ამერიკის შეერთებული შტატები 2018 წლის ბიუჯეტის კანონში გმობს რუსეთის მიერ საქართველოს ტერიტორიების ოკუპაციას და კრძალავს იმ მთავრობების დაფინანსებას, რომლებმაც აღიარეს რუსეთის მიერ ოკუპირებული აფხაზეთის და ცხინვალის რეგიონის დამოუკიდებლობა. ამასთან 2018 წლის ბიუჯეტში აშშ ზრდის საქართველოსადმი მხარდაჭერას 105 325 000 აშშ დოლარამდე. ამის შესახებ საქართველოს პრემიერმინისტრი Facebook-ის საკუთარ გერდზე წერს.
“ჩვენ ყველა ფორმატს ვიყენებთ იმისთვის, რომ საერთაშორისო მექანიზმები გააქტიურდეს ოკუპირებულ ტერიტორიებზე”, – ეს განცხადება პარლამენტის თავმჯდომარის პირველმა მოადგილემ თამარ ჩუგოშვილმა გაეროს ადამიანის უფლებათა საბჭოს მიერ მიღებული რეზოლუციის ირგვლივ გააკეთა.
მისივე განმარტებით, გაერომ გასულ წელსაც მიიღო მსგავსი რეზოლუცია და ძალიან მნიშვნელოვანია, რომ წელსაც მხარი დაუჭირა.
“როგორც იცით, საქართველოს ოკუპირებულ ტერიტორიებზე არ აქვს დაშვება არცერთ საერთაშორისო მექანიზმს, რომელსაც შეუძლია ადამიანის უფლებების მდგომარეობის მონიტორინგი განახორციელოს და ეს ძალიან სერიოზული პრობლემაა. მითუმეტეს, როდესაც სულ უფრო მწვავდება და მძიმდება ადამიანის უფლებების და განსაკუთრებით ეთნიკური ქართველების უფლებრივი მდგომარეობა ოკუპირებულ ტერიტორიებზე. ჩვენ ყველა ფორმატს ვიყენებთ იმისთვის, რომ საერთაშორისო მექანიზმები გააქტიურდეს ოკუპირებულ ტერიტორიებზე. გაერომ გასულ წელსაც მიიღო მსგავსი რეზოლუცია და ძალიან მნიშვნელოვანია, რომ წელსაც მხარი დაუჭირა. ეს გულისხმობს იმას, რომ გაეროს ადამიანის უფლებათა უმაღლესი კომისარი დაუშვან საქართველოს ოკუპირებულ ტერიტორიებზე და ჰქონდეს შეძლებლობა თავად ნახოს იქ ადამიანის უფლებების დარღვევის კუთხით არსებული პრობლემები. ასევე, პარალელურად ჩვენ ვმუშაობთ ევროსაბჭოსთან, რომ ევროსაბჭოს ადამიანის უფლებების კომისარიც დაუშვან ოკუპირებულ ტერიტორიებზე. ევროსაბჭოს და გაეროს უმაღლესი კომისრები საერთაშორისო დონეზე ყველაზე სანდო მონიტორები არიან უფლებების კუთხით და ისინი ვერ ახერხებენ ჩვენს ოკუპირებულ ტერიტორიებზე შესვლას. ამიტომ საჭიროა, სხვადასხვა ქვეყნებმა მხარი დაუჭირონ მათ და მისცენ შესაძლებლობა ჩვენს ოკუპირებულ ტერიტორიებზე შევიდნენ, შეაფასონ იქ არსებული მდგომარეობა”, – განაცხადა თამარ ჩუგოშვილმა.
საქართველოს მხარდამჭერი რეზოლუციის მიღებას გამოეხმაურა “ევროპული საქართველოს” წევრი გიორგი ტუღუშიც და დოკუმენტის მიღებას მნიშვნელოვანი უწოდა.
გაეროს ადამიანის უფლებათა საბჭომ საქართველოს მხარდამჭერი რეზოლუცია გუშინ დაამტკიცა. ამის შესახებ ინფორმაცია საგარეო საქმეთა მინისტრის მოადგილემ, დავით ზალკალიანმა Facebook-ის საკუთარ გვერდზე გამოაქვეყნა.
ქართული მხარის მიერ ინიცირებული რეზოლუციის განხილვისას, მხარდამჭერი განცხადებები გააკეთეს ამერიკის შეერთებული შტატების, გაერთიანებული სამეფოსა და ავსტრალიის დელეგაციებმა. თავიანთ გამოსვლებში, აღნიშნული ქვეყნები მიესალმნენ საქართველოს თანამშრომლობას გაერო-ს ადამიანის უფლებათა უმაღლესი კომისრის ოფისთან. დელეგაციებმა ერთხმად გამოხატეს შეშფოთება საქართველოს აფხაზეთისა და ცხინვალის რეგიონებში ადამიანის უფლებათა დაცვის კუთხით არსებულ მდგომარეობასთან დაკავშირებით და ისაუბრეს ამ რეგიონებში ადამიანის უფლებათა მონიტორინგის მექანიზმების შესვლის საჭიროებაზე. თავის განცხადებაში ავსტრალიის დელეგაცია ასევე გამოეხმაურა აფხაზეთისა და ცხინვალის რეგიონებში რუსეთის საპრეზიდენტო არჩევნებთან დაკავშირებით, საარჩვენო უბნების გახსნას და განაცხადა, რომ მსგავსი ფაქტები მიუღებელია. ყოველივე აღნიშნულის გათვალისწინებით, გამომსვლელებმა მოუწოდეს საბჭოს წევრებს ქართული მხარის მიერ წარდგენილი რეზოლუციის მხარდაჭერისკენ.
23 მარტს მიღებულ რეზოლუციაში, ადამიანის უფლებათა საბჭო კიდევ ერთხელ ადასტურებს საქართველოს სუვერენიტეტისა და ტერიტორიული მთლიანობის მხარდაჭერას მის საერთაშორისოდ აღიარებულ საზღვრებში. დოკუმენტში აღიარებულია საქართველოს მთავრობის ძალისხმევა ქვეყანაში დემოკრატიის, კანონის უზენაესობისა და ადამიანის უფლებათა განმტკიცების კუთხით. ამასთან, საბჭო მიესალმება საქართველოს მთავრობის თანამშრომლობას გაერო-ს ადამიანის უფლებათა უმაღლესი კომისრის ოფისთან და ადამიანის უფლებათა დაცვის სხვა, რეგიონულ თუ საერთაშორისო მექანიზმებთან.
რეზოლუციაში აღნიშნულია უმაღლესი კომისრის 2017 წლის ანგარიშში მოცემული შეფასებები და ხაზგასმულია საქართველოს რეგიონებში ეფექტური კონტროლის მქონე ძალის პასუხისმგებლობა – უზრუნველყოს ადგილზე ადამიანის ფუნდამენტური უფლებებისა და თავისუფლებების დაცვა.
რეზოლუციაში ადამიანის უფლებათა საბჭო გამოთქვამს სერიოზულ შეშფოთებას საქართველოს აფხაზეთისა და ცხინვალის რეგიონებში ეთნიკური ნიშნით დისკრიმინაციას, მშობლიურ ენაზე განათლების მიღების შეზღუდვასა და ეთნიკურად ქართველი მოსახლეობის სახლების მიზანმიმართულ ნგრევასთან დაკავშირებით. ამასთანავე, გამოთქმულია შეშფოთება, რომ იძულებით გადაადგილებული პირები და ლტოლვილები, კვლავაც ვერ ახერხებენ თავიანთ საცხოვრებელ სახლებში უსაფრთხოდ და ღირსეულად დაბრუნებას.
დოკუმენტში გამოთქმულია შეშფოთება, რომ რეგიონულ და საერთაშორისო მონიტორინგის მექანიზმებს არ ეძლევათ აფხაზეთისა და ცხინავლის რეგიონებში შესვლის საშუალება. აღნიშნულიდან გამომდინარე, რეზოლუციაში არის მოწოდება – მოხდეს უმაღლესი კომისრის ოფისისა და მონიტორინგის სხვა მექანიზმების დაუყოვნებლივი შეღწევის უზრუნველყოფა.
ამასთან, ადამიანის უფლებათა საბჭო, მიღებული რეზოლუციით ავალებს გაერო-ს ადამიანის უფლებათა უმაღლეს კომისარს, განაგრძოს საქართველოსთვის ტექნიკური დახმარების გაწევა და წარმოადგინოს ანგარიში რეზოლუციაში ასახულ საკითხებთან დაკავშირებით, საბჭოს მომდევნო – 38-ე და 39-ე სესიებზე“, – ნათქვამია საგარეო უწყების განცხადებაში.