ნინო წილოსანი: ადამიანზე ორიენტირებული პოლიტიკა იყო და იქნება ჩვენი პრიორიტეტი
Read Time:2 Minute, 3 Second
დღეს პარლამენტის საშემოდგომო სესია გაიხსნა და უამრავი მნიშვნელოვანი საკანონმდებლო ინიციატივის მიღმა საპარლამენტო ტრიბუნიდან სხვადასხვა პოლიტიკურ განცხადებსაც მოვისმენთ, ზოგჯერ ხმამაღალს, ძალიან კრიტიკულს, შეიძლება აბსურდულსაც კი, მაგრამ ყველა ამ განცხადების პარალელურად დგას რეალობა, რომელიც არ შეიძლება იყოს ორგვარი, – ამის შესახებ ნინო, უმრავლესობის წევრმა, წილოსანმა პარლამენტის პლენარულ სხდომაზე განაცხადა.
მისი თქმით, ერთმნიშვნელოვანია რეალობა, რომ საქართველო წარმატებული და ეფექტური იყო გლობალური პანდემიის წინააღმდეგ ბრძოლაში.
„ამას აღიარებს მსოფლიო, ჩვენი საერთაშორისო თანამეგობრობა და ეს სწორი პოლიტიკის დამსახურებაა. რა თქმა უნდა, ჩვენი მოქალაქეების დიდი პასუხისმგებლობისა და იმ პროფესიონალების, რომლებიც ჩართულნი იყვნენ ჩვენთან ერთად ამ ბრძოლაში. ამ შედეგის ერთ-ერთი მნიშვნელოვანი განმაპირობებელია ის, რომ ჩვენ მიერ გადადგმული ყველა ნაბიჯი მოტივირებული იყო ადამიანზე ზრუნვით.
სახელმწიფომ მძიმე მდგომარეობაში მყოფი ხალხის კომუნალური გადასახადების დაფარვა საკუთარ თავზე აიღო. როდესაც აგროპროგრამა შეიმუშავა 300 მილიონიანი დახმარებით, რომლითაც 200 000-მა ფერმერმა ისარგებლა. 120 000 სამუშაო ადგილის შენარჩუნება და 25 ადამიანის მოლოდინების გადაზღვევა იყო მოტივაცია, როცა სამშენებლო სექტორის სუბსიდირება განახორციელა. ქონების, საშემოსავლო გადასახადის, ავტოგანბაჟების გადავადება, კრედიტებზე საშეღავათო პერიოდი მიმართული იყო ადამიანზე ზრუნვისკენ. ამ პროგრამებით ისარგებლა 50 000-ზე მეტმა მოქალაქემ.
ადამიანზე ზრუნვა იყო განმაპირობებელი ასევე, როცა ხელისუფლებამ დააანონსა ონკოდაავადებულთა სრული დაფინანსება. რა თქმა უნდა, იგივე იყო მოტივაცია, როდესაც პანდემიის მძიმე შედეგების მინიმალიზაცია გვინდოდა 17 წლამდე ბავშვების 200 ლარიანი დახმარებით, რომელმაც ასევე პოზიტიური გამოხმაურება ჰპოვა გაეროს ბავშვთა ფონდის საქართველოში წარმომადგენლის მხრიდან. მან განაცხადა, რომ ეს საკვანძოდ მნიშვნელოვანი იყო. პენსიების განახლებული მოდელი, სტუდენტებისთვის დახმარება, ტურიზმის სექტორის დახმარება და სხვა პროგრამები იყო მოტივაცია იმის, რომ ჩვენ ეს პანდემია დროულად და ეფექტურად გვემართა და, რაც მთავარია, ყველა ამ პროექტის მიზანი იყო ადამიანზე ორიენტირებული პოლიტიკა. მაშინ, როდესაც შეიძლებოდა შედეგები დრამატული ყოფილიყო, ჩვენ შევძელით და ის პოზიტივად, ქვეყნისთვის შესაძლებლობად ვაქციეთ, საერთაშორისოდ აღიარებული წარმატებული ქვეყანა, მწვანე ზონა და უამრავი მნიშვნელოვანი პროექტის საწყისი. ჩვენ მიერ არჩეული ამ სწორი გზის შეცვლას ვერ შეძლებს ყიჟინი საზღვრების სრულ გახსნაზე, რაც ალბათ ვიღაცას აწყობს, სიცრუე და ტყუილი განცხადებები, ჩვენ მიერ განხორციელებული პროგრამების ცუდი ინტერპრეტაციები, რადგან რეალობა არის ერთი და ამ რეალობას ძალიან კარგად ხედავს საზოგადოება. ჩვენ ამ გაკეთებული საქმეებით მივდივართ 2020 წლის არჩევნებზე. ადამიანზე ორიენტირებული პოლიტიკა იყო და იქნება ჩვენი პრიორიტეტი. დემოკრატია, ადამიანის უფლებები, ჯანდაცვა, აგრო და ეკონომიკური სექტორების დახმარება, ჩვენი სოფლებისა და ქალაქების განვითარება არის ჩვენი პოლიტიკური ხედვა, რომლის საპირწონედაც დგას გაერთიანებული ოპოზიცია, რომლის ერთ-ერთმა ოდიოზურმა ლიდერმა 8 წლის თავზე მოიხადა ბოდიში და ისიც მხოლოდ წინასაარჩევნოდ იმისთვის, რომ აგრესიაში გვაცხოვრებდა და ქვეყანა დემოკრატიის რეგრესული გზით მიჰყავდა. სწორედ მნიშვნელოვანი პროგრამების განხორციელება გაგრძელდება, საჭიროებების იდენტიფიცირება და მისი მუდმივი კონტროლი იქნება მომავალშიც ჩვენი პოლიტიკური გუნდის სამუშაო პრიორიტეტი. ქვეყნის მართვაში ჩვენ დელეგირება გადმოგვცა მოსახლეობამ და დიდი იმედი მაქვს , რომ იგივე დელეგირებას გადმოგვცემს 2020 წლის არჩევნებში“, – განაცხადა ნინო წილოსანმა.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
Comments
0
0
