„ზოგი კონგრესმენი შეგვაქებს, ზოგი – გაგვაკრიტიკებს, მაგრამ მთავარია, რომ ორ ქვეყანას შორის სტრატეგიულ თანამშრომლობას არაფერი ემუქრება ისევე, როგორც ამერიკული ბიზნესის ინტერესებს“, – ამის შესახებ პრემიერ-მინისტრმა გიორგი გახარიამ კონგრესმენების წერილზე შეკითხვის საპასუხოდ განაცხადა.
„სუბიექტური რეალობის მოდელირებით ზოგიერთები ცდილობენ, ქვეყანა დააზიანონ, ეს არის სამწუხარო, ამიტომ ახლა უნდა დავწყნარდეთ და დავმშვიდდეთ. ზოგი კონგრესმენი შეგვაქებს, ზოგი – გაგვაკრიტიკებს, მაგრამ მთავარია, რომ ორ ქვეყანას შორის სტრატეგიულ თანამშრომლობას არაფერი არ ემუქრება ისევე, როგორც ამერიკული ბიზნესის ინტერესებს“, – აღნიშნა პრემიერმა.
მისივე თქმით, „ამერიკული პოლიტიკური სპექტრი, განსაკუთრებით ახლა მრავალფეროვანია.
„ამერიკული პოლიტიკური სპექტრი, განსაკუთრებით ახლა ძალიან სხვადასხვაა. მაგალითად, გუშინ ერთ-ერთი კონგრესმენისგან, ჯო ვილსონისგან მივიღე შესანიშნავი წერილი, რომელმაც ხაზგასმით აღნიშნა საქართველოს დემოკრატიის განვითარებაში წარმატებები. რა თქმა უნდა, იქ კონკრეტულ შემთხვევებში სხვადასხვა მოტივი არსებობს და მე შიდა სფეროებში არ ჩავერევი.
გარდა ამისა, რამდენიმე დღის წინ ვესაუბრე სახელმწიფო მდივანს, რომელიც იყო უაღრესად პოზიტიური და უაღრესად მომავალზე ორიენტირებული და რომლის ძირითადი აქცენტები იყო, რამდენად ფასეულია საქართველოსთვის და აშშ-სთვის ჩვენი სტრატეგიული პარტნიორობა – არამხოლოდ დღევანდელი მდგომარეობა, რომელიც ისტორიულად საუკეთესოა ბოლო ათწლეულების განმავლობაში, არამედ ამ სტრატეგიული პარტნიორობის შემდგომი გაღრმავება სხვადასხვა სფეროში – უსაფრთხოების, ადამიანის უფლებების, დემოკრატიის შემდგომი განვითარების, მათ შორის ბიზნესის და ეკონომიკის სფეროებიც. ეს არის რეალობა, რომელსაც დადასტურებულად დავინახავთ, როდესაც ყველა ერთად ჩავატარებთ ღირსეულ და დემოკრატიულ არჩევნებს“, – განაცხადა გიორგი გახარიამ.
მისივე თქმით, როდესაც ადამიანები, მათ შორის ამერიკელებიც, ზოგ შემთხვევაში ვერ ასრულებენ საინვესტიციო ვალდებულებებს და საქართველო არბიტრაჟს იგებს, ეს უნდა გვიხაროდეს.
„ეს არ უნდა გვწყინდეს და ჯიბრში არ უნდა ვუდგებოდეთ ქვეყანას. ქვეყნისთვის მნიშვნელოვანია, რომ საქართველოსა და აშშ-ს შორის ურთიერთობას რისკი არ უნდა შევუქმნათ. განსაკუთრებით – რაღაც გამოგონილი შეკითხვებით.
რატომ არ უნდა შევუქმნათ იცით?! ეს ქვეყანა ჯერ კიდევ ოკუპირებულია და ჩვენი სტრატეგიული პარტნიორების მხარდაჭერის გარდა, ამ ოკუპაციის მშვიდობიანი გადაწყვეტის სხვა გზა არ გვაქვს. ეს ყველას კარგად უნდა გვესმოდეს და როდესაც მოკლევადიანი საარჩევნო, პოლიტიკური ინტერესებიდან რაღაც უაზრო კითხვებს სვამთ, ამით შეიძლება ქვეყანა დავაზიანოთ“, – განაცხადა გიორგი გახარიამ.