საპარლამენტო უმრავლესობის ლიდერი და ფრაქცია „ქართული ოცნების“ თავმჯდომარე კვლავ მამუკა მდინარაძე გახდა

მივესალმები საქართველოს საზოგადოებას, რომელსაც დღეს გული სტკივა და ყველას უნდა გვტკიოდეს გული, რადგან დღეს საქართველოს პარლამენტი აღარ არსებობს და პარლამენტმა თუ მმართველმა გუნდმა, ერთმა პარტიამ თავზე დაიხია კონსტიტუცია, ძალიან მეცოდებიან, – ამის შესახებ საქართველოს პრეზიდენტმა, სალომე ზურაბიშვილმა ვიდეომიმართვაში ისაუბრა. ზურაბიშვილის თქმით, დღეს ყველაფერი ახალგაზრდების ხელშია. „პირველ რიგში, მეცოდება კობახიძე, როგორც ამ კონსტიტუციის დამწერი. როგორც ჩანს, რაღაცები ვერ გათვალა, თორემ არ დასჭირდებოდა, რომ თავზე დაეხია კონსტიტუცია. მეცოდება ყველა ის პარლამენტარი, რომლებიც დღეს ისხდნენ გაყინული სახეებით, რამეთუ იციან, რომ არიან გაყალბებული არჩევნების შედეგი, რამეთუ იციან, რომ იქნებიან რამდენიმე თვით თუ რამდენიმე კვირით ჩაკეტილი ამ დარბაზში, სადაც არცერთს არანაირი უფლება არ გააჩნიათ. მეცოდება ის საქართველო, სადაც ადამიანები ერთმანეთს ისე ესალმებიან, როგორც ჩვენ დღეს ვნახეთ კადრები, რომელიც ნამდვილად სამარცხვინოა და შევა ისტორიაში, როგორც სამარცხვინო კადრი, ერთმანეთის მისალმების თუ დაჩოქების. სამაგიეროდ, არ მეცოდებით თქვენ, არ მეცოდება ჩვენი საზოგადოება, რომელიც დგას იქ, სადაც უნდა იდგეს და როცა უნდა იდგეს. არ მეცოდება ჩვენი ახალგაზრდობა, რამეთუ მომავალი მათ ხელშია და უნდა მოემზადონ იმისთვის, რომ არა მხოლოდ მომავალი იყოს მათი, არამედ ძალიან მალე ხელში აიღონ სადავეები ამ ქვეყნის. თუ რამეს ვხედავთ ჩვენ, ეს არის, რომ თქვენი დრო მოვიდა. ის ძველი დრო, რომელიც ასახულია დღევანდელ პარლამენტში, ნამდვილად დამთავრდა. საჭიროა, რომ ახალი თაობა, ახალი პოლიტიკური ძალები გამოჩნდნენ ამ ქვეყანაში, რადგან ძალიან მალე დადგება დრო ახალი არჩევნების, რომელიც უნდა ჩატარდეს ახალი ფორმით, არა კალანდარიშვილისეული ფორმით, არამედ თავისუფლად, სამართლიანად და ეს დრო ნამდვილად მოდის“, – განაცხადა ზურაბიშვილმა. მისივე თქმით, ახლა მთავარი მოვალეობაა, ყველა ერთად იდგეს. „ჩვენი მთავარი მოვალეობა დღეს ის კი არ არის, რომ ყოველდღე ვიდგეთ სადმე, მთავარი მოვალეობაა მომზადება. თუ მოვემზადებით, იმედი უნდა გვქონდეს ჩვენი თავის, ჩვენი პარტნიორების, რომლებიც ნამდვილად მზად არ არიან, რომ მიატოვონ საქართველო, და იმედი უნდა გვქონდეს, რომ ეს მომავალი არის ამ ქვეყნის და ჩვენი, ყველასი ერთად. მე როცა გადავწყვეტ, წავიდე სტრასბურგში, როგორც აქამდე, წინასწარ გეტყვით, რისთვის მივდივარ, ვის ვხვდები, რას ვაკეთებ და როგორ დავბრუნდები. მე აქ ვიქნები და ერთად მოვემზადებით შემდეგი არჩევნებისთვის“, – განაცხადა ზურაბიშვილმა.

XI მოწვევის პარლამენტის კომიტეტებმა საორგანიზაციო სხდომები გამართეს, სადაც კომიტეტების დებულებები დაამტკიცეს. კომიტეტების სხდომებზე საკადრო საკითხებზეც იმსჯელეს და კომიტეტების თავმჯდომარეების პირველი მოადგილეები აირჩიეს. კერძოდ, თავდაცვისა და უშიშროების კომიტეტის თავმჯდომარის პირველ მოადგილედ დეპუტატებმა თენგიზ შარმანაშვილის კანდიდატურას ერთხმად დაუჭირეს მხარი. განათლების, მეცნიერებისა და ახალგაზრდულ საქმეთა კომიტეტის თავმჯდომარის პირველ მოადგილედ გიორგი ჩაკვეტაძე, საპროცედურო საკითხთა და წესების კომიტეტის თავმჯდომარის პირველ მოადგილედ კი ირაკლი შატაკიშვილი აირჩიეს. საფინანსო-საბიუჯეტო კომიტეტის თავმჯდომარის პირველ მოადგილედ კომიტეტმა ირაკლი ხელაძის კანდიდატურას დაუჭირა მხარი. სპორტის კომიტეტის თავმჯდომარის პირველ მოადგილედ შოთა ხაბარელი, გარემოს დაცვისა და ბუნებრივი რესურსების კომიტეტის თავმჯდომარის პირველ მოადგილედ ვლადიმერ ბოჟაძე, ხოლო ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის პირველ მოადგილედ ალუდა ღუდუშაური აირჩიეს. ევროპასთან ინტეგრაციის კომიტეტის თავმჯდომარის პირველი მოადგილე ვახტანგ თურნავა, საგარეო ურთიერთობათა კომიტეტის თავმჯდომარის პირველი მოადგილე კი მარიამ ლაშხი იქნება. დიასპორისა და კავკასიის საკითხთა კომიტეტმა თავმჯდომარის პირველ მოადგილედ მხარი გივი ჭიჭინაძის კანდიდატურას დაუჭირა, ჯანმრთელობის დაცვისა და სოციალურ საკითხთა კომიტეტმა კი თავმჯდომარის პირველ მოადგილედ ვლადიმერ კახაძე აირჩია. დარგობრივი ეკონომიკისა და ეკონომიკური პოლიტიკის კომიტეტის თავმჯდომარის პირველი მოადგილე ირაკლი მეზურნიშვილი, კულტურის კომიტეტის თავმჯდომარის პირველი მოადგილე კი ეკა ჭიჭინაძე იქნება. რაც შეეხება აგრარულ საკითხთა კომიტეტს, კომიტეტის თავმჯდომარის მოადგილედ დავით შერაზადიშვილი აირჩიეს.

მოსახლეობამ თავისი ნება გამოხატა. დღეს მოსახლეობის ნების შესაბამისად, კონსტიტუციის ფარგლებში, მოხდა ახალი პარლამენტის უფლებამოსილების ცნობა და პარლამენტი ჩვეულებრივად შეუდგება საქმიანობას, - განუცხადა ჟურნალისტებს საპარლამენტო უმრავლესობის წევრმა, გიორგი კახიანმა. „ოპოზიციის წარმომადგენლებს უნდა ესმოდეთ, რომ პარლამენტი ლეგიტიმური არის თუ არა, ეს მათ ნებაზე კი არ არის დამოკიდებული და იმაზე, ისინი შემოვლენ თუ არ შემოვლენ პარლამენტში, ეს დამოკიდებულია მოსახლეობის ნებაზე. მოსახლეობამ თავისი ნება გამოხატა. დღეს მოსახლეობის ნების შესაბამისად, კონსტიტუციის ფარგლებში, მოხდა ახალი პარლამენტის უფლებამოსილების ცნობა და პარლამენტი ჩვეულებრივად შეუდგება საქმიანობას. ევროკავშირთან ურთიერთობის თვალსაზრისით გადავდგამთ წინ ნაბიჯებს და ჩვენს სტრატეგიულ პარტნიორთან აშშ-თან ურთიერთობის თვალსაზრისით ჩვენ გვექნება პროგრესი“, - განაცხადა გიორგი კახიანმა. საკანონმდებლო ორგანომ 88 ხმით, პარლამენტის 150 წევრის უფლებამოსილება ცნო. კენჭისყრამდე, ცენტრალური საარჩევნო კომისიის თავმჯდომარე გიორგი კალანდარიშვილმა პარლამენტს 2024 წლის 26 ოქტომბრის არჩევნების შედეგები გააცნო და პარლამენტის დროებით სამანდატო კომისიას პარლამენტის წევრთა უფლებამოსილების ცნობისათვის საჭირო დოკუმენტაცია გადასცა.

მიმართავს თუ არა ოპოზიცია მანდატების გაუქმების შესახებ პარლამენტს - მას შემდეგ, რაც „ქართულმა ოცნებამ“ 150 დეპუტატის უფლებამოსილება ცნო, ოპონენტებს კითხვით მიმართავს. საპარლამენტო უმრავლესობაში აცხადებენ, რომ სწორედ დღეიდან არის მანდატებზე უარის თქმის იურიდიული შესაძლებლობა, ამიტომ ახლა გაირკვევა, პარტიები მართლა იტყვიან თუ არა უარს პარლამენტში შესვლაზე. კოალიციაში „ცვლილებებისთვის“ აცხადებენ, რომ სიების ჩახსნის შესახებ ცესკოს უკვე მიმართეს და მათი კოალიციიდან არცერთი ადამიანი არ შევა პარლამენტში. ელენე ხოშტარია, კოალიცია „ცვლილებებისთვის“ ერთ-ერთი ლიდერი: „ჩვენ ვხსნით ჩვენს სიას, არ ვაღიარებთ ამ არჩევნებს, არ ვაპირებთ ამ პარლამენტთან არანაირ კავშირს და ჩვენგან ფეხს არავინ შეადგამს ამ პარლამენტში. არ არსებობს არც მანდატი, არც სია, არ არსებობს არცერთი წარმომადგენელი - არც ინდივიდუალურად, არც პარტიულად - არ არსებობს ადამიანი კოალიციიდან „ცვლილებებისთვის", რომელიც ამ პარლამენტში შედგამს ფეხს“. ზურა ჯაფარიძე, კოალიცია „ცვლილებებისთვის“ ერთ-ერთი ლიდერი: „ჯერ არის სიების ჩახსნა, რაზეც განცხადება, წესით, უკვე შესული უნდა იყოს ცესკოში და ამის შემდეგ იწერება ინდივიდუალური განცხადებები მათთვის, ვისთვისაც ესენი გამიწერენ მანდატებს. ჯერ იხსნება სია, შემდეგ კეთდება ინდივიდუალური განცხადებები - ეს ადრეც გაკეთებული გვაქვს, 2020 წელს“. კოალიცია „ერთიანობა - ნაციონალური მოძრაობის“ ერთ-ერთმა ლიდერმა, გიორგი ვაშაძემ განაცხადა, რომ პარლამენტს თავისი მანდატის გაუქმების მოთხოვნით უკვე მიმართა. „ოპოზიციონერ კოლეგებთან ვერ მქონდა კონსულტაცია, რადგან მთელი დღეა აქ ვარ, თქვენთან ერთად. მე პირადად, უკვე გავაგზავნე განცხადება ამ თვითმარქვია ორგანოში, რომელსაც ისინი პარლამენტს უწოდებენ და დაუყოვნებლივ მოვითხოვ, შეწყდეს ჩემი მანდატი, დაუყოვნებლივ მოვითხოვ, რომ მიიღონ გადაწყვეტილება, რომ გაუქმდეს მათთან ჩემი ყოველგვარი კავშირი“, - აცხადებს გიორგი ვაშაძე.

თუ რეალურად ჩახსნიან სიებს, უარს იტყვიან მიღებულ მანდატებზე, რისი ალბათობაც ძალიან მცირეა, ფაქტობრივად, თვითლიკვიდაციას მოახდენენ, იმიტომ, რომ მათ უკვე დაეკარგებათ შესაძლებლობა გამოიყენონ ის მნიშვნელოვანი პლატფორმა, რასაც პარლამენტი წარმოადგენს, - განაცხადა გადაცემა „დღის ქრონიკაში“ განათლების, მეცნიერებისა და ახალგაზრდულ საქმეთა საპარლამენტო კომიტეტის თავმჯდომარე გივი მიქანაძემ რადიკალური ოპოზიციის მიერ სიების ჩახსნასთან დაკავშირებით. მისივე თქმით, რა გადაწყვეტილებაც არ უნდა მიიღონ, ეს ყველა შემთხვევაში ოპოზიციისთვის დამაზიანებელი იქნება. „ჩემთვის არ არის ცნობილი რამდენად მათ მიმართეს შესაბამის უწყებებს. ამ შემთხვევაში სიების ჩახსნაზე უნდა მიმართონ ცენტრალურ საარჩევნო კომისიას, ხოლო იმ კონკრეტულმა პირებმა, ვინც არჩეულები არიან პარლამენტის წევრებად, მათ პარლამენტის თავმჯდომარის სახელზე უნდა დაწერონ შესაბამისი განცხადებები. რა გადაწყვეტილებაც არ უნდა მიიღონ, ეს ყველა შემთხვევაში ოპოზიციისთვის დამაზიანებელი იქნება, ვინაიდან, თუ ისინი ამ ნაბიჯს არ გადადგამენ, ეს კიდევ ერთხელ აჩვენებს მათ უპრინციპობასა და უღირსობას. კიდევ ერთხელ საზოგადოება დარწმუნდება, რომ ამ ადამიანებს მხოლოდ და მხოლოდ სიცრუით შეუძლია გარკვეული პერფორმანსების და გარკვეული დაპირებების გაჟღერება. თუ ისინი ამ ნაბიჯს გადადგამენ, ფაქტობრივად თვითლიკვიდაციას გააფორმებენ“, - აღნიშნა მან. გივი მიქანაძის თქმითვე, 4 ოპოზიციურ პარტიას 61 მანდატი აქვს მოპოვებული და კოორდინაციის შემთხვევაში მათ აქვთ უამრავი შესაძლებლობები რეგლამენტიდან გამომდინარე სხვადასხვა ფუნქციები გამოიყენონ. „ვნახეთ მთელი წინასაარჩევნო პროცესის დროს, ახლაც, მას შემდეგ რაც არჩევნები დასრულდა, ეს კოორდინაცია რეალურად არ არსებობს. ეს არის მითი და რეალურად მათ შორის კოორდინირებულ მოქმედებებს ადგილი არ აქვს. სპონტანურად ხდება ცალ-ცალკე პარტიების მიერ სხვადასხვა აქტივობების განხორციელება. ამ შემთხვევაში მათ აქვთ უამრავი შესაძლებლობები რეგლამენტიდან გამომდინარე სხვადასხვა ფუნქციები გამოიყენონ ისევე, როგორც დაიკავონ პოლიტიკურად მნიშვნელოვანი თანამდებობები, მაგრამ თუ ისინი ამას არ გააკეთებენ და რეალურად ჩახსნიან სიებს, უარს იტყვიან მიღებულ მანდატებზე, რისი ალბათობაც ძალიან მცირეა, ამ შემთხვევაში ისინი, ფაქტობრივად, თვითლიკვიდაციას მოახდენენ. მათ უკვე დაეკარგებათ შესაძლებლობა გამოიყენონ ის მნიშვნელოვანი პლატფორმა, რასაც პარლამენტი წარმოადგენს“, - აღნიშნა გივი მიქანაძემ.