გიორგი აბდალაძე: რა თქმა უნდა, იქნება მცდელობა, რომ სალომე ზურაბიშვილი ტანჯულის როლში გამოიყვანონ, რომელიც არ თმობს სასახლეს და ძალის გამოყენებით გამოჰყავთ იქიდან

საქართველოს ტექნიკური უნივერსიტეტის სტუდენტები, სტუ-ის სასწავლო პროცესების მართვის სამსახურის კარიერული განვითარების განყოფილების ორგანიზებით, „ნიკორა ტრეიდის“ ტალანტების მოზიდვისა და შერჩევის გუნდის წარმომადგენლებს შეხვდნენ. ამის შესახებ ინფორმაციას საქართველოს ტექნიკური უნივერსიტეტი ავრცელებს.სტუ-ის ცნობით, შეხვედრის მიზანი სტუდენტებისთვის კომპანიის საქმიანობის, პროფესიული მიმართულებებისა და დასაქმების შესაძლებლობების გაცნობა იყო.ღონისძიების ფარგლებში „ნიკორა ტრეიდის“ შერჩევის გუნდის წევრებმა ახალგაზრდებს დეტალურად გააცნეს კომპანიის ის სფეროები, სადაც დასაქმება რეალურად არის შესაძლებელი, ასევე ისაუბრეს კარიერული განვითარების პერსპექტივებზე და იმ უნარებზე, რომლებიც თანამედროვე შრომის ბაზარზე წარმატების მისაღწევადაა საჭირო.საქართველოს ტექნიკური უნივერსიტეტის სასწავლო პროცესების მართვის სამსახურის კარიერული განვითარების განყოფილების ხელმძღვანელის თქმით, უნივერსიტეტი აქტიურად მუშაობს როგორც კერძო სექტორთან, ისე სხვადასხვა სახელმწიფო და საერთაშორისო ორგანიზაციასთან პარტნიორობის გაღრმავებაზე. როგორც ასოცირებული პროფესორი ნატო ქათამაძე აცხადებს, უნივერსიტეტის მიზანია კარიერული განვითარებისთვის სტუდენტებს მრავალფეროვანი არჩევანის საშუალება მისცეს სტაჟირების პროგრამებში ჩართვისა და სამუშაო პრაქტიკის მიღების მხრივ, ასევე, კარიერული სემინარებისა და ტრენინგების სახით.„საქართველოს ტექნიკურ უნივერსიტეტსა და ბიზნესსექტორს შორის თანამშრომლობა უმნიშვნელოვანესია სტუდენტების პროფესიული განვითარებისა და მათი შრომის ბაზარზე წარმატებული ინტეგრაციისთვის. მსგავსი ტიპის შეხვედრები ახალგაზრდებს აძლევს უნიკალურ შესაძლებლობას, უშუალოდ გაეცნონ იმ კომპანიების საქმიანობას, რომლებიც აქტიურად ოპერირებენ ქვეყნის ეკონომიკაში და უკეთ გააცნობიერონ შრომის ბაზრის რეალური მოთხოვნები.ასეთი ინიციატივები სტუდენტებს ეხმარება არა მხოლოდ კარიერული გზის განსაზღვრაში, არამედ საკუთარი ძლიერი მხარეების იდენტიფიცირებასა და იმ უნარების განვითარებაში, რომლებიც თანამედროვე დასაქმების გარემოში განსაკუთრებით მნიშვნელოვანია, იქნება ეს პროფესიული ცოდნა, პრაქტიკული გამოცდილება თუ კომუნიკაციური და გუნდური მუშაობის უნარები.უნივერსიტეტის კარიერული განვითარების განყოფილებისთვის პრიორიტეტია ახალგაზრდების მხარდაჭერა კარიერული ზრდის ყველა ეტაპზე. სწორედ ამიტომ, პარტნიორობის გასაღრმავებლად აქტიურად ვმუშაობთ როგორც კერძო სექტორთან, ისე სხვადასხვა ორგანიზაციასთან, რათა სტუდენტებს შევუქმნათ მეტი შესაძლებლობა პრაქტიკული გამოცდილების მიღებისთვის, დასაქმების პერსპექტივების გაფართოებისთვის. ჩვენი აზრით, მსგავსი შეხვედრები მნიშვნელოვან როლს ასრულებს სტუდენტების პროფესიული ორიენტაციის ჩამოყალიბების პროცესში. სწორედ ეს გვიქმნის მოტივაციას, რომ აქტიური მუშაობა მომავალშიც გავაგრძელოთ, რათა ახალგაზრდებმა სწავლის პროცესშივე შეძლონ კარიერული გზისა და წარმატებული მომავლის დაგეგმვა“, - აცხადებს ნატო ქათამაძე.სტუ-ის ინფორმაციით, „ნიკორა ტრეიდის“ წარმომადგენლებთან სტუდენტების შეხვედრა ინტერაქტიურ ფორმატში წარიმართა, რამაც ახალგაზრდებს საშუალება მისცა დისკუსიაში ჩართულიყვნენ და მათთვის საინტერესო თემებზე კითხვები დაესვათ. კომპანიის წარმომადგენლებმა მათ ამომწურავი პასუხები გასცეს, ასევე პრაქტიკული გამოცდილება გაუზიარეს.

მუდმივი დისკუსიაა, რას იტყვიან ბრიუსელში და ვაშინგტონში. ყველაზე საინტერესოა, რას ამბობენ წყაროზე სოფლებში, ქალაქებში. სულ იმას უნდა ვუყუროთ, ისინი რას იზამენ? ანწუხელიძე თავს რომ სწირავდა, კი არ ელოდებოდა, რას იტყვიან ბერლინში. საინტერესოა, რას იტყვიან აქ – ვარკეთილში, გლდანში, თემქაზე, ნაძალადევში, – ამის შესახებ „ერთიანი ნაციონალური მოძრაობის“ პოლიტსაბჭოს თავმჯდომარემ, ლევან ხაბეიშვილმა სასამართლო სხდომაზე განაცხადა.მისი თქმით, ყველა საგარეო პოლიტიკოსი გახდა, ბრიუსელიდან მეტი არაფერი მოხდება.„გიცხადებენ პირდაპირ, რომ ბანანის რესპუბლიკა ხართო, ადამიანის უფლებები არ გაქვთ, სასამართლო არ გაქვთ, სახელმწიფო ინსტიტუტები თქვენთან არ არის, მეტი რა თქვან?! ეს ხალხი ჩვენს გასაკეთებელს არ გააკეთებს. პოლიტიკოსებს, რომლებიც მუდმივად ამბობენ, აი, ნახეთ ახლა რა მოხდება ვაშინგტონში, გეტყვით: არაფერი მოხდება, ვიდრე ჩვენ არ გავაკეთებთ. ეს არის ჩვენი, ქართველი ხალხის გასაკეთებელი.არ მაქვს ამ ერზე ისეთი წარმოდგენა, რომ ბრძოლისუნარიანები არ ვართ. ამდენი დისიდენტი ზის ციხეში. პაატა ბურჭულაძით დაწყებული, ირაკლი ნადირაძით გაგრძელებული, ძალიან ბევრნი არიან. მანამდე დაკავებული კიკნაძე იქნება, ცეცხლაძე თუ სხვები. ამდენი დისიდენტია ქვეყანაში, ეს დისიდენტებია დასაფასებელი. ვიღაც რომ ამბობს, მე არ ვიტყვი, „დავიწყებ და დავამთავრებო“, კარგი, უფრო ჭკვიანური თქვი რამე, თქვენ იმოქმედეთ უკეთესად.ჩვენ ვცხოვრობთ სახელმწიფოში, სადაც მკვლელი და დამსახიჩრებელი ხარება გამოცხადებულია ქტიტორად და პაატა ბურჭულაძე – მოძალადედ. ასეთი ნონსენსი გაგიგიათ? მსოფლიო ბანი, თითით საჩვენებელი კაცი არის მოძალადედ გამოცხადებული და ქტიტორი – ხარებაო. არც დისიდენტი გვაკლია, არც ოპოზიციონერი, მაგრამ რაღაც გაუგებარ თემებს არჩევენ.ოპოზიციური ალიანსის ხუთი განცხადებიდან სამი „ნაციონალურ მოძრაობას“ რომ ეხება, არანორმალურია, ძმაო, სიგიჟეა. თქვენი პლაკატების გამკვრელი ვიქნები მე, ლევან ხაბეიშვილი, ოღონდ გაათავისუფლეთ ეს ქვეყანა, ოღონდ სწორი ნაბიჯები გადადგით, ოღონდ იბრძოლეთ, ძმაო. მე ვიქნები თქვენი უკანასკნელი აგიგატორი, ყველას მოსამსახურედ დავდგები.ტელევიზორში მოვისმინე ასეთი სიტყვები: 10 მაისიდან ვიწყებთ გასვლასო. დღეს რას აკეთებთ, 24-ში, ხალხო? ამას ნუ იტყვით, ჩემი რჩევაა. თქვენი არც გაკრიტიკება მინდა, მე ვარ ერთი თქვენი მხარდამჭერი, მაგრამ როგორ მაინტერესებს, რას აკეთებთ 6-ში, 7-ში, 8-ში, 9-ში?!იცით, რაზე ჩხუბობენ, იმან რაღაც პოსტი დაწერა და უნდა ვუპასუხოო. მიშას უნდა ვუპასუხოთ სასწრაფოდო და ბიძინას რატომ არ პასუხობთ? 31 მარტს რომ დააანონსე 26 მაისის აქცია, ისე დამთავრდა ერთი თვე, კამპნია არ დაუწყიათ. იძახიან, მოლოდინი არ შევქმნათო. ჩემთვის სრულიად გაუგებარია, რომ პოლიტიკოსი ერიდება მოლოდინის შექმნას. რა მოლოდინი არ უნდა შექმნა? მერაბ კოსტავა ათი წელი ციხეში იჯდა, დისიდენტი კაცი, კი არ შეშინებია, არ გამომივა და მოდი, არ ვიტყვიო. პოლიტიკოსმა მოლოდინი უნდა შექმნა და გაიმარჯვო, თუ არ გამოვიდა, არა უშავს.მე არ ვყოფ ოპოზიციას ამ მხარეს თუ იმ მხარეს, ჩემი თავი თქვენს ნაწილად მიმაჩნია, არავისზე მაგარი, უკეთესი არ ვარ, თქვენი გულშემატკივარი ვარ. გაეშვით კაცს, რომელსაც ლამის სამუდამო პატიმრობა მიუსაჯეს. სააკაშვილს ვგულისხმობ. ხუთი წელია, ციხეში ზის და თურმე პოსტი ვერ დაუწერია, ვიღაცის რევიზია უნდა გაიაროს. თავი ხომ არ მიარტყით რამეს, კაცო?შეეშვით ერთმანეთს და რაც გინდათ, თუ გინდათ, მე გამლანძღეთ, რამე ქენით. პაატა ბურჭულაძეზე, ირაკლი ნადირაძეზე და სხვებზე, დისიდენტებზე არაფერი უნდა თქვან, გვერდი უნდა აუარონ, რადგან ღობეა თურმე ძალიან მნიშვნელოვანი, ყაველაშვილის ღობეზე ვგიჟდებით. თქვენს ნაწილად მიმაჩნია თავი. არავისზე უკეთესი მე არ ვარ, თქვენი წიაღიდან წამოსული გულშემატკივარი ვარ. არ გვაქვს ბევრი დრო. ტროტუარზე დგომასაც კრძალავენ უკვე, სუნთქვასაც გვიკრძალავენ, ბენზინი 4 ლარი ღირს. საბანკო ოლიგარქიაზე რატომ არავინ ლაპარაკობს? ყვეკლა ოჯახს აქვს ვალი. თავქუდმოგლეჯილი რომ გაიქცა ირაკლი რუხაძე „ლიბერთი ბანკიდან“. 10 000 ლარს რომ იღებ და 18 000 ლარს რომ იხდი, სულ მცირე, ამაზე რატომ არავინ ლაპარაკობს?“ – განაცხადა ლევან ხაბეიშვილმა.

ოპოზიციაში ზოგიერთმა, სააკაშვილს ერთპიროვნული ლიდერობა უნდა, ჩვენ ამას არ დავუშვებთო, ვინ შეგიშალათ ხელი გალიდერებაში?, – ამის შესახებ საქართველოს ყოფილი პრეზიდენტი მიხეილ სააკაშვილი სოციალურ ქსელში წერს.სააკაშვილი ოპოზიციის წარმომადგენლებს „რიტორიკის გადატვირთვისკენ მოუწოდებს“.„ქოცები სხვას კი არაფერს აკეთებენ მთელი ეს დრო – დაახეთქებენ რაღაც ტყუილს და სხვებს აჯერებენ, თან თანდათან თვითონაც იჯერებენ. ახლა ოპოზიციაში ზოგიერთმა: „სააკაშვილს ერთპიროვნული ლიდერობა უნდა! ჩვენ ამას არ დავუშვებთ ხალხოოოო…“ მოიცა და ვინ შეგიშალათ ხელი გალიდერებაში? სააკაშვილი, რომელსაც ხალხთან არ უშვებენ, ციხიდან უკვე გამოვიდა, იქ თქვენ ჩაგკეტათ და ახლა უკვე თქვენ აღარ გიშვებთ ხალხთან, თუ როგორაა თქვენი საქმე? სააკაშვილმა, რომელსაც ტელევიზიით გამოსვლის საშუალებები არ აქვს, ციხიდან ჩაგიკეტათ ტელეეთერში ჭკვიანური ლაპარაკის საშუალება? თუ ისიც ჩემი ბრალია, რომ პოლიტიკოსების პროფანაციად და ტელეეთერის შესავსებ უბრალო მოლაპარაკე თავებად იქეცით. ძალიან აცდენილი ხართ რეალობას და იქნებ, გადატვირთოთ რიტორიკა, თორემ ამასობაში ხალხი ძალიან განვითარდა, ხელოვნური ინტელექტიც წამოგეწიათ და ისე აღარ ბნელა, როგორც 2012-ში“, – წერს მიხეილ სააკაშვილი.

შეთანხმება უნდა დაიცვას ყველამ, – ამის შესახებ „ოპოზიციის ალიანსის“ წევრმა, პარტია „ფედერალისტების“ ლიდერმა, თამარ ჩერგოლეიშვილმა ჟურნალისტებს განუცხადა.ამასთან, ჟურნალისტის კითხვაზე, რომ საქართველოს ყოფილი პრეზიდენტის, მიხეილ სააკაშვილის თქმით, გაჩუმებას არ აპირებს, ჩერგოლეიშვილმა განაცხადა, რომ „მიხეილ სააკაშვილი უნდა გაჩუმდეს“.„უნდა გაჩუმდეს, რა. შეთანხმების დაცვა მაინც მოუწევს, ისე ჩვენთან ვერ გაჩერდება“, – აღნიშნა ჩერგოლეიშვილმა.

ევროკავშირში კარგად ამჩნევენ, რომ ქართული საზოგადოების უდიდესი ნაწილი კარგად იაზრებს მშვიდობის თემას, რა ხდება მსოფლიოში, რა გამოწვევებია და მნიშვნელოვანწილად ამ განზომილებითაც ხელმძღვანელობს, როცა მხარს ხელისუფლებას უჭერს, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.მისი თქმით, მუქარაა, რომ ბნელ წარსულში დაბრუნება, სისხლისღვრა, დაპირისპირება სწორედ ის მიზანია, რომელსაც ბრიუსელის ადმინისტრაცია გაჰყვება, თუ საზოგადოების ნაწილი მორჩილი არ იქნება.„ადრე ხალხს მხოლოდ მათ უწოდებდნენ, ვინც რუსთაველის გამზირზე იყო გამოსული, ახლა მთელ საზოგადოებას ახსენებენ, რომ ხელეწიფებათ საქართველოში მოაწყონ ისეთი მდგომარეობა, რომელიც დაკავშირებულია სისხლისღვრასთან და ეკონომიკურ ნგრევასთან, ეს არის მუქარა. პერსონალური მუქარა გახსოვთ, რომელიც პრემიერ-მინისტრის მიმართ გაჟღერდა, რომ უკან თუ არ დაიხევდა და ქედს არ მოიხრიდა, იგივე დაემართებოდა, რაც ფიცოს დაემართა, როდესაც ექვსი თუ შვიდი ტყვია ესროლეს. ეს ირაკლი კობახიძეს ევროკომისარმა პირდაპირ უთხრა, რომ იყოს დამჯერი, წინააღმდეგ შემთხვევაში, შეიძლება, იგივე მოუვიდეს, რაც სლოვაკეთის პრემიერ-მინისტრს“, – განაცხადა გია ვოლსკიმ.პარლამენტის პირვეი ვიცე-სპიკერის განცხადებით, შემდეგ სხვა სახის მუქარები იყო.„ახლა მუქარების ახალი ხარისხია წინ წამოწეული, თუმცა არ მგონია, ეს ჰერჩინსკის ბრალი იყოს. იგი ინსტრუქციას ასრულებს, მით უმეტეს, საქართველოში საქმიანობის ვადა მალე უმთავრდება და, ამ ფაქტორის გათვალისწინებით, კარგი კანდიდატია ასეთი მუქარების გაჟღერებისთვის, რომ საზოგადოებას თვალთმაქცურად მოეფეროს. ადამიანი მთელ საქართველოს ემუქრება მაშინ, როდესაც ამის არანაირი წინაპირობა არ არსებობს. წარმოუდგენელია, ამ მონაცემით, რომელიც თუნდაც ახლა „ატლანტიკურმა საბჭომ“ გამოაქვეყნა, საქართველოს ემუქრება ის უბედურება, რაც ჰერჩინსკიმ დახატა. შეიძლება, რამე ისეთი იცის, რაც ჩვენ არ ვიცით. აქედან გამომდინარე, საგარეო უწყებაში უნდა დაიბარონ. ეს პოლიტიკური დემარშიცაა. საქმიანი საუბარიც უნდა შედგეს, ჰერჩინსკი რის საფუძველზე ემუქრება საქართველოს და მის საზოგადოებას“, – განაცხადა გია ვოლსკიმ.ცნობისთვის, რამდენიმე ქართულმა მედიამ გაავრცელა საქართველოში ევროკავშირის ელჩის, პაველ ჰერჩინსკის მიერ ბრიუსელში, ევროპის საგარეო ქმედებათა სამსახურში გამართულ ღონისძიებაზე გაკეთებული განცხადება, რომლის თანახმადაც: „საქართველო გზაგასაყარზე დგას, საქართველოს მომავალი ჯერ არ დაწერილა, მაგრამ ის, რაც მომავალ კვირებსა და თვეებში გადაწყდება, განსაზღვრავს, ეკუთვნის საქართველო ევროპული ქვეყნების ოჯახს, რომელიც დაფუძნებულია დემოკრატიაზე, კანონის უზენაესობასა და ადამიანის უფლებებზე, თუ, სამწუხაროდ, თავის ბნელ წარსულს დაუბრუნდება“. ამასთან, ჰერჩინსკიმ აღნიშნა: „არ უნდა დავუშვათ, რომ საქართველო და შესანიშნავი, თბილი, სტუმართმოყვარე ქართველი ხალხი დაბრუნდეს ძალადობის, სამოქალაქო ომის, სიღარიბის, გაჭირვების, კორუფციის ბნელ დროში“.