ზაზა შათირიშვილი: სინამდვილეში, ტრამპი ზუსტად ისევეა იძულებული, დაექვემდებაროს გლობალურ ომის პარტიას და “დიფ სთეითს”, როგორც ბაიდენი.

ბაიდენის ოთხწლედის დროს, “დიფ სთეითი”, პრაქტიკულად, საკუთარი თავის ლეგალიზებას ცდილობდა. ყველამ იცოდა, რომ ამერიკას არა ბაიდენი, არამედ არაფორმალური ძალა მართავდა, – ამის შესახებ ფილოსოფოს ზაზა შათირიშვილის მიერ გავრცელებულ წერილში ვკითხულობთ.

როგორც შათირიშვილი წერს, დონალდ ტრამპი ისევეა იძულებული, “დიფ სთეითს” დაექვემდებაროს, როგორც ბაიდენი და აღნიშნავს, რომ ვინც თავის დროზე პრეზიდენტ კენედის მკვლელობა დაუკვეთა, მისმა შვილიშვილებმა დაუკვეთეს საპრეზიდენტო კამპანიისას ტრამპის მკვლელობა.

“ჩავარდნილი სცენარისა და ახალი რეალობის პირობებში კი, გლობალური ომის პარტია დადგა აუცილებლობის წინაშე, აშშ კვლავ ზესახელმწიფოდ წარმოაჩინოს, რომელსაც არა მის მიერ მართული „მძინარე ჯო“, არამედ დემოკრატიულად არჩეული ტრამპი მართავს. პირველადი სცენარის ჩავარდნის პირობებში, გლობალური ომის პარტია შეეცდება, შედეგი ტრადიციული მეთოდით, ამერიკის ხელით მიიღოს და ერთპოლუსიანი სამყარო ზესახელმწიფოს ეგიდით ჩამოაყალიბოს. ამისათვის კი, საუკეთესო საშუალება იმ ყალბი აღქმის შექმნაა, რომ ტრამპი “დიფ სთეითს” ამარცხებს.

სინამდვილეში, ტრამპი ზუსტად ისევეა იძულებული, დაექვემდებაროს გლობალურ ომის პარტიას და “დიფ სთეითს”, როგორც ბაიდენი. ვინც თავის დროზე დაუკვეთა კენედის მკვლელობა, მისმა შვილიშვილებმა დაუკვეთეს საპრეზიდენტო კამპანიის დროს ტრამპის მკვლელობა. მართალია, მიზანს სრულად ვერ მიაღწიეს, თუმცა, ამ უკანასკნელს მკაფიოდ მიანიშნეს, თუ ვინ არის “სახლში უფროსი”, – წერს შათირიშვილი.

ის ასევე აღნიშნავს, რომ ფუჭია იმის მტკიცება, რომ “დიფ სთეითი” ბაიდენი და მისი ადმინისტრაციის ცალკეული წარმომადგენლები იყვნენ. შათირიშვილის თქმით, იგივე შეიძლება ითქვას USAID-ზე, NED-ზე, “ამერიკის ხმასა” და “რადიო თავისუფლებაზეც”, რომლებიც მხოლოდ “დიფ სთეითის” ინსტრუმენტების ფუნქციას ასრულებდნენ.

“შესაბამისად, ტრამპის სიტყვები “ან ამერიკა გაანადგურებს დიფ სთეითს, ან დიფ სთეითი გაანადგურებს ამერიკას” ისეთივე ფუჭია, როგორც იმის მტკიცება, რომ „დიფ სთეითი“, თურმე, ბაიდენი, ბლინკენი და სალივანი ყოფილან. რეალურად, ეს ადამიანები არა მმართველები, არამედ მართულები და “დიფ სთეითის” დაკვეთების უბრალო შემსრულებლები იყვნენ. იგივე უნდა ითქვას USAID-ზე, NED-ზე, “ამერიკის ხმაზე”, “რადიო თავისუფლებაზე” და სხვა ინსტიტუტებზე, რომლებიც “დიფ სთეითს” კი არ განეკუთვნებოდნენ, არამედ მისი ინსტრუმენტების ფუნქციას ასრულებდნენ. ომის ბაიდენისთვის, ხოლო რევოლუციების USAID-ისა და NED-ისთვის გადაბრალება მხოლოდ “დიფ სთეითის”, ანუ რეალური მმართველის მიჩქმალვას და მის რებრენდინგს ემსახურება”, – წერს ზაზა შათირიშვილი.