„როიტერი“ – ისრაელი აიათოლა ალი ხამენეის მოკვლას გეგმავდა, თუმცა აშშ-ის პრეზიდენტი ამის წინააღმდეგი იყო

რუსეთის საელჩო საკუთარ მოქალაქეებს ისრაელის დატოვებას ურჩევს. ამის შესახებ განცხადება რუსეთის ელჩმა, ანატოლი ვიქტოროვმა ტელეარხ „რუსეთ-24“-ის ეთერში გააკეთა.მან რუსეთის მოქალაქეებს ქვეყანაში ვითარების ნორმალიზებამდე ისრაელის დატოვება ურჩია.მისივე თქმით, რუსეთის მოქალაქეებისთვის საფრთხე „სულაც არ არის ეფემერული“. მან მაგალითად მოიყვანა, თუ როგორ ჩაიმსხვრა მინები რუსეთის საელჩოს თანამშრომელთა ბინებში ირანის ერთ-ერთი თავდასხმის დროს.ვიქტოროვის თქმით, რუსეთის მოქალაქეებს შეუძლიათ, დამოუკიდებლად დატოვონ ისრაელი ეგვიპტის საზღვარზე მდებარე სასაზღვრო გამშვები პუნქტის გავლით, შემდეგ კი გაფრინდნენ რუსეთში შარმ-ელ-შეიხიდან ან კაიროდან.ელჩის თქმით, რუსეთის მოქალაქეთა ევაკუაცია ისრაელიდან ჯერ არ გამოცხადებულა, მაგრამ საჭიროების შემთხვევაში ეს შესაძლებელი იქნება.

„2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებითი საგამოძიებო კომისიის“ სხდომაზე დაჩი ცაგურიას უსმენენ, რომელმაც 2009 წლის 15 ივნისის მოვლენები გაიხსენა.დაჩი ცაგურიას თქმით, 2009 წლის 15 ივნისი არის მისი ცხოვრების ყველაზე მძიმე დღე.„43 წლის ვარ და ასეთი მძიმე დღე უბრალოდ არ მქონია, არ ვიცი, ასეთი სასტიკი დღე არ ყოფილა მგონი არასოდეს. მივდიოდით იქ, სადაც იყო მიხეილ სააკაშვილი, ხან ქალბატონ სოფოსთან ერთად, ასეთ სიტუაციებში როცა იყო, რესტორანთან მივდიოდით და გამოვთქვამდით პროტესტს. შიგნით შესვლა არ გვიცდია არასდროს. ჩვენი მესიჯები გვქონდა, ხან სანდრო გირგვლიანის ფოტო გვქონდა, ხან ვაზაგაშვილის, გამცემლიძის, ბუტა რობაქიძის და ა.შ. შეჭრის მცდელობაც არ გვქონია. 15 ივნისს წინ უძღოდა ის, რომ იყო დიდი აგრესია, ცემა და უბედურება. 15 ივნისამდე საპროტესტო აქციები შენელებულია, უკვე ძალა აღარ აქვს ოპოზიციას და ესენი გადმოვიდნენ ჩვენზე შეტევაზე. ოჯახებს გვიწიოკებდნენ, დაიწყეს ჩვენი დაჭერები. მიშა მესხს მიუვარდნენ დასაჭერად სახლთან, მეზობლებმა და ქალებმა გადაარჩინეს. მეც ზუსტად ასევე მომივარდნენ. პოლიციამ ვითომ გამაჩერა. დამტვრეული „ნივა“ მყავდა და სიჩქარეს გადააჭარბეო. ის მანქანა სიჩქარეს ფიზიკურად ვერ აჭარბებდა. მივხვდი, რაშიც იყო საქმე. მამასთან ერთად ვიყავი და არ გრცხვენიათო? მამაჩემს ვუთხარი, სოზარ სუბართან ვრეკავ, დამშვიდდი-მეთქი და რომ გაიგო პოლიციელმა, ტელეფონი გამომგლიჯა. გადმოვედი მანქანიდან და ჩასაფრებაა, ალბათ 200 პოლიციელია. ზედაზენის ქუჩაზე, ჩემს საცხოვრებელ სახლთან დამხვდნენ. მეზობლების დახმარებით, ვერ დამიჭირეს.  ასე ყველას სახლებთან რომ გვხვდებოდნენ, ამიტომ გადავწყვიტეთ, მივსულიყავით სამმართველოსთან. აქციის მიზეზი იყო, რომ ჩავბარებულიყავით – „გვითხარით, ვისი დაჭერაც გინდათ, აქ ვართ“. დაახლოებით 50-60 ადამიანი ვიყავით მშობლებთან ერთად.  სამმართაველოსთან ვიდექით ტროტუარზე. ჩვენდა გასაოცრად, დაგვხვდა სამმართველოს კარი ღია. შიგნიდან ვიდეოკამერებით გვიღებდნენ და ჩვენ დავიწყეთ სიის წაკითხვა, რომ მოვედით და აქ ვართ. უცებ ყველა მხრიდან მოდიან, სამმართველოს შესასვლელის გარდა. ამათ უნდოდათ, დაედგათ კადრი, შევერეკეთ შენობაში, რომ გადაეღოთ, ვითომ შევიჭერით.  ყველა ჩვენს აქციას თან ახლდა ზონდერ დაჯგუფებების გაკეთება. უდესიანები და ვიღაცები ჰყავდათ ზონდერ დაჯგუფებების ორგანიზატორებად. აქციიდან წასულ ხალხს სასიკვდილოდ სცემდნენ“, – განაცხადა დაჩი ცაგურიამ.დაჩი ცაგურიამ დეტალურად ისაუბრა ჯერ პოლიციის სამმართველოს ეზოში, შემდეგ კი, სამმართველოს შენობაში განვითარებულ პროცესებზე.„ახალგაზრდებმა მინდა იცოდნენ, ხალხნო, ახლა რომ ამბობთ, იგივეა და უარესია, ეს სიგიჟეა, არ დაგაჯეროთ არავინ. ვინმემ თუ არ იცით, რა არის იგივე და რა არის უარესი, უარესია კი არა, ჩრდილო კორეა გვენატრებოდა და რა რუსეთში მიგვაქანებენ, რუსეთი იყო სანატრელი. ესეთი რაღაცები მაშინდელ რუსეთში არ ხდებოდა. ჯერ გარეთ დაგვასისხლიანეს, სასიკვდილოდ გაგვიმეტეს და გვცემეს, შემდეგ შეგვათრიეს სამმართველოს შენობაში. ოღონდ როგორ იყო იცით, მოაწყობდნენ ხოლმე სახელდახელოდ დერეფანს, ხომ მიგვათრევდნენ ხელებამობრუნებული და გვირტყამდნენ თან, გვაფურთხებდნენ სახეში და შეურაცხყოფას გვაყენებდნენ, შემდეგ დერეფანში შეგვაგდებდნენ და დერეფანი უნდა გაგვევლო. დერეფანში იდგა ერთი ორმოცი ადამიანი ხელკეტებით და რაღაცებით და სათითაოდ ყველა გვირტყამდა, ყველა სამაგალითოდ. ერთგვარი შეჯიბრი ჰქონდათ, ვინ უფრო მაგარი იყო, ერთმანეთისთვის რომ დაემტკიცებინათ, ვინ უფრო მაგრად გაგვიმეტებდა, ვინ უფრო დაუნდობელი იყო. ჯერ ქუჩაში მოგვკლეს ცემით და დაგვასისხლიანეს, თავებდახეთქილები და დაგლეჯილები ვართ უკვე, დაკავებულები და არავინ არანაირ წინააღმდეგობას არ უწევს, მაგრამ მაინც გვირტყამენ, მოგვათრევენ და უკვე სამმართველოს ეზოში ჯერ ეს დერეფნები ეწყობა სახელდახელოდ ყველასთვის და იქ გვცემენ, გვაგინებენ, ისეთ რაღაცებს გვეუბნებოდნენ, რომ ეს გინება არ არის, ვერ ვიტყვი უბრალოდ, რაღაც საზიზღრობაა. სახეში გვაფურთხებდნენ. დერეფანი ხომ გაგვატარეს, შემდეგ დერეფნიდან აგვიყვანეს კიბეებზე, სამმართველოს შესასვლელი იყო, სადაც ლიფტებია და ერთგვარი ფოიე, იქ რომ შემიყვანეს, ჩემი მეგობრები არიან ძირს დაყრილები, ძირს ვწევართ, უკვე ადგილი აღარ არის იქ, გადაიჭედა იქაურობა და ფეხით დადიოდნენ ჩვენზე ზემოდან, ბეიზბოლის ხელკეტებით და არმატურებით ზემოდან გვცემდნენ. ნაწილი მანდ შეგვიყვანეს, ნაწილი სასამართლოს შენობაში შეიყვანეს. სასამართლოს შენობაში ჩემი მეგობრები დაგლიჯეს ცემით, ტყავი დაუხიეს, ისეთ დღეში ჩააგდეს, დაასისხლიანეს, ძვლები დაულეწეს, სააპელაციო სასამართლოს შენობაში, ახლა რომ გრძელი ენა აქვთ, რაღაცები რომ არ მოსწონთ. ჩემზე იყო ერთგვარი მოთხოვნა, აბა, ცაგურია ცაგურია. პარტია პარტია მოდიოდნენ, უკვე გონზე ვიყავი, მაგრამ ყოველგვარი ენერგიისგან გამოლეული, თავზე მედო ხელები და თავზე რომ ბეისბოლის ბიტას მირტყამდნენ, ხელის მტევანი დალეწილი მაქვს, ფორმა აქვს შეცვლილი, სამმართველოში დამიმტვრიეს, თავზე რომ მედო და ბეიზბოლის ბიტას რომ მირტყამდნენ. ეტყობა, ხელზე რომ მხვდებოდა, გული სწყდებოდათ მაგაზე, მომეპარა უკნიდან და ზუსტად შუაში, ისე რომხელებს შორის გაეძვრინა, მხეთქა ბეიზბოლის ხელკეტი და საშინელი ტკივილი იყო. ხერხემალი დამიზიანდა იქ, ორი მალა მქონდა ცემისგან გატეხილი“, – განაცხადა დაჩი ცაგურიამ.

აქტიური მუშაობა უნდა გვქონდეს საზოგადოებასთან, რომელმაც თავადაც გვითხრა, რომ თბილისში არანაირი არჩევნები არ უნდა, 70 პროცენტი წინააღმდეგია, – ამის შესახებ „დროას“ ლიდერმა, ელენე ხოშტარიამ განაცხადა.ხოშტარიას კითხვა დაუსვეს სოციოლოგიურ გამოკითხვაზე, რომლის მიხედვითაც, კითხვაზე, ოპოზიციურმა პარტიებმა უნდა მიიღონ თუ არა მონაწილეობა 2025 წლის ადგილობრივ არჩევნებში, გამოკითხულთა 54 პროცენტის პასუხია „დიახ“.„არ ვაპირებ „ლელოსთან“ საჯარო პოლემიკაში ამ საკითხის გარჩევას. მამუკა ხაზარაძეს შევთავაზე საჯარო დებატები და ეს შეთავაზება ძალაშია, სადაც ჩვენ ყველა საკითხზე გულწრფელად ვისაუბრებთ. ასევე, შემიძლია, საზოგადოებას ვუთხრა, რომ დავუკავშირდი და შევხვდი ორჯერ. რამდენჯერაც საჭირო იქნება, იმდენჯერ მივალ და კიდევ ერთხელ ვადასტურებ ჩემს პატივისცემას. ამასთანავე, კოალიციის პოზიცია ძალიან პრინციპულია, ადგილობრივი თვითმმართველობის არჩევნები არ არის არჩევნები. ეს ყალბი რუსული პროცესია, რომელშიც მონაწილეობა არავითარ შემთხვევაში არ შეიძლება და ამის გარშემო უნდა გავერთიანდეთ. ყველას თავის პოზიციის თქმა შეუძლია, მაგრამ ერთადერთი შეთანხმება, რომელიც ამ საკითხზე იყო, ეს იყო პლატფორმის ფარგლებში, რომელზეც პრეზიდენტმა ისაუბრა და ჩემთვის ძალიან სამწუხარო იყო, რომ „ლელომ“ ეს გადადო.რუსული ოცნების ჩამოშლის გზა გადის მისი ლეგიტიმაციის არაღიარებაზე და მათთან არ თანამშრომლობაზე. ეს არის ბრძოლის გზა. სწორედ ამიტომ სხედან ციხეში მათ შორის ამ კოალიციის ლიდერები. როგორ შეიძლება, კომისიაზე არმისვლით გირაოთი წახვიდე ციხეში და იქვე ილაპარაკო ადგილობრივი თვითმმართველობის არჩევნებში მათთან თანამშრომლობაზე და, პრაქტიკულად, აღიარო, რომ არჩევნები ტარდება ბიძინა ივანიშვილის პირობებში. ეს პრინციპული პოზიციაა და იმედი მაქვს, ოპოზიცია ერთიანად შევჯერდებით. ბოიკოტი არასწორი სიტყვაა, არ არსებობს არჩევნები, რისი ბოიკოტი. აქტიური მუშაობა უნდა გვქონდეს საზოგადოებასთან, რომელმაც თავადაც გვითხრა – თბილისში არანაირი არჩევნები არავის არ უნდა, 70% წინააღმდეგია“, – აღნიშნა ელენე ხოშტარიამ.

საგანგებო სიტუაციების მართვის სამსახურის თანამშრომლებმა, ალპურ ზონაში მყოფი დაშავებული მამაკაცის სიცოცხლე გადაარჩინეს. ამის შესახებ ინფორმაციას შსს-ს საგანგებო სიტუაციების მართვის სამსახური ავრცელებს.მათივე ცნობით, მეხანძრე-მაშველებმა, შესაბამისი აღჭურვილობისა და შინაგან საქმეთა სამინისტროს სასაზღვრო პოლიციის ვერტმფრენის ჩართულობით, მოქალაქე საავადმყოფოში გადაიყვანეს, სადაც შესაბამისი სამედიცინო დახმარება უტარდება.„შემოსული ინფორმაციის თანახმად, კახეთში, სოფელ ართანადან ზღვის დონიდან 2800 მეტრის სიმაღლეზე, ალპურ ზონაში იმყოფებოდა შვიდი პიროვნება, ქვათაცვენის შედეგად, ერთ-ერთმა მათგანმა, ჯანმრთელობის დაზიანება მიიღო და ესაჭიროებოდა სასწრაფო დახმარება.სამაშველო ოპერაციაში, საგანგებო სიტუაციების მართვის სამსახურის განსაკუთრებულ სიტუაციებზე რეაგირების მეხანძრე-მაშველების ჯგუფთან ერთად, სასაზღვრო პოლიციის ვერტმფრენი მონაწილეობდა“,- აღნიშნულია საგანგებო სიტუაციების მართვის სამსახურის ინფორმაციაში.

2009 წელს პოლიციის შენობასთან აქციაზე ხმა მომესმა, ეს აბაშიძეა და აუცილებლად უნდა გავუსწორდეთო, მერე გონებას ვკარგავ, ხელკეტით მძიმე დაზიანებები მივიღე არა მხოლოდ სახის არეში, სხეულის სხვა მიდამოებშიც, – ამის შესახებ საქართველოს პარლამენტის დროებითი საგამოძიებო კომისიის სხდომაზე 2009-2010 წლებში პოლიტიკური პარტია „თავისუფალი დემოკრატების“ გენერალურმა მდივანმა, ზურაბ აბაშიძემ განაცხადა.როგორც აბაშიძემ განაცხადა, დაახლოებით სამი ადამიანი ხელკეტით იყო შეიარაღებული, ასევე აღნიშნა, რომ მათგან ვერავის ამოიცნობს, რადგან ნიღბებით იყვნენ.„გამოვარდნენ და აშკარად იგრძნობოდა, რომ ესენი არ არიან მოსული იმიტომ, რომ მშვიდობიანად დაგვშალონ. ეს იყო სრული დარბევა. შევშფოთდი და რამდენიმესთან მივედი, ვუთხარი, რას აკეთებთ, რას ვაშავებთ-მეთქი. ხმა მომესმა, ეს აბაშიძეა და აუცილებლად უნდა გავუსწორდეთო. მერე უკვე გონებას ვკარგავ. ხელკეტით მძიმე დაზიანებებს არა მხოლოდ სახის არეში ვიღებ, არამედ სხეულის სხვა მიდამოებში. გონზე როდესაც მოვდივარ, მაგ დროს ვარ მანქანაში და მივდივართ საავადმყოფოში. რაღაც პერიოდის შემდეგ ისევ ვკარგავ გონებას. საავადმყოფოში უკვე ვსაუბრობ მედიის წარმომადგენლებთან. დაახლოებით სამი ადამიანი მირტყამდა ხელკეტით. დავეცი. რამდენიმე დარტყმა ერთდროულად მივიღე, სახის არეშიც და წელის არეშიც. დაბეჟილობები და დაზიანებები მქონდა. ხელკეტით შეიარაღებული ადამიანები იყვნენ ნიღბებით. პირდაპირ გეტყვით, რომ მე ვერავის ამოვიცნობ, იდენტიფიკაციას ვერ მოვახდენ, რადგან სახეზე არავინ მინახავს.2013 წელს, როგორც მახსოვს, პროკურატურამ დამკითხა. იქ კადრებიც ამოიღეს და მაჩვენეს ეს კადრები. მთელი შინაგან საქმეთა სამინისტროს ხელმძღვანელობა იქ იყო. იმ პერიოდის მინისტრი არ ჩანს, მაგრამ რამდენიმე მოადგილე, თუ არ ვცდები, ჩანს. ისინი იყვნენ ჭიშკართან, სამმართველოს ეზოში. მოადგილე მაშინ იყო ლორთქიფანიძე“, – განაცხადა ზურაბ აბაშიძემ.ზურაბ აბაშიძემ დეტალურად ისაუბრა, კონკრეტულად რა ტიპის დაზიანებები მიიღო.„მქონდა ცხვირის ძვლების მოტეხილობა, მრავლობითი დაბეჟილობები, ჩამიმტვრიეს კბილები, თავში მირტყეს და მქონდა ტვინის შერყევა. დიდი ხანი დამჭირდა რეაბილიტაცია“, – აღნიშნა აბაშიძემ.თეა წულუკიანის კითხვაზე, „სამედიცინო საბუთებში ეს დაზიანებები ჩაიწერა, თუ რაღაც შეალამაზეს?“, აბაშიძემ აღნიშნა, რომ „მაქსიმალურად ეცადნენ, მსუბუქი დაზიანებები ჩაეწერათ“.„აღარც მიმიქცევია ყურადღება, აზრი არ ჰქონდა. მე ჩავატარე ალტერნატიული ექსპერტიზა, რომელიც პროკურატურაში საქმის მასალებში არის“, – განაცხადა აბაშიძემ.