ოპოზიციონერი დეპუტატი, ხატია დეკანოიძე დარწმუნებულია, რომ საერთაშორისო პარტნიორების მხრიდან, “გამჭვირვალობის” შესახებ კანონპროექტთან დაკავშირებით, კრიტიკა კიდევ უფრო გაძლიერდება, ხოლო ეს კრიტიკა კონკრეტული შედეგის გარეშე არ დასრულდება.
მისივე თქმით, იმ ფონზე, როდესაც საერთაშორისო პარტნიორები კანონპროექტს აკრიტიკებენ, ხოლო კრემლი ამ ინიციატივას იწონებს, ბუნებრივია, ჩნდება შთაბეჭდილება, რომ საქართველოს ხელისუფლება მოქალაქეების ინტერესების გათვალისწინებით არ მოქმედებს.
“როდესაც ყველა პარტნიორი გვეუბნება, რომ ეს კანონპროექტი არ ვარგა და ეს დაბრკოლება იქნება საქართველოს ევროკავშირის მიმართულებით, ამ დროს, პესკოვი და კრემლი აქებს ამ კანონპროექტს, მაშინ, რა თქმა უნდა, უნდა გვქონდეს სერიოზული ეჭვი იმისა, რომ საქართველოს ხელისუფლება, სამწუხაროდ, არ იქცევა საქართველოს მოქალაქეების ინტერესების გათვალისწინებით. კრიტიკა კიდევ უფრო გაიზრდება. დარწმუნებული ვარ, რომ კონკრეტული შედეგები აუცილებლად დადგება”, – განაცხადა ხატია დეკანოიძემ.
“ლელოს” პოლიტიკური მდივნის, სალომე სამადაშვილის განცხადებით, საფრანგეთში მიღებული კანონი ევროკავშირისა და ნატოს წევრ ქვეყნებზე არ ვრცელდება.
“საფრანგეთის კანონი არ ვრცელდება ევროკავშირზე და NATO-ს წევრ სახელმწიფოებზე. არ ვრცელდება, გატყუებენ! რუსული კანონის მიღების შემთხვევაში შეუძლებელი იქნება საუბარი რაიმე პროგრესზე ევროკავშირის მოთხოვნების შესრულების გზაზე”, – განაცხადა სალომე სამნიძემ.