აშშ-ის არჩეული პრეზიდენტის, დონალდ ტრამპის განცხადებით, ის, დიდი ალბათობით, „ტიკ ტოკის“ აკრძალვას 90 დღით გადაავადებს მას შემდეგ, რაც პრეზიდენტის თანამდებობას დაიკავებს. ამის შესახებ აშშ-ს არჩეულმა პრეზიდენტმა NBC News-თანსატელეფონო ინტერვიუში ისაუბრა.
დონალდ ტრამპის თქმით, ჯერჯერობით „ტიკ ტოკის“ დაბლოკვის შესახებ კანონთან დაკავშირებით საბოლოო გადაწყვეტილება არ მიუღია.
„ვფიქრობ, ეს იქნებოდა ერთ-ერთი ვარიანტი, რომელსაც განვიხილავთ. 90-დღიანი გადავადება, სავარაუდოდ, განხორციელდება, რადგან ეს მართებულია. ჩვენ ყურადღებით უნდა განვიხილოთ. ეს ძალიან დიდი საკითხია. ამის გაკეთებას თუ გადავწყვეტ, ალბათ ორშაბათს გამოვაცხადებ“, – განაცხადა ტრამპმა ინტერვიუში.
ცნობისთვის, კანონი აპლიკაციის მფლობელ ჩინურ კომპანიას ავალდებულებს, ან გაყიდოს იგი, ან 19 იანვრიდან დაექვემდებაროს აპლიკაციის აშშ-ში აკრძალვას. მანამდე, აშშ-ის უზენაესი სასამართლოს მოსამართლეებმა ერთხმად დაუჭირეს მხარი გადაწყვეტილებას, რომ კანონი, რომელიც კონგრესმა შარშან დაამტკიცა და რომელსაც პრეზიდენტმა ჯო ბაიდენმა ხელი მოაწერა, არ არღვევს აშშ-ის კონსტიტუციის პირველ შესწორებას სიტყვის თავისუფლების შესახებ.
აღსანიშნავია, რომ „ტიკ ტოკის“ გენერალური დირექტორი შოუ ზი ჩიუ დაესწრება ტრამპის ინაუგურაციას.
ტრამპმა 17 იანვარს განაცხადა, რომ მან „ტიკ ტოკის“ საკითხი ჩინეთის პრეზიდენტთან, სი ძინპინთან სატელეფონო საუბრისას განიხილა.