სრული პასუხისმგებლობით შემიძლია მოგახსენოთ, რომ ავიაციის ჩართულობით რაც იყო გასაკეთებელი, ის ამოცანა ასი პროცენტით შესრულდა, – ამის შესახებ საქართველოს შინაგან საქმეთა სამინისტროს საგანგებო სიტუაციების მართვის სამსახურის უფროსმა, თემურ მღებრიშვილმა პირველი არხის ეთერში განაცხადა.
„თითოეული სპეციფიკური ღონისძიების ჩატარებისას, მაგალითად, ექვსი ცხედრის გადმოსვენებაში იყო ჩართული ვერტმფრენები, რადგან ფიზიკურად შეუძლებელი იყო ფეხით მათი გადმოსვენება. მხოლოდ ასეთ კონკრეტულ ღონისძიებებზე ვიყენებთ, სხვა შემთხვევაში ავიაცია აღარ არის საძიებო სამუშაოებისთვის გამოსაყენებელი.
ამ კონკრეტულ უბედურ შემთხვევასთან არაფერ შუაში არ არის ის საკითხი, რატომ არ გვყავს ქვეყანაში განსაკუთრებული სპეცაღჭურვილობით მზადყოფნაში ვერტმფრენი. აბსოლუტურად უადგილოა ამ კონკრეტულ შემთხვევაში. თუმცა თქვენ იცით, რომ სამივე ვერტმფრენის შესყიდვის პროცედურა დაწყებულია. კიდევ ერთხელ ხაგზასმით მინდა, ვთქვა, რომ აღნიშნული სტიქიის დროს ჩვენ ხელი არაფერში არ შეგვშლია, რასაც ჰქვია ვერტმფრენების ჩართულობა“, – განაცხადა მღებრიშვილმა.
ინტერვიუ თემურ მღებრიშვილთან – რა ეტაპზეა სამაშველო ოპერაცია, რამდენი ადამიანია გამოყვანილი და ხომ არ შეცვლილა დაკარგულების შესახებ მონაცემები
მსგავსი: ინტერვიუ თემურ მღებრიშვილთან – რა ეტაპზეა სამაშველო ოპერაცია, რამდენი ადამიანია გამოყვანილი და ხომ არ შეცვლილა დაკარგულების შესახებ მონაცემები
მისივე თქმით, სტიქიის ადგილას სამძებრო სამუშაოებში ვერტმფრენების ჩართვა დაუყოვნებლივ მოხდა.
„ინციდენტზე 112-დან ინფორმაცია 15:10 წუთზე შემოვიდა, შესაბამისად, ის აუცილებელი მინიმუმი დრო, რაც საჭირო იყო ღონისძიების დაგეგმვისთვის, ვერტმფრენების მწყობრში მოსაყვანად, გამზადება გაფრენისთვის, გარდა ამისა, მეტეოროლოგიურმა პირობებმაც გარკვეულწილად ხელი შეგვიშალა, უამინდობის მიუხედავად, მფრინავების რისკის ფასად მოხერხდა ხეობაში შემოფრენა, ვერტმფრენების დაუყოვნებლივ ჩართულობა ღონისძიებაში“, – აღნიშნა მღებრიშვილმა.
რაც შეეხება უსაფრთხოების ნორმებს, მღებრიშვილის განცხადებით, სამძებრო სამუშაოები ყოველგვარი სტანდარტის დაცვით მიმდინარეობს.
„გარდა ამისა, ადგილზე გვყავს კინოლოგიური სამსახურიც და ვცდილობთ, რომ მაქსიმალურად უსაფრთხოდ, მაგრამ გარკვეული რისკის ფასად გავწიოთ ის აუცილებელი ძებნა-შველის ღონისძიება, რასაც მოუთმენლად ელიან ჩვენგან პირველ რიგში, დაზარალებული ოჯახები“, – აღნიშნა მღებრიშვილმა.