ბიძინა ივანიშვილი – „ქართული ოცნების“ გუნდში არ უნდა მოერიდონ ერთმანეთის ოპონირებას, გაფილტრონ ერთმანეთის აზრი, ეს არის ერთადერთი, რასაც ვთხოვ

აწყური საუკუნეების განმავლობაში სამხრეთ საქართველოს ერთ-ერთი უმნიშვნელოვანესი სულიერების ცენტრი იყო. სწორედ აქედან იწყება საქართველოს 2000-წლოვანი ავტოკეფალური ეკლესიის ისტორია, – ამის შესახებ საქართველოს პარლამენტის თავმჯდომარე შალვა პაპუაშვილი სოციალურ ქსელში წერს.როგორც პაპუაშვილი აღნიშნავს, მეუფე თეოდორეს და ბიძინა ივანიშვილის ოჯახის ღვაწლით საქართველო იბრუნებს აწყურის ღვთისმშობლის ტაძარს და აწყურის დიდებულ ციხეს იმ სახით, როგორითაც ისინი ჩვენს ქვეყანას საუკუნეები მოჰყვებოდნენ.„ახალციხის, ტაო-კლარჯეთისა და ლაზეთის მიტროპოლიტ თეოდორესთან ერთან დავათვალიერეთ აწყურის ღვთისმშობლის ტაძრის აღდგენის მიმდინარე პროცესი. აწყური საუკუნეების განმავლობაში სამხრეთ საქართველოს ერთ-ერთი უმნიშვნელოვანესი სულიერების ცენტრი იყო. სწორედ აქედან იწყება საქართველოს 2000-წლოვანი ავტოკეფალური ეკლესიის ისტორია. აქ მისცა დასაბამი წმინდა ანდრია პირველწოდებულმა ქართულ ეკლესიას, რომელიც ორი ათასწლეულია ჩვენი იდენტობის საფუძველია. აქ ინახებოდა აწყურის ღვთისმშობლის სასწაულმოქმედი ხატი, რომელიც ქართველი ხალხის განსაკუთრებული თაყვანისცემის საგანს წარმოადგენდა და დღეს ხელოვნების მუზეუმშია დაცული.მეუფე თეოდორეს და ბიძინა ივანიშვილის ოჯახის ღვაწლით საქართველო იბრუნებს აწყურის ღვთისმშობლის ტაძარს და აწყურის დიდებულ ციხეს იმ სახით, როგორითაც ისინი ჩვენს ქვეყანას საუკუნეები მოჰყვებოდნენ“, – წერს შალვა პაპუაშვილი.

მოხარულები ვართ, რომ ვიზიტის პარალელურად ბიშკეკში გაიმართა საქართველო-ყირგიზეთის მთავრობათაშორისი ეკონომიკური თანამშრომლობის კომისიის მეორე სხდომა, – ამის შესახებ საქართველოს პრემიერ-მინისტრმა, ირაკლი კობახიძემ ყირგიზეთის რესპუბლიკის პრეზიდენტ სადირ ჟაპაროვთან ერთად გამართულ ბრიფინგზე განაცხადა.პრემიერის შეფასებით, ეს იყო ძალიან დროული სხდომა, რადგან ორივე მხარეს მიეცა შესაძლებლობა დეტალურად განეხილა ორ ქვეყანას შორის სავაჭრო-ეკონომიკური ურთიერთქმედების გაზრდის შესაძლებლობები.„გარდა ამისა, ჩვენ განვიხილეთ საქართველო-ყირგიზეთის პარტნიორობა საერთაშორისო ორგანიზაციების ფარგლებში. დარწმუნებული ვართ, რომ ჩვენი ნაყოფიერი თანამშრომლობა ამ მიმართულებით მომავალშიც გაგრძელდება. აქვე, მსურს ვისარგებლო შემთხვევით და მივულოცო ბატონ პრეზიდენტს და სრულიად ყირგიზეთს ისტორიული გამარჯვება, რომელიც მან გაერო-ს უშიშროების საბჭოში მოიპოვა და რომლის საფუძველზეც ყირგიზეთი 2027-2028 წლების პერიოდში დაიკავებს გაერო-ს უშიშროების საბჭოს არამუდმივი წევრის პოზიციას.შეხვედრაზე საუბარი ასევე შეეხო სატრანსპორტო და ლოგისტიკური მიმართულებით თანამშრომლობის განვითარების პერსპექტივებს. აღვნიშნეთ „შუა დერეფნის“ განვითარების მნიშვნელობა და ძალისხმევის გაძლიერების მიზანშეწონილობა მისი განვითარების ხელშეწყობისა და დამატებითი ტვირთების მოზიდვის მიმართულებით.ჩვენ დიდი ინტერესით ვადევნებთ თვალს ჩინეთ-ყირგიზეთ-უზბეკეთის სარკინიგზო პროექტის განხორციელებას და მოხარული ვართ, რომ ეს პროექტი სწრაფი ტემპით ხორციელდება. ეს პროექტიც დამატებით შეუწყობს ხელს ცენტრალურ აზიასა და ჩვენს რეგიონს შორის დაკავშირებადობის გაძლიერებას. საქართველოს თავის მხრივ მნიშვნელოვან ინვესტიციებს ახორციელებს სატრანზიტო ფუნქციის განვითარებაში. მთლიანობაში, ეს პროცესები, ვფიქრობთ, რომ მნიშვნელოვნად შეუწყობს ხელს რეგიონებს შორის და კონკრეტულად ჩვენს ორ ქვეყანას შორის სავაჭრო-ეკონომიკური ურთიერთობების შემდგომ განვითარებას“, – განაცხადა ირაკლი კობახიძემ.როგორც კობახიძემ აღნიშნა, საუბარი შეეხო ტურიზმის სფეროში თანამშრომლობას.„ასევე, ჩვენ ვისაუბრეთ ტურიზმის სფეროში თანამშრომლობის გაღრმავებისა და ორმხრივი ტურისტული ნაკადების ზრდის მნიშვნელობაზე. ამას აქვს დატვირთვა,როგორც ეკონომიკური თვალსაზრისით, ასევე ჩვენს ხალხებს შორის ურთიერთობების შემდგომი განვითარების კუთხით. აღინიშნა, რომ საქართველოსა და ყირგიზეთს შორის პირდაპირი ფრენების დანიშვნა დამატებით ხელს შეუწყობდა ჩვენს ქვეყნებს შორის ტურისტული მიმართულებით თანამშრომლობის განვითარებას.ჩვენ მნიშვნელოვნად მიგვაჩნია საქართველოსა და ყირგიზეთს შორის უმაღლესი და მაღალი დონის ვიზიტების განხორციელება და მუდმივი დიალოგის შენარჩუნება. აღნიშნულთან დაკავშირებით ბატონი პრეზიდენტი მოვიწვიე ვიზიტით საქართველოში მისთვის მოსახერხებელ პერიოდში. დიდი იმედი გვაქვს, რომ პრეზიდენტის ვიზიტი საქართველოში მალე განხორციელდება. დარწმუნებული ვარ, რომ ჩვენი ურთიერთობები, ჩვენი ქვეყნების, ხალხებისა და საერთო ინტერესების საკეთილდღეოდ, მომავალში კიდევ უფრო სწრაფი ტემპით განვითარდება.დასასრულს, ჩემი და დელეგაციის წევრების სახელით, მსურს მადლობა გადაგიხადოთ გულთბილი მასპინძლობისთვის და მიღებისთვის და განვითარების შთამბეჭდავი ტემპების გათვალისწინებით, დარწმუნებული ვართ, რომ ჩვენი ურთიერთობები მომავალში კიდევ უფრო მეტად გაღრმავდება. მადლობა და მინდა, წარმატებები გისურვოთ“, – განაცხადა პრემიერ-მინისტრმა.

თეთრ სახლში გამოსვლისას აშშ-ის პრეზიდენტმა, დონალდ ტრამპმა განაცხადა, რომ აშშ-მა „ირანთან შესანიშნავ შეთანხმებას მიაღწია“.„ჩვენ ახლახან მივაღწიეთ შესანიშნავ შეთანხმებას და ახლა, დოკუმენტების საბოლოოდ ვამუშავებთ, რაც მომდევნო რამდენიმე დღეში უნდა დასრულდეს, წინ მივდივართ. სავარაუდოდ, ხელმოწერის ცერემონია ევროპაში გაიმართება. ეს შესანიშნავი მოვლენაა. ნავთობის ფასი დაეცა და, ვფიქრობ, ის კიდევ უფრო დაიკლებს, შესაძლოა, იმაზე დაბლაც, ვიდრე ადრე იყო. ფასები შემცირდება. როდესაც ნავთობის ფასი იკლებს, სხვა ხარჯებიც მცირდება. და რაც ყველაზე მნიშვნელოვანია – ჩვენ გვაქვს შეთანხმება, რომლის მიხედვითაც ირანს არასოდეს ექნება ბირთვული იარაღი. სწორედ ეს იყო მთავარი მიზანი, რის გამოც ამ ყველაფრის გავლა მოგვიწია. ამიტომ ეს ძალიან დიდი, მართლაც ძალიან მნიშვნელოვანი ამბავია. ხელმოწერა მალე გაიმართება და დოკუმენტები უკვე თითქმის საბოლოო ფორმაშია. ვნახოთ. ყველაფერი ძალიან კარგად მიდის. ეს საკმაოდ სწრაფად უნდა დასრულდეს. მათ ეს შეთანხმება ზუსტად ისევე სურდათ, როგორც სხვებს. ვფიქრობ, ამის შედეგად ბევრი კარგი ურთიერთობა ჩამოყალიბდება.ახლახან ვესაუბრე იმ ქვეყნების ლიდერებს, რომლებიც განცხადებაში იყვნენ ნახსენები. ვესაუბრე ბიბი ნეთანიაჰუს. ვესაუბრე კატარის, არაბთა გაერთიანებული საამიროების, საუდის არაბეთის, ბაჰრეინის, ქუვეითის და სხვა ქვეყნების ლიდერებს. ასევე თურქეთის პრეზიდენტს, რეჯეფ თაიფ ერდოღანს. პრეზიდენტი ერდოღანი შესანიშნავია. ეს მართლაც შესანიშნავი მოვლენაა. პაკისტანი ფანტასტიკური იყო. პრემიერ-მინისტრი და ის, ვისაც მე გენერალს ვეძახი – შესანიშნავი გენერალია. ყველა ძალიან ბედნიერია. მთელი ახლო აღმოსავლეთი ბედნიერია და არა მხოლოდ ახლო აღმოსავლეთი. როგორც კი ხელს მოვაწერთ შეთანხმებას, სრუტე გაიხსნება. როგორც კი ხელს მოვაწერთ, ძალიან მალე, შესაძლოა უკვე ამ შაბათ-კვირას ევროპაში. მე იქ ყოფნას ვერ შევძლებ, მაგრამ ვიცე-პრეზიდენტი ჯეი დი ვენსი დაესწრება. ასევე რამდენიმე სხვა წარმომადგენელიც. სტივ უიტკოფმა და ჯარედ კუშნერმა შესანიშნავი სამუშაო შეასრულეს.“”, – აღნიშნა ტრამპმა.მისი თქმით, ჰორმუზის სრუტე შეთანხმების ხელმოწერისთანავე გაიხსნება.ამასთან, ჟურნალისტის კითხვაზე, დათანხმდა თუ არა ირანის უზენაესი ლიდერი შეთანხმებას, ტრამპმა უპასუხა: „როგორც გავიგე, პასუხი დადებითია“.

საქართველოს საპატრიარქოში უწმინდესი და უნეტარესი, სრულიად საქართველოს კათოლიკოს-პატრიარქი, მცხეთა-თბილისის მთავარეპისკოპოსი და ბიჭვინთის და ცხუმ-აფხაზეთის მიტროპოლიტი შიო III საქართველოში ისრაელის საგანგებო და სრულუფლებიან ელჩს, ვალიდ აბუ ჰაიას შეხვდა.საქართველოს საპატრიარქოს ინფორმაციით, შეხვედრას ესწრებოდნენ საქართველოს საპატრიარქოს საგარეო განყოფილების თავმჯდომარე, ზუგდიდისა და ცაიშის მიტროპოლიტი გერასიმე (შარაშენიძე), სრულიად საქართველოს კათოლიკოს-პატრიარქის მდივანი, დეკანოზი მიქაელ ბოტკოველი, თბილისის სასულიერო აკადემიისა და სემინარიის რექტორი, პროტოპრესვიტერი გიორგი ზვიადაძე, საპატრიარქოს საზოგადოებასთან ურთიერთობის სამსახურის ხელმძღვანელი, დეკანოზი ანდრია ჯაღმაიძე და ამავე სამსახურის წარმომადგენლები.„შეხვედრა გულთბილ და მეგობრულ ვითარებაში წარიმართა. სტუმართან საუბრისას მისმა უწმინდესობამ ისაუბრა ქართველი და ებრაელი ხალხების განსაკუთრებული ურთიერთპატივისცემისა და მრავალსაუკუნოვანი მეგობრობის შესახებ, რომელიც მშვიდობიანი თანაცხოვრებისა და სიყვარულის მაგალითს წარმოადგენს.კათოლიკოს-პატრიარქმა ყურადღება გაამახვილა რწმენისა და სულიერი ფასეულობების მნიშვნელობაზე ორი ქვეყნის ისტორიასა და საზოგადოებრივ ცხოვრებაში. მისი თქმით, მიუხედავად მცირე ტერიტორიისა და მრავალი ისტორიული განსაცდელისა, სწორედ რწმენის, კულტურისა და ეროვნული იდენტობის ერთგულებამ გადაარჩინა ქართველი და ებრაელი ხალხები.ელჩმა კათოლიკოს-პატრიარქს აღსაყდრება მიულოცა, მადლობა გადაუხადა მიღებისთვის და აღნიშნა, რომ მისთვის განსაკუთრებული მნიშვნელობა აქვს საქართველოს საპატრიარქოში სტუმრობასა და პირადად მისი უწმინდესობის გაცნობას. მან ასევე აღნიშნა, რომ, მიუხედავად რელიგიური განსხვავებისა, ქრისტიანობას დიდ პატივის სცემს, რადგან ქართველ და ებრაელ ერებს მრავალი საერთო ღირებულება აერთიანებთ.შეხვედრაზე საუბარი შეეხო აგრეთვე ჩვენს ქვეყნებს შორის არსებული მეგობრული ურთიერთობების შემდგომი გაღრმავების პერსპექტივებს. ელჩმა აღნიშნა, რომ მისასალმებელი იქნება, სამომავლოდ ერთობლივი კულტურული, საგანმანათლებლო და სხვა სახის ღონისძიებების განხორციელება.მხარეებმა ასევე იმსჯელეს მსოფლიოში მიმდინარე მნიშვნელოვან პროცესებსა და იმ გამოწვევებზე, რომელთა წინაშეც საქართველო და ისრაელი დგანან. აღინიშნა, რომ რელიგიური და ზნეობრივი ფასეულობები დღესაც მნიშვნელოვან როლს ასრულებს ორივე ერის სულიერი სიმტკიცისა და განვითარების საქმეში.კათოლიკოს-პატრიარქმა ხაზი გაუსვა ისრაელის ხელისუფლების კეთილგანწყობასა და მზრუნველობას ისრაელში მცხოვრები ქართველებისადმი. მისმა უწმინდესობამ სთხოვა ელჩს, მადლობა გადაეცა იერუსალიმის პატრიარქ თეოფილესთვის ნეტარხსენებული კათოლიკოს-პატრიარქის, ილია II-ის გარდაცვალების გამო გამოხატული თანაგრძნობისათვის. მან ასევე გამოთქვა მადლიერება მისი აღსაყდრებისადმი გამოგზავნილი მილოცვისა და საჩუქრებისთვის.შეხვედრის დასასრულს მხარეებმა ერთმანეთს სამახსოვრო საჩუქრები გადასცეს“,- აღნიშნულია საპატრიარქოს ინფორმაციაში.

პარტია „ხალხის ძალის“ რეგიონული მდივანი, დეპუტატი ვიქტორ ჯაფარიძე რამდენიმე დღის წინ მედიასთან გამოეხმაურა მამუკა მდინარაძისა და ირაკლი კობახიძის განცხადებას, რომ სვანეთში უკანონო კრიპტომაინინგის აღმოსაფხვრელად დაიწყება გამრიცხველიანების პროცესი.ჯაფარიძის განცხადება ოპოზიციურმა მედიამ და რადიკალურმა ოპოზიციამ კონტექსტიდან ამოგლეჯილი სახით გაავრცელა - თითქოს დეპუტატი ემხრობა სვანეთში უფასო ელექტროენერგიის მიწოდების შეწყვეტას.საკითხზე ვიქტორ ჯაფარიძემ დღეს კიდევ ერთხელ გააკეთა კომენტარი და განმარტა თავისი პოზიცია. მისი სიტყვებით, მედიასთან საუბარში მან ხაზი გაუსვა მაინერების პრობლემას და თქვა, რომ სახელმწიფოს პრეტენზია აქვს არა მოსახლეობასთან, არამედ კანონის დამრღვევებთან:„ოპოზიციური ტელევიზიების და რადიკალური ოპოზიციის წარმომადგენლების დანიშნულებაა, რომ „ფეიკი“ გამოიტანონ და ილაპარაკონ ტყუილი. ბატონმა მამუკა მდინარაძემ ცალსახად თქვა, რომ მოსახლეობასთან პრეტენზია არ აქვთ, პრეტენზია აქვთ იმ ადამიანებთან, ვინც მოსახლეობის ხარჯზე კრიპტომაინინგით არის დაკავებული. მთავრობა უფასო ენერგიას აძლევს მოსახლეობას და ამ დროს, ვიღაცები ამ ელექტროენერგიას უკანონოდ იყენებენ. ამ საკითხზე ვისაუბრე და გაუგებარია ჩემთვის, რას მოჰყვა სპეკულაცია.რომ მეთქვა, კარგია, მოსახლეობას აუცილებლად უნდა დაუწესდეს გადასახადი - სხვა თემაა, მაგრამ მე სხვა რაღაც ვთქვი - სახელმწიფო და ქართული ხელისუფლება არ დატოვებს მოსახლეობას პრობლემების პირისპირ, მოულოდნელად არ ჩაუჭრის ელექტროენერგიას. ჯერ მიყვებიან და ამოიღებენ ამ მაინერებს, რომ დადგინდეს - რა რაოდენობის ელექტროენერგიას მოიხმარს მესტიის მოსახლეობა და მხოლოდ ამის შემდეგ მიიღება გადაწყვეტილება გამრიცხველიანებასთან დაკავშირებით. ჩემს ინტერვიუში ვთქვი ისიც, რომ ვინაიდან ყაზბეგში არის შეშით მომარაგების პრობლემა, ამიტომ სახელმწიფო ადგილობრივ მოსახლეობას ბუნებრივი აირის გადასახადს უსუფსიდირებს. დარწმუნებული ვარ, სვანეთის მოსახლეობასაც ხელისუფლება დაუსუბსიდირებს ელექტროენერგიის ღირებულებას, განსაკუთრებით სოციალურად დაუცველებს და, აქედან გამომდინარე, მათ არ შეექნებათ პრობლემა. მით უმეტეს, სვანეთი გაზიფიცირებული არ არის და მთელი მოსახლეობა ელექტროენერგიაზეა დამოკიდებული. საერთო ჯამში კი, დღესდღეობით არა მხოლოდ სოციალურად დაუცველებს, არამედ მთელი სვანეთის მოსახლეობას აქვს პრობლემა ამ უკანონო მაინინგების გამო, ვინაიდან დენის ძაბვა 220 ვოლტი კი არა 140 ვოლტიც არ მიეწოდება, უფრო მეტიც, ხშირია ელექტროენერგიის საერთოდ გათიშვის შემთხვევებიც. სწორედ ამის გამო მოსახლეობა ელემენტარულად სარეცხ მანქანას, ტელევიზორს, უთოს და ა.შ. ვერ რთავს და ესეც პრობლემაა. ხოლო როდესაც ქვეყანაში ტურიზმის განვითარებაზე ვსაუბრობთ და მაგალითად, ერთ-ერთ ყველაზე მოთხოვნად ტურისტულ ზონაში მესტიაში - სამთო-სათხილამურო კურორტ თეთნულდში ჩამოდის ტურისტი და მას საბაგირო ხვდება გათიშული, ეს არის სრულიად დაუშვებელი.აღსანიშნავია ისიც, რომ სვანეთში 2012 წლამდე სულ ერთი სასტუმრო და რამდენიმე „გესთჰაუსი“ იყო, დღეს კი სასტუმროებისა და საოჯახო სასტუმროების რაოდენობამ 800-ს გადააჭარბა. აბსოლუტურად ყველა კეთილმოწყობილია, ყველას აქვს ელექტროენერგიაზე მომუშავე გათბობა და ყველა ის სერვისი, რისი მიწოდებაც მოსახლეობას ტურისტებისთვის შეუძლია. საქართველოს დღევანდელი ხელისუფლების ერთ-ერთი პრიორიტეტი სწორედ ტურიზმის განვითარებაა და ამ მიზნით არაერთი ნაბიჯი გადაიდგა და დღესაც იდგმება მმართველი გუნდის მიერ. სწორედ ამის დადასტურებაა მამუკა მდინარაძის მიერ გაკეთებული განცხადება, რომ აუცილებლად გათვალისწინებული იქნება მოსახლეობის პრობლემები. ოპოზიციურმა ტელევიზიებმა კონტექსტიდან ამოგლეჯილად გაავრცელეს ჩემი ნათქვამი. ვინმეს თუ რამე აინტერესებს და ჩემს ნათქვამზე პრეტენზია აქვთ, ბატონებო, იქნებ დაინტერესდეთ ბოლომდე იმით, რაც ვთქვი და მაინცდამაინც „ტვ პირველის“ და „მთავარის“ ნიუსებით არ იმსჯელოთ“, - განაცხადა ვიქტორ ჯაფარიძემ.