საქართველოს ყოფილი პრეზიდენტი სალომე ზურაბიშვილი ჩეხეთის სენატში სიტყვით გამოვიდა.
მიმართვის დაწყებისას სალომე ზურაბიშვილმა 9 აპრილის მნიშვნელობაზე გაამახვილა ყურადღება და სენატორებს მიმართა, 1989 წლის 9 აპრილს დაღუპულებს პატივი მიაგონ წუთიერი დუმილით.
სალომე ზურაბიშვილის განცხადებით, საქართველოს გარკვეული დროის წინ ევროკავშირის კანდიდატის სტატუსი მიანიჭეს, ხოლო დღეს ქვეყანა ნელ-ნელა ექცევა რუსულ ორბიტაზე, არსებულ რეალობას კი ევროპული პასუხი არ შეესაბამება.
„საქართველოს გარკვეული დროის წინ კანდიდატის სტატუსი მისცეს, დღეს კი იგივე ქვეყანა ნელ-ნელა ჩათრეული ხდება რუსულ ორბიტაზე და ევროპული პასუხი არსებულ რეალობას არ შეესაბამება. ეს არ არის მხოლოდ ქართული კრიზისი, ეს არის გამოწვევა ევროპისთვის, გამოწვევა ლიბერალური დემოკრატიისთვის საქართველოში და ასევე ევროპაშიც. საქართველოში ერთ წელიწადში თუ დაშლიან დემოკრატიულ მექანიზმებს, ამდენწლიანი თქვენი დახმარება, რომლითაც შეიქმნა თავისუფალი მედია, გაუმჯობესდა ინსტიტუტები, ეს რას მეტყველებს დემოკრატიაზე, თუ ეს სისტემა ასეთი მარტივი დასაშლელია. ეს იქნება გზავნილი, რომ დემოკრატია არის მსხვრევადი სისტემა, საქართველოს მოსახლეობა მზად არის წინააღმდეგობის გასაწევად, საქართველო არ არის რომელიმე შემთხვევითი ქვეყანა, საქართველო არის ევროპის მეზობლად, აქ არის სტრატეგიული მნიშვნელობის შავი ზღვა, სამხრეთ კავკასია, მშვიდობა სომხეთში, რომელიც ძალიან მყიფეა და მისი გზა ევროპისკენ“, – განაცხადა სალომე ზურაბიშვილმა.
მისი თქმით, საქართველო თუ ავტორიტარიზმში ჩაეფლობა, ეს მნიშვნელოვნად შეამცირებს რეგიონში ევროპის პოზიციებს, როგორც პოლიტიკურად ისე მორალურად, ასევე მსოფლიოში ევროპას ზიანს მიაყენებს.
„ნება მომეცით, პირდაპირი ვიყო, თუ ევროკავშირი ვერ დაიცავს იმ ღირებულებებს, რომლის ხელშესაწყობადაც ათწლეულების განმავლობაში მუშაობდნენ, თუ ის მკაფიოდ ვერ უპასუხებს ერთ პატარა ქვეყანაში არსებულ ვითარებას, ქვეყანაში, რომელსაც იტაცებს რეპრესიული რეჟიმი, ეს ნიშნავს, რომ ევროპის სტრატეგია მხოლოდ ქაღალდზეა და მას რეალური ძალა არ აქვს. ამ ყველაფერს რუსეთი აკვირდება და შემდეგ ნაბიჯებს გეგმავს, რაც ვერ მოახერხეს ტანკებით 2008 წელს და უკრაინაში წამოწყებული ომით, ახლა ცდილობს ჰიბრიდული გზით მიაღწიოს და ჩუმად დაიპყროს საქართველო. ეს ახალი მიდგომა არ საჭიროებს არმიას, მხოლოდ სამი ინგრედიენტია საჭირო – მანიპულაცია არჩევნებში, დეზინფორმაცია და პროპაგანდა, ასევე ოლიგარქი, რომელიც შიგნიდან მიიტაცებს სხვადასხვა ინსტიტუტებს. რუსეთი უკრაინაში თუ ვერ მოიგებს ომს და ის ვერ იგებს ომს სამხედრო ძალით, მაშინ შეეცდებიან, პოლიტიკური გზით მიაღწიონ მიზნებს, უკრაინაში არჩევნების მანიპულირებით მიაღწიონ საკუთარ მიზნებს, შეეცადონ, შიგნიდან გატეხონ სისტემა, როგორც ამას საქართველოში ცდილობენ“, – განაცხადა სალომე ზურაბიშვილმა.
მისი თქმით, საქართველოში ჰიბრიდული მიდგომა თუ გამართლდება, მისი გადამღერება შესაძლებელი გახდება სხვა ქვეყნებშიც.
„საქართველომ არათუ წლების, არამედ საუკუნეების განმავლობაში იცოდა, როგორ უნდა გამკლავებოდა საფრთხეებს, თუმცა ეს ახალი მეთოდი დანერგილი იქნება სხვა ქვეყნებშიც, იქნება ეს მოლდოვა თუ სხვა. რაც უნდა გავაკეთოთ – ევროპამ ნაბიჯები უნდა გადადგას ახლავე, არამხოლოდ სიტყვებით, არამედ რეალური საპასუხო სტრატეგიით. ეს ჩვენი ბრძოლაა და ბრძოლას გავაგრძელებთ, მაგრამ ჩვენმა პარტნიორებმა, პირველ რიგში, უნდა უზრუნველყონ არჩევნების დაცვა. ამავე დროს ახალი არჩევნები იქნება უსარგებლო, თუ არ გვექნება ახალი, მკაცრი წესები. ამჟამად ამ მიდგომით არჩევნებს აყალბებენ წინასწარ, არჩევნების დღემდე. საქართველოს ხალხის უდიდესი ნაწილი პროევროპულია. საჭიროა სანქციები მათ წინააღმდეგ, ვინც ხელს უწყობს ძალაუფლების ამ მიტაცებას. დაიცავით ის ღირებულებები, რომლებსაც ხელს უწყობდით, იქნება ეს თავისუფალი მედია, მართლმსაჯულება თუ სხვა. ამით მნიშვნელოვან გზავნილს გავუგზავნით ყველა ავტოკრატს. ძვირფასო მეგობრებო, ჩეხმა ხალხმა იცის, რას ნიშნავს ოკუპაცია, იცის რას ნიშნავს პროპაგანდა და თქვენ უკვე ერთხელ აჩვენეთ, რას ნიშნავს თავისუფლების მოპოვება. თავისუფლება საჭიროებს დაცვას ქუჩებში, ინსტიტუტებში, მოქალაქეებში. საქართველო დღეს ამ ბრძოლაშია ჩართული, ჩვენ არ ვითხოვთ, რომ თქვენ იბრძოლოთ ჩვენს ნაცვლად, მაგრამ გთხოვთ, ჩვენს გვერდით დადგეთ, ხმა აიმაღლოთ, ისაუბროთ მკაფიოდ და ცხადად, იმოქმედოთ გამიზნულად, რადგან თუ ჩვენ დღეს საქართველოს ვერ დავიცავთ, შეიძლება, ხვალ ძალიან განსხვავებულ ევროპაში გავიღვიძოთ. დღევანდელი რეზოლუციით ჩეხეთის სენატმა აჩვენა მაგალითი მხარდაჭერისა, ეს უნდა იყოს მაგალითი სხვა ევროპული ქვეყნებისთვის. ქართველი ხალხის სახელით მინდა, მადლობა გითხრათ“, – განაცხადა სალომე ზურაბიშვილმა.