საქართველოს ტექნიკურ უნივერსიტეტსა და თბილისის მუნიციპალიტეტის მერიას შორის საგანმანათლებლო სფეროში ურთიერთთანამშრომლობის მემორანდუმი გაფორმდა. დოკუმენტს ხელი მოაწერეს სტუ-ის რექტორმა, აკადემიკოსმა დავით გურგენიძემ და თბილისის მერის მოადგილემ, კახაბერ გულედანმა. ინფორმაციას საქართველოს ტექნიკური უნივერსიტეტი ავრცელებს.
უნივერსიტეტის ცნობით, ღონისძიებას ესწრებოდნენ სტუ-ის კანცლერი, პროფესორი კარლო კოპალიანი, უნივერსიტეტის ადმინისტრაციის წარმომადგენლები, ფაკულტეტების დეკანები, პროფესორ-მასწავლებლები და სტუდენტები. ასევე, თბილისის მუნიციპალიტეტის ინსპექციის უფროსი ლაშა მაჭავარიანი და თბილისის მუნიციპალური ინსპექციის უფროსის მოადგილე ზაზა კვიციანი.
ურთიერთთანამშრომლობის მემორანდუმის ფარგლებში, მხარეები შეთანხმდნენ, რომ თბილისის მერია აქტიურად დაუჭერს მხარს უნივერსიტეტის საგანმანათლებლო საქმიანობას, რომლის მიზანიც სტუდენტების პროფესიული განვითარებისა და კვალიფიკაციის ამაღლების ხელშეწყობაა.
საქართველოს ტექნიკური უნივერსიტეტის რექტორის, დავით გურგენიძის განცხადებით, მემორანდუმზე ხელმოწერით თბილისის მერია მნიშვნელოვან მხარდაჭერას უცხადებს საქართველოს ტექნიკურ უნივერსიტეტს სტუდენტებისათვის პროფესიული უნარ-ჩვევების გამომუშავებისა და პრაქტიკული გამოცდილების მიღების ხელშეწყობის თვალსაზრისით.
„საქართველოს ტექნიკურ უნივერსიტეტს თბილისის მერიასთან მჭიდრო თანამშრომლობა აკავშირებს. თბილისის მერიას აქვს სპეციალური სტაჟირების პროგრამა, ისევე როგორც, სტიპენდიების პროგრამა, რომელშიც უნივერსიტეტის არაერთი სტუდენტია ჩართული. უნივერსიტეტსა და მერიას შორის გაფორმებული მემორანდუმი, კიდევ მეტად გაამყარებს და გააფართოებს თანამშრომლობას. სტუდენტების პროფესიული განვითარების ხელშეწყობის მიზნით, იგეგმება ერთობლივი პროგრამების განხორციელება. უნივერსიტეტი და თბილისის მერია ერთობლივ ღონისძიებებს და პროექტებს დაგეგმავენ სხვადასხვა საგანმანათლებლო საფეხურის პროგრამების თუ სასწავლო კურსების შემუშავება-განხორციელების მიმართულებით. წარმატებას ვუსურვებ საქართველოს ტექნიკურ უნივერსიტეტს და თბილისის მუნიციპალიტეტის მერიას მემორანდუმის ფარგლებში გეგმების გამხორციელების მიმართულებით“, – განაცხადა რექტორმა დავით გურგენიძემ.
შეხვედრის დასასრულ, თბილისის მუნიციპალიტეტის მერის მოადგილემ, კახაბერ გულედანმა საქართველოს ტექნიკურ უნივერსიტეტს თანამშრომლობისთვის მზაობისთვის მადლობა გადაუხადა და თავის მხრივ, აღნიშნა, რომ თბილისის მერია მზად არის სტუდენტთათვის სტაჟირების პროგრამის განსახორციელებლად, ასევე, საგანმანათლებლო სფეროში, ახალგაზრდებისთვის კვალიფიკაციის ამაღლების, პროფესიული უნარ-ჩვევების გამომუშავებისა და პრაქტიკული გამოცდილების მიღების ხელშესაწყობად. გულედანის თქმით, უნივერსიტეტს გააჩნია საერთაშორისო სტანდარტების საგანმანათლებლო ბაზა, კვლევითი ლაბორატორიები, ტრენინგ-ცენტრები, რაც სამომავლოდ, მჭიდრო თანამშრომლობის გარანტიაა.