საქართველოს ტექნიკური უნივერსიტეტის რექტორი, აკადემიკოსი დავით გურგენიძე საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) თავმჯდომარეს, პროფესორ დავით ნარმანიას და საქართველოს წყალმომარაგების ბაზარზე ერთ-ერთი წამყვანი კომპანიის – „ჯორჯიან უოთერ ენდ ფაუერის“ (გწპ) კომუნიკაციის დირექტორ ეკატერინე ბერიძესა და ტექნიკურ დირექტორ გიგა ნადირაძეს შეხვდა. ამის შესახებ ინფორმაციას საქართველოს ტექნიკური უნივერსიტეტი ავრცელებს.
სტუ-ის ცნობით, შეხვედრაზე განიხილეს წყალმომარაგება-წყალარინების სექტორის განვითარების შესაძლებლობები, ახალგაზრდა კადრების მომზადების პერსპექტივა და სამომავლო თანამშრომლობის კონკრეტული მიმართულებები.
„სამუშაო შეხვედრაზე, რომელშიც მონაწილეობდნენ უნივერსიტეტის კანცლერი, პროფესორი კარლო კოპალიანი, ვიცე-რექტორი პროფესორი თამარ წერეთელი, სამშენებლო ფაკულტეტის დეკანი, პროფესორი ზურაბ გვიშიანი, ენერგეტიკის ფაკულტეტის დეკანი, პროფესორი ქეთევან ქუთათელაძე, ქიმიური ტექნოლოგიისა და მეტალურგიის ფაკულტეტის დეკანი, პროფესორი ლიანა თარგამაძე, მხარეებმა ასევე იმსჯელეს თანამშრომლობის გაფართოების შესახებ და სამომავლო კოოპერაციის დეტალები შეათანხმეს.
როგორც რექტორმა, აკადემიკოსმა დავით გურგენიძემ აღნიშნა, საქართველოს ტექნიკური უნივერსიტეტი მზად არის, აქტიურად ჩაერთოს წყალმომარაგებისა და წყალარინების სექტორის განვითარებაში, რაც ქვეყნის ინფრასტრუქტურული განვითარების მხრივ ერთ-ერთი პრიორიტეტია.
რექტორმა ისაუბრა წყალმომარაგებისა და მისი მომიჯნავე საინჟინრო დარგებისთვის ახალგაზრდა, პროფესიონალი კადრების მომზადების მნიშვნელობაზე, ასევე, ყურადღება გაამახვილა წყალმომარაგების სექტორში მიმდინარე სამეცნიერო კვლევებზე, რაც უაღრესად მნიშვნელოვანია ქვეყნის წყალმომარაგებისა და წყალარინების სისტემის გამართული ფუნქციონირებისთვის.
რექტორის განცხადებით, კომპანია „ჯივიპი“, რომელსაც მენეჯმენტს უწევს ევროპის წყალმომარაგების ბაზრის ერთ-ერთი უმსხვილესი წარმომადგენელი – ესპანური კომპანია დაინტერესებულია უნივერსიტეტის სამშენებლო, ენერგეტიკის, ქიმიური ტექნოლოგიის, გარემოს ინჟინერიის საგანმანათლებლო პროგრამების სტუდენტების ჩართვით კომპანიის საქმიანობაში, რაც უპირველეს ყოვლისა, გულისხმობს ახალგაზრდების დახელოვნებას და მათ მონაწილეობას კომპანიის საქმიანობაში.
როგორც აკადემიკოსმა დავით გურგენიძემ აღნიშნა, საქართველოს ენერგეტიკისა და წყალმომარაგების მარეგულირებელი ეროვნული კომისია და მისი თავმჯდომარე დავით ნარმანია მხარს უჭერენ უნივერსიტეტსა და წყალმომარაგება-წყალარინების სექტორში მოქმედ ერთ-ერთ მსხვილ კომპანიას შორის მსგავსი ტიპის კოლაბორაციის გაღრმავებას. რექტორის თქმით, საქართველოს ტექნიკურ უნივერსიტეტში საინჟინრო სპეციალობებს მრავალი წარმატებული სტუდენტი ეუფლება, რომელთაც „ჯივიპიში“ სტაჟირება, შემდგომი დასაქმების პერსპექტივით, დამატებით მოტივაციას შეუქმნის.
„საქართველოს ტექნიკური უნივერსიტეტი მზად არის, აქტიურად ჩაერთოს წყალმომარაგებისა და წყალარინების სექტორის განვითარებაში, რაც ჩვენი ქვეყნის ერთ-ერთი მთავარი პრიორიტეტია. ძალიან მნიშვნელოვანია, რომ საქართველოს ტექნიკურ უნივერსიტეტს ჰქონდეს მჭიდრო კავშირი როგორც მარეგულირებელ ორგანოებთან, ისე ინდუსტრიის წარმომადგენლებთან, რათა ერთად შევქმნათ ისეთი სასწავლო და პრაქტიკული სივრცე, რომელიც მომავალ სპეციალისტებსა და მკვლევრებს რეალურ გამოწვევებზე პასუხის გაცემის შესაძლებლობას მისცემს.
ძალიან მნიშვნელოვანია, რომ სტუდენტებმა თეორიულ ცოდნასთან ერთად რეალურ სამუშაო გარემოში პრაქტიკული უნარებიც განივითარონ. სწორედ ამიტომ, საქართველოს ტექნიკური უნივერსიტეტი ზრუნავს, დაამყაროს პარტნიორული ურთიერთობები ინდუსტრიებთან და მათი მხარდაჭერით თანამედროვე სასწავლო და კვლევითი ინფრასტრუქტურა შექმნას. მოხარული ვარ, რომ სემეკის თავმჯდომარესთან და კომპანია „ჯივიპის“ წარმომადგენლებთან ერთად ვისაუბრეთ არა მარტო თანამშრომლობის გაღრმავებაზე, არამედ კონკრეტულ ნაბიჯებზე – სამშენებლო, ენერგეტიკის, ქიმიური ტექნოლოგიისა და მეტალურგიის ფაკულტეტებზე თანამედროვე ინფრასტრუქტურის, სასწავლო-კვლევითი ლაბორატორიების მოდერნიზების, ასევე, ახალი ლაბორატორიების შექმნის შესახებ. საგულისხმოა, რომ „ჯივიპი“, ისევე როგორც სხვა მსხვილი კომპანიები, მაგალითად, „არემჯი“, „თეგეტა მოტორსი“, ბიოსამედიცინო ინჟინერიის სფეროში მოქმედი მსხვილი კომპანიები და სხვა, გამოთქვამს სურვილს, მონაწილეობა მიიღოს საუნივერსიტეტო ლაბორატორიული ბაზის განვითარებაში. ინფრასტრუქტურის მოდერნიზება არა მხოლოდ სტუდენტებისთვის ქმნის ღირებულ სასწავლო გარემოს, არამედ აძლიერებს საქართველოს ტექნიკური უნივერსიტეტის სასწავლო და კვლევით პოტენციალს. ჩვენი მიზანია, სტუდენტები არა მხოლოდ თეორიულ ცოდნას დაეუფლონ საქართველოს ტექნიკურ უნივერსიტეტში, არამედ აქტიურად ჩაერთონ კვლევით საქმიანობაშიც, იმუშაონ რეალურ პროექტებზე სხვადასხვა კომპანიაში და სტუდენტობის წლებიდანვე ეზიარონ პროფესიულ გამოცდილებას. სწორედ ეს არის უნივერსიტეტის ერთ-ერთი პრიორიტეტი, რაც არის საფუძველი სტუდენტების პრაქტიკული უნარების გაუმჯობესებისა და მათ შორის წყალმომარაგება-წყალარინების სექტორში მაღალკვალიფიციური კადრების მომზადებისთვის“, – აღნიშნა დავით გურგენიძემ.
სტუ-ის ინფორმაციით, შეხვედრის დასასრულს, მხარეები შეთანხმდნენ, რომ ერთობლივად იზრუნებენ სამმხრივი თანამშრომლობის მემორანდუმის პროექტის მომზადებაზე. აღნიშნულ დოკუმენტს საქართველოს ტექნიკური უნივერსიტეტის რექტორი, სემეკის თავმჯდომარე და კომპანია „ჯივიპის“ ხელმძღვანელობა ახლო მომავალში მოაწერენ ხელს.