„ბიბისი“ – ისრაელის საპარლამენტო არჩევნების წინასწარი შედეგებით, ბენიამინ ნეთანიაჰუს ბლოკი ლიდერობს, თუმცა მთავრობის ფორმირებისთვის საჭირო 61 მანდატის მოპოვებას ვერ ახერხებს

პედიატრი, ინგა მამუჩიშვილი მიმართვას ავრცელებს:„შემოდგომის დადგომასთან ერთად რესპირაციული ვირუსული ინფექციების შემთხვევებმა იმატა. მშობლები ხშირად მეკითხებიან: “გრიპი უკვე დაიწყო?“, “როგორ გავარჩიოთ გრიპი ჩვეულებრივი გაციებისგან?“ და “როგორ მოვუაროთ ბავშვს სახლის პირობებში?“რა ვითარებაა ამჟამად?2026 წლის ოქტომბრის ბოლო მონაცემებით, საქართველოში ძირითადად ცირკულირებს: რინოვირუსი -ამჟამად ყველაზე გავრცელებული რესპირაციული ვირუსია, რომელიც უმეტესად იწვევს სურდოს, ცხვირის გაჭედვას, ცემინებასა და ხველას.ადენოვირუსი-ხშირად მიმდინარეობს ცხელებით, ყელის ტკივილით, კონიუნქტივიტით, ზოგჯერ დიარეითაც. პარაგრიპის ვირუსი-განსაკუთრებით საყურადღებოა მცირეწლოვან ბავშვებში, რადგან შეიძლება გამოიწვიოს ლარინგიტი და ცრუ კრუპი.რესპირაციულ-სინციტიური ვირუსი (RSV)-ჩვილებში შეიძლება გამოიწვიოს ბრონქიოლიტი, ხიხინი და სუნთქვის გაძნელება.კორონავირუსი-კვლავ ცირკულირებს და შესაძლოა გამოვლინდეს როგორც მსუბუქი გაციებით, ისე უფრო გამოხატული რესპირაციული სიმპტომებით.  გვხვდება თუ არა გრიპი? სეზონის დასაწყისში A ტიპის გრიპის ცალკეული შემთხვევები დაფიქსირდა, თუმცა ოქტომბრის ბოლო კვირების მონაცემებით მისი აქტიური გავრცელება ჯერ არ დასტურდება. გრიპის შემთხვევების მატება მომდევნო თვეებშია მოსალოდნელი.როგორ ამოვიცნოთ გრიპი?გრიპისთვის უფრო დამახასიათებელია დაავადების უეცარი დასაწყისი, მაღალი ტემპერატურა, თავისა და კუნთების ტკივილი, ძლიერი სისუსტე და მშრალი ხველა.ჩვეულებრივი გაციებისას კი ხშირად წამყვანია სურდო, ცემინება, ყელის დისკომფორტი და შედარებით მსუბუქი საერთო მდგომარეობა.თუმცა მხოლოდ კლინიკური ნიშნებით ვირუსის ზუსტი იდენტიფიცირება ყოველთვის შეუძლებელია.  როგორ ვუმკურნალოთ ბავშვს სახლის პირობებში?თუ ბავშვის ზოგადი მდგომარეობა დამაკმაყოფილებელია და არ აღენიშნება საგანგაშო ნიშნები: მიეცით საკმარისი სითხე, ჩვილებში გააგრძელეთ ძუძუთი კვება ან ფორმულა. უზრუნველყავით დასვენება, ოთახის განიავება და კომფორტული ტემპერატურა. ცხვირის გაჭედვისას გამოიყენეთ ფიზიოლოგიური ხსნარი. ცხელებისა და დისკომფორტის დროს გამოიყენეთ პარაცეტამოლი ან, 6 თვის ასაკიდან, იბუპროფენი ასაკისა და წონის შესაბამისი დოზით.1 წელზე უფროს ბავშვებში ხველის შესამსუბუქებლად შეიძლება თაფლის გამოყენება.არ გამოიყენოთ ანტიბიოტიკი ექიმის დანიშნულების გარეშე ვირუსებზე ის არ მოქმედებს.არ არის რეკომენდებული ბავშვებში ასპირინი და თვითნებურად ხველის საწინააღმდეგო კომბინირებული პრეპარატები.  როდის უნდა მივმართოთ ექიმს დაუყოვნებლივ?თუ ბავშვს აღენიშნება სუნთქვის გაძნელება, ტუჩების სილურჯე, გამოხატული მოდუნება, გაუწყლოების ნიშნები, კრუნჩხვა ან მდგომარეობის მკვეთრი გაუარესება, აუცილებელია გადაუდებელი სამედიცინო შეფასება. 3 თვემდე ასაკის ჩვილში 38°C ან მეტი ტემპერატურა დაუყოვნებელი შეფასების საფუძველია.  როგორ დავიცვათ ბავშვები?გრიპის პრევენციის ყველაზე ეფექტიანი სპეციფიკური საშუალებაა ყოველწლიური ვაქცინაცია, რომელიც რეკომენდებულია 6 თვის ასაკიდან.ასევე მნიშვნელოვანია ხელების ჰიგიენა, დახურული სივრცეების განიავება, ავადმყოფ ადამიანებთან ახლო კონტაქტის შეზღუდვა და სიმპტომების მქონე ბავშვის სახლში დატოვება.ჯანმრთელობას გისურვებთ ყველას

მსგავსი ტრაგედია ესპანეთში აღარ უნდა განმეორდეს, – ამის შესახებ ესპანეთის პრემიერ-მინისტრმა, პედრო სანჩესმა მატარებლების შეჯახებასთან დაკავშირებით განაცხადა.პედრო სანჩესმა მომხდარს საშინელი ტრაგედია უწოდა და საგანგებო სამსახურებს გაწეული დახმარებისთვის მადლობა გადაუხადა.პედრო სანჩესმა ასევე სამძიმარი გამოუცხადა დაღუპულთა ოჯახებს.„ესპანეთის მთავრობის მთავარი პრიორიტეტია დაზარალებულებზე ზრუნვა, მათთვის დახმარების გაწევა და უზრუნველყოფა, რომ რაც შეიძლება მეტი ადამიანი გადარჩეს“, – განუცხადა ავარიის ადგილზე მყოფმა პრემიერ-მინისტრმა ჟურნალისტებს.ამასთან, პედრო სანჩესის თქმით, მთავრობის მთავარი მიზანი ამჟამად ავარიის გამომწვევი მიზეზების დადგენაა.„უსაფრთხოების სისტემაში ხარვეზები თუ იყო, ცხადია, ისინი უნდა აღმოვფხვრათ. ნათელია, რომ უსაფრთხოების დონე კიდევ უფრო უნდა გავზარდოთ, რადგან მსგავსი ტრაგედია ჩვენს ქვეყანაში აღარ უნდა განმეორდეს“, – აღნიშნა სანჩესმა.ესპანეთში მომხდარი სარკინიგზო ავარიის შედეგად, სულ მცირე, 68 ადამიანი დაიღუპა. მიმდინარე წლის იანვარში ესპანეთის სამხრეთ ნაწილში კიდევ ერთი მასშტაბური სარკინიგზო ავარია მოხდა.

უეფა-ს ახალგაზრდულ ლიგაზე „დინამო თბილისმა“ „კოპენჰაგენს“ უმასპინძლა, შესანიშნავი თამაში აჩვენა და დანიის ჩემპიონი დამაჯერებლად დაამარცხა – 3:0.ტურნირის მეორე რაუნდის პირველი შეხვედრა, რომელიც „დინამო არენაზე“ გაიმართა, თბილისელებმა შესანიშნავად დაიწყეს – ანგარიში თორნიკე კვარაცხელიამ მე-4 წუთზე გახსნა, მერე მისი გადაცემით სანდრო მიქაუტაძემ (27) „დინამოს“ უპირატესობა გაზარდა.მატჩის გმირი კი თორნიკე კვარაცხელია გახდა. მან შესვენების შემდეგ, 51-ე წუთზე, მარცხენა ფლანგზე წამოწყებული სწრაფი კონტრშეტევა შესანიშნავი დარტყმით დააგვირგვინა, გოლი კი ხვიჩას სტილში აღნიშნა.ახალაგზრდული ჩემპიონთა ლიგის მე-2 რაუნდის საპასუხო შეხვედრა 4 ნოემბერს დანიაში გაიმართება. მატჩს კოპენჰაგენის „ვალბი სპორტს პარკი“ უმასპინძლებს.

საქართველოს ტექნიკურ უნივერსიტეტში VI საერთაშორისო სამეცნიერო-პრაქტიკული სემინარი - „ენერგოდამზოგი ტექნოლოგიები და გარემოს ინჟინერია“ გაიმართა. საერთაშორისო სამეცნიერო ღონისძიებამ სხვადასხვა ქვეყნის მკვლევრებსა და დარგის სპეციალისტებს ენერგოეფექტურობის, გარემოს დაცვისა და მდგრადი საინჟინრო განვითარების აქტუალურ საკითხებზე სამეცნიერო გამოცდილებისა და კვლევის შედეგების გაზიარების შესაძლებლობა მისცა.ინფორმაციას საქართველოს ტექნიკური უნივერსიტეტი ავრცელებს.უნივერსიტეტის ცნობით, სემინარი საქართველოს ტექნიკური უნივერსიტეტისა და მისი საერთაშორისო პარტნიორი უნივერსიტეტებისა და ორგანიზაციების თანამშრომლობით ჩატარდა. ღონისძიების თანადამფუძნებლები არიან ბელოსტოკის ტექნოლოგიური უნივერსიტეტი, ლუბლინის სიცოცხლის შემსწავლელ მეცნიერებათა უნივერსიტეტი, თურქეთის ეკონომიკური და სოციალური კვლევის ინსტიტუტი, სომხეთის არქიტექტურისა და მშენებლობის ეროვნული უნივერსიტეტი და ტაშკენტის არქიტექტურისა და სამოქალაქო ინჟინერიის უნივერსიტეტი.სემინარი გახსნა საქართველოს ტექნიკური უნივერსიტეტის სამშენებლო ფაკულტეტის დეკანმა, პროფესორმა ზურაბ გვიშიანმა. მისასალმებელი სიტყვით ღონისძიების მონაწილეებს შესაძლებლობა მიეცათ, გაცნობოდნენ სემინარის მიზნებსა და საერთაშორისო სამეცნიერო თანამშრომლობის მნიშვნელობას ენერგოდამზოგი ტექნოლოგიებისა და გარემოს ინჟინერიის მიმართულებით.„ენერგოეფექტურობა და გარემოსდაცვითი მდგრადობა თანამედროვე მსოფლიოს ერთ-ერთი უმნიშვნელოვანესი ტექნოლოგიური და საზოგადოებრივი გამოწვევაა. ენერგორესურსების რაციონალური გამოყენება, გარემოზე ტექნოგენური ზემოქმედების შემცირება და ინოვაციური საინჟინრო გადაწყვეტილებების დანერგვა მოითხოვს არა მხოლოდ მაღალკვალიფიციურ კვლევებს, არამედ სხვადასხვა ქვეყნის სამეცნიერო და საგანმანათლებლო ინსტიტუტების მჭიდრო თანამშრომლობას. ამ კონტექსტში საქართველოს ტექნიკურ უნივერსიტეტში ჩატარებული საერთაშორისო სემინარი მნიშვნელოვანია როგორც სამეცნიერო ცოდნის გაცვლის, ისე პროფესიული დიალოგისა და ახალი თანამშრომლობითი შესაძლებლობების განვითარების თვალსაზრისით.კვლევების შედეგები, თანამედროვე ტექნოლოგიური მიდგომები და საერთაშორისო გამოცდილება ქმნის საფუძველს ისეთი გადაწყვეტილებების შემუშავებისთვის, რომლებიც ხელს შეუწყობს ენერგეტიკული რესურსების ეფექტიან გამოყენებას, საინჟინრო სისტემების გაუმჯობესებასა და გარემოსდაცვითი პასუხისმგებლობის გაძლიერებას“, - აღნიშნა თავის გამოსვლაში ზურაბ გვიშიანმა.სემინარზე 20 ქვეყნის მეცნიერთა მონაწილეობით 58 სამეცნიერო ნაშრომი იყო წარმოდგენილი.სემინარში მონაწილეობდნენ უცხოელი მეცნიერები და მკვლევრები ჩეხეთის რესპუბლიკის, პოლონეთისა და სომხეთის წამყვანი საგანმანათლებლო და სამეცნიერო დაწესებულებებიდან. მოხსენებებით წარდგნენ სამხრეთ ბოჰემიის უნივერსიტეტის ჯანმრთელობისა და სოციალურ მეცნიერებათა ფაკულტეტის წარმომადგენლები სტეფან კავანი და ჟანა რედინოვა; ლუბლინის სიცოცხლის შემსწავლელ მეცნიერებათა უნივერსიტეტის მეცნიერები მაია ბრუკი და მალგოჟატა კორალ-კოვალჩუკი; სომხეთის არქიტექტურისა და მშენებლობის ეროვნული უნივერსიტეტის (NUACA) წარმომადგენლები სამველ საჰაკიანი, არესტაკ სარუხანიანი და სტეფან ხაჩატრიანი. სამეცნიერო მოხსენებებით ასევე წარდგნენ აკადემიკოს ეგიაზაროვის წყლის პრობლემებისა და ჰიდრავლიკური ინჟინერიის ინსტიტუტის პროფესორები ჰოვანეს ტოკმანჯიანი და ვაჩე ტოკმანჯიანი.სტუ-ის ინფორმაციით, VI საერთაშორისო სამეცნიერო-პრაქტიკული სემინარი „ენერგოდამზოგი ტექნოლოგიები და გარემოს ინჟინერია“ ოთხ დღეს გასტანს.

საქართველოს პრეზიდენტი, მიხეილ ყაველაშვილი აღმოსავლეთ და ცენტრალური ევროპისა და ცენტრალური აზიის ნარკოპოლიტიკის კომისიის (ECECACD) თავმჯდომარეს, პოლონეთის ყოფილ პრეზიდენტ ალექსანდერ კვაშნევსკისა და თანმხლებ დელეგაციას შეხვდა. პრეზიდენტის სასახლეში გამართულ გაფართოებულ შეხვედრაზე ყურადღება გამახვილდა ნარკოპოლიტიკის სფეროში არსებულ რეგიონულ და გლობალურ გამოწვევებზე, ასევე, პრევენციის, მკურნალობისა და რეაბილიტაციის მიმართულებით თანამშრომლობის შესაძლებლობებზე. შეხვედრაზე საუბარი შეეხო საქართველოს გამოცდილებას საზოგადოებრივი ჯანდაცვის მიმართულებით. საქართველო რეგიონში ერთ-ერთი პირველი ქვეყანა იყო, რომელმაც ზიანის შემცირების პროგრამები დანერგა. აღინიშნა 2015 წელს დაწყებული C ჰეპატიტის ელიმინაციის პროგრამა, რომლის ფარგლებში ათიათასობით ადამიანმა უფასო მკურნალობა მიიღო, ხოლო შესაბამისი სერვისები ზიანის შემცირების ცენტრებთან ინტეგრირდა. მიხეილ ყაველაშვილმა კომისიის წევრებს გააცნო 2027 წელს თბილისში ჯანსაღი ცხოვრების წესის ხელშეწყობის პირველი გლობალური სამიტის ჩატარების ინიციატივაც, რომლის გამართვაც ჯანმრთელობის მსოფლიო ორგანიზაციასთან, ოლიმპიურ კომიტეტთან და საერთაშორისო პარალიმპიურ კომიტეტთან თანამშრომლობით განიხილება. ინიციატივის მიზანია ფიზიკური აქტივობის ხელშეწყობისა და ჯანსაღი ცხოვრების წესის მიმართულებით საერთაშორისო თანამშრომლობის გაძლიერება. პრეზიდენტმა აღნიშნა, რომ ფუნდამენტურად მნიშვნელოვანია ახალგაზრდებისთვის ისეთი ალტერნატიული სივრცეების შექმნა, სადაც მათი ყოველდღიური ცხოვრება მრავალფეროვანი სპორტული, საგანმანათლებლო-შემეცნებითი თუ გასართობი აქტივობებით დაიტვირთება, როგორც მათი ფსიქიკური და მენტალური, ასევე ფიზიკური ჯანმრთელობის ხელშეწყობის მიზნით. აქვე დასძინა, რომ სახელმწიფოს მისიაა ჯანმრთელი, მორალურად მყარი და ეროვნული ცნობიერებით განმსჭვალული თაობების აღზრდა. შეხვედრის დასასრულს მიხეილ ყაველაშვილმა მადლობა გადაუხადა ალექსანდერ კვაშნევსკისა და კომისიის წევრებს საქართველოში ვიზიტისთვის და იმედი გამოთქვა, რომ შეხვედრა ნაყოფიერი და გრძელვადიანი თანამშრომლობის საფუძველი გახდება.