ექსკლუზივი-მიცვალებულთა ქალაქი

საქართველოსა და რუმინეთის დედაქალაქებს შორის პირდაპირი რეგულარული საჰაერო მიმოსვლა განახლდება.საქართველოს აეროპორტების გაერთიანების ინფორმაციით, ფრენებს რუმინული ავიაკომპანია DAN AIR-ი, ბუქარესტი-თბილისი-ბუქარესტის საჰაერო ხაზზე შეასრულებს.„ავიაკომპანიის მიერ, სამოქალაქო ავიაციის სააგენტოში წარმოდგენილი განაცხადის შესაბამისად, ავიაკომპანია ფრენებს განახორციელებს პირველი ივლისიდან 24 ოქტომბრამდე, კვირაში ორი სიხშირით ყოველ სამშაბათსა და შაბათს.საქართველოს ეკონომიკისა და მდგრადი განვითარების სამინისტროს სსიპ სამოქალაქო ავიაციის სააგენტომ ავიაკომპანიას ფრენების შესრულებისათვის აუცილებელი ნებართვა 9 ივნისს მიანიჭა“, – აღნიშნულია ინფორმაციაში.

ყველანაირად შევეცდები, რომ ირანსა და საქართველოს შორის საქართველოსთვის უარყოფითი სავაჭრო ბალანსი თანაბარი გახდეს, რომ საქართველოდანაც ბევრი პროდუქცია შევიდეს ირანულ ბაზარზე, – ამის შესახებ საქართველოში ირანის ელჩმა, სეიედ ალი მოჯანიმ ირანის საელჩოში გამართულ პრესკონფერენციაზე განაცხადა.კითხვაზე, როგორი სახის თანამშრომლობას გეგმავს ირანის საქართველოსთან მომდევნო ექვსი თვის განმავლობაში, ირანელმა დიპლომატმა უპასუხა, რომ თანამშრომლობა და სამომავლო პროგრამები დამოკიდებულია იმაზე, როგორ განვითარდება მოვლენები, შეჩერდება თუ არ ომი ირანის წინააღმდეგ.„ირანი 180 დღეზე მეტია, აგრძელებს წინააღმდეგობას და იბრძვის აგრესორების წინააღმდეგ. გუშინ, როდესაც ამერიკამ იერიში მიიტანა ირანის ერთ-ერთ პორტში არსებულ წყლის რეზერვუარზე, ჩვენ ამის შემდეგ საავიაციო თავდასხმები განვახორციელეთ რეგიონის ქვეყნებში არსებულ ამერიკის სამხედრო ბაზებზე, ავიაბაზაზე და ისიც ცნობილია, რამდენი სამხედრო თვითმფრინავი გამოვიდა მწყობრიდან. ეს ომი თუ გაგრძელდება, საელჩოს შემდგომი მუშაობა გარკვეულწილად დამოკიდებული იქნება ამ პროცესზე. თუმცა, ეს არანაირ წინააღმდეგობაში არ მოდის საელჩოს ჩვეულებრივ მუშაობასთან. მე და საელჩოს თანამშრომლები გავაგრძელებთ მუშაობას იმ მიმართულებით, რომ ხელი შევუწყოთ ორი ქვეყნის ურთიერთობების განვითარებას, იქნება ეს სავაჭრო ურთიერთობები, ეკონომიკური ურთიერთობები, კულტურის მიმართულებით თუ ტურიზმის სფეროში თანამშრომლობა. ბატონ პრეზიდენტს როდესაც გადავეცი რწმუნებათა სიგელი, მას განვუცხადე, რა პრიორიტეტები მაქვს დასახული. ეს პრიორიტეტებია: ეკონომიკური და სავაჭრო ურთიერთობების განვითარება, ტრანზიტული, სამეცნიერო და კულტურის სფეროში თანამშრომლობა. რაც შეეხება პოლიტიკურ ურთიერთობებს, ეს ჩვეულებრივ გაგრძელდება“, – აღნიშნა ალი მოჯანიმ.ირანის ელჩის განცხადებით, სავაჭრო მიმართულებით არის გარკვეული გამოწვევები, რადგან, სამწუხაროდ, სავაჭრო ბალანსი ორ ქვეყანას შორის არ არის თანაბარი და საქართველოსთვის ყოველთვის უარყოფითია.„მე ყველანაირად შევეცდები, სავაჭრო ბალანსი თანაბარი გახდეს, რომ საქართველოდანაც ბევრი პროდუქცია შევიდეს ირანულ ბაზარზე. ჩვენ ძალიან აქტიურად ვთანამშრომლობთ გადაზიდვების სფეროში. გასული წლის განმავლობაში 2 ათასზე მეტმა ქართველმა გადამზიდავმა გამოიყენა ირანის ტერიტორია სხვადასხვა ქვეყნიდან ტვირთების გადასაზიდად. ჩვენ მივესალმებით ამ ფაქტს და ხელს შევუწყობთ, რომ უფრო მეტად იყოს გამოყენებული ირანული პოტენციალი, რათა ქართველმა გადამზიდავებმა უფრო მეტი ტვირთის გადაზიდვა შეძლონ. საზღვაო გადაზიდვები როდესაც გართულებულია, გამომდინარე უკრაინის ომიდან, შავ ზღვაში არსებული მდგომარეობა, ასევე, სპარსეთის ყურე და ჰორმუზის სრუტე, განსაკუთრებულ ყურადღებას იქცევს სახმელეთო გადაზიდვები. ამ მხრივ ჩვენ უნდა ვიყოთ მზად და ხელი შევუწყოთ სახმელეთო გადაზიდვების განვითარებას“, – აღნიშნა ირანის ელჩმა.სეიედ ალი მოჯანიმ ასევე ისაუბრა ახალი დერეფნების განვითარების მნიშვნელობაზე.„ერთ-ერთი მნიშვნელოვანი დერეფანი, რაც გამოიკვეთა, არის ინდოეთის მიმართულება. შექმნილია სამმხრივი სამუშაო ჯგუფი: ინდოეთი, ირანი, სომხეთი და ეს სამუშაო ჯგუფი მუდმივ რეჟიმში მუშაობს და ამ ჯგუფის მუშაობა საკმაოდ უწყობს ხელს სომხეთის ეკონომიკის განვითარებას. ინდოეთი არის ძალიან დიდი, ერთ მილიარდიანი ბაზარი. ასევე უნდა გავითვალისწინოთ 40-მილიონიანი ერაყი, რომელიც მალე, შესაძლოა, 80 მილიონი გახდეს და ირანული 95-მილიონიანი ბაზარი. შესაბამისად, როდესაც ჰორმუზის სრუტე არის დახურული, სპარსეთის ყურის ქვეყნებს სხვა ალტერნატიული გზები თითქმის არ აქვთ, რომ მათთვის საჭირო პროდუქცია მიიღონ. ერთ-ერთი კარგი შესაძლებლობა აქვს საქართველოს, რომ მისი გავლით მოხდეს მათთვის ტვირთების მიწოდება. ასე რომ, მომდევნო 180 დღე, შეიძლება ითქვას, ძალიან დატვირთული გვექნება იქიდან გამომდინარე, რომ აქტიურად ვიმუშავებთ ორ ქვეყანას შორის სავაჭრო ბალანსის გათანაბრებისთვის“, – აღნიშნა ირანის ელჩმა.ამასთან, როგორც ელჩმა აღნიშნა, ირანი ყოველთვის მხარს უჭერს საქართველოს სუვერენიტეტსა და ტერიტორიულ მთლიანობას.„რატომ არ დავუჭირეთ მხარი გაერო-ს რეზოლუციას აფხაზეთში და სამხრეთ ოსეთში ლტოლვილების დაბრუნებასთან დაკავშირებით? მოგეხსენებათ, რომ ჩვენ ყოველთვის მხარს ვუჭერთ საქართველოს სუვერენიტეტს და ტერიტორიულ მთლიანობას. ჩვენ კენჭისყრაში საერთოდ არ მიგვიღია მონაწილეობა და ეს განსხვავებული პოზიციაა, ვიდრე მხარის არდაჭერა. არის, ასე ვთქვათ, ნაცვალგების პრინციპი. საქართველოს მხარე გარკვეულ რეზოლუციებზე კენჭისყრაში არ მონაწილეობს და ანალოგიურად, ამ კენჭისყრის დროს ჩვენ არ ვიღებთ მონაწილეობას. ჩვენ სხვადასხვა დროს აფხაზეთიდან და სხვა რეგიონიდან ქართველ ლტოლვილებს ყოველთვის დავეხმარეთ“, – განაცხადა ირანის ელჩმა.

მაკა ბოჭორიშვილი ჩავა იმით, რომ კიდევ ახალი პოლიტიკური პატიმრები ეყოლებათ თუ ევროპა კარგად არ მოიქცევა, სხვა რით უნდა ჩავიდეს მაკა ბოჭორიშვილი, თავისი ძვირიანი ტანსაცმლის გარდა? - ამის შესახებ „კოალიცია ცვლილებისთვის“ ერთ-ერთმა ლიდერმა ნიკა გვარამიამ განაცხადა.მისი თქმით, თუ საქართველოს უვიზო მიმოსვლა შეუჩერდება, ეს ქართველებისთვის დიდი პრობლემა იქნება.„რეკომენდაციები მარტო დემოკრატიას და ადამიანის უფლებებს ხომ არ ეხება? ტექნიკური თვალსაზრისით „ქართული ოცნება“ გასულია რეალობიდან. ევროპას კი არ ვჭირდებით ჩვენ, არამედ ჩვენ გვჭირდება ევროპა, უვიზო მიმოსვლის თვალსაზრისით.ჩვენ თუ რეკომენდაციებს არ ვასრულებთ, ევროპას დარდი რატომ უნდა ჰქონდეს საქართველოს მოქალაქე ევროპაში ადვილად ჩავა თუ არა? ჩვენ უნდა გვქონდეს იმის დარდი და ყველაფერს უნდა ვაკეთებდეთ, რომ ეს არ დავკარგოთ.ევროპული ბიუროკრატიის იმედი მაქვს, რომელიც ნელა მუშაობს, რომ ვერ მოასწრებს უვიზო რეჟიმის შეჩერებას, ვიდრე ეს ხელისუფლება არის.ეს ყველაფერი პოლიტპატიმრებისა და ტყვეების საქმეებია და ეს ერთიანი სავაჭრო ლოტია, რომელიც ბიძინა ივანიშვილს გამოაქვს და მაგიდაზე „დაახორაგებს“, რომ მოლაპარაკებები გაიმარტივოს. „შარლ მიშელი 2“ არ გამოვა, პოლიტპატიმრების გათავისუფლების სანაცვლოდ, ბიძინა ივანიშვილი ხელისუფლებაში ყოფნის მუდმივს უფლებას ვერ მოიპოვებს",- განაცხადა ნიკა გვარამიამ.ცნობისთვის, საქართველოს საგარეო უწყების ინფორმაციით, სავიზო რეგულაციის თანახმად, შეჩერების მექანიზმის მოქმედების პერიოდში, ევროკომისიამ შესაბამის მესამე ქვეყანასთან უნდა დაიწყოს დიალოგი და 11 ივნისს საქართველოს მხარეს და ევროკომისიას შორის დიალოგის პირველი შეხვედრა გაიმართება.აღნიშნულ შეხვედრასთან დაკავშირებით განმარტება გააკეთა ევროკომისიის პრესსპიკერმა მარკუს ლამერტმა.„2026 წლის მარტში კომისიამ თავდაპირველი 12 თვის ვადით შეუჩერა უვიზო მიმოსვლა დიპლომატიური და სამსახურებრივი პასპორტების მფლობელ საქართველოს მოქალაქეებს. ეს მოხდა მას შემდეგ, რაც წევრმა ქვეყნებმა ამასთან დაკავშირებით შეთანხმებას მიაღწიეს. როდესაც უვიზო მიმოსვლის შესახებ შეთანხმება ჩერდება, კომისია შესაბამის მესამე ქვეყანასთან იწყებს პროცესს, რომელსაც გაძლიერებულ დიალოგს ვუწოდებთ. მისი მიზანია იმ გარემოებების გამოსწორება, რომელმაც შეჩერება გამოიწვია. ამ კონტექსტში, 11 ივნისს გაიმართება პირველი შეხვედრა ევროკომისიასა და საქართველოს ოფიციალური პირების დელეგაციას შორის“, - აღნიშნა ევროკომისიის პრესსპიკერმა.

სააკაშვილს ხისტი მოთხოვნები აქვს, ყველას დამორჩილებასა და დაქვემდებარებას ითხოვს. ის იგივეა, უბრალოდ, ახლა მოქმედებისთვის ბერკეტები არ აქვს, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.ვოლსკის კითხვა დაუსვეს „ნაციონალური მოძრაობის“ შესახებ საქართველოს ყოფილი პრეზიდენტის, მიხეილ სააკაშვილის გუშინდელ განცხადებაზე.„ნიკა გვარამია ცხარე ცრემლებით ტიროდა, რომ მიხეილ სააკაშვილს დემენცია სჭირდა, მის ჯანმრთელობას საფრთხე ემუქრებოდა. სერიოზული კითხვა ჩნდება, ოპოზიციაში რამდენად სერიოზულია დაპირისპირება. მით უმეტეს, საუბარია, ერთი სულისა და საერთო წარსულის, აწმყოს მქონე ადამიანებზე. შესაძლოა, აქციებზე სააკაშვილის ფოტოების გამოჩენამ ის ადამიანები დააფრთხო. შეიძლება, ბევრს არ უნდა, რომ სააკაშვილის იმ წარსულთან იყოს დაკავშირებული, როცა ქვეყნის ტერიტორიები დაიკარგა, ათასობით ადამიანი გაუბედურდა და სადაც ადამიანებს ქუჩაში კლავდნენ, მათ შორის ახალგაზრდებს. სააკაშვილს ხისტი მოთხოვნები აქვს, ყველას დამორჩილებასა და დაქვემდებარებას ითხოვს. შეიძლება, ეს სხვებისთვის ფაქტორი იყოს, მაგრამ ეს ადამიანები ერთი მიზნისა და ამოცანების მქონე არიან. შეიძლება, ერთმანეთს იმაში ეჯიბრებიან, ვის უფრო მეტი დესტრუქციის ძალა აქვს. მათი მიზანია, პატრონებს დაანახონ, აქ ლიდერი ვინ არის და ასევე საზოგადოების ნაწილი მიიმხრონ ექსტრემისტულ პროცესებში. სააკაშვილისგან ახალი რაც ვიხილეთ, არის ვარცხნილობა და ნანუკა ჟორჟოლიანი, რომელიც ისედაც „ნაცმოძრაობის“ შემადგენელ ნაწილად განიხილებოდა. სააკაშვილი იგივეა, უბრალოდ, ახლა მოქმედებისთვის ბერკეტები არ აქვს“, – განაცხადა გია ვოლსკიმ.ცნობისთვის, საქართველოს ყოფილმა პრეზიდენტმა, მიხეილ სააკაშვილმა განაცხადა, რომ „ერთიან ნაციონალურ მოძრაობაში“ რადიკალურ ცვლილებებს გეგმავს.„მე არა მხოლოდ ვარცხნილობა შევიცვალე, არამედ ვგეგმავ რადიკალურ ცვლილებებს „ნაციონალურ მოძრაობაში“, რეფორმირებისთვის შემოვიერთებთ ბრწყინვალე ნანუკა ჟორჟოლიანს“, – დაწერა სააკაშვილმა სოციალურ ქსელში.

ის, რომ ჩვენი ქვეყანა ახერხებს მსოფლიოს ზესახელმწიფოს უძლიერესი არმიის შეკავებას ჰორმუზის სრუტეში, ვფიქრობ, მრავლისმეტყველი ფაქტია, – ასე უპასუხა საქართველოში ირანის ელჩმა, სეიედ ალი მოჯანიმ შეკითხვას, რა მექანიზმები აქვს თეირანს სამხრეთ კავკასიაში „ტრამპის მარშრუტის“ განხორციელების წინააღმდეგ?ირანელი დიპლომატის მტკიცებით, თეირანი სამხრეთ კავკასიაში საზღვრების შეცვლის ნებისმიერ მცდელობას ეწინააღმდეგება.„ირანი მხარს უჭერს სამხრეთ კავკასიის განვითარებას, რამდენადაც ჩვენ მიგვაჩნია, რომ კავკასიის ქვეყნები არიან ერთგვარი ურთიერთშემავსებლები და ჩვენი ქვეყნების ეკონომიკები ერთმანეთს ეხმარებიან და ავსებენ. ჩვენ ცალსახად განვაცხადეთ, რომ არ დავუშვებთ გეოგრაფიული საზღვრების ცვლილებას და არ აქვს მნიშვნელობა, ეს გეოგრაფიული ცვლილება სად იქნება, საქართველოში, სომხეთში თუ აზერბაიჯანში. მოგეხსენებათ, ირანის ისლამური რესპუბლიკა, თავისი პოლიტიკიდან გამომდინარე, მხარს უჭერს საქართველოს სუვერენიტეტს და ტერიტორიულ მთლიანობას და ესეც მეტყველებს იმ ფაქტზე, რომ ჩვენ არ მიგვაჩნია სწორად და არ დავუშვებთ რეგიონში საზღვრების ცვლილებას. ის, რომ ჩვენი ქვეყანა ახერხებს მსოფლიოს ზესახელმწიფოს უძლიერესი არმიის შეკავებას ჰორმუზის სრუტეში, ვფიქრობ, მრავლისმეტყველი ფაქტია. ზოგადად მიგვაჩნია, რომ თავად რეგიონის ქვეყნების გადასაწყვეტია, რომ მათ უნდა უზრუნველყონ თავიანთი სუვერენიტეტი, დაიცვან ტერიტორიული მთლიანობა და თავიანთი ეკონომიკური განვითარება. ირანი არის საკმაოდ დიდი ფართობის მქონე მეზობელი ქვეყანა კავკასიის ქვეყნებისთვის. საზღვრების და გეოგრაფიის ნებისმიერი ცვლილება არის საფრთხე ჩვენი უსაფრთხოებისთვის და, ბუნებრივია, ირანი ამას არ დაუშვებს“, – აღნიშნა სეიედ ალი მოჯანიმ.სეიედ ალი მოჯანიმ ასევე განაცხადა, რომ, სამწუხაროდ, ბოლო ორი ომის განმავლობაში მეზობელი ქვეყნების საჰაერო სივრცე და ხმელეთი აგრესორის სამხედრო ძალების, სადაზვერვო სტრუქტურებისა და ლოგისტიკური ინფრასტრუქტურის თავმოყრის ადგილად იქცა.„აშშ, ქვეყანა, რომელიც დაუსრულებელ ომებშია ჩართული, თუ ფიქრობს, რომ სამოქალაქო ობიექტების დაბომბვა განსაზღვრავს შედეგს, ირანი დაანახებს, რომ მშვიდობის გეოგრაფიას რაკეტები მოხაზავენ“, – აღნიშნა ელჩმა.ამასთან, ალი მოჯანის განცხადებით, ამ ვითარებაში ირანს აღარ სურს, შემწყნარებლობისა და თავშეკავების პოლიტიკის ფარგლებში დაუშვას, რომ მისი სამეზობლო გარემო გადაიქცეს პლაცდარმად, საიდანაც დარტყმები განხორციელდება ირანის სუვერენიტეტისა და ტერიტორიული მთლიანობის წინააღმდეგ.„სწორედ ამიტომ, ირანმა დიპლომატიური გზავნილების მეშვეობით მსოფლიოს მრავალ ქვეყანას, მათ შორის მეზობელი რეგიონის ფარგლებს გარეთ მდებარე სახელმწიფოებსაც, მკაფიოდ განუცხადა: „ირანის მტრების მხარდაჭერა და მათთვის მოქმედების შესაძლებლობების შექმნა უპასუხოდ არ დარჩება“. შემთხვევითი არ ყოფილა, რომ ამ გზავნილის მიღების შემდეგ ევროპის ზოგიერთმა ქვეყანამ საკუთარი საჰაერო სივრცე ამერიკის შეერთებული შტატებისთვის დახურა და მკაფიოდ და კატეგორიულად განაცხადა, რომ აშშ-ის სამხედრო ოპერაციებში მონაწილეობას არ მიიღებდა. ქვეყნებმა, რომლებსაც ძლიერი ეროვნული არმიები ჰყავთ, ასევე უარი განაცხადეს საკუთარი აკვატორიის, ტერიტორიისა და საჰაერო სივრცის გამოყენების შესაძლებლობის მიცემაზე აგრესორი სახელმწიფოებისთვის. გვინდა, ამ მეზობელ სახელმწიფოებს პირდაპირ შევახსენოთ: აგრესორების ის ბაზები, რომლებიც მათ ტერიტორიაზე მდებარეობს და საფრთხეს უქმნის ჩვენს უსაფრთხოებას, ირანის ისლამური რესპუბლიკის მიერ ლეგიტიმური თავდაცვის უფლების ფარგლებში სამიზნე გახდება. დღევანდელი ირანი საკუთარ ეროვნულ ძალას ეყრდნობა. თავისი მრავალსაუკუნოვანი ისტორიის განმავლობაში ირანს არასოდეს განუხორციელებია აგრესია მეზობელი ქვეყნების ტერიტორიის წინააღმდეგ. ირანის ისლამურ რესპუბლიკას არც ჰქონია და არც აქვს იმპერიად ქცევის სურვილი“, – აღნიშნა საქართველოში ირანის ელჩმა.