იუსტიციის უმაღლესი საბჭოს მდივანი გიორგი მიქაუტაძე აცხადებს, რომ თბილისის საქალაქო სასამართლოს დამატებითი შენობა სჭირდება. გიორგი მიქაუტაძეს მიაჩნია, რომ დამატებითი შენობა საჭიროა და დღეს არსებული შენობები უფუნქციოდ არ დარჩება. ინფორმაციას 1tv ავრცელებს.
“სამივე მიმართულებით არის საჭიროება ფართის მომატების საქალაქო სასამართლოში. მშენებარე ფლიგელი სრულად ვერ უზრუნველყოფს საქალაქო სასამართლოს მოთხოვნილებებს. ასევე მოგეხსენებათ, რომ ნაწილი საქალაქო სასამართლოსი ბულაჩაურის ქუჩაზეა განთავსებული.
სასამართლოს გადაეცა გარკვეული მიწის ნაკვეთი არსებული შენობის მიმდებარედ. საუბარია ამ მიწის ნაკვეთის განაშენიანებაზე.
იუსტიციის უმაღლეს საბჭოს მიღებული ჰქონდა გადაწყვეტილება, რომ საქალაქო სასამართლოსთვის ამ თავისუფალ მიწის ნაკვეთზე აშენებულიყო შენობა. ახლა საუბარია ტექნიკურ დეტალებზე.
34 მილიონი გამოყოფილი არ არის. ეს არის საორიენტაციო ღირებულება იმ მომავალი განვითარების, რომელზეც საუბარია. შესაძლებელია ის თანხები, რომელიც ივარაუდებოდა ამ შენობისთვის, არ აღმოჩნდეს საკმარისი და ბიუჯეტის კორექტირებასთან გვქონდეს საქმე“,- განაცხადა გიორგი მიქაუტაძემ.
იუსტიციის საბჭოს დღევანდელ სხდომაზე ამ საკითხის შესახებ საბოლოო გადაწყვეტილება არ მიუღია. თემაზე მსჯელობა გაგრძელდება.