გუშინ ოთხი შვილის დედამ თათო გვარიშვილმა სოციალურ ქსელში პოსტი გაავცელა, რომელსაც დღეს თბილისის მერი კახა კალაძე გამოეხმაურა.
კახა კალაძემ თავის მოადგილეს, სოფიო ხუნწარიას დაავალა 15 წლის გიგი ანთაძის საკითხი შეისწავლოს და თუ საჭიროა, ფინანსურადაც დაეხმარონ.
“15 წლის გიგი ანთაძე, რომელიც ცერებრალური დამბლითაა დაავადებული, წლებია რუსთაველის გამზირზე საკუთარი საცხოვრებელი სახლის სიახლოვეს ნივთებს ყიდის. მისი ასაკის მიუხედავად, ეს პატარა ბიჭუნა ჩართულია თავის კერძო ბიზნესში.
ბოლო პერიოდში, გიგი რუსთაველის გამზირზე ფრეშ წვენებს ყიდის და საკუთარი შემოსავლის წყარო აქვს. ჩვენ გვაქვს რეგულაციები გარევაჭრობასთან დაკავშირებით, რომელიც ქალაქისთვის სერიოზულ პრობლემას წარმოადგენს. რა თქმა უნდა, ამ შემთხვევაშიც, ვერ მივცემთ შესაძლებლობას, რომ ცალკე იყოს გამოყოფილი გიგი და თავის საქმიანობა გააგრძელოს. მინდა, სოფო ხუნწარიას დავავალო, ყველაფერი გააკეთეთ იმისთვის, რომ ამ ახალგაზრდა ბავშვს, რომელმაც თავისი ბიზნესი შეიქმნა, ყველანაირი პირობა ჰქონდეს. თუ საჭირო გახდება, მეც ჩავერთვები და ფინანსური დამხმარებისთვისაც მზად ვიყოთ, ყველანაირი ხელშეწყობა ჰქონდეს გიგის ამ მიმართულებით”, – განაცხადა კალაძემ.
15 წლის გიგი ანთაძის დედის პოსტს უცვლელად გთავაზობთ:
“არვიცი საიდან დავიწყო ამ ამბის წერა. ჩემი მეგობრების უმრავლესობა იცნობთ ჩემს შვილს, გიგის. გიგის აქვს ცერებრალური დამბლა, რაც გამოიხატება სიარულში და მცირემხედველობაში (მხოლოდ 7 % აქვს).
როდესაც ეს დიაგნოზი დაუსვეს არ ვიცოდით შეძლებდა თუ არა სიარულს, ლაპარაკს, აზროვნებას. ყველა ხვდებით რა დღეები გამოვიარეთ სანამ მივხვდებოდით რომ ლაპარაკობს, აზროვნებს და ოდესმე გავლასაც შეძლებდა.
ყოველთვის ძალიან ცდილობდა მიეღწია ქუჩაში დამოუკიდებლად სიარულისათვის. დაახლოებით 8 წლის იქნებოდა როცა ქუჩაში ე.წ ვოქერით დაიწყო სიარული. გაიცნო მთელი რუსთაველი, გახდა ყველა გაჭირვებულის ქომაგი და მესაიდუმლე. ხშირად მთხოვდა ვინმეს შვილის სკოლაში მოწყობას ან ვინმეს ქმრისთვის სამსახურს (გონია რომ ყველაფერი შემიძლია:) მეც ყველანაირად ვცდილობ ).
ერთ დღესაც მიწისქვეშა გადასასვლელში მოუნდა მარტო ჩასვლა და მუსიკოსების გაცნობა, ამის ხათრით ივარჯიშა ბევრი და ჯოხით სიარულზე გადავიდა. რაღაც პერიოდი აზრი მიეცა ყოველ საღამოს. ჩადიოდა მიწისქვეშაში და თავის მეგობარ მუსიკოსებთან ერთად უკრავდა.
უკვე 2 წელზე მეტია რაც საკუთარი ბიზნესი წამოიწყო. ყოველ დილით (საკუთარი პენსიით დაიწყო) მიდიოდა სადგურზე ყიდულობდა ბუშტებს და რუსთაველზე ყიდდა. თავიდან ძალიან განვიცდიდი, ვნერვიულობდი, მერე მივხვდი რომ ადამიანმა რომელსაც არ შეუძლია ძალიან ბევრი რამ რაც ჩვენ შეგვიძლია შეუძლებელი შეძლო. შეძლო ის რომ აქვს თავის ცხოვრება, ჰყავს უამრავი ნაცნობი, მეგობარი და გულშმატკივარი, აქვს საკუთარი შემოსავალი და იმის საშუალება რომ კაფეში და რესტორანში დაპატიჟოს ვინც უნდა.
ბუშტები საახალწლო ნივთებმა ჩაანაცვლა, მერე ცივმა სასმელებმა და ა.შ. რამოდენიმე დღის წინ იყიდა ფრეშის საწური აპარატი და ახალი საქმეც მიეცა:)
დღეს დამირეკა მერიის ზედამხედველობის წარმომადგენელმა ძალიან კარგმა ქალბატონმა. ამიხსნა რომ ძალიან კარგად იცნობენ გიგის და ძალიან გულშემატკივრობენ, მაგრამ 1 აპრილიდან საკმაოდ სოლიდური ჯარიმის გადახდა მოუწევს თუ უნებართვოდ იდგება რუსთაველის გამზირზე (არადა რა ვქნა იქ რომ ვცხოვრობ). გიგი აღშფოთებული მირეკავს ეხლა და მთხოვს რამე მოუფიქრო ან თვითონ წავა მერიაში და მოითხოვს მისცენ ” წვენისწურვითი საქმიანობის უფლება”
მირჩიეთ რა შემიძლია გავაკეთო?
თბილისის მერია / Tbilisi City Hall Kakha Kaladze კახა კალაძე იქნებ რამე საშველი არსებობდეს იმის გათვალისწინებით რომ გიგი 15 წლის შშმ პირია და სახლთან ვაჭრობს? დამერწმუნეთ საერთოდ არ მომწონს გარემოვაჭრეებით გადატვირთული ქუჩები დსა ბევრად მერჩივნა ჩემს შვილს სხვა შესაძლებლობები და ინტერესები ჰქონოდა.” – წერს თათო გვარიშვილი.