“ნაციონალური მოძრაობა” ერთ-ერთი პირველია, ვინც სალომე ზურაბიშვილს კიდევ ერთხელ გაემიჯნა. სააკაშვილის პარტია, ყოფილ პრეზიდენტს საზოგადოების მოტყუებაში ადანაშაულებს და ამბობს, რომ ზურაბიშვილი პირადი კომფორტისა და საპარლამენტო მანდატის მოსაპოვებლად იბრძვის. მწვავე პოზიცია აქვს პარტიის პოლიტსაბჭოს თავმჯდომარეს. ლევან ხაბეიშვილი სოციალურ ქსელში წერს, რომ ნებისმიერი არჩევნების ხსენება დანაშაულია, მასში მონაწილეობის შემთხვევაში კი ოპოზიციონერი პოლიტიკოსები თეატრის მსახიობები იქნებიან.
ოპოზიციის კრიტიკა, სალომე ზურაბიშვილმა საპროტესტო აქციაზე გაკეთებული განცხადების გამო დაიმსახურა. ყოფილმა პრეზიდენტმა თქვა, რომ ადგილობრივ არჩევნებამდე ჯერ საპარლამენტო არჩევნები უნდა ჩატარდეს, ან ორივე ერთად გაიმართოს.
ზურაბიშვილის ამ განცხადებას პროტესტი ადგილზე, საპროტესტო აქციაზევე მოყვა. პაატა ბურჭულაძე პირველი იყო, ვინც მკაფიოდ თქვა, რომ ყოფილმა პრეზიდენტმა ხალხი ფუჭი სიტყვების მოსასმენად მიიყვანა.
რუსთაველის გამზირის პარალელურად , სალომე ზურაბიშვილმა კრიტიკული გზავნილები მიიღო სხვა პოლიტიკური ძალებიდანაც. ნიკა მელია, ვისთვისაც ყოფილი პრეზიდენტის განცხადება ბუნდოვანი აღმოჩნდა, ზურაბიშვილისგან ითხოვს განმარტოს- პირადი პოზიცია გააჟღერა, თუ პლატფორმაზე არსებული პარტიების სახელით საუბრობდა.
სალომე ზურაბიშვილის განცხადება გასაგები და მისაღები აღმოჩნდა ლელოსთვის. ხაზარაძე ჯაფარიძის გუნდში ამბობენ, რომ მათთვის პრიორიტეტი სწორედ ახალი საპარლამენტო არჩევნებია. ნებისმიერი შემდეგი მარათონისთვის ემზადება გიორგი გახარიას გუნდი. ექსპრემიერმა განცხადება პარტიის ყრილობაზე გააკეთა.
ოპოზიციას დღეს სახელისუფლებო გუნდიდან შეახსენეს, რომ მათ საკუთარი მხარდამჭერებიც დაკარგეს. ამის დასტური ქართული ოცნებისთვის საპროტესტო აქციაზე მისული ადამიანების რაოდენობა იყო. მმართველ გუნდში დარწმუნებული არიან, რომ პარტიები, ვინც მითითებებს უცხოელი დამფინანსებლებისგან იღებენ, ნებისმიერ არჩევნებში დამარცხდებიან.
თვითმმართველობის არჩევნები 4 ოქტომბერს გაიმართება. მერებსა და საკრებულოების წევრებს ქვეყნის მასშტაბით 64 მუნიციპალიტეტში აირჩევენ.