რა რაოდენობის წყალი უნდა დალიოს ქალმა ფეხმძიმობის პერიოდშ

ხვალინდელი შეხვედრა უფრო ტექნიკური ხასიათისაა, სადაც აღმასრულებელი ხელისუფლების სხვადასხვა რგოლის წარმომადგენლები იქნებიან. ვთვლი, რომ საუბარი უფრო მეტად იქნება იმ საკითხებზე, იმ პირობების შესრულებაზე, რა პირობებიც იყო მაშინ, როდესაც საქართველო ვიზალიბერალიზაციასთან დაკავშირებით ხელშეკრულებას აფორმებდა, – ასე უპასუხა პარლამენტის რეგიონული პოლიტიკისა და თვითმმართველობის კომიტეტის თავმჯდომარემ, ირაკლი ქადაგიშვილმა საქართველოს პირველი არხის გადაცემის „დღის თემა“ წამყვანის შეკითხვას, რა მოლოდინები აქვს ბრიუსელში ხვალ დაგეგმილ შეხვედრასთან დაკავშირებით და რამდენად ელოდება რამე კონკრეტულ გადაწყვეტილებას, რომ შესაძლოა, მომავალში უვიზო მიმოსვლის შეჩერება შეეხოს არა მხოლოდ დიპლომატიური და სამსახურებრივი პასპორტის მფლობელებს, არამედ საქართველოს ყველა მოქალაქეს.„ეს პირობები ეხება კონკრეტულად ვიზის, პასპორტის, მიგრაციული პროცესების მართვის, რეადმისიის, საზღვრის კონტროლის საკითხებს და შეიძლება ითქვას, ამ მხრივ საქართველო ნამდვილად ძალიან წარმატებულ პოლიტიკას ატარებს. ამიტომ რამე ისეთი განსაკუთრებული შენიშვნა საქართველოს მიმართ არ იქნება, თუმცა, შარშან შემოიღეს საქართველოსთან მიმართებით სწორედ ერთგვარი პოლიტიკური შეფასების კრიტერიუმი, რომელსაც კონკრეტული შკალა არ აქვს და ზოგადად არის საუბარი, რომ შეფასდება ამა თუ იმ ქვეყანაში დემოკრატიის მდგომარეობა. რა არის ახლა ეს დემოკრატიის მდგომარეობა და ვინ რას ჩათვლის დემოკრატიის უკუსვლად ან წინსვლად, ეს არის აბსოლუტურად პოლიტიკური გადაწყვეტილების საკითხი. ამიტომ, ამ გადაწყვეტილებას ხვალ ვერავინ მიიღებს, ელემენტარულად, მათი კომპეტენცია ეს არ არის და ეს საკითხი ალბათ, საბოლოო ჯამში, ან წლის ბოლოს, ან მომავალი წლის დასაწყისში უფრო პოლიტიკური განსჯის საგანი იქნება“, – განაცხადა ქადაგიშვილმა.მისი თქმით, ევროკომისია წერს, რომ საქართველოში შელახულია ადამიანის ფუნდამენტური უფლებები, რაც ასე არ არის.„წერენ, რომ საქართველოში შელახულია ადამიანის ფუნდამენტური უფლებები და ერთი მითხარით, რომელი ფუნდამენტური უფლება არის საქართველოში შელახული? ფუნდამენტური უფლება, რასაც ადამიანის უფლებები ჰქვია, საქართველოში არ არის შელახული“, – აღნიშნა ქადაგიშვილმა.თამთა სანიკიძემ გადაცემის სტუმარს შეახსენა, რომ ანგარიშში მითითებულია 2024 წლის ბოლოს აქციებზე განვითარებული მოვლენები, დემონსტრანტების მიმართ მოპყრობა, იქ კონკრეტული ძალადობრივი შემთხვევები და ასე შემდეგ, რაზეც ირაკლი ქადაგიშვილმა განაცხადა, რომ ეს არ არის ფუნდამენტურ უფლებაზე ლაპარაკი, აქ არის კონკრეტული აქცია, რომელიც იყო ძალადობრივი აქცია და რომელიც აღკვეთეს კანონის თანახმად საპოლიციო ძალებმა.როგორც პარლამენტის რეგიონული პოლიტიკისა და თვითმმართველობის კომიტეტის თავმჯდომარემ აღნიშნა, საქართველოს ხელისუფლება არაფერს ისეთს არ აკეთებს, რაც ევროპის ქვეყნებში არ არის.„რას მოგვიწოდებს ევროკავშირი ყველას და, მათ შორის, თავის შიგნით სწორედ ეს არის პოლარიზაციის და სიძულვილის დაძლევა, და როგორ დავძლიოთ? მოდით, დავძლიოთ იმავე მეთოდებით, რა მეთოდებითაც ამას ევროპის ქვეყნებში აკეთებენ. ყველა ამ ქვეყანაში სწორედ პატიმრობა, ჯარიმები ან სხვადასხვა ტიპის ადმინისტრაციული თუ სისხლისსამართლებრივი პასუხისმგებლობებია, მათ შორის, „ფეისბუქში“ გამოთქმული სიძულვილის, შეურაცხმყოფელი, დამაბულინგებელი და ათასგვარი ცუდი რამის მიმართულებით. ჩვენ ისეთს არაფერს ვაკეთებთ ან იმაზე მეტს, რაც ევროპის ქვეყნებში არ არის. ელემენტარულად, ის, რომ ჩვენ მოგვიწია რამდენიმე ანტიკონსტიტუციური, რევოლუციური თუ გადატრიალების სცენარის ჩაშლა და ესეც გაკეთდა კანონის ფარგლებში, თუ იყო ერთეული გადაცდომები პოლიციელის მხრიდან, ამაზე შესაბამისი სისხლის სამართლებრივი რეაგირება არის. ეს დემოკრატიის უკუსვლა კი არ არის, ეს არის დემოკრატიის დაცვა სწორედ გადატრიალებების, რევოლუციებისა და ამდაგვარი საქმიანობისგან“, – განაცხადა ქადაგიშვილმა.გადაცემის წამყვანის შეკითხვაზე, იმ პირობებში, როცა აშშ-ს შეჩერებული აქვს საქართველოსთან სტრატეგიული პარტნიორობა და ახლა მიმდინარეობს ურთიერთობის ნორმალიზება, როგორ აისახება ჩინეთთან სტრატეგიული პარტნიორობის კიდევ უფრო გაფართოება ამერიკასთან ურთიერთობის გადატვირთვის პროცესზე, ქადაგიშვილმა აღნიშნა, რომ ჩინეთთან სტრატეგიული პარტნიორობის კიდევ უფრო გაფართოება აშშ-თან ურთიერთობას ხელს არ უშლის.„მოდით, ცოტა რეალისტები ვიყოთ, რა უშლის ხელს აშშ-ს, ამ 35-წლიანი ისტორიის განმავლობაში საქართველოსთან დიდი საინვესტიციო პოლიტიკა გაეტარებინათ? რა უშლის ხელს? რომელიმე ხელისუფლებამ უთხრა, რომ შენ ინვესტიციებს არ შემოგატანინებ საქართველოში ან შენთან კულტურულ, ეკონომიკურ, სავაჭრო, პოლიტიკურ, უსაფრთხოების სფეროში კავშირებს არ დავამყარებ?“ – განაცხადა ქადაგიშვილმა.როგორც ქადაგიშვილმა აღნიშნა, დღეს მსოფლიოში ყველა ცდილობს, თავისი გარკვეული პოლიტიკური, ეკონომიკური, ჰუმანიტარული თუ სხვა კუთხის გავლენა გაავრცელოს, რაც ბუნებრივია და კომპრომისი არის ჩვეულებრივი მოვლენა, მაგრამ კომპრომისი არ შეიძლება, დადგეს ისეთი რამის ხარჯზე, რაც პირდაპირ ეწინააღმდეგება ქვეყნის ან კონსტიტუციას, ან ფუნდამენტურ სუვერენულ უფლებებს და ამაზე კომპრომისი არ დგება.მისივე თქმით, აშშ-თან გადატვირთვის პროცესში პროგრესია.„ახლა, სულ რაღაც ერთი კვირის წინ, როდესაც საქართველოს დამოუკიდებლობის დღისადმი მიძღვნილი მიღება იყო ამერიკის შეერთებულ შტატებში საქართველოს საელჩოში, სახელმწიფო მდივნის მოადგილემ, რაც ძალიან მაღალი პოზიციაა, განაცხადა, რომ დღეს გვაქვს ჩვენ ბრწყინვალე საშუალება საქართველოსთან ამ სტრატეგიული ურთიერთობის განახლებისო. ასე რომ, ვფიქრობ, ჩვენ უნდა მოთმინებით და თანმიმდევრულად მივყვეთ ჩვენი პოზიციების დაცვას“, – განაცხადა ქადაგიშვილმა.ცნობისთვის, სავიზო რეგულაციის ფარგლებში საქართველოს მხარესა და ევროკომისიას შორის ბრიუსელში პირველი შეხვედრა ხვალ, 11 ივნისს გაიმართება.

ევროკავშირსა და საქართველოს შორის დღეს სავიზო დიალოგის ფარგლებში შეხვედრა გაიმართება.ინფორმაცია თავდაპირველად „რადიო თავისუფლების” ევროპის ბიუროს ხელმძღვანელმა რიკარდ იოზვიაკმა გაავრცელა.„მნიშვნელოვანი შეხვედრა, რომელზეც განიხილება ვიზალიბერალიზაციის შესაძლო შეჩერება“, - დაწერა იოზვიაკმა სოციალურ ქსელში.მოგვიანებით, საქართველოს საგარეო საქმეთა სამინისტრომ განმარტა, რომ ევროკავშირის სავიზო რეგულაციის ((EU) 2018/1806, მუხლი 8e(9)), თანახმად შეჩერების მექანიზმის მოქმედების პერიოდში, ევროკომისიამ შესაბამის მესამე ქვეყანასთან დიალოგი უნდა დაიწყოს.„ევროკომისიის მიგრაციისა და საშინაო საქმეთა გენერალური დირექტორატის მოწვევით, 11 ივნისს, ბრიუსელში საქართველოს მხარესა და ევროკომისიას შორის დიალოგის პირველი შეხვედრა გაიმართება, რომელშიც მონაწილეობას საქართველოს შესაბამისი უწყებების წარმომადგენლები მიიღებენ საგარეო საქმეთა სამინისტროს საერთაშორისო სამართლებრივი, საკონსულო და დიასპორის საკითხების დირექტორატის დირექტორის ხელმძღვანელობით“, - განაცხადეს უწყებაში.

წინადადება საინტერესოა. გამოწვევა გააზრებული მაქვს, რომ არც ისე მარტივი იქნება, მაგრამ ასევე, მგონია, რომ შანსია დიდი ცვლილებების, - ასე ეხმაურება ჟურნალისტი, ნანუკა ჟორჟოლიანი მესამე პრეზიდენტის მიხეილ სააკაშვილის განცხადებას, სადაც ის აღნიშნავს, რომ „ერთობლივად შევთანხმდით, პარტიის რეფორმირებისთვის შემოვიერთოთ ბრწყინვალე ნანუკა ჟორჟოლიანი და მისი შესანიშნავი გუნდი“.ნანუკა ჟორჟოლიანის განცხადებით, ახლა მოლაპარაკებების ეტაპია და მეტ დეტალზე მოგვიანებით ისაუბრებს.მისივე განცხადებით, პარტიამ მეტი ნდობა უნდა გამოუცხადოს ახალ სახეებსა და ახალგაზრდებს, რათა მათ ქვეყნის განვითარების ახალი დღის წესრიგი შექმნან.ჟორჟოლიანი ასევე აღნიშნავს, რომ აფასებს სააკაშვილის მზადყოფნას ცვლილებებისთვის და მის ნდობას ახალგაზრდული ხედვების მიმართ.ჟორჟოლიანი დარწმუნებულია, რომ ქვეყნის "მთავარი რეფორმატორების" პარტიის "ძველ შემადგენლობას ყველაზე კარგად ესმის, რამდენად მნიშვნელოვანია" აღნიშნული.„მოკლედ, ამბავი ასეთია. მიშასგან მაქვს საინტერესო წინადადება, რაზეც პრინციპში უკვე დაწერა. “ნაციონალურ მოძრაობაში” უნდა მოხდეს რევოლუციური ცვლილებები - მთავარ ძალად ახალგაზრდები იქცნენ. რეგიონებში მუშაობა და დაპირისპირება პროპაგანდასთან, ახალი ინტერესების შექმნა, პოლიტიკური კინკლაობებიდან რეალურ საქმეზე გადასვლა, ისრების გასწორება მთავარი მტრისკენ. რა ეტაპზე ვართ? - მოლაპარაკების.წინადადება საინტერესოა. გამოწვევა გააზრებული მაქვს, რომ არც ისე მარტივი იქნება, მაგრამ ასევე მგონია, რომ შანსია დიდი ცვლილებების. მოკლედ, ფიქრის და მოლაპარაკების ეტაპია. შეხვედრების, სხვების მოსაზრებების მოსმენის…ვაფასებ მიშას საჯარო განცხადებას, რომ დიდი ცვლილებებისთვის მზადაა. პირად საუბრებშიც ესაა მთავარი თემა. კარი გაეხსნათ ახალ სახეებს, ახალგაზრდებს, იდეებით და ახლებური ხედვებით, საქართველო დიდი ჭაობიდან სწორედ ახალგაზრდულმა ხედვებმა უნდა ამოიყვანოს. პარტია მეტად უნდა ენდოს მათ, როგორც თავის დროზე, მიშას ენდობოდა და ქვეყნის მართვის საჭეს აძლევდა. ახლაც ამის დროა, ახალგაზრდებმა უნდა შექმნან დღის წესრიგი. ამ ნაწილში ვაფასებ მიშას ნდობას.დარწმუნებული ვარ, ამ ქვეყნის მთავარი რეფორმატორების პარტიის ძველ შემადგენლობას ყველაზე კარგად ესმის, რამდენად მნიშვნელოვანია ეს ახლა. როგორც კი მეტი დეტალი მეცოდინება, ხომ იცით, დაწერას ვერავინ დამასწრებს, ნუ მიშას გარდა“,- წერს ჟურნალისტი.ინფორმაციისთვის, საქართველოს მესამე პრეზიდენტმა, მიხეილ სააკაშვილმა „ერთიან ნაციონალურ მოძრაობაში“ რადიკალური რეფორმებისა და პარტიის განახლების მიზნით ტელეწამყვან ნანუკა ჟორჟოლიანისა და მისი გუნდის შეერთება დააანონსა.საქართველოს მესამე პრეზიდენტი ციხიდან გავრცელებულ განცხადებაში ხაზს უსვამს ენმ-ის „სახალხო ორგანიზაციად“ გარდაქმნის აუცილებლობას, რომელიც უნდა იყოს არა ვიწრო-ელიტარული დაჯგუფება, არამედ ყველა მოქალაქის გაერთიანება.სააკაშვილის განმარტებით, ლიდერების პატიმრობის პირობებში პარტიას ფუნდამენტური განახლება და გააქტიურება სჭირდება, რისთვისაც ტელეწამყვან ნანუკა ჟორჟოლიანს მისი სრული მანდატი და ნდობა აქვს.

აპირებენ ჯარიმების შემცირებას, ეს ძალიან კარგია. არასდროსაა ცუდი, როდესაც შენ აღიარებ შენს შეცდომას, - ამის შესახებ საქართველოს მთავრობის ადმინისტრაციის ყოფილმა უფროსმა, „ქართული ოცნების“ ყოფილმა წევრმა, პოლიტიკოსმა კახა კახიშვილმა „პალიტრანიუსის“ გადაცემაში „360 გრადუსი“ განაცხადა, რითაც გამოეხმაურა მმართველი პარტიის ინიციატივას, რომელიც საგზაო წესებთან დაკავშირებით რიგი ჯარიმების შემცირებას ითვალისწინებს.კახა კახიშვილის თქმით, სანქციების გამკაცრება არასდროს არ მუშაობს და ამას კრიმინოლოგიას მესამე კურსზე ასწავლიან, იურიდიულ ფაკულტეტზე.„ხელისუფლების წარმომადგენლებმა ამცნეს საზოგადოებას, რომ აპირებენ ჯარიმების შემცირებას, ეს ძალიან კარგია. არასდროსაა ცუდი, როდესაც შენ აღიარებ შენს შეცდომას, როგორც ბოდიშის მოხდა არ არის სირცხვილი, ასევე მცდარი გადაწყვეტილებების უკან გაწვევაც არაა სირცხვილი. უბრალოდ, ეს მცდარი გადაწყვეტილებები ზედიზედ არ უნდა მიეწყოს, თან რაღაც უაზრო არგუმენტაციით.ჩემთვის ცოტა გაუგებარი იყო. ბატონი ირაკლი კობახიძე არის იურისტი და კვალიფიკაციას ნამდვილად არ დავუწუნებ, მაგრამ როდესაც ასეთი ტიპის ჯარიმების კანონპროექტს იღებ, ბარელაძეს ტვინით კი არ უნდა იმოძრაო და ბარელაძე რასაც გეტყვის, ისე კი არ უნდა გააკეთო და იფიქრო, რომ ეს მართლა რაღაც პრევენციაა, ამისთვის არსებობს მეცნიერება, კრიმინოლოგია ჰქვია. კრიმინოლოგია სწავლობს დანაშაულის პრევენციის საკითხებს, არა მხოლოდ სისხლის სამართლის პრევენციის საკითხებს, არამედ ადმინისტრაციული სამართალდარღვევების შესახებ. კრიმინოლოგია იკვლევს, არის თუ არა კავშირში სანქციების სიმკაცრე დანაშაულის ან გადაცდომის შემცირებასთან. კრიმინოლოგია ასწლიანი მეცნიერებაა, მეცნიერებმა იმუშავეს, ბარელაძემ კი არ იმუშავა, რომელიც იყო პატრულის უფროსის მოადგილე, მეცნიერებმა იმუშავეს და თქვეს, რომ არასდროს არ მოქმედებს. სამი ძირითადი პრინციპი აქვს კრიმინოლოგიას: სასჯელის პროპორციულობა და სამართლიანობა, მეორე პრინციპია სასჯელის გარდაუვალობა და მესამე, სახელმწიფოს მხრიდან ეფექტური რეაგირება სასჯელზე, რომ შემცირდეს დანაშაული. სანქციების გამკაცრება არასდროს არ მუშაობს, ეს ჩემი მოგონილი არ არის, კრიმინოლოგიას მესამე კურსზე ასწავლიან იურიდიულ ფაკულტეტზე და იქ პირდაპირ წერია. არ შეიძლება კრიმინოლოგიის და კრიმინალისტიკის არევა, რა თქმა უნდა, ბატონმა ირაკლიმ ეს ძალიან კარგად იცის. ამას ვიძახი იმ ადამიანებისთვის, რომლებმაც ეს აზრი მიაწოდეს პრემიერს და უხერხულ მდგომარეობაში ჩააგდეს, როდესაც კრიმინოლოგია და კრიმინალისტიკა შეიძლება არც იციან რა არის. მათ გასაგონად ვიტყვი, კრიმინოლოგია სწავლობს პრევენციის საკითხებს, კრიმინალისტიკა სწავლობს გახსნის მაჩვენებლებს.რა თქმა უნდა, შეცდომაში შეიყვანეს , თურმე ამოიღეს ერთი წლის სტატისტიკა, კორელაცია არ არსებობსო . ამას დღეს კი არ უნდა ამბობდნენ, სანამ კანონპროექტს მოამზადებდნენ, უნდა გადაეშალათ კრიმინოლოგიის წიგნი და "ანი-ბანი" შეესწავლათ. ტერმინი - "კრიმინალისტიკა" საერთოდ არ უნდა გამოეყენებინათ“, - განაცხადა კახა კახიშვილმა.

მიუხედავად იმისა, რომ ევროკომისიასთან შეხვედრა არის ტექნიკური ხასიათის, „ქართული ოცნების“ ხელისუფლების პირობებში განსაკუთრებული მოლოდინები ნამდვილად არ გვაქვს, – ამის შესახებ პარტია „გახარია საქართველოსთვის“ საპარლამენტო ფრაქციის თავმჯდომარის მოადგილემ, გიგა ფარულავამ საქართველოს პირველი არხის გადაცემაში „დღის თემა“ სტუმრობისას განაცხადა.ფარულავამ უპასუხა წამყვანის შეკითხვას, შეიძლება თუ არა, კონკრეტული გადაწყვეტილება მოჰყვეს ხვალინდელ კომუნიკაციას, რაც შესაძლოა, დასრულდეს უვიზო მიმოსვლის შეჩერებით.„ჩვენ არ ვიცით, გრძელვადიან პერსპექტივაში ექვს თვეში, თუ წლის ბოლოსთვის ამ კონკრეტულ, თუნდაც ხვალინდელ შეხვედრას, რა შედეგები ექნება და რა შედეგის მომტანი იქნება ის უშუალოდ შემდგომ პერიოდისთვის ჩვენი რიგითი მოქალაქეებისთვის. რაც შეეხება მოლოდინებს, ჩვენ გვაქვს მოლოდინი ჩვენი სტრატეგიული პარტნიორი ქვეყნების, ევროკავშირის, რომლებიც პარტნიორები არიან არა „ქართული ოცნების“, რომელიმე კონკრეტული პარტიის,არამედ ჩვენი ქვეყნის, ჩვენი ქვეყნის ევროპული მომავლის, დემოკრატიული განვითარების და იმედს ვიტოვებთ, მათი კეთილგონიერებით იქნება მიღებული გადაწყვეტილება, რომელიც რიგით მოქალაქეებს არ შეეხება“, – განაცხადა ფარულავამ.მისი თქმით, დღეს ქვეყანას თუ ვინმე აშორებს ევროპულ მომავალს, ევროინტეგრაციას, ამაზე პასუხისმგებელი არიან თავად „ოცნების“ ლიდერები.გადაცემის წამყვანის შეკითხვაზე, რა ნაწილზეა პასუხისმგებელი ხელისუფლება კონკრეტულად და ასრულებს თუ არა ის იმ კონკრეტულ ვალდებულებებს, რა კონკრეტულ კრიტერიუმებს და ფაქტორებსაც ემყარება ვიზალიბერალიზაციის რეჟიმის მოქმედება, მაგალითად, მიგრაციის კონტროლი, მიგრაციის მონიტორინგი, რეადმისიის ვალდებულების შესრულება, დოკუმენტების უსაფრთხოება, საზღვრების მიგრაციის საკითხი, საზოგადოებრივი უსაფრთხოება და მასთან დაკავშირებული რისკების მართვა, გიგა ფარულავამ განაცხადა, რომ ხელისუფლება ცდილობს, ხვალინდელი შეხვედრა და მათ შორის, დიპლომატიური ვიზების შეჩერება ტექნიკურ დონემდე, საზღვრის კვეთის, მიგრაციის კონტროლამდე დაიყვანოს.„რა თქმა უნდა, უვიზო მიმოსვლის აღდგენა, ან შეჩერება ბევრ ტექნიკურ დეტალს მოიცავს, მაგრამ მთავარი ამოსავალი წერტილი, რის გამოც ევროკავშირმა დიპლომატიური ვიზების უვიზო მიმოსვლა შეაჩერა, ეს არის ის ადამიანის ფუნდამენტური ღირებულებები და თავისუფლებების შეზღუდვა-შელახვა, რაც ბოლო წლების განმავლობაში აქტიურად მიმდინარეობს საქართველოში“, – განაცხადა ფარულავამ.პარტია „გახარია საქართველოსთვის“ საპარლამენტო ფრაქციის თავმჯდომარის მოადგილემ ასევე აღნიშნა, რომ დღეს ბრიფინგზე რაც  ირაკლი კობახიძემ ბრძანა, როცა ჩინეთთან სტრატეგიული ურთიერთობა შეადარა აშშ-თან სტრატეგიულ ურთიერთობას და დასძინა, რომ სტრატეგიული ურთიერთობა ისეთი უნდა, როგორიც ჩინეთთან გვაქვს და არა შეერთებულ შტატებთანო, არის მავნებლური პოლიტიკა.„ეს არის არაკომპეტენტური პოლიტიკა, ან უვიცობა, ან მიზანმიმართული ნგრევა იმ სტრატეგიული კომუნიკაციისა, რაც წლების განმავლობაში შეერთებული შტატების ადმინისტრაციების ძალისხმევით ვაშენეთ დღემდე“, – განაცხადა ფარულავამ.მისივე თქმით, მსგავსი ტიპის შედარებები საგარეო პოლიტიკას აზიანებს.„მსგავსი ტიპის შედარებები საგარეო პოლიტიკას აზიანებს, მით უმეტეს, ქვეყნის პრემიერი ხარ, პრეტენზია გაქვს მულტუვექტორულ საგარეო პოლიტიკაზე, გამოდიხარ ხარ და ჩინეთის ეკონომიკურ, სტრატეგიულ მდგომარეობას, ურთიერთობას ადარებ შეერთებული შტატების სტრატეგიულ პარტნიორობასთან მაშინ, როდესაც ამერიკა დღეს ჩვენი ქვეყნის უსაფრთხოებისთვის, ტერიტორიული მთლიანობისთვის, პოლიტიკის წარმოებისთვის არის ერთ-ერთი უმთავრესი, უძლიერესი პარტნიორი“, – განაცხადა ფარულავამ.ცნობისთვის, სავიზო რეგულაციის ფარგლებში საქართველოს მხარესა და ევროკომისიას შორის ბრიუსელში პირველი შეხვედრა ხვალ, 11 ივნისს გაიმართება.