პირობითად, რომ არსებობდეს კანდიდატი დიმიტრი ყიფიანი, რომელიც ყველა ვარიანტში იგებს თბილისის არჩევნებს, კამპანია როგორ უნდა აწარმოოს, თუ არ არის ახალი საპარლამენტო არჩევნები, ანუ თუ არ იცვლება ხელისუფლება და თუ ვერ ამბობს, რომ არჩევნებში დაიცავს ხმებს, – ამის შესახებ „ერთიანობა- ნაციონალური მოძრაობის“ წევრმა, ლევან სანიკიძემ საქართველოს პირველი არხის გადაცემაში „აქტუალური თემა – მაკა ცინცაძესთან ერთად“ სტუმრობისას განაცხადა.
„ნებისმიერ ვარიანტში იმის თქმა მოუწევს, რომ 26 ოქტომბრის არჩევნები არის გაყალბებული, ამის სჯერა, თუ არ სჯერა ამ კანდიდატს და წესით და რიგით, უნდა სჯეროდეს. ამ ვითარებაში, როდესაც დამატებითი უზარმაზარი მორალური დილემაა, პოლიტპატიმრები თუ არიან ციხეში, კამპანია რაზე უნდა აწარმოოს? რა უნდა დაჰპირდეს? რის გამო უნდა გაიღოს პოლიტიკურმა პარტიამ, მაგალითად ჩვენ, რისკი, ის პოლიტიკური პასუხისმგებლობა, რომ რა? სულ რომ მოიგოს ასეთმა კანდიდატმა, ბიძინა ივანიშვილი არსებული ცესკო-თი და არსებული საზოგადოებრივი განწყობით ოპოზიციურ ამომრჩეველში, რომელიც მკვეთრად უარყოფითად აფასებს ამ სახის რუსულ სპეცოპერაციაში მონაწილეობას, როგორ წარმოუდგენია, რომ რამე შანსი არსებობს ამ სცენარის განვითარების?“, – განაცხადა ლევან სანიკიძემ.
ამ განცხადებით ლევან სანიკიძემ გადაცემის წამყვანის შეკითხვას უპასუხა, რატომ ემიჯნება „ნაციონალური მოძრაობა“ მაგალითად, ერთ-ერთი ექსპერტის შეთავაზებას, რომ თუ ოპოზიცია ერთიან კანდიდატზე შეთანხმებას მოახერხებს, ამ ტაქტიკამ შესაძლებელია, ოპოზიციას საკმაოდ დიდი წარმატება მოუტანოს და რატომ არ შეიძლება, იგივე სალომე ზურაბიშვილი იყოს თბილისში კანდიდატი, რადგან, როდესაც მის ირგვლივ გაერთიანდნენ, ოპოზიციის წარმომადგენლები ამბობდნენ, რომ მას ძალიან დიდი რეიტინგი ჰქონდა და ერთგვარად, ოპოზიციის ლიდერი იყო.
მაკა ცინცაძის შეკითხვაზე, არის თუ არა მნიშვნელოვანი „ლელოს“ არგუმენტი, რომ პარტიამ არჩევნებში მონაწილეობა ამომრჩეველთა ერთმნიშვნელოვანი განწყობის გამო გადაწყვიტა, რაც მათი თქმით, კვლევამ აჩვენა, სანიკიძემ აღნიშნა, რომ არ იცის, რამდენად სანდოა მათი პოზიციის გასამყარებლად მათივე ორგანიზაციის მიერ დაკვეთილი კვლევა, ამ კვლევის პრეზენტაცია არ მომხდარა და დეტალებს არ იცნობს, თუმცა ის, რაც „ლელოს“ კვლევიდან გამომდინარე იცის, იქაც მრავლისმეტყველი რაოდენობა ამბობს უარს არჩევნებში მონაწილეობაზე და ესეც საკმარისია, არჩევნებში მონაწილეობა არ მიიღო.
როგორც სანიკიძემ აღნიშნა, „ლელოს“, ამ პოლიტიკური ორგანიზაციის მიმართ მაინც განსხვავებული დამოკიდებულება აქვს, ვიდრე გახარიას პარტიასთან, რადგან აქამდე, „ნაციონალურ მოძრაობას“ „ლელოსთან“ ურთიერთთანამშრომლობის უკეთესი გამოცდილება ჰქონდა და ჯერ კიდევ იტოვებს იმედს, რომ მათი პოზიცია, მით უმეტეს, საზოგადოებრივი აზრიდან გამომდინარე, ბოიკოტისკენ ჩამოყალიბდება.
შეკითხვაზე, რას ნიშნავს მისი განცხადება „არ მიიღებენ კი არა, ვერ უნდა მიიღოს „ლელომაც“ მონაწილეობა არჩევნებში“, რა იგულისხმება და როგორ უნდა აიძულონ „ლელო“, რომ არჩევნებში მონაწილეობაზე უარი თქვას, სანიკიძემ აღნიშნა, რომ ამას საზოგადოებრივი აზრით აიძულებენ და საზოგადოებრივი აზრის ფორმირებას ისე შეძლებენ, რომ „ლელოს“ ძალიან გაუჭირდეს არჩევნებში მონაწილეობის მიღება.
„საზოგადოებრივი აზრიდან, აბა ხელებს ხომ არ გადავუგრეხთ ვინმეს? საზოგადოებრივი აზრის ფორმირებაში მივიღებთ მონაწილეობას“, – განაცხადა ლევან სანიკიძემ.
მისი თქმით, შესაძლოა, „ლელოში“ მიმდინარეობდეს აქტიური ფიქრი, რომ მთავარი ოპოზიციური ძალა გახდნენ.