„როიტერი“ – ევროპის რამდენიმე ქვეყანაში ჰაერის ტემპერატურა 40 გრადუსს უახლოვდება, კონტინენტზე ხანგრძლივი სიცხისთვის ემზადებიან

დიდი ბრიტანეთის პრემიერ-მინისტრმა გადადგომის შესახებ განაცხადა. მან მოსახლეობას პრემიერის რეზიდენციის წინ გამართულ ბრიფინგზე მიმართა და აღნიშნა, რომ „ლეიბორისტული პარტიის“ ლიდერის პოსტსაც ტოვებს.მოსალოდნელია, რომ პრემიერის პოსტზე სტარმერს „ლეიბორისტული პარტიის“ წევრი ენდი ბერნემი ჩაანაცვლებს.ცნობების სტარმერის გადადგომის შესახებ გუშინ მედიაში გავრცელდა, შემდეგ კი ისინი აშშ-ის პრეზიდენტმა, დონალდ ტრამპმა დაადასტურა.

საქართველოს მოსახლეობის რიცხოვნობა 3 929 000-ს შეადგენს, რაც 2014 წლის აღწერის მონაცემებთან შედარებით, 5.8%-ით მეტია. მოსახლეობის აღწერის ძირითადი შედეგები საქსტატმა დღეს წარადგინა.აღწერა 2024 წლის 14 ნოემბრიდან 31 დეკემბრის პერიოდში ჩატარდა. საერთაშორისო მეთოდოლოგიის მიხედვით, აღწერას დაექვემდებარა ქვეყანაში მუდმივად მცხოვრები საქართველოს ყველა მოქალაქე, ასევე ქვეყნის ტერიტორიაზე მყოფი უცხო ქვეყნის მოქალაქეები და მოქალაქეობის არმქონე პირები.

„ჯარის ბანაკი“ ერთ-ერთი მართლაც ყველაზე წარმატებული პროექტია, რომელიც ჩვენ გვაქვს ახალგაზრდებთან მიმართებაში, - განაცხადა საქართველოს თავდაცვის მინისტრმა ირაკლი ჩიქოვანმა „ჯარის ბანაკის“ გახსნის საზეიმო ცერემონიაზე.ირაკლი ჩიქოვანის თქმით, მათთვის ძალიან საამაყოა, რომ წლიდან წლამდე ინტერესი „ჯარის ბანაკის“ მიმართ იზრდება და განათლების სამინისტროსთან ერთად ამ პროექტს წარმატებით ახორციელებენ.„ბატონო პრეზიდენტო, ბატონო პრემიერ-მინისტრო, ბატონო პარლამენტის თავმჯდომარევ, ბატონო თავდაცვის ძალების მეთაურო, ბატონო გენერლებო, ოფიცრებო, სერჟანტებო, მოგესალმებით. პირველ რიგში, ხაზგასმით მინდა მადლობა გითხრათ მობრძანებისთვის, იმ ყურადღებისთვის, რომელსაც თქვენ იჩენთ, ზოგადად თავდაცვის ძალების მიმართ და იმ მხარდაჭერისთვის, რომელსაც თქვენ აღუთქვამთ ჩვენს სამხედროებს. „ჯარის ბანაკი“ ერთ-ერთი მართლაც ყველაზე წარმატებული პროექტია, რომელიც ჩვენ გვაქვს ახალგაზრდებთან მიმართებაში. ჩვენთვის ძალიან საამაყოა, რომ წლიდან წლამდე ინტერესი „ჯარის ბანაკის“ მიმართ იზრდება და განათლების სამინისტროსთან ერთად ჩვენ ამ პროექტს წარმატებით ვახორციელებთ.მინდა მადლობა გადავუხადო თითოეულ სერჟანტს, თითოეულ ოფიცერს, საჩხერის სამთო სკოლის წარმომადგენლებს, კოჯრის სერჟანტთა სკოლის წარმომადგენლებს, იმ ადამიანებს, ვინც უშუალოდ ზრუნავს ამ ახალგაზრდებზე. ნამდვილად, ეს არის უნიკალური შესაძლებლობა მათთვის, ეზიარონ იმ ყოველდღიურობას, რომელიც აქვს ჯარისკაცს, ჩვენს ოფიცრებს, რას ნიშნავს სამშობლოს სამსახური. ამასთან ერთად, მიიღონ კონკრეტული გამოცდილება, განათლება კონკრეტული მიმართულებებით და რა თქმა უნდა, ასევე ისაუბრონ ისეთ უმნიშვნელოვანეს ღირებულებებზე, როგორიც არის ჩვენი სამშობლო, პატრიოტიზმი, ეროვნული ღირებულებები, ოჯახის სიწმინდე და რა თქმა უნდა, ჩვენი იდენტობა.მადლობა მინდა გადავუხადო საპატრიარქოს, ვინაიდან მათი წვლილი და თანამონაწილეობა ამ ყველაფერში არის ძალიან მნიშვნელოვანი. ჩვენ ვაფასებთ ამას. საპატრიარქო უშუალოდ არის ჩართული ამ დღეებში, საგანმანათლებლო პროცესში და ესეც ძალიან მისასალმებელია. აქვე ვიტყვი იმას, რომ ის ინფორმაცია, რაც გვაქვს იმ ახალგაზრდების მხრიდან, რომლებმაც უკვე გაიარეს „ჯარის ბანაკი“, მართლაც წარუშლელი შთაბეჭდილებები მიიღეს და ამავდროულად, მიიღეს ძალიან დიდი გამოცდილება, ვინაიდან ასეთ გამოცდილებას ეს ახალგაზრდები ვერსად მიიღებენ. თითოეულ თქვენგანს მინდა მოგიწოდოთ მაქსიმალურად მოინდომოთ. ის ინფორმაცია, რასაც მიიღებთ, მაქსიმალურად გაითვალისწინოთ და რა თქმა უნდა, თუ გექნებათ კითხვები, თუ გექნებათ უფრო მეტი ინფორმაციის მიღების სურვილი, ჩვენ მზად ვართ. თითოეული სამხედრო, თითოეული ოფიცერი ამისთვის მზად არის. რა თქმა უნდა, ეს ყველაფერი ემსახურება იმას, რომ მოვახდინოთ ჩვენი ჯარის პოპულარიზაციაც ამავდროულად და დიდ იმედს ვიტოვებ, რომ ის ახალგაზრდები, რომლებიც აქ არიან შეკრებილები, როგორც იქნებიან წარმატებულები ბევრ სხვა პროფესიაში, ზოგიერთი მათგანი მოიფიქრებს და შემოუერთდება თავდაცვის ძალებს, დაინახავს რა რა არის სერჟანტის ცხოვრება ოფიცრის ცხოვრება და იქნება ჩვენი თავდაცვის ძალების ნაწილი. დღესდღეობით მართლაც რომ თავდაცვის ძალებს აქვს უაღრესად დიდი მხარდაჭერა და შესაძლებლობა, რომ ყოველმხრივ განვითარდეს თითოეული ჯარისკაცი, თითოეული ოფიცერი. მადლობა ამ მხარდაჭერისთვის, რომელსაც ჩვენ ვიღებთ როგორც პრემიერ-მინისტრის მხრიდან, საკანონმდებლო ხელისუფლების მხრიდან და ასევე თქვენგან, ბატონო პრეზიდენტო. თითოეულ თქვენგანს ახალგაზრდებო, წარმატებები მინდა გისურვოთ ამ ერთი კვირის განმავლობაში. ეს არის ძალიან საინტერესო, ლამაზი ერთი კვირა. დარწმუნებული ვარ, აქედან რომ წახვალთ ამ ამბავს მოუყვებით თქვენს მეგობრებს და თქვენი მეგობრებიც მომავალში შეძლებენ ჯარის ბანაკში მონაწილეობის მიღებას“, - აღნიშნა თავდაცვის მინისტრმა.

მიხარია, რომ ძალიან ღირებული, მნიშვნელოვანი ტრადიცია გრძელდება და უკვე მეოთხე წელია, იმართება „ჯარის ბანაკი“, რომელიც ახალგაზრდებს გაძლევთ საშუალებას, გაიზიაროთ ის სიამაყე, რომელსაც განიცდის თითოეული სამხედრო მოსამსახურე სამშობლოს სამსახურში, – ამის შესახებ საქართველოს პრემიერ-მინისტრმა, ირაკლი კობახიძემ „ჯარის ბანაკი 2026“-ის გახსნის ღონისძიებაზე სიტყვით გამოსვლისას განაცხადა.როგორც კობახიძემ აღნიშნა, 1 700 მოსწავლეს მასპინძლობს „ჯარის ბანაკი“ როგორც კოჯორში, ისე საჩხერის სამთო მომზადების სკოლაში.„დარწმუნებული ვარ, ეს დღეები თქვენთვის იქნება ძალიან საინტერესოც, სასიამოვნოც და, საბოლოო ჯამში, იქნება დაუვიწყარი. მთლიანობაში 1 700 მოსწავლეს მასპინძლობს „ჯარის ბანაკი“ როგორც კოჯორში, ისე საჩხერის სამთო მომზადების სკოლაში. თითოეულ თქვენგანს გექნებათ საშუალება, ადგილზე ნახოთ, როგორია ჯარისკაცის ცხოვრება, რა ღირებულებებს ეზიარება სამხედრო მოსამსახურე. ასევე ძალიან მნიშვნელოვანია, რომ „ჯარის ბანაკს“ წელს პირველად დაემატა „საპატრიარქო საათის“ კომპონენტი, სადაც ჩვენს ეროვნულ, სულიერ ღირებულებებზე საუბრის საშუალება გექნებათ. უმნიშვნელოვანესი პროექტია. მინდა, მადლობა გადავუხადო ყველას, ვინც ამ პროექტს ახორციელებს. მადლობა თავდაცვის სამინისტროს, განათლების სამინისტროს, ახალგაზრდობის სააგენტოს, თითოეულ ინსტრუქტორს. თითოეული თქვენგანისთვის ძალიან მნიშვნელოვანია ის დღეები, რომლებსაც გაატარებთ „ჯარის ბანაკში“. მინდა, ყველას გისურვოთ წარმატებული და ძალიან საინტერესო დღეები“, – განაცხადა პრემიერ-მინისტრმა.

გილოცავთ 2026 წლის „ჯარის ბანაკის“ დაწყებას. ეს მართლაც უნიკალური პროექტია, რომელიც უკვე მეოთხე წელია, ხორციელდება, მასში მონაწილეობა მიიღო ასეულობით ახალგაზრდამ და ეს მართლა შთამბეჭდავია, – ამის შესახებ საქართველოს პრეზიდენტმა, მიხეილ ყაველაშვილმა „ჯარის ბანაკის“ გახსნის ღონისძიებაზე სიტყვით გამოსვლისას განაცხადა.„მინდა, მადლობა გადავუხადო ყველა იმ ადამიანს, ვინც ეს პროექტი შექმნა. ასევე, მინდა, მადლობა გადავუხადო ჩვენი ჯარის ინსტრუქტორებს, პედაგოგებს, სასულიერო პირებს, რომლებიც თქვენთან ერთად იმყოფებიან ბანაკში, გაძლევენ ცოდნას. ეს არის მართლაც უნიკალური შემთხვევა, როცა თქვენ ეზიარებით ამ მართლაც მნიშვნელოვან ცოდნას, რომელიც მთელი ცხოვრება გაგყვებათ. ბედნიერი ვარ, რომ შარშან დავესწარი ასევე ბანაკის გახსნას. შევხვდი ახალგაზრდებს. მათი შთაბეჭდილებები, ემოციები მართლაც დაუვიწყარია, მთელი ცხოვრება გაჰყვებათ ეს დაუვიწყარი დღეები“, – აღნიშნა ყაველაშვილმა.მისივე თქმით, ჩვენი წინაპრების, განსაკუთრებით კი, ჩვენი გმირი სამხედროების დამსახურებაა, რომ ქვეყანა დღეს არის დამოუკიდებელი, სუვერენული და ღირსეული.„ჩვენ გვაერთიანებს ჩვენი სამშობლო. ის, რომ დღეს ჩვენ ამ ულამაზეს ქვეყანაში ვცხოვრობთ, ვსაუბრობთ ქართულად, ვართ მორწმუნე ქრისტიანები, გვაქვს უნიკალური კულტურა და ტრადიციები, ეს არის ჩვენი წინაპრების, ღვაწლმოსილი ადამიანების და განსაკუთრებით, გმირი სამხედროების დამსახურება, რომ ჩვენი ქვეყანა დღეს არის დამოუკიდებელი, სუვერენული და ღირსეული. ეს რეალობა ჩვენი წინაპრების უდიდესი მსხვერპლის, უდიდესი ძალისხმევის ფასად მივიღეთ და ჩვენ არ გვაქვს უფლება, არ ვემსახუროთ ჩვენს სამშობლოს იგივე პასუხისმგებლობით. თქვენ გაქვთ უნიკალური შესაძლებლობები, გახდეთ თქვენს პროფესიებში წარმატებული. თქვენ ისეთ ასაკში ხართ, ალბათ თითოეულ თქვენგანს განსაზღვრული გაქვთ, რა პროფესია უნდა აირჩიოთ, მაგრამ მერწმუნეთ, რომ ის ღირებულებები, რომელიც ჩვენ გვაერთიანებს – მამული, ენა სარწმუნოება, ღმერთი, ადამიანი, სამშობლო, ოჯახის სიწმინდე, უნიკალური ჩვენი კულტურა და ტრადიციები – ამ ღირებულებებით უნდა გახდეთ თქვენ წარმატებული ქართველი პატრიოტები. ეს არის უნიკალური შესაძლებლობა. მერწმუნეთ, დამოუკიდებლობის აღდგენის შემდეგ ასეთი ძლიერი და განვითარებული საქართველო არ ყოფილა, მაგრამ ეს არის საწყისი ეტაპი. ჩვენ წარმოვადგენთ დღეს საქართველოს, თითოეული ჩვენგანი ვართ განსხვავებული პოზიციებით, მაგრამ გვაქვს პირადი პასუხისმგებლობა სამშობლოს წინაშე. ამიტომ, ყველაფერი უნდა გავაკეთოთ, რომ ვიყოთ წარმატებულები და უფრო მეტად გავაძლიეროთ ჩვენი სამშობლო.საბედნიეროდ, ჩვენ გვყავს სხვადასხვა პროფესიებში წარმატებული ადამიანები და შეგვიძლია, მათგან ვისწავლოთ ბევრი რამ. ყველასთვის ცნობილია, მაგალითად, ხვიჩა კვარაცხელია, რომელიც არის წარმატებული ფეხბურთელი და პიროვნება, სწორედ იმ ღირებულებებით გამსჭვალული, რომლებსაც იცავდნენ ჩვენი წინაპრები. ამ ღირებულებებით გამსჭვალული უნდა ვიყოთ წარმატებული ჩვენს პროფესიაში. ეს არის ჩვენი მიზანი – ვიყოთ უფრო ძლიერი სახელმწიფო“, – განაცხადა მიხეილ ყაველაშვილმა.