ჩემი იქ დგომის მიზანი ევროპული მომავლის დაცვაა, უკანონოდ დაკავებული მოქალაქეებისთვის, რომლებიც ნაწილი ნაწამებია, იმ უსამართლობის გამო ვდგავარ, რაც ჩვენს ქვეყანაშია – ბაჩო ქაჯაია

ხარაგაულის მუნიციპალიტეტის 2 სოფელში მეწყრული პროცესი გრძელდება. პროცესის შედეგად დაზიანებულია სახლები, სახნავ-სათესი სავარგულები და საავტომობილო გზები. სოფლებში ხემაღალსა და ღეკში მეწყრული კერების გეოლოგიური შესწავლა მიმდინარეობს.მუნიციპალიტეტის მერიის ინფორმაციით, ამ ეტაპზე, გეოლოგიური დასკვნის საფუძველზე, საცხოვრებელი ფართიდან 21 ოჯახია გაყვანილი.პარალელურად, გრძელდება პროცესების მონიტორინგი და მისი გამომწვევი მიზეზების კვლევა, რის შემდეგაც შესაბამისი გადაწყვეტილებები იქნება მიღებული.ადგილზე იმყოფებოდნენ ხელისუფლების წარმომადგენლები და არსებულ მდგომარეობას და ადგილობრივების საჭიროებებს გაეცნენ.„მერია მოქმედებს გეოლოგების რეკომენდაციების შესაბამისად, ყოველდღიურ რეჟიმში ჩვენ მუდმივი კომუნიკაცია გვაქვს თითოეულ ოჯახთან, ვსწავლობთ მათ მდგომარეობას და ვცდილობთ, მერიის შესაბამისი სამსახურების მონაწილეობით უზრუნველვყოთ შესაფერისი ალტერნატიული უსაფრთხო საცხოვრებელი მათთვის", - განაცხადა ხარაგაულის მერმა კობა ლურსმანაშვილმა.სტიქიის ზონაში მეწყრული პროცესები რამდენიმე თვის წინ გააქტიურდა.

ალექსი ახვლედიანის საქმეზე პროკურატურა განცხადებას ავრცელებს:„საქართველოს პროკურატურამ ცეცხლსასროლი იარაღის დაუდევრად შენახვის ფაქტზე, რამაც მძიმე შედეგი გამოიწვია, ერთ პირს ბრალდება წარუდგინა.საქართველოს შინაგან საქმეთა სამინისტროს ცენტრალური კრიმინალური პოლიციის მიერ სისხლის სამართლის საქმეზე ჩატარებული გამოძიებით დადგინდა, რომ 6 ივლისს, საღამოს საათებიდან თ.რ. სტუმრად იმყოფებოდა, ქ. საგარეჯოში, თავისი მეგობრის ა. ა.-ს სახლში. 7 ივლისს, დაახლოებით 01:10 საათიდან 01:30 საათამდე პერიოდში, თ.რ.-მ მალულად აიღო ა. ა.-ს კუთვნილი „გლოკის“ სისტემის ცეცხლსასროლი იარაღი, რომელიც ა.ა.-ს დაუდევრად ჰქონდა დატოვებული თავისი საცხოვრებელი სახლის მიმდებარედ არსებულ შემინულ ფანჩატურში, შემდეგ ასევე მალულად გადაიტანა სტუმრისთვის განკუთვნილ საძინებელ ოთახში და მარტო დარჩენილმა, თვითმკვლელობის მიზნით ისროლა გულმკერდის არეში, რამაც მძიმე ხარისხის ჯანმრთელობის დაზიანება გამოიწვია.სამართალდამცველებმა ა.ა. იმავე დღეს დააკავეს. დაკავებულს ბრალდება საქართველოს სისხლის სამართლის კოდექსის 238-ე მუხლით (ცეცხლსასროლი იარაღის დაუდევრად შენახვა, რამაც მძიმე შედეგი გამოიწვია) წარედგინა, რაც სასჯელის სახედ და ზომად სამ წლამდე თავისუფლების აღკვეთას ითვალისწინებს.პროკურატურა სასამართლოს კანონით დადგენილ ვადაში მიმართავს ბრალდებულისთვის აღკვეთი ღონისძიების შეფარდების მოთხოვნით“, - ნათქვამია განცხადებაში.

საქართველოს ტექნიკური უნივერსიტეტის არქიტექტურის, ურბანისტიკისა და დიზაინის ფაკულტეტზე ლანდშაფტური არქიტექტურის მიმართულების სტუდენტთა ნამუშევრების გამოფენა მოეწყო, რომელიც სტუდენტური შემოქმედებისა და პროფესიული უნარების წარმოჩენას ისახავდა მიზნად.ამის შესახებ ინფორმაციას საქართველოს ტექნიკური უნივერსიტეტი ავრცელებს.მათივე ცნობით, გამოფენაში, რომლის სასწავლო თემატიკად არჩეული იყო სტუ-ის პირველი კორპუსის მიმდებარე ღია სარეკრეაციო სივრცე, არქიტექტურის, ურბანისტიკისა და დიზაინის ფაკულტეტის მეორე კურსის 20-ზე მეტმა ბაკალავრმა მიიღო მონაწილეობა.არქიტექტურის, ურბანისტიკისა და დიზაინის ფაკულტეტის დეკანის, პროფესორ ნუგზარ ხვედელიანის თქმით, სტუდენტებისათვის მიცემული დავალება აერთიანებდა საგანმანათლებლო სივრცის ყველა კომპონენტს - მობილობას, სხვადასხვა ფაკულტეტის სტუდენტებს შორის მოქნილ კომუნიკაციას, სასწავლო, საგამოფენო, სამუშაო, გასართობ, მოსასვენებელ, სავაჭრო ფუნქციებს. გარდა ამისა, გამოფენაზე ციფრულ ფორმატში წარმოდგენილი იყო კეთილმოწყობის სხვადასხვა კონცეფცია ისეთი ტერიტორიებისათვის, როგორიცაა დიღმის ტყე-პარკი, დიღმის ჭალები, თბილისის ზღვის მიმდებარე არეალი, ძველი იპოდრომი და მახათას მთა.„ლანდშაფტური არქიტექტურა ურბანულ განვითარებაში, განსაკუთრებით კი ჩვენი ქალაქების პირობებში, სადაც მწვანე სივრცეებისა და ადამიანზე მორგებული გარემოს დეფიციტი აშკარად საგრძნობია, ერთ-ერთ ყველაზე მნიშვნელოვანი დარგია. ჩვენი სტუდენტების ნამუშევრები არა მხოლოდ პროფესიული უნარების განვითარებას, არამედ ძალიან აქტუალურ საზოგადოებრივ გამოწვევებზე რეაგირებასაც ემსახურება. მეორე კურსის სტუდენტების მიერ წარმოდგენილი პროექტები გვიჩვენებს, რომ მათ უკვე გააჩნიათ სისტემური მიდგომა როგორ უნდა გაერთიანდეს არქიტექტურა, გარემოს დაცვა, სოციალური ფუნქცია და კულტურული კონტექსტი ერთიან დიზაინურ ხედვაში. განსაკუთრებით მიმაჩნია სასწავლო პროცესის დაკავშირება რეალურ ურბანულ სივრცეებთან. ფაკულტეტის მიმდებარე არეალის ხელახალი გააზრება არ ყოფილა მხოლოდ თეორიული დავალება, არამედ ესაა მცდელობა სტუდენტური შემოქმედების ქალაქის განვითარებაში პირდაპირი ჩართვისთვის“, - განაცხადა ნუგზარ ხვედელიანმა.არქიტექტურის, ურბანისტიკისა და დიზაინის ფაკულტეტის დეკანის მოადგილის, პროფესორ თამარ ჭანტურიას თქმით, სტუდენტებმა მოამზადეს პროექტები, რომლითაც განიხილავენ სტუ-ის პირველი სასწავლო კორპუსის სივრცის, როგორც საგანმანათლებლო პროცესში ჩართვის, ასევე, საზოგადოებრივი ურთიერთქმედების და დასვენების სივრცედ გარდაქმნის გზებს. პროექტები ითვალისწინებს მულტიფუნქციური ზონების შექმნას, რაც გულისხმობს არა მხოლოდ სასწავლო და საგამოფენო გარემოს მოწყობას, არამედ მობილური სამუშაო სადგურების, მწვანე არეალების, სტუდენტური კაფეების, მცირე სავაჭრო ობიექტების და ღია ამფითეატრის ერთიან ეკოსისტემაში ინტეგრაციას.„გამოფენამ დიდი ინტერესი გამოიწვია. დამთვალიერებელთა განსაკუთრებულ ინტერესს იწვევდა ციფრულ ფორმატში წარმოდგენილი ლანდშაფტური კეთილმოწყობის კონცეფციები, რომლებიც სხვადასხვა ურბანული თუ ნახევრადველური სივრცეების განვითარებას მოიცავს. მათ შორის გამოირჩევა: დიღმის ტყე-პარკის რეკრეაციული პოტენციალის გამოყენების იდეები, რომლებიც გულისხმობს ეკო-სბილაკების მოწყობას, ბიომრავალფეროვნების შენარჩუნებასა და საგანმანათლებლო დანიშნულების ეკო-პავილიონების განთავსებას; დიღმის ჭალების ბიოფილური არქიტექტურის კონცეფციები, სადაც სტუდენტებმა შეიმუშავეს წყლის რესურსების მართვის ინტეგრირებული სისტემები და ფლორა-ფაუნის ბუნებრივი გარემოს შენარჩუნებაზე ორიენტირებული ინფრასტრუქტურა; თბილისის ზღვის მიმდებარე არეალის რეკრეაციულ-კულტურულ ცენტრად გარდაქმნის პროექტები, რომელიც მოიცავს საგამოფენო სივრცეებს, საბავშვო ზონებს, წყლის სპორტის ინფრასტრუქტურას და ლანდშაფტურ ხელოვნებას; ძველი იპოდრომის ტერიტორიაზე განსახილველი იყო ურბანული ტყის კონცეფცია, რომელიც ქალაქში მწვანე „ფილტრის" ფუნქციას შეითავსებს და ასევე მოემსახურება სოციალურ ინტეგრაციას, ჯანსაღი ცხოვრების წესს და ეკოლოგიური ცნობიერების ამაღლებას შეუწყობს ხელს; მახათას მთის პროექტები განსაკუთრებულად ხაზს უსვამს ისტორიულ-კულტურულ ღირებულებებთან ჰარმონიულ შერწყმას, მოიაზრებს სანახაობრივი ბილიკების, მედიტაციური სივრცეებისა და გადმოსახედების მოწყობას ისე, რომ ბუნებრივი ლანდშაფტი მაქსიმალურად შენარჩუნებული იქნას. გამოფენამ ცხადჰყო, რომ ლანდშაფტური არქიტექტურა გაცილებით მეტია, ვიდრე მხოლოდ ესთეტიკური სივრცის შექმნა. ესაა სოციალური, ეკოლოგიური და ფუნქციური საკითხების კომპლექსური გადაჭრა. სტუდენტთა მიერ წარმოდგენილი ხედვები ამ მიმართულებით გვიჩვენებს, რომ ახალ თაობას გააზრებული აქვს თანამედროვე ურბანული განვითარების ტენდენციები და მზად არის წვლილი შეიტანოს ქალაქის მდგრადი მომავლის ფორმირებაში“,- განაცხადა თამარ ჭანტურია.სტუ-ის ინფორმაციით, გამოფენა 11 ივლისამდე გასტანს.

ეუთო/ოდირს შეუტიეს, რადგან საპარლამენტო არჩევნებთან დაკავშირებით დადებითი დასკვნა დაწერა, ახლა კიდევ გვკარნახობენ, მოვიწვიოთ და შემდეგ ამ ორგანიზაციას გადაუარონ, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.ვოლსკის თქმით, ამ დასკვნის მიმართ უკიდურესად კრიტიკული დამოკიდებულება ჰქონდათ ოპოზიციონერებს.„უპირველეს ყოვლისა, უნდა აღვნიშნოთ, რომ არჩევნებს არაფერი ემუქრება, ელექტრონული არჩევნებია, დამკვირვებლებიც არ გვაკლია, თუნდაც შიდა დამკვირვებლები, ჟურნალისტები, ექსპერტები. აქედან გამომდინარე, არცერთი სახელმწიფო, მით უმეტეს, საქართველო არ დაუშვებს, რამე მოხდეს ისეთი, რაც კითხვებს გამოიწვევს. კითხვები გამოიწვია ეუთო/ოდირიის დასკვნამ, არათუ კითხვები, ასეთი გააფთრებული შეტევა პრაქტიკაში არ არსებობდა ევროპულ სივრცეში. შეუტიეს, რადგან დადებითი დასკვნა დაწერა. აქედან გამომდინარე, რასაკვირველია, ეუთო/ოდირის განცხადება ერთია, მაგრამ მეორეა ეუთო/ოდირის დასკვნა, რომლის მიმართაც უკიდურესად კრიტიკული დამოკიდებულება ჰქონდათ ოპოზიციონერებს, მეხუთე კოლონას, გარეთა აქტორებს, გადაუარეს, ბულინგის ასეთი ხარისხი ევროპულ ისტორიას არ მოსწრებია. ეუთო-ს გენერალური მდივნის, დამკვირვებლების განცხადება იყო, რომ საქართველოში არჩევნები ჩატარდა მაღალ დონეზე. აქედან გამომდინარე, გადავდგათ ისეთი ნაბიჯები, როგორც ეკადრება განვითარებულ, დემოკრატიულ სახელმწიფოს, ჩავატაროთ ნორმალური არჩევნები და არანაირი წინაპირობა არ უნდა შევუქმნათ რაიმე დაპირისპირებას, მით უმეტეს, ევროპის ფორმატში, რომელიც არაერთხელ საკმაოდ ძვირი დაუჯდა ქვეყანას. ასე რომ, ჩავატაროთ არჩევნები ისეთი, როგორც ეკადრება დემოკრატიულ, განვითარებულ სახელმწიფოს.არჩევნები უნდა ჩატარდეს იმ დონეზე, როგორც ტარდება ევროპულ ქვეყნებში. მით უმეტეს, განცხადებები, რომლებიც გაკეთდა, თითქოს პოლიტიკური პატიმრებია და გარკვეული გარემოებებია შექმნილი, არ ეკადრება დემოკრატიულ სახელმწიფოს. გადახედონ, რა ხდება ევროპულ სახელმწიფოებში, მაშინ როდესაც სახელმწიფო სისტემას უპირისპირდება გარკვეული აგრესია, რა ხდება გინდ პოლიციის, გინდ სასამართლოს მხრიდან. ზუსტად ამ გზით მივდივართ ჩვენც. ასე რომ, არჩევნებს არაფერი ემუქრება. განცხადება თუ კეთდება, რომ 20 წლის განმავლობაში ისტორიას არ ახსოვს ასეთი მოვლენა, ისტორიას არც ის ახსოვს არც 20, არც 30 წლის განმავლობაში, რომ კვალიფიციური, ავტორიტეტული ორგანიზაციის მხრიდან გაკეთებული დადებითი შეფასება ფეხქვეშ ყოფილიყო გაგდებული, აბუჩად აგდებული. აქედან გამომდინარე, კიდევ გვკარნახობენ, რომ მოვიწვიოთ ორგანიზაცია, შემდეგ ამ ორგანიზაციას გადაუარონ და კიდევ საშუალება მივცეთ, გარკვეულ სპეკულაციებს, ბულინგს ჰქონდეს ადგილი. ვფიქრობ, გვეყოფა ძალა იმისათვის, მათ შორის, ე.წ. კრიტიკულ მედიას, როგორც თვითონ უწოდებენ თავის თავს, ეყოფა ძალა, ობიექტურად, სამართლიანად შეაფასოს და გვქონდეს ისეთი არჩევნები, როგორიც ტარდება სხვა ქვეყნებში, სადაც არ აქვთ აუცილებლობა, ვინმე გარედან ამოწმებდეს“, – განაცხადა გია ვოლსკიმ.ეუთო/ოდირ-მა საქართველოში არსებულ ვითარებასთან დაკავშირებით განცხადება გაავრცელა, რომელშიც, მათ შორის, ნათქვამია, რომ „საქართველოს ხელისუფლება არ აპირებს ოფისის მოწვევას მომავალი ადგილობრივი არჩევნების დასაკვირვებლად. ეს წარმოადგენს საქართველოს ბოლო ოცი წლის განმავლობაში მუდმივი პრაქტიკისგან გამონაკლისს“.

რამდენიმე თვის წინ გვქონდა იდეა სალომე ზურაბიშვილის თბილისის მერობის კანდიდატად წარდგენის შესახებ, მაგრამ, რა თქმა უნდა, ეს მისი გადასაწყვეტია, – ამის შესახებ პარტია „გახარია საქართველოსთვის“ წევრმა, ანა ბუჩუკურმა განაცხადა.ბუჩუკურს კითხვა დაუსვეს ალეკო ელისაშვილის განცხადების იმ ნაწილზე, სადაც ელისაშვილი კანდიდატებზე საუბრობს: „საერთო კანდიდატები, თბილისში სალომე ზურაბიშვილი ლიდერი და ჩვენ მის გარშემო“.„სალომე ზურაბიშვილის კანდიდატობის საკითხს რაც შეეხება, რამდენიმე თვის, დაახლოებით, 7-8 თვის წინ გვქონდა ჩვენ ეს იდეა, სალომე ზურაბიშვილის წარდგენა თბილისის მერობის კანდიდატად, მაგრამ, რა თქმა უნდა, მისი გადასაწყვეტია. ვიდრე „ლელო“ მიიღებდა გადაწყვეტილებას, ჩვენ ისედაც ნეიტრალური, არაპარტიული კანდიდატების ძებნაზე ვიყავით გადასულნი და „ლელოსთან“ ერთად საერთო კანდიდატებზე გვექნება მსჯელობა“, – განაცხადა ანა ბუჩუკურმა.