სგპ ,,წითელ ხიდზე“ მებაჟე ოფიცრებმა 10 კილოგრამამდე არადეკლარირებული ვერცხლის ნაკეთობების შემოტანის ფაქტი აღკვეთეს

მეხანძრე-მაშველებმა სოფელ ომალოში, მთის ფერდობზე დაკარგული და დაშავებული მწყემსი დრონის დახმარებით იპოვეს და უსაფრთხო ადგილზე გადაიყვანეს. ინფორმაციას საგანგებო სიტუაციების მართვის სამსახური ავრცელებს.უწყების ცნობით, 112-ში შევიდა შეტყობინება სოფელ ომალოში დაკარგული მწყემსის შესახებ.„შეტყობინების მიღებისთანავე საგანგებო სიტუაციების მართვის სამსახურის მეხანძრე-მაშველები ადგილზე დაუყოვნებლივ გამოცხადდნენ და სამძებრო-სამაშველო ღონისძიება დაიწყეს.სამძებრო სამუშაოების ფარგლებში, ტერიტორია დრონების საშუალებით დათვალიერდა, რის შედეგადაც მეხანძრე-მაშველებმა მთის ფერდობზე დაშავებული მწყემსი იპოვეს.მეხანძრე-მაშველებმა დაშავებული უსაფრთხო ადგილზე ჩამოიყვანეს, საიდანაც იგი სასწრაფო სამედიცინო დახმარების ჯგუფმა სამედიცინო დაწესებულებაში გადაიყვანა“, – ნათქვამია საგანგებო სიტუაციების მართვის სამსახურის მიერ გავრცელებულ ინფორმაციაში.

„უმაღლესი განათლების ერთ-ერთი უმნიშვნელოვანესი გამოწვევაა ისეთი საგანმანათლებლო გარემოს შექმნა, სადაც აკადემიური ცოდნა რეალურ პროფესიულ გამოცდილებასა და თანამედროვე საერთაშორისო პრაქტიკასთან ბუნებრივად იკვეთება. სწორედ ამ თვალსაზრისით არის განსაკუთრებით მნიშვნელოვანი ჩვენი სტუდენტებისა და პროფესორ-მასწავლებლების მონაწილეობა ხელოვნებისა და მოგზაურობის საერთაშორისო ფილმების ფესტივალზე - ARTFF 2026. ფესტივალი საინტერესო მაგალითია იმისა, თუ როგორ შეიძლება ერთმანეთთან დაკავშირება ხელოვნების, კულტურის, ტურიზმის, ბიზნესისა და თანამედროვე ტექნოლოგიების სფეროები. განსაკუთრებით მნიშვნელოვანია ხელოვნური ინტელექტისა და ციფრული ტექნოლოგიების მზარდი გავლენა ამ ინდუსტრიებზე. ჩვენთვის, როგორც ბიზნესტექნოლოგიების ფაკულტეტისთვის, ეს საკითხი ორმაგად საინტერესოა, ერთი მხრივ, სტუდენტები ეცნობიან ტექნოლოგიურ ინოვაციებს, ხოლო მეორე მხრივ, ხედავენ, როგორ გარდაიქმნება მათი გამოყენებით სრულიად განსხვავებული სფეროები და იქმნება ახალი ბიზნეს და პროფესიული შესაძლებლობები“, - ამის შესახებ სტუ-ის ბიზნესტექნოლოგიების ფაკულტეტის დეკანმა, პროფესორმა რუსუდან ქუთათელაძემ სტუდენტებთან შეხვედრისას, სადაც ARTFF 2026-ის მნიშვნელობასა და ფესტივალზე სტუდენტების მონაწილეობაზე ისაუბრა, განაცხადა.ინფორმაციას საქართველოს ტექნიკური უნივერსიტეტი ავრცელებს.მისივე ცნობით, საქართველოს ტექნიკური უნივერსიტეტის ბიზნესტექნოლოგიების ფაკულტეტის პროფესორ-მასწავლებლები: დეკანი რუსუდან ქუთათელაძე, პროფესორები ლელა კოჭლამაზაშვილი, მარინა მეტრეველი, ასოცირებული პროფესორი ნანი მამფორია და სტუდენტები ხელოვნებისა და მოგზაურობის საერთაშორისო ფილმების ფესტივალს - ARTFF 2026-ს დაესწრნენ და ფესტივალის ფარგლებში გამართულ სხვადასხვა საგანმანათლებლო, კულტურულ და პროფესიულ ღონისძიებაში აქტიური მონაწილეობა მიიღეს.საერთაშორისო ფესტივალმა კინოს, ხელოვნების, მოგზაურობისა და თანამედროვე შემოქმედებითი ინდუსტრიების წარმომადგენლებს მოუყარა თავი და მონაწილეებს შესაძლებლობა მისცა, გაცნობოდნენ თანამედროვე საერთაშორისო პრაქტიკას, ინოვაციურ მიდგომებსა და ინდუსტრიის განვითარების უახლეს ტენდენციებს. ფესტივალის პროგრამის ფარგლებში დაგეგმილი ღონისძიებები თბილისის სხვადასხვა კულტურულ და საგანმანათლებლო სივრცეში, მათ შორის, საქართველოს სახვითი ხელოვნების მუზეუმსა და აპოლონ ქუთათელაძის სახელობის თბილისის სახელმწიფო სამხატვრო აკადემიაში გაიმართა.ფესტივალში მონაწილეობა ბიზნესტექნოლოგიების ფაკულტეტის სტუდენტებისა და აკადემიური პერსონალისთვის განსაკუთრებით მნიშვნელოვანი იყო პროფესიული ცოდნის გაფართოებისა და საერთაშორისო გამოცდილების გაზიარების თვალსაზრისით. მათ შესაძლებლობა ჰქონდათ დასწრებოდნენ სხვადასხვა ქვეყნის კინოსა და შემოქმედებითი ინდუსტრიების წარმომადგენლების, რეჟისორებისა და პროდიუსერების მიერ ჩატარებულ ვორქშოფებს, მასტერკლასებსა და საგანმანათლებლო შეხვედრებს.სტუ-ის ბიზნესტექნოლოგიების ფაკულტეტის დეკანის თქმით, ფესტივალის ერთ-ერთ მნიშვნელოვან მიმართულებას წარმოადგენდა ხელოვნებისა და მოგზაურობის სფეროების თანამედროვე ტექნოლოგიებთან დაკავშირებული განვითარების ტენდენციების განხილვა. განსაკუთრებული ყურადღება დაეთმო ციფრული ტექნოლოგიებისა და ხელოვნური ინტელექტის (AI) მზარდ როლს შემოქმედებით ინდუსტრიებში, მათ შორის, ხელოვნების, ტურიზმისა და კულტურული მემკვიდრეობის პოპულარიზაციის მიმართულებით. როგორც პროფესორი რუსუდან ქუთათელაძე აცხადებს, აღნიშნული საკითხები განსაკუთრებით აქტუალურია ბიზნესტექნოლოგიების ფაკულტეტის სტუდენტებისთვის, ვინაიდან თანამედროვე ბიზნესგარემო სულ უფრო მეტად ეფუძნება ტექნოლოგიური ინოვაციების, მონაცემთა ანალიზის, ციფრული ტრანსფორმაციისა და ხელოვნური ინტელექტის გამოყენებას. საერთაშორისო ფესტივალის ფარგლებში მიღებულმა გამოცდილებამ სტუდენტებს შესაძლებლობა მისცა, აკადემიური სივრცის მიღმა დაკვირვებოდნენ იმას, თუ როგორ გარდაქმნის ახალი ტექნოლოგიები შემოქმედებით ინდუსტრიებს და როგორ შეიძლება მათი გამოყენება ტურიზმისა და კულტურის სფეროების განვითარების ხელშესაწყობად.„ფესტივალის საგანმანათლებლო კომპონენტი განსაკუთრებით მნიშვნელოვანი იყო თეორიული ცოდნისა და პრაქტიკული გამოცდილების სინთეზის თვალსაზრისით. საერთაშორისო პროფესიონალებთან უშუალო კომუნიკაციამ სტუდენტებს საშუალება მისცა, გაცნობოდნენ რეალურ პროფესიულ გამოცდილებას, დაესვათ მათთვის საინტერესო კითხვები და უკეთ დაენახათ კავშირი უნივერსიტეტში მიღებულ ცოდნასა და თანამედროვე სამუშაო გარემოს მოთხოვნებს შორის. ARTFF 2026-ის მსგავსი საერთაშორისო ღონისძიებები სტუდენტებისთვის წარმოადგენს შესაძლებლობას, გააფართოონ პროფესიული და აკადემიური ინტერესების სფერო, დაამყარონ ახალი კონტაქტები და გაეცნონ სხვადასხვა ქვეყნის წარმომადგენლების გამოცდილებას. ამგვარი აქტივობები ხელს უწყობს სტუდენტებში კრიტიკული და შემოქმედებითი აზროვნების, ინტერდისციპლინური ხედვისა და საერთაშორისო კომპეტენციების განვითარებას. ბიზნესტექნოლოგიების ფაკულტეტისთვის საერთაშორისო საგანმანათლებლო და კულტურულ პროექტებში სტუდენტებისა და აკადემიური პერსონალის ჩართულობა უმაღლესი განათლების თანამედროვე ხედვის მნიშვნელოვანი ნაწილია. ტექნოლოგიების სწრაფი განვითარების პირობებში ბიზნესის, ხელოვნების, კულტურისა და ტურიზმის სფეროები სულ უფრო მეტად იკვეთება და ქმნის ახალ შესაძლებლობებს როგორც პროფესიული განვითარების, ისე ინოვაციური ბიზნესმოდელების ჩამოყალიბებისთვის. ვფიქრობ, ARTFF 2026-ის გამოცდილება ჩვენი სტუდენტებისთვის განსაკუთრებით ღირებულია იმ თვალსაზრისითაც, რომ მათ დაანახა, რომ თანამედროვე ბიზნესტექნოლოგიები მხოლოდ ტრადიციულ ბიზნესს არ უკავშირდება. ტექნოლოგიური ცოდნა სულ უფრო აქტიურად გამოიყენება კულტურის, ხელოვნების, ტურიზმისა და კრეატიული ინდუსტრიების განვითარებისთვის და ამ პროცესში იქმნება ახალი პროფესიები, ახალი სერვისები და ახალი ბიზნესმოდელები. სწორედ ასეთი ინტერდისციპლინური ხედვის განვითარებაა ის მიმართულება, რომელსაც ჩვენი ფაკულტეტი მომავალშიც განსაკუთრებულ ყურადღებას დაუთმობს“, - აცხადებს რუსუდან ქუთათელაძე.

ბოლო წლების განმავლობაში საქართველოს ეკონომიკური პოლიტიკა სწორედ ამ მიზანს ემსახურება, შევქმნათ ისეთი ბიზნესგარემო, სადაც კერძო ინვესტიცია დაცულია, საერთაშორისო პარტნიორობა წახალისებულია, ხოლო მსხვილი პროექტები სწრაფად და პროგნოზირებადად ხორციელდება, – განაცხადა პროექტ „არქი გრანდ ავენიუს“ პრეზენტაციაზე სიტყვით გამოსვლისას ვიცე-პრემიერმა, ეკონომიკისა და მდგრადი განვითარების მინისტრმა, მარიამ ქვრივიშვილმა.როგორც მინისტრმა აღნიშნა, საქართველო სულ უფრო ხშირად ხდება ადგილი, სადაც საერთაშორისო კომპანიები მხოლოდ ოპერირებას კი არ იწყებენ, არამედ გრძელვადიან განვითარებასაც გეგმავენ.„„არქი გრანდ ავენიუ“ სწორედ ასეთი ნდობის მაგალითია. ეს არის პროექტი, რომელიც აერთიანებს საცხოვრებელ, სასტუმრო, კომერციულ, რეკრეაციულ და საზოგადოებრივ ფუნქციებს, ქმნის ახალ მიზიდულობის ცენტრს და ქალაქის განვითარებას სრულიად ახალ მასშტაბს სძენს. განსაკუთრებით აღსანიშნავია ისტორიული ვაგონთმშენებელი ქარხნის ტერიტორიის თანამედროვე ფუნქციით გაცოცხლება, რაც კიდევ ერთხელ აჩვენებს, რომ განვითარება შესაძლებელია ქალაქის მემკვიდრეობის პატივისცემითაც“, – აღნიშნა სიტყვით გამოსვლისას მარიამ ქვრივიშვილმა.მისივე განცხადებით, საქართველოს მთავრობა მომავალშიც გააგრძელებს ისეთი ეკონომიკური პოლიტიკის განხორციელებას, რომელიც ხელს შეუწყობს მაღალი ღირებულების ინვესტიციებს, თანამედროვე ურბანულ განვითარებასა და საერთაშორისო პარტნიორობის კიდევ უფრო გაღრმავებას.„ბოლო პერიოდში საქართველოში არაერთი მასშტაბური საინვესტიციო და დეველოპერული პროექტი დაიწყო. თითოეული მათგანი განსხვავებულია, თუმცა მათ ერთი საერთო აქვთ – ისინი ასახავენ იმ ნდობას, რომელიც ინვესტორებსა და საერთაშორისო პარტნიორებს საქართველოს ეკონომიკის მიმართ აქვთ. სწორედ ეს არის მშვიდობაზე, სტაბილურობასა და შედეგზე ორიენტირებული ეკონომიკური პოლიტიკის შედეგი – პოლიტიკის, რომელიც საქართველოს  ეკონომიკურ გაძლიერებასა და ჩვენი საზოგადოების კეთილდღეობის ზრდას ემსახურება“, – აღნიშნა მარიამ ქვრივიშვილმა.მისივე თქმით, თანამედროვე ეკონომიკური განვითარებისთვის მნიშვნელოვანია, როგორ იქმნება ისეთი ურბანული სივრცეები, რომლებიც ერთდროულად იზიდავს ინვესტიციას, ქმნის ახალ სამუშაო ადგილებს, ავითარებს ტურიზმს, ზრდის ბიზნესაქტივობას და საზოგადოებას ცხოვრების გაუმჯობესებულ ხარისხს სთავაზობს.„განსაკუთრებით მნიშვნელოვანია, რომ „არქი გრანდ ავენიუს“ პროექტში მონაწილეობენ მსოფლიოში აღიარებული საერთაშორისო პარტნიორები – „ჰილტონი“, „ვინდჰემი“ და წამყვანი არქიტექტურული თუ ურბანული კომპანიები. თანამედროვე ეკონომიკური განვითარებისთვის მნიშვნელოვანია, თუ როგორ იქმნება ისეთი ურბანული სივრცეები, რომლებიც ერთდროულად იზიდავს ინვესტიციას, ქმნის ახალ სამუშაო ადგილებს, ავითარებს ტურიზმს, ზრდის ბიზნესაქტივობას და ჩვენს საზოგადოებას ცხოვრების გაუმჯობესებულ ხარისხს სთავაზობს – სწორედ ასეთი პროექტია „არქი გრანდ ავენიუ““, – განაცხადა მარიამ ქვრივიშვილმა.როგორც მინისტრმა აღნიშნა, პროექტის განხორციელებაში მსოფლიოში აღიარებული საერთაშორისო კომპანიები არიან ჩართულები.„მოხარული ვარ, რომ დღეს წარმოდგენილია მისი განვითარების ახალი ეტაპი – პროექტი, რომელიც დაახლოებით ორი მილიარდი ლარის ინვესტიციას აერთიანებს და თბილისის ურბანული განვითარების ერთ-ერთ ყველაზე მასშტაბურ მაგალითს წარმოადგენს. განსაკუთრებით მნიშვნელოვანია, რომ ამ პროექტში მონაწილეობენ მსოფლიოში აღიარებული საერთაშორისო პარტნიორები – „ჰილტონი“, „ვინდჰემი“ და წამყვანი არქიტექტურული თუ ურბანული კომპანიები“, – აღნიშნა მარიამ ქვრივიშვილმა.მინისტრის განცხადებით, ეს კიდევ ერთხელ ადასტურებს, რომ საქართველო საერთაშორისო ინვესტორებისთვის სანდო, სტაბილური და მიმზიდველი ქვეყანაა, ხოლო ჩვენი სამშენებლო და უძრავი ქონების სექტორი განვითარების ახალ ეტაპზე გადავიდა.

“ქართულ ოცნებას” ჯერ კიდევ ჰყავდა კონკრეტული ევროპარლამენტარები და პოპულისტი, რადიკალი მემარჯვენე ჯგუფები, რომლებიც გარკვეულწილად “ქართული ოცნების” მხარდამჭერ განცხადებებს აკეთებდნენ, თუმცა პარტიების აკრძალვის საკითხი რომ დადგა დღის წესრიგში, ეს იმდენად არადემოკრატიული ნაბიჯია და იმდენად სცილდება ავტორიტარული რეჟიმის ქმედებებს, რომ იმ დეპუტატების ნაწილმაც კი გააკრიტიკა “ქართული ოცნება”, რომელიც მანამდე მას მხარს უჭერდა , - ამის შესახებ პარტია “ჯერ საქართველოს” პოლიტიკური საბჭოს წევრმა, ნიკოლოზ ხატიაშვილმა “პალიტრანიუსის” გადაცემა “თავისუფალ სტუდიაში” ევროპარლამენტის მიერ საქართველოს შესახებ რეზოლუციის მიღების თაობაზე განაცხადა.ხატიაშვილის შეფასებით, რეზოლუციის მხარდამჭერი დეპუტატების რაოდენობა აჩვენებს იმას, რომ ევროპაში არის სრული კონსენსუსი იმასთან დაკავშირებით, რომ “ქართული ოცნება” არადემოკრატიულ ნაბიჯებს დგამს ქვეყანაში.“ეს რეზოლუცია არ არის განსაკუთრებული სიახლე. ეს არის იმ მოვლენების ლოგიკური გაგრძელება, რაც 2024 წლიდან ქვეყანაში ვითარდება. ევროპარლამენტის მხრიდან ეს არის ბუნებრივი რეაქცია არადემოკრატიულ ნაბიჯებზე, კანონებზე, ადამიანების დაკავებაზე, ყველა ანტიდემოკრატიულ ქმედებაზე, რაც “ქართულმა ოცნებამ” ბოლო ორ წელიწადში ჩაიდინა. ეს პროცესი კიდევ გაგრძელდება, თუ “ქართული ოცნება” ევროინტეგრაციის გზას არ დაუბრუნდება და ქვეყანაში დემოკრატიულ წესრიგს არ აღადგენს.ჩვენ ვნახეთ, რომ რეზოლუციას 445-მა დეპუტატმა დაუჭირა მხარი, წინააღმდეგი კი 37 დეპუტატი იყო. აქ მნიშვნელოვანი ფაქტორი ის არის, რომ “ქართულ ოცნებას” ჯერ კიდევ ჰყავდა კონკრეტული ევროპარლამენტარები და პოპულისტი, რადიკალი მემარჯვენე ჯგუფები, რომლებიც გარკვეულწილად “ქართული ოცნების” მხარდამჭერ განცხადებებს აკეთებდნენ, თუმცა პარტიების აკრძალვის საკითხი რომ დადგა დღის წესრიგში, ეს იმდენად არადემოკრატიული ნაბიჯია და იმდენად სცილდება ავტორიტარული რეჟიმის ქმედებებს, რომ იმ დეპუტატების ნაწილმაც კი გააკრიტიკა “ქართული ოცნება”, რომელიც მანამდე მას მხარს უჭერდა.ევროდეპუტატების დაახლოებით 65% ამ რეზოლუციას მხარს უჭერს, დაახლოებით 4% წავიდა მის წინააღმდეგ, ზოგმაც თავი შეიკავა. ეს სურათი ერთობლიობაში გვაჩვენებს, რომ ევროპაში არის სრული კონსენსუსი იმასთან დაკავშირებით, რომ “ქართული ოცნება” არადემოკრატიულ ნაბიჯებს დგამს ქვეყანაში.მიუხედავად იმისა, რომ რეზოლუცია არ არის სავალდებულო ქვეყნებისთვის აღსასრულებლად და მას მხოლოდ სარეკომენდაციო ხასიათი აქვს, მისი ლეგიტიმაციიდან, პოლიტიკური მხარდაჭერიდან და დეპუტატების რაოდენობიდან გამომდინარე, ვინც ამ რეზოლუციას მისცა ხმა, გათვალისწინებული იქნება როგორც ევროკავშირის ქვეყნების მიერ თავისი გადაწყვეტილებების მიღების პროცესში, ასევე საერთაშორისო ორგანიზაციების მხრიდან. მაგალითისთვის, ეუთომ, შესაძლოა, რაღაც კონკრეტული გადაწყვეტილებების მიღებისას ამ რეზოლუციის შინაარსზე გააკეთოს აპელირება და დაიხმაროს თავისი გადაწყვეტილების მიღების პროცესში, აქედან გამომდინარე, მიუხედავად რეზოლუციის არასავალდებულო ხასიათისა, მას მაინც ძლიერი პოლიტიკური წონა ექნება “, - განაცხადა მან.ხატიაშვილმა ევროკავშირისა და დიდი ბრიტანეთის მიერ სანქციების შესაძლო დაწესებასა და მის გავლენებზეც ისაუბრა.კითხვაზე, რატომ ასანქცირებს ესა თუ ის ქვეყანა საქართველოს მოქალაქეებს მხოლოდ რუსეთის სასარგებლო საქმიანობის გამო და არა საკუთრივ “ქართული ოცნების” სასარგებლო ქმედებისთვის და რა ფაზაში უნდა გადავიდეს ქვეყანაში პროცესები იმისთვის, რომ კონკრეტული პირების დასანქცირება უშუალოდ “ქართულ ოცნებასთან” კავშირების გამო მოხდეს, ხატიაშვილმა უპასუხა, რომ აქამდე ევროკავშირი ცდილობდა, ყველა ხიდი არ დაეწვა და იმედს იტოვებდა, რომ “ქართული ოცნება” ზოგიერთ შემთხვევაში პრაგმატულ გადაწყვეტილებებს მიიღებდა.ოპოზიციონერი პოლიტიკოსის მოსაზრებით, პარტიების აკრძალვა იქნება ის ბოლო წერტილი, რომელსაც შეიძლება ევროკავშირისგან თუ დიდი ბრიტანეთისგან გარკვეული სანქციები თუ სხვა ფინანსური ნაბიჯები მოჰყვეს.“ევროკავშირი ბოლო ორი წლის განმავლობაში მაინც ცდილობდა, რომ ბოლომდე არ ჩაეწვა ხიდები და რამენაირად ეწარმოებინა დიალოგები ან ისეთი ნაბიჯები გადაედგა, რომლებიც რადიკალიზმს არ მოიცავდა. ევროკავშირს იმედი ჰქონდა, რომ “ქართული ოცნება” ზოგიერთ შემთხვევაში პრაგმატულ გადაწყვეტილებებს მიიღებდა რაიმე დათმობაზე წავიდოდა, თუმცა ჩვენ ვნახეთ, რომ ამან არ იმუშავა. მე ვფიქრობ, რომ სწორედ პარტიების საკითხი შეიძლება გახდეს სწორედ საბოლოო ტრიგერი, რომელსაც უკვე სხვა ტიპის ნაბიჯები მოჰყვება, მათ შორის, შეიძლება ეს იყოს სანქციები ან სხვა ფინანსური ნაბიჯები, რომლებიც უკვე მნიშვნელოვან გავლენას მოახდენს “ქართულ ოცნებაზე”, მაგრამ აქ ყველაზე ცუდი ის არის, რომ ამას ნეგატიური გავლენა ექნება ქვეყანაზეც, რაც შესაძლოა ჩვენმა თითოეულმა მოქალაქემ იგრძნოს, თუმცა აქ პასუხისმგებლობა “ქართულ ოცნებას” დაეკისრება, რადგან სწორედ მისი პოლიტიკა იქნება ამ ყველაფრის მიზეზი.სანქციებს ძალიან ბევრი ასპექტი აქვს. პირველი არის ის, რომ ჩვენი ბანკები საერთაშორისო სისტემის ნაწილი არიან და, შესაბამისად, როდესაც ევროკავშირი ან დიდი ბრიტანეთი აწესებს სანქციებს, ის კომპანიები თავს არიდებენ სანქცირებულ ადამიანებთან საქმის დაჭერას იმიტომ, რომ საფრთხე ექმნება მათ საქმიანობას და შესაძლოა, სწორედ ასეთ პირებთან საქმის დაჭერის გამო ისინიც დასანქცირდნენ, ეს კი ფინანსური ინსტიტუტებისთვის ძალიან არამომგებიანია.მეორე ასპექტი არის ის, რომ თუ დასანქცირებულ ადამიანს სანქციის დამწესებელ ქვეყანაში გააჩნია ფინანსური ან სხვა ტიპის აქტივი, ავტომატურად ებლოკება და მასზე წვდომა აღარ აქვს.მესამე მნიშვნელოვანი ფაქტორი არის ის, რომ თუ ევროკავშირმა ან დიდმა ბრიტანეთმა დაასანქცირა, ის ვერ ევროკავშირის ტერიტორიაზე შევა და ვერც ბრიტანეთის. ასევე მნიშვნელოვანი საკითხი არის ის, რომ როდესაც ბრიტანეთი აწესებს სანქციებს, ეს სანქციები ძირითად შემთხვევებში თანამეგობრობის წევრ ქვეყნებზეც ვრცელდება, აქედან გამომდინარე, დასანქცირებულ ადამიანს არა მხოლოდ ბრიტანეთში შეექმნება პრობლემა, არამედ ყველა იმ ქვეყანაში, რომელიც თანამეგობრობის წევრია და ასეთი ქვეყანა ძალიან ბევრია.აქედან გამომდინარე, როდესაც ადამიანი სანქციების ქვეშ ექცევა, ის სრულფასოვანი ცხოვრების შესაძლებლობას კარგავს, როგორც სხვა ქვეყანაში, ისე ქვეყნის საზღვრებს გარეთ”, - განაცხადა ხატიაშვილმა.

დედაქალაქის განვითარებას სჭირდება გაბედული ნაბიჯები და მასშტაბური ხედვა, ახალი ეკონომიკური და ურბანული მიზიდულობის ცენტრების შექმნა, რომელიც ორიენტირებულია ადამიანების ინტერესებსა და კომფორტზე. დღეს სწორედ ასეთი პროექტის, „არქი გრანდ ავენიუს“ განვითარების ახალ ეტაპს ეყრება საფუძველი, იწყება მსოფლიოში ცნობილი ბრენდების – „ჰილტონის“ ხუთვარსკვლავიანი სასტუმროსა და „ვინდჰემის“ რეზიდენციების მშენებლობა, – ამის შესახებ საქართველოს პრემიერ-მინისტრმა, ირაკლი კობახიძემ „ჰილტონის“ ხუთვარსკვლავიანი სასტუმროსა და „ვინდჰემის“ რეზიდენციების მშენებლობის დაწყების ღონისძიებაზე სიტყვით გამოსვლისას განაცხადა.როგორც მთავრობის მეთაურმა აღნიშნა, ინვესტიციის მოცულობა არის ძალიან შთამბეჭდავი, ორი მილიარდი ლარი.„ეს არის მკაფიო განაცხადი იმასთან დაკავშირებით, რომ ჩვენი ქვეყნის ეკონომიკა სტაბილურად ვითარდება, არის უზრუნველყოფილი მშვიდობიანი განვითარება და ასეთ პირობებში, რა თქმა უნდა, შესაძლებელია ამბიციური საინვესტიციო პროექტების განხორციელება. ეს პროექტი ასევე ადასტურებს ბიზნესის ნდობას ქვეყანაში შექმნილი ეკონომიკური გარემოს მიმართ, ბიზნესგარემოსადმი და ცხადყოფს, რომ საქართველოში გრძელვადიანი, მსხვილი კაპიტალდაბანდება არის ერთი მხრივ, დაცული და მეორე მხრივ, პერსპექტიული.ხუთვარსკვლავიანი სასტუმრო, თანამედროვე რეზიდენციები 21 ჰექტარზე იქნება გაშენებული, ეს არის ახალი უბნის ნაწილი და ასევე ცალკე უნდა აღინიშნოს, რომ ამ სივრცის 75 პროცენტი, 3/4 დაეთმობა პარკებს, გამწვანებასა და რეკრეაციას, რაც განსაკუთრებულ ხიბლს სძენს ამ მასშტაბურ პროექტს“, – განაცხადა ირაკლი კობახიძემ.მისივე თქმით, „არქი გრანდ ავენიუ“ ითვალისწინებს ღირსეული ცხოვრებისთვის საჭირო ყველა პირობას.„აქ აშენდება სკოლა, საბავშვო ბაღი, სპორტულ-გამაჯანსაღებელი, კულტურული და გასართობი ინფრასტრუქტურა. მრავალფუნქციური იქნება ეს სივრცე თავისი დატვირთვით, რაც მნიშვნელოვანია ასეთი ტიპის სივრცის სწორად განვითარებისთვის. ცალკე აღნიშვნის ღირსია სატრანსპორტო გვირაბი, რომელიც ამ ტერიტორიას პირდაპირ წერეთლის გამზირთან დააკავშირებს, ეს ყველაფერი მნიშვნელოვნად განტვირთავს მიმდებარე ქუჩებს. რაც განსაკუთრებით მნიშვნელოვანია, პროექტი უზრუნველყოფს ათასობით ახალ სამუშაო ადგილს, გაძლიერებულ ეკონომიკას და ჩვენი დედაქალაქი გადავა განვითარების კიდევ ერთ, მნიშვნელოვან, ძალიან საინტერესო ეტაპზე. მსგავსი პროექტებით შენდება თანამედროვე თბილისი, რომელიც ინარჩუნებს თავის გამორჩეულ იერსახეს და ვითარდება მომავლის ხედვით. მინდა, მადლობა გადავუხადო „არქი ჯგუფის“ დამფუძნებელს, ბატონ ილია წულაიას, რომელიც გამოირჩევა ასეთი მასშტაბური პროექტებით, მასშტაბური ხედვებით და მინდა, მას წარმატებები ვუსურვო. ყველას გილოცავთ დღევანდელ დღეს. ინვესტორებს, არქიტექტორებსა და მშენებლებს გისურვებთ ამ პროექტის წარმატებით განხორციელებას“, – განაცხადა ირაკლი კობახიძემ.