ეს არის სრული ბოდვა. მგონი, ყველა კარგად ხვდებით, რატომ დაიწყო ეს ყველაფერი და რა დგას ამის უკან, – ასე პასუხობს თბილისის მერი კახა კალაძე ჟურნალისტის კითხვას ეუთო-ს „მოსკოვის მექანიზმის“ ფარგლებში საქართველოზე მომზადებულ ანგარიშთან დაკავშირებით.
მერის განცხადებით, ქვეყნის შიგნით რა კანონებია მისაღები, ამას საქართველოს ხელისუფლება გადაწყვეტს.
„ეს არის სრული ბოდვა. მგონი, ყველა კარგად ხვდებით, რატომ დაიწყო ეს ყველაფერი და რა არის ამის უკან: ჩვენ გვთხოვენ, გავაუქმოთ ოჯახური ღირებულებებისა და არასრულწლოვანთა დაცვის კანონი, გვთხოვენ, გავაუქმოთ „გამჭვირვალობის კანონი“, ასევე, ამერიკული „ფარა“ და ვიმოქმედოთ არა ქვეყნის ინტერესებიდან გამომდინარე, არამედ მათი სურვილების შესაბამისად. ბევრჯერ ვთქვით და კიდევ ერთხელ გავიმეორებ: საქართველოს ხელისუფლება ყველაფერს გააკეთებს, რაც სჭირდება ჩვენს სამშობლოს და ქართველ ხალხს. დასრულდა ის დრო, როდესაც გარედან მოდიოდა მითითებები, დავალებები და თავჩაღუნული იღებდნენ გადაწყვეტილებებს. ჩვენ ვიმოქმედებთ ქვეყნის ინტერესებიდან გამომდინარე. ქვეყნის შიგნით რა კანონებია საჭირო, ამას გადაწყვეტს საქართველოს ხელისუფლება, რომელიც ჩვენი ქვეყნის მოსახლეობის უმრავლესობამ აირჩია, და არა გარედან ვიღაცეების დავალებით და თითის ქნევით მიღებული გადაწყვეტილებებით“, – განაცხადა კახა კალაძემ.
რაც შეეხება ჟურნალისტის კითხვას, ვის ინტერესებს ემსახურება აღნიშნული ანგარიში, მერმა უპასუხა:
„ვხვდებით, რა პროცესები მიდის. მაგალითად, უკრაინის სასამართლომ დაუშვა ერთნაირსქესიანთა ქორწინება. ყველაფერი ვიცით, საით მიდის. გარე აქტორების სურვილია, რომ ისეთი ქვეყნები, როგორებიც არიან საქართველო, უკრაინა, გამოყენებული იყოს მათი ინტერესების გასატარებლად. ჩვენ არაერთხელ გვითქვამს, ღიად, გაცხადებულად, რომ არ დავუშვებთ ისეთი გადაწყვეტილებების მიღებას, რომ დავაზიანოთ ჩვენი ქვეყნის ინტერესი, ჩვენი ეკონომიკა, ქართველი ხალხი. ამას არ გააკეთებს საქართველოს ხელისუფლება. ყოველთვის გადავდგამთ ისეთ ნაბიჯებს, რომელიც ჩვენს სამშობლოს და ქართველ ხალხის სჭირდება“, – განაცხადა კახა კალაძემ.
მისივე თქმით, მისასალმებელია, რომ რიგმა ქვეყნებმა აღნიშნულ დოკუმენტს მხარი არ დაუჭირეს.
„მთელმა რიგმა ქვეყნებმა, როგორებიცაა სომხეთი, აზერბაიჯანი, თურქეთი, ესპანეთი, აშშ, საფრანგეთი, მხარი არ დაუჭირეს ამ გადაწყვეტილებას, რაც მისასალმებელია. კიდევ ერთხელ ვიმეორებ, ეს არის სრული ბოდვა, რაც არის ამ დოკუმენტში“, – აღნიშნა მერმა.
მერმა აღნიშნულ ვითარებაში ხელისუფლების სამოქმედო გეგმაზეც ისაუბრა. როგორც მან განაცხადა, მთავრობა ყველა გადაწყვეტილებას მხოლოდ ქვეყნის ინტერესებიდან გამომდინარე მიიღებს.
„ჩვენი სამოქმედო გეგმა არის მარტივი – გადაწყვეტილებები, რომელთა მიღება ხდება საქართველოს ხელისუფლების მხრიდან, ეს იქნება კანონების მიღება თუ ახალი საკანონმდებლო ინიციატივები, ყველაფერი კეთდება ქვეყნის ინტერესებიდან გამომდინარე. თქვენ ხედავთ, რა პროცესები მიდის მსოფლიოში, რა ხდება ახლო აღმოსავლეთში, როგორი საფრთხის წინაშე დგას მთელი მსოფლიო. შესაბამისად, ყველა ქვეყანა მოქმედებს თავისი ინტერესებიდან გამომდინარე. ჩვენ არ დავუშვებთ, რომ ვიღაცას, დიდ ქვეყანას, დიდ პოლიტიკურ მოთამაშეებს მივცეთ შესაძლებლობა, რომ ჩვენი პატარა, მაგრამ უდიდესი კულტურისა და ტრადიციების მქონე ქვეყანა გამოიყენოს თავისი ინტერესებისთვის. ჩვენ გამოვლილი გვაქვს ეს, საკუთარ თავზე გვაქვს გამოცდილი, რამხელა უბედურება შეიძლება მოიტანოს ომმა, 2008 წლის ტკივილები და ჭრილობები ჯერ კიდევ არ მოგვიშუშებია. შესაბამისად, ვიმოქმედებთ მხოლოდ ქვეყნის ინტერესებიდან გამომდინარე“, – განაცხადა კახა კალაძემ.
ეუთო-მ „მოსკოვის მექანიზმის“ ფარგლებში საქართველოზე მომზადებული ანგარიში გამოაქვეყნა, რომელშიც განხილულია საქართველოში ადამიანის უფლებებისა და ფუნდამენტური თავისუფლებების კუთხით 2024 წლის გაზაფხულიდან განვითარებული მოვლენები და მოცემულია რეკომენდაციები. ამასთან, ეუთო-ს „მოსკოვის მექანიზმის“ ფარგლებში მომზადებულ ანგარიშში ნათქვამია, რომ „უნდა გაუქმდეს ოჯახური ღირებულებების, გამჭვირვალობის, აგენტების რეგისტრაციის კანონები და უცხოურ გრანტებთან დაკავშირებული დებულებები“.