მსოფლიოს საუკეთესო კალათბურთის ლიგაში – ჩრდილოამერიკის კალათბურთის ეროვნული ასოციაციას რიგებში ისრაელის წარმომადგენელმა დენი ავდიამ თამაში დაიწყო.
თელ-ავივის „მაკაბის“ წამყვანი მოთამაშე პირველი რაუნდის დრაფტში – 2020 წელს აირჩიეს. ის ახლა „ვაშინგთონ უიზარდის“ გუნდში ითამაშებს.
დრაფტის შემდგომ გამართულ პირველ პრესკონფერენციაზე დენი ავდიამ თქვა: „ვამაყობ, რომ ისრაელს წარმოვადგენ და იმედს გამოვთქვამ წარმატებული ვიქნები ეროვნული ასოციაციის თამაშებზე“.
ნიჭიერმა ახალგაზრდამ ყურადღება თავიდანვე მიიქცია. ის ისრაელის იუნიორთა ნაკრების ლიდერი გახლდათ. გუნდმა ზედიზედ ორჯერ, ევროპის ჩემპიონატზე (2018 და 2019 წ.წ.) ოქროს მედლები მოიპოვა, ხოლო დენი ორივე წელს ევროპის სიმბოლურ ნაკრებში მოხვდა.
2017 წელს დენი ავდიამ თელ-ავივის „მაკაბთან“ ექვსწლიანი პროფესიული კონტრაქტი გააფორმა. ის გუნდში ყველაზე ახალგაზრდა ფორვარდია, მხოლოდ 17 წლისაა. მისი სიმაღლე 206 სმ, წონა კი 95 კგ.
დენი კიბუც ბეით-ზერაში დაიბადა, მისი მშობლებიც სპორტით იყვნენ დაკავებულნი. მამა, ზუფერ ავდია ბელგრადის კალათბურთის გუნდის „ცვრენი ზვეზდას“ კაპიტანი იყო. 1982 წლის მსოფლიო ჩემპიონატის პრიზიორი იუგოსლავიის ნაკრების წევრი გახლდათ. დიდი ხნის განმავლობაში ისრაელის „ჰა-პოელში“ და სხვა გუნდებში ასპარეზობდა. ისრაელის მოქალაქეობის მიღების შემდეგ მსუბუქ ათლეთიკაში ისრაელის ჩემპიონზე, კალათბურთელ შარონ არციზე დაქორწინდა. სწორედ დედა გაჰყვა დენის აშშ-ში თამაშებზე მხარდასაჭერად.
დენი ავდიამ აშშ-ის დედაქალაქის გუნდის პირველ მატჩებში კარგი თამაში აჩვენა. „ვაშინქთონ უიზარდის“ მწვრთნელმა სკოტ ბრუკსმა „მინესოტაზე“ გამარჯვების შემდეგ აღნიშნა: „დენიმ თავის კარიერაში სერიოზული ნაბიჯი გადადგა და საუკეთესო თამაში აჩვენა“.
გაეროში ისრაელის მუდმივმა წარმომადგენელმა გილათ ერდანმა საკუთარ ტვიტერში დაწერა: „დღეიდან შენც ჩვენი წარმომადგენელი ხარ, ჩვენ ყველა „ვაშინგთონ უიზარდის“ ფანატები ვართ.
ყოველ წელს ეროვნულ ასოციაციაში მოთამაშე ევროპელი კალათბურთელების რიცხვი იზრდება. ეს ამერიკელი გულშემატკივრებისათვის უკვე ჩვეულებრივ ამბად იქცა. 2019 წლის დრაფტით „ინდიანა პეისერსის“ გუნდის წარმომადგენლებმა ქართველი ცენტრი ბითაძე არჩიეს, რომელიც სერბიის ჩემპიონატში ბრწყინვალედ ასპარეზობდა.
დენი ავდია მესამე სპორტსმენია, რომელიც ეროვნულ ასოციაციაში გალა მეკელის („დალასი“) და ომრი კასპის („საკრამენტო“) შემდეგ მიიწვიეს.
2020 წლის დრაფტის კიდევ ერთი სიურპიზი – ლეგენდარულმა „ბოსტონ სელტიკსმა“ 47 ნომრად ისრაელიდან, თელ-ავივის „ჰაპოელიადან“ იამა მადარა აირჩიეს. ის ამ სეზონს თელ-ავივის გუნდში გაატარებს.
სერგი პოდრაჟანსი, იერუსალიმი
ფოტო: ბეჭდვითი მედიის სამთავრობო ბიურო, სპორტის სამინისტრო