ყოველ კვირას, 17:00-საათიან „ქრონიკაში“ ტელეკომპანია „იმედი“ გთავაზობთ მიმოხილვას, თუ რას წერს უცხოური მედია საქართველოზე. გიორგი გახარიას ღია წერილი Daily Telegraph-ში, საპარლამენტო არჩევნები, ვითარება ოკუპირებულ ტერიტორიებზე – ეს ის თემებია, რომლებზეც უცხოურმა მედიამ ამ კვირაში გაამახვილა ყურადღება.
ბრიტანულ გაზეთ Daily Telegraph-ში საქართველოს პრემიერ-მინისტრის ღია წერილი გამოქვეყნდა სათაურით „ბრექსიტის შემდეგ დიდი ბრიტანეთი რუსეთის აგრესიიდან შავი ზღვის რეგიონის უსაფრთხოების უზრუნველყოფაში დაგვეხმარება“. პუბლიკაციაში გიორგი გახარია თავისუფლებისა და დემოკრატიის მხარდაჭერის საკითხში დასავლეთის საერთო მიდგომაზე საუბრობს.
ყველაზე თავისუფალი, ღია და სამართლიანი არჩევნების ჩატარება, რაც კი ოდესმე ჩატარებულა საქართველოში, გახლავთ ჩვენი ძირითადი ვალდებულება და დიდი პასუხისმგებლობა, – ამის შესახებ საქართველოს პარლამენტის ვიცე-სპიკერმა კახა კუჭავამ ტელეკომპანია Fox-ის ახალი ამბების რადიო-ინტერვიუს დროს განაცხადა.
გაერთიანებულ სამეფოში საქართველოს საელჩოში საქართველოს სავაჭრო-სამრეწველო პალატასა და ლონდონის სავაჭრო-სამრეწველო პალატას (LCCI) შორის თანამშრომლობის შესახებ შეთანხმება გაფორმდა. დოკუმენტის მიზანი საქართველოსა და ლონდონის სავაჭრო-სამრეწველო პალატების წევრებს ერთმანეთთან საქმიანი კონტაქტების დამყარებაში დახმარება და ბრიტანული ბიზნესისთვის საქართველოში არსებული ეკონომიკური და საინვესტიციო შესაძლებლობების უკეთ წარმოჩენაა.
ქართული დიპლომატიის ძალისხმევის კიდევ ერთი შედეგია ლონდონის სამრეწველო პალატის ყოველთვიურ პუბლიკაციაში London Business Matters-ში ელჩის ვრცელი სტატია საქართველოზე, რომელიც გასულ თვეს პირველად გამოქვეყნდა.
რა ხდის საქართველოს ერთ-ერთ უდიდეს კულტურულ მემკვიდრეობად თანამედროვე მსოფლიოში? ამ კითხვაზე პასუხის მისაღებად Casamundi საქართველოს ელჩს ბრაზილიაში, დავიდ სოლომონიას ესაუბრა, რომელიც ბრაზილიაში 2017 წლის ივლისიდან იმყოფება.
ნიდერლანდურმა ვებგვერდმა ANS-online-nl-მა გამოაქვეყნა ბლოგი ღვინის უცნობ ისტორიაზე, რომელშიც აღნიშნავენ ღვინის 8 ათას-წლიან ისტორიას და ქვევრის ისტორიას. ბლოგში ასევე წერია, რომ წითელი, თეთრი და როზე ღვინოების გარდა არსებობს სასმელის სხვა ფერებიც. სტატიის ავტორს მაგალითად ქართული ყავისფერი ღვინო მოჰყვას.
ნიდერლანდური მედია კიდევ ერთ სტატიას უძღვნის Efco-ს ინვესტიციას ქართული მოცვის ბიზნესში და აღნიშნავს, რომ პრეზენტაციას საქართველოს ეკონომიკისა და მდგრადი განვითარების მინისტრი ნათია თურნავა და სოფლის მეურნეობის მინისტრი ლევან დავითაშვილი დაესწრნენ.
ღვინის დაყენების ქართულ, ათასწლოვან ტრადიციას აშუქებს უნგრული მედია. ამის შესახებ ადგილობრივი გამოცემა Baon. HU წერს.
ბრიტანული გამოცემა The Calvert Journal-ი ქართულ არქიტექტურას სტატიას უძღვნის. პუბლიკაციაში სახელწოდებით „ქართული არქიტექტურული სტუდია დაკეცილ ბეტონში ჩამალულ ყავის ქარხანას წარადგენს“ ავტორი ქართული ყავის ბრენდის „მეამას“ სათაო ოფისზე წერს, რომელიც არქიტექტურულმა კომპანიამ Giorgi Khmaladze Architects შექმნა.