როდესაც ადამიანი აცხადებს, რომ ოჯახის სიყვარული, მშობლების სიყვარული, შვილის სიყვარული, სამშობლოს სიყვარული, პატივისცემა და მისთვის ზრუნვა, ავადმყოფობაა, ეს არის მისი ფსიქიკის დიაგნოზი, – ამის შესახებ ლაშა ნაცვლიშვილმა, ,,იმედის“ ეთერში განაცხადა.
„ქართული ოცნების“ კონსულტანტი საზოგადოებასთან ურთიერთობების საკითხებში, სააკაშვილისა და გვარამიას განცხადებებს აფასებს და არაადეკვატურს უწოდებს. ნიკა გვარამიას მცდელობა, ავადმყოფობად მონათლოს ოჯახისადმი დამოკიდებულებები, ნაცვლიშვილის თქმით, გვარამიას არასწორ ღირებულებებზე მეტყველებს.
მმართველი პარტიის კონსულტანტის ბიძინა ივანიშვილის 2015 წლის პროგნოზსაც იხსენებს და ნაციონალური მოძრაობის დღევანდელ ქმედებებზე დიაგნოზს სვამს. ლაშა ნაცვლიშვილი, აცხადებს, რომ „ენის მოჩლექის დრო არ არის და სათქმელი პირდაპირ უნდა ითქვას“.
„ზოგადად, ეს პროცესი, ჩემი აზრით, არის სააკაშვილის და მისი გუნდის ლუსტრაციის პროცესის გაგრძელება. ის, რაც ახლა უკრაინაში ხდება და ეს უკვე მეორედ ხდება, ეს ამ პროცესის განუყოფელი ნაწილია. ჩვენ გვახსოვს, როდესაც სააკაშვილი პირველად იქნა რეინკარნირებული უკრაინაში, ეს იყო 2015 წელი, როდესაც პრეზიდენტ პოროშენკოს მმართველობის დროს იგი გახდა ოდესის გუბერნატორი, როდესაც ბიძინა ივანიშვილს სთხოვეს კომენტარი, მან თქვა, რომ აქედან გაასწრესო და შეიძლება იქედან ვერ გამოასწრონო. ერთხელ აუხდათ ეს ამბავი, გვახსოვს ეს ეპოპეა და ჩემი აზრით ახლოს ვართ მეორე, იმ ამბავთან, რომ მეორედ აუხდებათ ივანიშვილის ეს წინასწარმეტყველება. ლუსტრაციას ვგულისხმობ, როდესაც ვლაპარაკობ, ლუსტრაციის პროცესს. თქვენ კარგად გახსოვთ, რომ ლუსტრაცია დაიწყო სააკაშვილის აღიარებით, რომ მას აქვს უმძიმესი დანაშაული ჩადენილი და არაერთი დანაშაული საქართველოს სახელმწიფოსა და ხალხის წინაშე. ამას მოჰყვა მისი ნომინირება პრემიერ-მინისტრის პოსტზე, ამ აღიარების მიუხედავად, რითაც ნაციონალურმა მოძრაობამ პრაქტიკულად აღიარა, რომ ის არა პოლიტიკური პარტიაა, არამედ ორგანიზებულ-დანაშაულებრივი დაჯგუფება, რომლის ლიდერი, რა თქმა უნდა, უნდა იყოს კრიმინალური, ყველაზე დიდი კრიმინალი, არქიტექტორი ამ არამხოლოდ ავტორიტარული და დიქტატორული რეჟიმის, არამედ პირდაპირ, დანაშაულებრივი რეჟიმის.
ლუსტრაციის გაგრძელება და ძალიან მნიშვნელოვანი ფაქტორი ამ თვითლუსტრაციის იყო ნიკა გვარამიას აბსოლუტურად უმსგავსი განაცხადი დაკავშირებული ივანიშვილის ოჯახთან. ძალიან მნიშვნელოვანია – მიუხედავად იმისა, რომ პოლიტიკურად შესაძლოა უფრო მნიშვნელოვანი ყოფილიყო ის, რომ სააკაშვილმა 8 წლის თავზე აღიარა, რომ უმძიმესი დანაშაული აქვს ჩადენილი და დაამთავრა, წერტილი დაუსვა მითს მისი ე.წ. პოლიტიკური დევნილობის შესახებ, ამ აღიარებით. შესაძლოა, ამას პოლიტიკური კონტექსტი, პოლიტიკური ნიშნით უფრო გადამწყვეტი მნიშვნელობა მიენიჭა, მაგრამ ჩემთვის როგორც ერთი მოქალაქისთვის, რომელიც ამ პროცესს დიდი ხანია აკვირდება, ეს უფრო ღირებული იყო, ის, რაც გააკეთა მისდაუნებურად გვარამიამ.
მან ავადმყოფობად, ავადობად, გადახრად გამოაცხადა ის, რაც ნებისმიერი ადამიანისთვის არის ბუნებრივი – ეს არის ოჯახის სიყვარული, მშობლების სიყვარული, შვილის სიყვარული, სამშობლოს სიყვარული და პატივისცემა, მასზე ზრუნვა და როდესაც ადამიანი აცხადებს, რომ ეს არის ავადმყოფობა, ეს არის მისი არაცნობიერი დიაგნოზი, მისი ფსიქიკის. ეს ხალხი თავად არის ავადმყოფი. მე მესმის, რომ თქვენც ხართ შეზღუდული გარკვეული პოლიტკორექტურობის ცენზურით, რომ სიძულვილის ენა არ იყოს გამოყენებული პოლიტიკური კომენტარების დროს და ზოგადად პოლიტიკისთვის ეს სიძულვილის ენა მიუღებელია, მაგრამ მე შარი არ მინდოდა. მე არათუ უფლება მაქვს ახლა ვუპასუხო იმავე რეგისტრში, არამედ ვალდებულიც ვარ იმიტომ, რომ ავადმყოფობაა, როდესაც სიყვარული ავადმყოფობა გგონია და ესენი არიან დაავადბული ფსიქიკის ადამიანები, სწორედ ეს გადახრილი ფსიქიკა. მე არ ვიცი რისგან არის წარმოშობილი, არც ფსიქიატრი ვარ, არც ფსიქოლოგი, საიდან მოდის ეს ყველაფერი, ბავშვობის ტრავმებისგან, გენეტიკურია, სოციალურია, ეს არ არის ჩვენი საქმე. ჩვენ გვაქვს პროდუქტი, ეს არის დაზიანებული ფსიქიკის ადამიანთა ჯგუფი, რომელსაც ადამიანის ყველაფერი სძულს.
ამ გადახრისგან, ამ ავადმყოფობისგან მომდინარეობს ყველა ის დანაშაული და ყველა ის არაადამიანური ლტოლვა ძალაუფლებისკენ, რაც მათ გამოარჩევდათ – ეს ავადმყოფობის შედეგია. ამ ყველაფრის მიზეზი არის ეს მათი ავადმყოფური ვნებები, ასე გამძვინვარებით რომ იბრძვიან ძალაუფლებისთვის, ესეც ამის ნიშანია, რომ ისევ უნდათ დაიბრუნონ სადავეები, რომ დაიკმაყოფილონ საკუთარი ავადმყოფური ვნებები და ისევ იძალადონ საზოგადოებაზე, იძალადონ ხალხზე.
საბედნიეროდ, უკანასკნელი კვლევები, ყველა სახის ადასტურებს, რომ ეს მხოლოდ მათი ილუზიაა და ამას ასრულება არ უწერია, მაგრამ ეს ხაზგასმით უნდა ითქვას. ჩვენ ენის მოჩლექას თავი უნდა დავანებოთ, რომ რაღაცა არაკორექტულია, რომ ვიღაცა კოლეგაა, რომ ეს არ შეიძლება. ეს არათუ არ შეიძლება, ეს არის საჭირო. ეს არის დაზიანებული ფსიქიკის, შეპყრობილი ადამიანების ჯგუფი, რომელთა ქცევის კოდექსი უსაქციელოა და ყველაფრის კადრებაა და ეს არაამქვეყნიური, არაადამიანური ლტოლვაა. თითქოს უჰაერო სივრცეშია არიან და ერთი სული აქვთ ამოვიდნენ ამ წყლისქვეშეთიდან და ჩაისუნთქონ ძალაუფლება, როგორც ჟანგბადი. სხვანაირად თანაარსებობა მათ თავის თვისტომთან არ შეუძლიათ. ამიტომ, ეს უნდა ითქვას და ეს იყო ჩემთვის ყველაზე მნიშვნელოვანი ამ ლუსტრაციის პროცესში”, – განაცხადა ლაშა ნაცვლიშვილმა.