროცესი გაგრძელდება. ჩვენ ჩვენი როლი გვაქვს გარემოს დაცვის და ეკოლოგიის კუთხით. ჩემს სიტყვაშიც განვაცხადე, რომ ამ პროცესშიც ჩართული ვართ. ამ ყველაფერს თან სდევს ჩვენი გაცხადებული სამშვიდობო პოლიტიკა და სტაბილური მდგომარეობა, პარალელურ რეჟიმში ეკონომიკური ზრდა, რომელსაც ყველა ერთად აღნიშნავს, რადგან ეს პროცესი დაკავშირებულია ერთმანეთთან, ინკლუზიურია და ყველა ჩართულია ამ პროცესში. საომარი ვითარებებია გარშემო, დაძაბულობაა და ასეთი გამოწვევების ფონზე თითქოს რატომ უნდა გვაწუხებდეს ეკოლოგია, მაგრამ ეს ყველაფერი კავშირშია ჩვენს სამყაროსთან, ადამიანებთან, სახელმწიფოებთან, რასაც ძალიან გაგებით ეკიდებიან. ჩვენ ლიდერებთან შემდეგ ცალკეც გვქონდა ამ თემებზე საუბარი. ჩვენთვის მნიშვნელოვანია, რომ შუა აზიის ქვეყნებთან თითქმის ყველასთან ძალიან კარგი ურთიერთობა გვაქვს. გარდა ეკოლოგიისა, იცით, რომ შუა დერეფნის თემა ძალიან მიმზიდველია, მით უმეტეს, კიდევ უფრო მეტად იძენს თავის ფუნქციას. ყველამ იცის, რომ საქართველოს გარეშე ეს პროცესი წარმოუდგენელია და ამაში ყველანი ერთხმად ვთანხმდებით. ძალიან კარგი შესაძლებლობები აქვს ჩვენს ქვეყანას“, – განაცხადა მიხეილ ყაველაშვილმა.მიხეილ ყაველაშვილის განმარტებით, ყაზახეთის პრეზიდენტთან შეხვედრაზე შეთანხმდნენ, რომ უახლოეს მომავალში ყაზახეთი და საქართველო მოაწერენ ხელს სტრატეგიული პარტნიორობის დოკუმენტს.„ბოლოს მქონდა უკვე ყაზახეთის პრეზიდენტთან შეხვედრა, სადაც აღვნიშნეთ, რომ ჩვენი ტრადიციული მეგობრობა, რომელიც გვაკავშირებს სხვადასხვა სფეროში სავაჭრო, ეკონომიკის კუთხით, საჭიროებს სტრატეგიული პარტნიორობის დოკუმენტის შექმნას, უფრო სწორად, ხელმოწერას. ამაზე ჩვენ შევთანხმდით და უახლოეს მომავალში ყაზახეთი და საქართველო მოაწერენ ხელს სტრატეგიული პარტნიორობის დოკუმენტს, სადაც ყველა მიმართულებით იქნება გაწერილი ორივე ქვეყნის შესაძლებლობები და ურთიერთსარგებელზე დაფუძნებული პროცესები“, – აღნიშნა მიხეილ ყაველაშვილმა.

კანადა არ მისცემს აშშ-ს თავისუფალი ვაჭრობის შესახებ მოლაპარაკებების პირობების განსაზღვრის უფლებას, – ამის შესახებ კანადის პრემიერ-მინისტრმა, მარკ კარნიმ განაცხადა.„ეს არ არის შემთხვევა, როცა ერთი მხარე მოთხოვნებს აყენებს, მეორე კი მხოლოდ ითხოვს. ეს არ არის შემთხვევა, როდესაც შეერთებული შტატები კარნახობს პირობებს. ჩვენ გვაქვს მოლაპარაკება, შეგვიძლია, მივიდეთ ორმხრივად წარმატებულ შედეგამდე – ამას გარკვეული დრო დასჭირდება“, – განაცხადა კარნიმ.როგორც „ბიბისი“ წერს, კანადამ, აშშ-მა და მექსიკამ პირველი ივლისიდან სავაჭრო შეთანხმების სავალდებულო გადახედვა უნდა დაიწყონ. მაისში მექსიკა იწყებს ოფიციალურ ორმხრივ მოლაპარაკებებს აშშ-სთან. კანადასა და აშშ-ს შორის ოფიციალური მოლაპარაკებები ჯერ არ დაწყებულა, თუმცა სავაჭრო უწყებებს შორის კომუნიკაცია მიმდინარეობს.მარკ კარნიმ კანადა-აშშ-ის სავაჭრო ურთიერთობების შესახებ ახალი საკონსულტაციო კომიტეტი მოიწვია, რომლის პირველი შეხვედრა მომავალ კვირას არის დაგეგმილი. კვებეკის ყოფილმა პრემიერ-მინისტრმა, ჟან შარესტმა, რომელიც ახალი საკონსულტაციო კომიტეტის წევრია, განაცხადა, რომ აშშ ორმხრივი მოლაპარაკებების დაწყებამდე „კანადისგან ბევრ დათმობას“ ელოდება.

დონალდ ტრამპს ირანისთვის შეთანხმების მისაღწევად მკაფიო ვადა არ დაუწესებია, – ამის შესახებ თეთრი სახლის პრესსპიკერმა, ქეროლაინ ლევიტმა განაცხადა.ლევიტის თქმით, აშშ-ის პრეზიდენტი მზად არის, გარკვეული მოქნილობა გამოიჩინოს.„პრეზიდენტი ინარჩუნებს პოზიციას და გულუხვად სთავაზობს მცირე მოქნილობას რეჟიმს, რომელიც სრულად შელახულია“,- განაცხადა ლევიტმა. მისივე განცხადებით, ირანში ამჟამად მიმდინარეობს დაპირისპირება „პრაგმატისტებსა და მკაცრი ხაზის მხარდამჭერებს შორის“, ხოლო ტრამპს „ერთიანი პასუხის მიღება სურს“.ამასთან, მისივე თქმით, აშშ აგრძელებს ირანული გემებისა და პორტების საზღვაო ბლოკადას. ლევიტმა აღნიშნა, რომ ოპერაცია „ეფექტიანად და წარმატებით მიმდინარეობს“ და აშშ „სრულად ახრჩობს“ ირანის ეკონომიკას.ჟურნალისტის კითხვაზე, რამდენ ხანს უნდა იყვნენ ამერიკელები მზად ომის გასაგრძელებლად, რადგან ეს უკვე იმაზე მეტხანს გაგრძელდა, ვიდრე თავდაპირველად ითქვა, ლევიტმა უპასუხა, რომ საბოლოო ვადას ტრამპი განსაზღვრავს.„ის დაასრულებს ამას მაშინ, როცა ჩათვლის, რომ ეს შეესაბამება შეერთებული შტატებისა და ამერიკელი ხალხის საუკეთესო ინტერესებს”,- განაცხადა ლევიტმა.ლევიტმა ასევე ისაუბრა ირანული სახელმწიფო მედიის განცხადებებზე, სადაც უარყვეს, რომ თეირანმა ცეცხლის შეწყვეტის ვადის გახანგრძლივება მოითხოვა.„გირჩევდით, ფრთხილად მოეკიდოთ ყველაფერს, რასაც ისინი ამბობენ. რაც ვნახეთ, არის ის, რომ რასაც საჯაროდ ამბობენ, მნიშვნელოვნად განსხვავდება იმისგან, რასაც პირად მოლაპარაკებებში აღიარებენ შეერთებული შტატებისა და ჩვენი მომლაპარაკებელი გუნდის წინაშე”,- განაცხადა ლევიტმა.ამასთან, ლევიტმა აღნიშნა, რომ დონალდ ტრამპი ირანის მიერ ჰორმუზის სრუტეში ორი გემის დაკავებას ცეცხლის შეწყვეტის დარღვევად არ მიიჩნევს.„ეს არ იყო აშშ-ის გემები. ეს არ იყო ისრაელის გემები. ეს იყო ორი საერთაშორისო გემი. მათ არ აქვთ კონტროლი სრუტეზე. ეს არის მეკობრეობა, რასაც ჩვენ ვხედავთ და შეერთებული შტატების მიერ დაწესებული საზღვაო ბლოკადა კვლავ წარმოუდგენლად ეფექტურია“, – განაცხადა ლევიტმა.

ირანში მიმდინარე ომი ევროპის დასუსტებას იწყებს, – ამის შესახებ თურქეთის პრეზიდენტმა, რეჯეფ თაიფ ერდოღანმა გერმანიის პრეზიდენტთან, ფრანკ-ვალტერ შტაინმაიერთან სატელწფონო საუბრისას განაცხადა.„თუ ეს მიმართულება მშვიდობაზე ორიენტირებული მიდგომით არ შეიცვლება, კონფლიქტური პროცესის შედეგად მიყენებული ზიანი გაცილებით დიდი იქნება“, – განაცხადა ერდოღანმა.გერმანელ კოლეგასთან საუბრისას ერდოღანმა როგორც ირანში, ასევე უკრაინაში მიმდინარე ომებზე ისაუბრა და აღნიშნა, რომ ანკარა კონფლიქტების დასრულებას მოლაპარაკებების გზით ცდილობს.„თურქეთი ძალისხმევას არ იშურებს, რათა ომები მოლაპარაკებების გზით დასრულდეს და დამყარდეს ხანგრძლივი მშვიდობა”,- განაცხადა ერდოღანმა.

საქმე თუ აქამდე მივიდა, „ოპოზიციის ალიანსში“ როგორც შესვლასთან დაკავშირებით მივიღეთ ერთობლივი გადაწყვეტილება, ისე გამოსვლასთან დაკავშირებით მივიღებთ ერთობლივ გადაწყვეტილებას, – ამის შესახებ „ნაციონალური მოძრაობის“ თავმჯდომარემ, თინა ბოკუჩავამ განაცხადა.მისი თქმით, გადაწყვეტილება, რომ პარტია გამხდარიყო „ოპოზიციის ალიანსის“ წევრი, მიღებული იყო მიხეილ სააკაშვილის არა მხოლოდ ჩართულობით, არამედ ინიციატივით.„ჩვენი ამოცანა იყო ოპოზიციურად განწყობილი ადამიანების, საზოგადოების ჯანსაღი ნაწილის კონსოლიდაცია, გალვანიზაცია; იმ ადამიანების მოტივირება, რომლებსაც შესაძლოა, ძალიანაც არ მოსწონთ ივანიშვილი, ესმით, რომ ივანიშვილის გადარჩევით თუ გადაგდებით, რეჟიმის ჩამოშორებით, არანაირი ომი არ იქნება, ქვეყანა სწორი მიმართულებით წავა. ე.წ. არჩევნებში, მაგალითად, 20%-ზე მეტის მიმხრობა ვერ მოახერხეს, მათ შორის კახა კალაძისთვის, რომელიც მათი ყველაზე პოპულარული ფიგურაა. ჩვენი ამოცანაა საზოგადოების ჯანსაღი ნაწილის მობილიზაცია, კონსოლიდაცია, ანუ შემაგრება და გაერთიანება, ასევე გალვანიზაცია, რაც ნიშნავს, რომ შეიძლება იყო გაერთიანებული, მაგრამ მოქმედებისთვის არ იყო მზად. გალვანიზაცია ნიშნავს, რომ მოქმედებაშიც მოდიხარ, მყწობრში. მოქმედებაში რომ მოხვიდე, აუცილებელია, მათ შორის, გამარჯვების რწმენა, ნდობა, რომ შეგიძლია, გამარჯვება მოიტანო. სწორედ კონსოლიდაციისთვის, გალვანიზაციისთვის და გამარჯვების რწმენისთვის შევედით „ოპოზიციის ალიანსში“. ჩვენ როგორც შესვლასთან დაკავშირებით მივიღეთ ერთობლივი გადაწყვეტილება, ისე გამოსვალსთან დაკავშირებით მივიღებთ ერთობლივ გადაწყვეტილებას, თუ აქამდე მივიდა საქმე“, – განაცხადა თინა ბოკუჩავამ.კითხვაზე, „ოპოზიციის ალიანსის“ განცხადებაზე „ნაციონალური მოძრაობის“ ხელმოწერა არ იყო, თინა ბოკუჩავა პასუხობს: „არ იყო და ვერც იქნებოდა. „ნაციონალური მოძრაობა“ ვერასდროს იქნება ისეთი გაერთიანების ნაწილი, რომელიც ანტიმიშას პოზიციებს ითავსებს ან ასხივებს.შეგახსენებთ, საქართველოს ყოფილმა პრეზიდენტმა, მიხეილ სააკაშვილმა 18 აპრილს სოციალურ ქსელში დაწერა: „ჩვენი გზა ვერ იქნება უნგრული და უნდა იყოს ქართული, ქართველების გზა არის რევოლუცია. ზიხართ თბილ ტელესტუდიებში და გიკვირთ, ხალხი რატომ არ მოდის რუსთაველზე“.აღნიშნულ განცხადებას გამოეხმაურა „ოპოზიციის ალიანსში“ შემავალი რვა პარტია: „არცერთ პარტიას არ აქვს უფლება, თავი გამოაცხადოს საპროტესტო მოძრაობის ერთადერთ წარმომადგენლად ან ერთპარტიულ თუ ერთპიროვნულ ლიდერად“.მიხეილ სააკაშვილმა 21 აპრილს კიდევ ერთი ფეისბუქპოსტი გამოაქვეყნა, სადაც აღნიშნა: „მეგობრებო, დროა, ჩემი კომპლექსისგან გათავისუფლდეთ და საქმეზე კონცენტრირდეთ. რამე თუ არ გამოგდით, კი არ უნდა თქვათ, მიშა გვიშლის ხელსო, არამედ უკეთესად იმუშაოთ“.ცნობისთვის, ცხრა ოპოზიციურმა პარტიამ 2 მარტს „ოპოზიციური ალიანსის“ შექმნის შესახებ განაცხადა, რომელშიც შედიან: „ახალი“, „გირჩი“, „დროა“, „ევროპული საქართველო“, „ნაციონალური მოძრაობა“, „ეროვნულ-დემოკრატიული პარტია“, „თავისუფლების მოედანი“, „სტრატეგია აღმაშენებელი“, „ფედერალისტები“.