ექსკლუზივი-მიცვალებულთა ქალაქი

ცენტრალური კრიმინალური პოლიციის დეპარტამენტის დირექტორის დავით კიკნაძის ინფორმაციით, შინაგან საქმეთა სამინისტრომ „ქურდულ სამყაროსთან” კავშირში მყოფი 29 პირი დააკავა, ხოლო 3 პირს ბრალი დაუსწრებლად წარედგინება, მათ შორის ერთი ”კანონიერი ქურდია”.მისივე თქმით, ბრალდებული პირები, პირადი მატერიალური სარგებლის მიღების მიზნით, აქტიურად ერთვებოდნენ მოქალაქეებს შორის არსებული ფინანსური დავების გადაწყვეტაში. აღნიშნულ პროცესში, კრიმინალური გავლენების გაძლიერებისა და მოდავე მხარეებზე ფსიქოლოგიური ზეწოლის მოხდენის მიზნით, ჩართული იყო საზღვარგარეთ მცხოვრები ე.წ. კანონიერი ქურდი ბესიკ ჯაფარიძე.“შინაგან საქმეთა სამინისტროს ცენტრალური კრიმინალური პოლიციის დეპარტამენტის თანამშრომლებმა, გენერალურ პროკურატურასთან ერთად, ბოლო 24 საათში, ქვეყნის მასშტაბით კომპლექსურად ჩატარებული ოპერატიული ღონისძიებებისა და საგამოძიებო მოქმედებების შედეგად, მოსამართლის განჩინების საფუძველზე, „ქურდულ სამყაროსთან“ კავშირში მყოფი 29 პირი დააკავეს, ხოლო 3 პირს ბრალი დაუსწრებლად წარედგინება, მათ შორის ერთი საზღვარგარეთ მყოფი „კანონიერი ქურდია”.გამოძიებით დადგინდა, რომ სისხლის სამართლის დანაშაულში ბრალდებული პირები, პირადი მატერიალური სარგებლის მიღების მიზნით, აქტიურად ერთვებოდნენ მოქალაქეებს შორის არსებული ფინანსური დავების გადაწყვეტაში.აღნიშნულ პროცესში, კრიმინალური გავლენების გაძლიერებისა და მოდავე მხარეებზე ფსიქოლოგიური ზეწოლის მოხდენის მიზნით, ჩართული იყო საზღვარგარეთ მცხოვრები ე.წ. კანონიერი ქურდი ბესიკ ჯაფარიძე. ბრალდებულები, საზღვარგარეთ მყოფ კრიმინალურ ავტორიტეტთან შეთანხმებით, მოდავე მხარეებთან ერთად პერიოდულად აწყობდნენ ე.წ. ქურდულ გარჩევებს.დისტანციური კომუნიკაციისა და პირადი შეხვედრების დროს, ბესიკ ჯაფარიძე კრიმინალური სამყაროს წესებისა და ე.წ. „ქურდული ტრადიციების“ შესაბამისად იღებდა საბოლოო გადაწყვეტილებებს, რომელთა საფუძველზეც ერთ-ერთ მხარეს მეორის სასარგებლოდ სოლიდური თანხის გადახდა ეკისრებოდა.გამოძიებით ასევე, დგინდება რომ დაკისრებული ვალდებულებების შეუსრულებლობის ან კონკრეტული ვადების დარღვევის შემთხვევაში, ბრალდებულები მოქალაქეებსა და მათი ოჯახის წევრებს ფიზიკური ანგარიშსწორებით, ჯანმრთელობის დაზიანებითა და სიცოცხლის მოსპობით ემუქრებოდნენ.სამართალდამცველების მიერ ჩატარებული ჩხრეკის შედეგად, ნივთმტკიცებად ამოღებულია ბრალდებულების მობილური ტელეფონები და კომპიუტერული ტექნიკა, რომელთა საშუალებითაც ისინი ერთმანეთს და უცხოეთში მცხოვრებ ე.წ. კრიმინალურ ავტორიტეტს უკავშირდებოდნენ.ასევე, პოლიციის მიერ, ჩხრეკის შედეგად, ნივთმტკიცებად ამოღებულია უკანონოდ შეძენილი ცეცხლსასროლი იარაღები და საბრძოლო მასალა.გამოძიება საქართველოს სისხლის სამართლის კოდექსის 223-ე პრიმა, 223-ე ტერცია, 223-ე კვარტა და 236-ე მუხლებით მიმდინარეობს, რაც 15 წლამდე ვადით თავისუფლების აღკვეთას ითვალისწინებს.საქართველოს შინაგან საქმეთა სამინისტროსთვის ერთ-ერთ უმთავრეს პრიორიტეტს წარმოადგენს ორგანიზებულ დანაშაულთან, მათ შორის ე.წ. ქურდულ სამყაროსთან დაკავშირებული დანაშაულებრივი საქმიანობის წინააღმდეგ ბრძოლა და ნებისმიერი პირი, რომელიც რაიმე ფორმით ჩართული იქნება აღნიშნულ დანაშაულებრივ სქემაში კანონის სრული სიმკაცრით დაისჯება“, - აღნიშნა დავით კიკნაძემ.

„ქართული ოცნება“ კონფერენციაზე დესტრუქციისთვის იყო ჩასული, - ამის შესახებ პოლიტიკოსი დიმიტრი ცქიტიშვილი საუბრობს. მისი თქმით, განსხვავებით "ოცნებისგან", სხვა ქვეყნები ევროკავშირში ინტეგრაციისთვის მოტივირებულები არიან, ივანიშვილის ხელისუფლებამ კი ქვეყანა იზოლაციაში მოაქცია.  თითოეულ ამ ქვეყანას თავისი გამოწვევები აქვს, თავისი პრობლემები აქვს გაწევრიანების გზაზე, მაგრამ ისინი ყველანი მოტივირებულები არიან და რეალური სურვილი აქვთ, რომ გაწევრიანდნენ ევროკავშირში განსხვავებით, სამწუხაროდ, "ქართული ოცნებისგან", რომელმაც ქვეყანა მთლიანად მოაქცია იზოლაციაში და არც კი ცდილობს და რეალურად, დესტრუქციისთვის იყო იქ აშკარად ჩასული, ეს დესტრუქცია მის გამოსვლებში ძალიან ნათელი იყო, თუმცა ამ შეხვედრას და ამ ფორმატს სულ სხვა დანიშნულება ჰქონდა. როგორც იცით, ერთ-ერთი ინიციატივა უკრაინას ეკუთვნის და სულ სხვა სულისკვეთება იყო დაგეგმილი და ეს დაფიქსირდა კიდეც, უბრალოდ, "ქართული ოცნება" არის დესტრუქციული და არა მხოლოდ ევროკავშირს, არამედ ყველა გაწევრიანების მოსურნე ქვეყნების მიმართ, - ამბობს დიმიტრი ცქიტიშვილი.

ფინანსთა სამინისტროს შემოსავლების სამსახურის საბაჟო გამშვებ პუნქტებზე „სადახლო - საავტომობილო“ და „ნინოწმინდა“, უცხო ქვეყნიდან შემოსული, 22 290 ცალი მოჭრილი ვარდებით დატვირთული ორი ავტოსატრანსპორტო საშუალება იქნა შეჩერებული.სასაზღვრო-საკარანტინო კონტროლის პროცედურების განხორციელებისას, საქართველოს ფიტოსანიტარიულ მოთხოვნებთან შეუსაბამობა კერძოდ, მცენარეებზე ცოცხალი მავნე ორგანიზმები და მათ მიერ გამოწვეული დაზიანებები გამოვლინდა.საქართველოს მთავრობის 2019 წლის 20 სექტემბრის №463 დადგენილების შესაბამისად, აღნიშნული საქონელი ექსპორტიორ ქვეყანაში გაბრუნებას დაექვემდებარა.

9 ივლისიდან, თბილისის მერიის ორგანიზებითა და ტელეკომპანია „რუსთავი 2“-თან თანამშრომლობით, პირველი რესპუბლიკის მოედანზე მსოფლიო ჩემპიონატის საფეხბურთო მატჩების საჯარო ჩვენება მოეწყობა.როგორც დედაქალაქის მერმა კახა კალაძემ თბილისის მუნიციპალიტეტის მთავრობის სხდომაზე აღნიშნა, ტერიტორიაზე მისულ გულშემატკივრებს მატჩების ჩვენებამდე სხვადასხვა აქტივობა დახვდება.„სასიამოვნო სიახლე გვაქვს ფეხბურთის მოყვარულებისთვის. ჩვენ რამდენიმე მთავრობის სხდომის წინ უკვე ვთქვით, რომ პირველი რესპუბლიკის მოედანზე დავამონტაჟებდით დიდ ეკრანს, სადაც გულშემატკივრებს მსოფლიო ჩემპიონატის მატჩების ნახვა შეეძლებოდათ. თბილისიის მერიის ორგანიზებით, ტელეკომპანია „რუსთავი 2“-თან თანამშრომლობის ფარგლებში, აღნიშნულ ტერიტორიაზე მატჩების საჯარო ჩვენება 9-დან 19 ივლისის ჩათვლით გაიმართება. ასევე დაგეგმილია ფანზონის მოწყობა. 9 ივლისს, საღამოს 9 საათიდან ტერიტორიაზე მისულ გულშემატკივრებს მატჩების ჩვენებამდე სხვადასხვა აქტივობა დახვდება, რომელიც დანარჩენ დღეებში სტარტს თამაშის დაწყებამდე ოთხი საათით ადრე აიღებს“, - განაცხადა კახა კალაძემ.მისივე ინფორმაციით, 10 დღის განმავლობაში, პირველი რესპუბლიკის მოედანზე ქართული ფეხბურთის ლეგენდების მონაწილეობით ღია საუბრებიც გაიმართება.„იმ თარიღებში, როდესაც შეხვედრის ტრანსლირება არ იქნება, მოქალაქეებს 19:00 საათიდან, ტერიტორიაზე განთავსებული მრავალფეროვანი სასმელისა და კვების ობიექტები, მოსასვენებელი სივრცეები, საქართველოს ფეხბურთის ფედერაციის ფანშოპი, საქართველოს კიბერფეხბურთის ფედერაციის ინტერაქციული ზონა დახვდება, პატარა გულშემატკივრებისთვის კი ცალკე გამოყოფილ ზონაში ყოველდღიურად საბავშვო-თემატური აქტივობები და გათამაშებები გაიმართება, სადაც პატარები ასევე შეძლებენ სამახსოვრო ფოტოების გადაღებას და სახეზე მოხატვას. გარდა ამისა, ფეხბურთის ფედერაციის ჩართულობით, 10 დღის განმავლობაში, ქართული ფეხბურთის ლეგენდები ესტუმრებიან პირველი რესპუბლიკის მოედანს, სადაც გაიმართება ღია საუბრები მიმდინარე მსოფლიო ჩემპიონატის და ფეხბურთის შესახებ.ყველას გეპატიჟებით. წინ ძალიან საინტერესო სანახაობა გველოდება“, - აღნიშნა თბილისის მერმა.

ინტენსიური ნალექის დროს დაიტბორა რამდენიმე ქუჩა, რამაც მოსახლეობას პრობლემები შეუქმნა. მინდა, კიდევ ერთხელ ვუთხრა მოსახლეობას, რომ ყველა პრობლემა იქნება მოგვარებული, – ამის შესახებ დედაქალაქის მერმა, კახა კალაძემ თბილისის მუნიციპალიტეტის მთავრობის სხდომაზე განაცხადა.კალაძემ ასევე ისაუბრა იმ მიზეზებზე, რის გამოც ხდება კონკრეტული ქუჩების დატბორვა. როგორც კალაძემ აღნიშნა, მთელი ქალაქის მასშტაბით, მიწისქვეშა კომუნიკაციების ინფრასტრქტურის თვალსაზრისით, სერიოზული გამოწვევა არსებობს.დედაქალაქის მერის განცხადებით, ეტაპობრივად ყველა პრობლემა იქნება მოგვარებული.„როგორც მოგეხსენებათ, მოკლე დროში მოსული ინტენსიური ნალექის დროს დაიტბორა რამდენიმე ქუჩა, რამაც მოსახლეობას პრობლემები შეუქმნა. გარდა ამისა, ჩვენ გვაქვს ინფორმაცია, კონკრეტულ უბნებში რა პრობლემები შექმნა ამინდმა. არცერთი ადგილი არ დარჩენილა, სადაც ჩვენი მუნიციპალიტეტის შესაბამისი სამსახურები ან გამგეობის თანამშრომლები არ მისულიყვნენ, არ ჰქონოდათ კომუნიკაცია მოსახლეობასთან. ყველგან, სადაც იყო აუცილებლობა, ვიყავით მისული. მინდა, კიდევ ერთხელ ვუთხრა მოსახლეობას, რომ ყველა პრობლემა იქნება მოგვარებული. ამინდმა გარკვეული პრობლემები შექმნა ინფრასტრუქტურის მიმართულებით. ყველაფერი იქნება მოწესრიგებული და ყველა პრობლემა – აღმოფხვრილი. რაც შეეხება მიზეზს, რატომ ხდება კონკრეტული ქუჩების დატბორვა, არის ორი პრობლემა. ერთი, როდესაც ხდება სანიაღვრეების ამოვსება ჩამოგლეჯილი ხის ტოტებით, ფოთლებით, ასევე ნარჩენებით. ეს, რა თქმა უნდა, პრობლემას წარმოადგენს, ასევე, ზოგადად, სანიაღვრე ქსელების არარსებობა ან მოძველება. ამიტომაც არის, რომ 2017 წლიდან მოყოლებული, სარეაბილიტაციო სამუშაოების დაწყებისას, იქნება ეს ქუჩები, გამზირები, პირველი, რასაც ვაკეთებთ, არის მიწისქვეშა კომუნიკაციების მოწესრიგება. ბევრჯერ გვითქვამს და კიდევ ერთხელ გავიმეორებ, რომ ზოგადად, მთელი ქალაქის მასშტაბით მიწისქვეშა კომუნიკაციების ინფრასტრქტურის თვალსაზრისით სერიოზული გამოწვევა გვაქვს. ამიტომ, სადაც ვიწყებთ სამუშაოებს, პირველი კეთდება მიწისქვემოთ არსებული ქსელის გამოცვლა, მოწესრიგება, განახლება. ცხადია, ერთდროულად ყველაფერს ვერ შევძლებთ, მაგრამ ეტაპობრივად ყველა პრობლემა იქნება მოგვარებული და მოწესრიგებული“, – განაცხადა კახა კალაძემ.