ინტერვიუ თინათინ მესხთან
არასამთავრობო ორგანიზაცია ,,ჰელფინგ ჰენდს’’ საზოგადოება კარგად იცნობს, როგორც ახალგაზრდებთან მომუშავე აქტიურ ორგანიზაციას. დაარსების დღიდან დღემდე ,,ჰელფინგ ჰენდის’’ პროგრამებში ათასობით მოზარდი და ახალგაზრდა იღებდა მონაწილეობას. პროექტები ძირითადად მოხალისეობის განვითარებას, ახალგაზრდების ფსიქო-სოციალურ მხარდაჭერას, კულტურული და საგანმანათლებლო ღონისძიებების ორგანიზებას ისახავს მიზნად.
,,ჰელფინგ ჰენდს’’ ჰყავს ათობით ადგილობრივი და საერთაშორისო პარტნიორი, რომლებთან თანამშრომლობაც ორგანიზაციას საშუალებას აძლევს პროექტები მთელი ქვეყნის მასშტაბით განახორციელოს. პარტნიორთა შორისაა – ,,The Global Resilience Fund for Girls’’, სწორედ აღნიშნული ფონდის მხარდაჭერით 6 თვეა ხორციელდება პროექტი ოკუპირებულ რეგიონებსა და საზღვრისპირა სოფლებში მცხოვრები გოგონების ფსიქო-სოციალური მხარდაჭერის მიზნით COVID-19 პანდემიის პირობებში.
სულ რამდენი მონაწილე გააერთიანა პროექტმა, რა ღონისძიებები განხორციელდა და როგორია მიღებული შედეგები – ამ და სხვა თემებზე ორგანიზაციის დირექტორს, თინათინ მესხს ვესაუბრეთ:
ქალბატონო თინათინ, რატომ გადაწყვიტეთ აღნიშნული პროექტის განხორციელება, საიდან გაჩნდა ეს იდეა და აქამდე თუ გყავდათ პროექტებში ჩართული საზღვრისპირა ან ოკუპირებულ რეგიონებში მცხოვრები გოგონები?
ოკუპირებულ ტერიტორიებზე, მათ შორის საზღვრისპირა სოფლებში მდგომარეობა საკმაოდ რთული და საგანგაშოა. არსებული მძიმე უფლებრივი მდგომარეობის გათვალისწინებით, ადგილობრივებს საკმაოდ რთულ პირობებში უწევთ ცხოვრება, ჩვენ ახალგაზრდებთან ვმუშაობთ, შესაბამისად, მუდმივად ვცდილობთ ყურადღების მიღმა არ დაგვრჩეს იქ მცხოვრები ახალგაზრდები.
ამ მიმართულებით წლებია ვმუშაობთ, მაგალითად 2010 წლიდან ვახორციელებდით „მშვიდობის ელჩებისა“ და „ლიდერ გოგონათა კლუბებს“ გალის რესურს ცენტრთან და აფხაზეთის მთავრობასთან თანამშრომლობით. ეს პროგრამები, გვაძლევდა შესაძლებლობას ეს ახალგაზრდები, განსაკუთრებით გოგონები, არ დარჩენილიყვნენ არსებული შესაძლებლობების მიღმა. პანდემიის დაწყების შემდეგ, არსებული პროგრამების ფორმატი ბუნებრივია შეიცვალა, გაჩნდა ფსიქოლოგის ჩართულობის საჭიროებაც და ამ პროგრამით სწორედ ამ მიმართულებით წარიმართა მუშაობა.
რა ღონისძიებები განხორციელდა აღნიშნული პროექტის ფარგლებში?
პროექტში თანატოლ-განმანათლებელი გოგონები არიან ჩართულები, რომლებიც მონაწილეობენ დაგეგმილ ღონისძიებებში. ამავდროულად, აქტიურად უწყობენ ხელს სხვა გოგონათა ჩართულობასაც სამიზნე რეგიონებიდან.
პროექტი 2 ეტაპად განხორციელდა, პირველ ეტაპზე საზღვრისპირა და ოკუპირებული რეგიონებიდან 20 გოგონა იყო ჩართული, მეორე ეტაპზე საქართველოს სხვადასხვა ქალაქსა და რეგიონში მცხოვრები 15 გოგონა ჩაერთო. ღონისძიებები დისტანციურ რეჟიმში ხორციელდებოდა.
პროექტის ფარგლებში გამოიკვეთა ფსიქოლოგთან ღია შეხვედრებისა და მიზნობრივი ვებინარების ჩატარების საჭიროება. შესაბამისად, ,,ჰელფინგ ჰენდის’’ ორგანიზებით ყოველკვირეულად იგეგმებოდა ონლაინ-შეხვედრები პროფესიონალ ფსიქოლოგთან, ქალბატონ ლია ჭილაშვილთან, ის საუბრობდა ახალგაზრდებისთვის აქტუალურ საკითხებზე, პანდემიის პირობებში წამოჭრილ პრობლემებზე, როგორიცაა მაგალითად: სკოლის, უნივერსიტეტის დახურვისა და თანატოლებთან პირდაპირი, აქტიური ინტერაქციის შეზღუდვის გამო მოზარდებში გახშირებული მენტალური ჯანმრთელობის პრობლემები, მათ შორის: დეპრესია, შფოთვითი აშლილობა, თვითშეფასებასთან დაკავშირებული საკითხები, კომპლექსები, და ა.შ.
მონაწილე გოგონები ძალიან აქტიურად ერთვებოდნენ შეხვედრებში, სვამდნენ მათთვის საინტერესო შეკითხვებს, უსმენდნენ ფსიქოლოგს, იზიარებდნენ სხვათა მოსაზრებებს… ვფიქრობთ, რომ აღნიშნული პროექტით ხელი შევუწყვეთ გოგონების გაძლიერებას, მათში მოტივაციის ამაღლებას და ახალი მიზნების დასახვას.
ცნობილია, რომ მონაწილეებს ჯგუფური შეხვედრების გარდა, ინდივიდუალურ ფსიქოლოგიურ კონსულტაციებსაც სთავაზობდით. რამდენად აქტიურად გადიოდნენ მონაწილეები ასეთ კონსულტაციებს?
დიახ, პროექტის დაწყებიდანვე ცხადი გახდა, რომ ჯგუფურთან ერთად, სადაც ყველასთვის ასე თუ ისე საერთო პრობლემატიკა იყო განხილული, არსებობდა ინდივიდუალური კონსულტაციის საჭიროებაც. ამრიგად, პროექტის ფარგლებში ასევე შესაძლებელი იყო ანონიმური და ინდივიდუალური კონსულტაციის გავლა ფსიქოლოგთან. ამ მიმართულებითაც აქტიურობდნენ გოგონები, თუმცა, მნიშვნელოვანია ისიც, რომ ფსიქოლოგიური კონსულტაციის მიღების საშუალება ეძლეოდათ, არა მხოლოდ პროექტში რეგისტრირებულ მონაწილეებს, არამედ, ნებისმიერ მსურველ გოგონას:
ორგანიზაციის ფეისბუქ გვერდზე ეტაპობრივად ვრცელდებოდა ბმულები და ინფორმაცია, რომლის მეშვეობითაც მსურველებს შეეძლოთ: შეკითხვების გამოგზავნა, ფსიქოლოგთან ღია შეხვედრაში ჩართვა, ანონიმურ შეკითხვებზე კვალიფიციური პასუხის მიღება.
თინათინ, როგორია პროექტის საბოლოო შედეგები და გეგმავს თუ არა ,,ჰელფინგ ჰენდი’’ გოგონათა ამ ჯგუფთან მუშაობის გაგრძელებას სამომავლოდ?
ძალიან დიდი სურვილი გვაქვს, რომ გოგონებთან ჩამოყალიბებული თანამშრომლობა გავაგრძელოთ, მათ ჩვენ პარტნიორებად და ჩვენი გუნდის წევრებად მოვიაზრებთ და მათთან ერთად ვფიქრობთ მსგავსი სერვისი სხვა სოფლებში მცხოვრებ გოგონებსაც გავუზიაროთ. ასევე ვფიქრობთ, რომ არსებული სერვისი კიდევ უფრო უნდა განვითარდეს, გაფართოვდეს და ეფექტიანად პასუხობდეს ახალგაზრდების ფსიქო-საგანმანათლებლო საჭიროებებს.