როგორი იქნება გუდიაშვილის რეაბილიტირებული მოედანი. ვიდეო

ისრაელის თავდაცვის მინისტრი ისრაელ კაცი აცხადებს, რომ ისრაელმა ირანის უზენაესი ლიდერის, აიათოლა ალი ხამენეის მოკვლის გადაწყვეტილება ნოემბერში მიიღო და ოპერაციის ჩატარებას დაახლოებით ექვსი თვის შემდეგ გეგმავდა.„ჩვენ უკვე ნოემბერში შევიკრიბეთ პრემიერ-მინისტრთან ძალიან პატარა ფორუმზე და პრემიერ-მინისტრმა დაისახა მიზანი – ხამენეის განადგურება“, – განუცხადა კაცმა ისრაელის N12 ტელევიზიას.მისი თქმით, აიათოლას მოკვლა 2026 წლის შუა პერიოდი იყო დაგეგმილი. მისივე თქმით, გეგმა საბოლოოდ ვაშინგტონს გაუზიარეს და იანვარში, ირანის წინააღმდეგ საპროტესტო აქციების დაწყების შემდეგ გაჩნდა საფრთხე, რომ ირანს შესაძლოა, აშშ-სა და ისრაელზე იერიში მიეტანა, ამიტომაც ირანის სულიერი ლიდერის ლიკვიდაციის გეგმა დაჩქარდა.ცნობისთვის, ისრაელმა არაერთხელ განაცხადა, რომ მისი მიზანია ირანის ბირთვულ პროგრამასა და ბალისტიკური რაკეტების პროექტში არსებული ეგზისტენციალური საფრთხის აღმოფხვრა და რეჟიმის შეცვლა. „როიტერი“ წერს, რომ ირანის მმართველებმა ჯერჯერობით ძალაუფლების დათმობის არანაირი ნიშანი არ გამოავლინეს.ირანის სახელმწიფო მედიამ პირველ მარტს დაადასტურა, რომ ქვეყნის სულიერი ლიდერი აიათოლა ალი ხამენეი დაიღუპა.

ევროკავშირის საგარეო პოლიტიკის ხელმძღვანელი კაია კალასი აცხადებს, რომ „ირანი ომის ექსპორტიორია“ და და ის ახლო აღმოსავლეთში კონფლიქტის ესკალაციას ცდილობს.შვეიცარიის საგარეო საქმეთა მინისტრ იგნაციო კასისთან ერთად ციურიხში გამართულ პრესკონფერენციაზე კალასმა აღნიშნა, რომ ამჟამად ირანის რეჟიმი ცდილობს, რაც შეიძლება მეტი ქვეყანა ჩაითრიოს ამ ომში. მისი თქმით, როგორც ნატო-ს, ასევე ევროკავშირს აქვთ მექანიზმები, რომლებიც წევრებს საშუალებას აძლევს, გადაწყვიტონ, სჭირდებათ თუ არა დახმარება სხვა წევრი ქვეყნებისგან.„ირანი ომის ექსპორტიორია და სინამდვილეში, ამჟამად, რეჟიმი ცდილობს, რაც შეიძლება მეტი ქვეყანა ჩაითრიოს ამ ომში. თუმცა, ირანი მარტო იბრძვის და მისი სამხედრო შესაძლებლობები განუსაზღვრელი არ არის. არავინ იცის, რას უმზადებს ირანს მომავალი. როგორც წესი, რეჟიმები შიგნიდან ინგრევა და არა გარედან. ირანი მნიშვნელოვნად დასუსტებულია და ირანელ ხალხს აქვს შანსი, თავად განსაზღვროს საკუთარი მომავალი. ჩვენ ვეცადოთ ყველაფერი გავაკეთოთ დაძაბულობის შესამცირებლად, რომ ის უფრო შორს არ წავიდეს, რადგან რეგიონს კიდევ ერთი ომი არ სჭირდება“- განაცხადა კალასმა.

ისრაელის თავდაცვის ძალებში აცხადებენ, რომ ირანის წინააღმდეგ „ოპერაციის შემდეგ ფაზაზე გადადიან“.IDF-ის შტაბის უფროსის, გენერალ-ლეიტენანტ ეიალ ზამირის თქმით, ეს „რეჟიმს და მის სამხედრო შესაძლებლობებს კიდევ უფრო დაანგრევს“, რადგან აშშ და ისრაელი ერთობლივი ოპერაციით ირანზე ზეწოლის გაზრდასა და მის კიდევ უფრო დასუსტებას ცდილობენ.ზამირის თქმით, ისრაელი ირანს ექვსი დღის განმავლობაში „შეუჩერებლად“ ურტყამს და ოპერაცია გეგმის მიხედვით მიმდინარეობს.„მოულოდნელი დარტყმის ფაზის დასრულების შემდეგ, რომლის დროსაც ჩვენ დავამყარეთ საჰაერო უპირატესობა და ჩავახშეთ ბალისტიკური რაკეტების მასივი, ახლა ოპერაციის შემდეგ ფაზაზე გადავდივართ. ამ ფაზაში ჩვენ კიდევ უფრო დავანგრევთ რეჟიმს და მის სამხედრო შესაძლებლობებს. წინ კიდევ ბევრი სიურპრიზი გველის, რომელთა გამხელას არ ვაპირებ“,- განაცხადა ზამირმა.

საქართველოს ინფრასტრუქტურის სამინისტროს საავტომობილო გზების დეპარტამენტის ინფორმაციით, რთული მეტეოროლოგიური პირობების (შეზღუდული ხილვადობა და ქარბუქი) გამო, შიდასახელმწიფოებრივი მნიშვნელობის კოდა–ფარცხისი–მანგლისი–წალკა-ნინოწმინდის საავტომობილო გზის კმ94-კმ110 (ფარავნის უღელტეხილი) მონაკვეთზე, დროებით აკრძალულია ყველა სახის ავტოტრანსპორტის მოძრაობა. ამავე საავტომობილო გზის კმ110-კმ146 მონაკვეთზე, აკრძალულია მისაბმელიანი და ნახევრად მისაბმელიანი ავტოტრანსპორტის მოძრაობა, ხოლო დანარჩენი სახის ავტოტრანსპორტის მოძრაობა თავისუფალია.საავტომობილო გზის კმ1-კმ94 (კოდა-აიაზმა) მონაკვეთზე ავტოტრანსპორტის მოძრაობა თავისუფალია.

პარტიები, რომლებიც ხან შედიან პარლამენტში და ხან არა, არიან მოღალატეები, - ამის შესახებ საქართველოს მეხუთე პრეზიდენტმა სალომე ზურაბიშვილმა Facebook ლაივში განაცხადა, სადაც ის ხალხის კითხვებს პასუხობს."ბოტების გარდა მე "ოცნების" მხარდამჭერი არ ვიცი. "ოცნება" შეეხო ყველას - დიასპორას, მშობელს, სტუდენტებს, არავინ არ გადარჩება. "ოცნება" შეეხო ბიზნესსაც. ყველაფერი აკრძალულია ქვეყანაში და ვინ უნდა იყოს ამ პირობებში "ოცნების" მხარდამჭერი. ეს არ არის სახელმწიფო და ეს ვინმეს უნდა მოსწონდეს, თუ "ოცნებასთან" მიჯაჭვული არ ხარ?მე ვარ იმედიანად, ჩვენ მოვიგეთ ბოლო არჩევნები და ჩვენ მოვიგებთ ახალ არჩევნებს კიდე უფრო ძლიერად, თუ არ დავიწყებთ ერთმანეთის ჩაძირვას და ერთმანეთის მოტყუებას. ასეთები არიან ის პარტიები, რომლებიც ხან შედიან პარლამენტში და ხან არა და ესენი, არიან მოღალატეები და ამათთან ერთად ძალიან რთულია ეს ერთობა, მაგრამ მაინც მივაღწევთ", - განაცხადა სალომე ზურაბიშვილმა.