საქართველოს პრემიერმინისტრის სპეციალური წარმომადგენელი რუსეთთან ურთიერთობების საკითხებში ზურაბ აბაშიძე, რუსეთში სავაჭრო ცენტრ კემეროვში ხანძრისას დაღუპულთა ოჯახებს უსამძიმრებს. მისი სამძიმრის ტექსტს მთავრობის ადმინისტრაცია ავრცელებს.
„მწუხარებას გამოვთქვამთ რუსეთში, კემეროვოს სავაჭრო ცენტრში მომხდარი მასშტაბური ხანძირისას დაღუპული ათეულობით ადამიანის გამო, მათ შორის საუბედუროდ, ბავშვები არიან. სამძიმარს ვუცხადებთ და თანავუგრძნობთ დაღუპულთა ოჯახებს და მათ ახლობლებს,“- აცხადებს ზურაბ აბაშიძე.
სავაჭრო ცენტრ “ზამთრის კოშკში” ხანძარი 25 მარტს გაჩნდა. პოლიციის განმარტებით, ხანძრის დროს, შენობაში სიგნალიზაცია არ ჩაირთო და დროულად არ განხორციელდა ევაკუაცია. ბოლო მონაცემებით, ხანძარს 64 ადამიანი ემსხვერპლა.
კემეროვოში 3 დღიანი გლოვა გამოცხადდა. 27, 28 და 29 მარტს რეგიონში სავაჭრო ცენტრში დაღუპულებს იგლოვებენ.
კემეროვოს სავაჭრო ცენტრის მფლობელი ხანძრის დროს დაღუპული ადამიანების ოჯახებს სამი მილიონი, ხოლო ადგილობრივი ხელისუფლება ერთი მილიონი რუბლით დაეხმარება.
რუსეთის საგამოძიებო კომიტეტმა ქალაქ კემეროვოში სავაჭრო ცენტრში ხანძრის გაჩენის საქმეზე 5 ადამიანი დააკავა.