თელავში, ერეკლე მეფის დაბადებიდან 304 წლისთავი აღინიშნა

ემანუელ მაკრონი „დიდი შვიდეულის“ ქვეყნებს მოუწოდებს, მიიღონ ზომები, რათა ჰორმუზის სრუტეში ნავიგაცია რაც შეიძლება სწრაფად აღდგეს. ამის შესახებ „ევრონიუსი“ წერს. აღნიშნული განცხადება საფრანგეთის პრეზიდენტმა „დიდი შვიდეულის“ წევრი ქვეყნების ლიდერებთან ვიდეოკონფერენციის დროს გააკეთა. მაკრონის თქმით, აუცილებელია კოორდინირებული მოქმედება, რათა ახლო აღმოსავლეთში მიმდინარე ომის ფონზე მნიშვნელოვანი საზღვაო მარშრუტი კვლავ ფუნქციონირებდეს. საფრანგეთის პრეზიდენტის განცხადებით, საჭიროა ერთობლივი ნაბიჯები იმისთვის, რომ „ნავიგაციის თავისუფლება რაც შეიძლება სწრაფად აღდგეს ყველა სახელმწიფოსთვის“, რადგან რეგიონში მიმდინარე სამხედრო დაპირისპირებამ ერთ-ერთ მთავარ საზღვაო სატრანზიტო გზაზე მოძრაობა პრაქტიკულად შეაჩერა. მაკრონის თქმით, ასევე აუცილებელია მესამე მხარეებთან თანამშრომლობა, რათა თავიდან იყოს აცილებული ნავთობისა და ბუნებრივი აირის ექსპორტზე შესაძლო შეზღუდვები.

ჩვენ უკვე დავიწყეთ ვაჭრობა სომხეთთან, დარწმუნებული ვარ, რომ მშვიდობა გაგრძელდება, – ამის შესახებ აზერბაიჯანის პრეზიდენტმა, ილჰამ ალიევმა ევროკავშირის საბჭოს პრეზიდენტთან, ანტონიო კოშტასთან ერთად გამართულ პრესკონფერენციაზე განაცხადა.აზერბაიჯანის პრეზიდენტის თქმით, ქვეყნები, უკვე შვიდი თვეა, მშვიდობიანად ცხოვრობენ.„დამოუკიდებლობა 1991 წელს იქნა მიღწეული და მხოლოდ ბოლო შვიდი თვის განმავლობაში იყო მშვიდობიანი პერიოდი. დარწმუნებული ვარ, რომ მშვიდობა გაგრძელდება. ჩვენ უკვე დავიწყეთ ვაჭრობა და სომხეთისთვის მნიშვნელოვანი ნავთობპროდუქტების მიწოდება. ეს კიდევ ერთხელ ჩვენი მტკიცე პოლიტიკური ნების დემონსტრირებაა. ვფიქრობ, ეს საუკეთესო მაჩვენებელია ორივე მხარის განზრახვის, ააშენონ ჯანსაღი ურთიერთობები და დარჩნენ მშვიდობის ერთგული. ამიტომ ჩვენი დღის წესრიგის მთავარი თემა რეგიონში უსაფრთხოების საკითხების განხილვაა“, – აღნიშნა ილჰამ ალიევმა.

ირანთან ომი „მალე“ დასრულდება, რადგან „პრაქტიკულად არაფერი დარჩა სამიზნედ“ – ამის შესახებ აშშ-ის პრეზიდენტმა, დონალდ ტრამპმა გამოცემა „აქსიოსს“ განუცხადა. „როცა მენდომება, რომ დასრულდეს, დამთავრდება. ომი შესანიშნავად მიმდინარეობს. ჩვენ გრაფიკს გაცილებით ვასწრებთ. ჩვენ მათ იმაზე მეტი ზიანი მივაყენეთ, ვიდრე წარმოგვედგინა, თუნდაც თავდაპირველი ექვსკვირიანი პერიოდის განმავლობაში.“, – აღნიშნა ტრამპმა. „აქსიოსის“ თანახმად, აშშ-მა მიიღო სადაზვერო ინფორმაცია, რომლის თანახმად, ირანმა დაიწყო ნაღმების დადება ჰორმუზის სრუტეში – ნავთობით მომარაგების ერთ-ერთ ყველაზე კრიტიკულ წერტილში. ოფიციალური პირების თქმით, გაურკვეველია, რამდენი ნაღმი განათავსა ირანმა, თუმცა, არსებული შეფასებით, ეს რიცხვი ძალიან მცირეა. ტრამპმა „აქსიოსს“ დაუდასტურა, რომ აშშ-ის მიერ განხორციელებულმა დარტყმებმა ნაღმის დამდები 16 ნავი გაანადგურა და ირანის გეგმები ჩაშალა

ირანის წინააღმდეგ ისრაელისა და აშშ-ის სამხედრო ოპერაცია იქამდე გაგრძელდება, ვიდრე ყველა დასახული მიზანი არ შესრულდება და გამარჯვებით არ დასრულდება, – ამის შესახებ ისრაელის თავდაცვის მინისტრმა, ისრაელ კაცმა განაცხადა.მისივე თქმით, სამხედრო ოპერაცია დროის შეზღუდვის გარეშე გაგრძელდება.როგორც ისრაელ კაცმა აღნიშნა, ისრაელი და აშშ „სისტემურ და შთამბეჭდავ ოპერაციებს ახორციელებენ ირანის რეჟიმის წარმომადგენლების, „ირანის ისლამური რევოლუციის გვარდიის კორპუსისა“ და „ბასიჯის“ წინააღმდეგ“.ისრაელ კაცის განმარტებით, „„ბასიჯი“ ირანის სახელმწიფო მილიციაა, რომელიც ქვეყნის შიდა საპროტესტო გამოსვლების ძალადობრივ ჩახშობაში მნიშვნელოვან როლს ასრულებს“.ისრაელის თავდაცვის მინისტრმა ასევე აღნიშნა, რომ ირანში განხორციელებული დარტყმების ერთ-ერთი მიზანია „ირანელი ხალხისთვის შესაძლებლობის მიცემა, წამოდგნენ, იმოქმედონ და დაამხონ ეს რეჟიმი“. მისივე თქმით, საბოლოოდ ეს თავად ირანელებზეა დამოკიდებული.ამასთან, როგორც ისრაელ კაცმა განაცხადა, თავდასხმებს გადარჩენილი ირანის ლიდერები „მშიშარათა ჯგუფია“, ისინი „ქუჩებში ქალებს, ბავშვებს, მოხუცებს ესხმიან თავს და სამოქალაქო მოსახლეობის ხოცვაში არიან სპეციალიზებული“.მისივე თქმით, ირანის ხელისუფლება უკვე იმუქრება იმ ადამიანების მოკვლით, რომლებიც საპროტესტო აქციებში მიიღებენ მონაწილეობას.თავის მხრივ, ისრაელის თავდაცვის ძალების შტაბის უფროსმა, ეიალ ზამირმა განაცხადა, რომ ისრაელის დარტყმების შედეგად ირანში ათასობით სამხედრო და მეთაური არის ლიკვიდირებული. მისივე თქმით, ისრაელი აგრძელებს ოპერაციას, რომელიც „ირანის რეჟიმსა და მის საფუძვლებს მნიშვნელოვან ზიანს აყენებს”.„აქედანვე ვეუბნები ჩვენს ყველა მტერს, რომ არავინ არის ხელშეუხებელი. ჩვენ ვიცით, როგორ მივწვდეთ ყველას, ვინც ისრაელის მოქალაქეების დაზიანებას შეეცდება“, – განაცხადა ზამირმა.

„სქაი ნიუსის” ინფორმაციით, ირანის გაერთიანებულმა სამხედრო სარდლობამ განაცხადა, რომ კონფლიქტის გაგრძელებისას აშშ უნდა მოემზადოს ბარელზე 200 დოლარის ფასისთვის და დასძინა, რომ მას „ხელოვნური ზომებით“ ფასების კონტროლი არ შეუძლია.ირანის სარდლობამ განაცხადა, რომ ირანის „ურთიერთდარტყმების“ პოლიტიკა დასრულდა და ახლა ის „უწყვეტ დარტყმებს“ განახორციელებს.ომმა ნავთობის ფასების მკვეთრი ზრდა გამოიწვია და ფასი 9 მარტს ბარელზე 120 დოლარს მიუახლოვდა, დღის ბოლოს კი შემცირდა. ამჟამად ბარელზე ფასი დაახლოებით 91 დოლარს შეადგენს.ბრენტის ტიპის ნავთობის ბარელის რეკორდული ფასი 147.50 დოლარია, რომელიც 2008 წლის ივლისში, ფინანსური კრიზისის პიკამდე დაფიქსირდა.