რიჩარდ კოკერილმა იაპონიასთან ტესტმატჩისთვის „ბორჯღალოსნების“ შემადგენლობა დაასახელა

ბუტა რობაქიძე 2004 წლის 24 ნოემბერს მოკლეს, 2025 წლის 19 ნოემბერს „ოცნებამ“ ბუტა რობაქიძის მკვლელობის საქმეზე გაამართლა ზურაბ ადეიშვილი, „ნაცმოძრაობის“ იმდროინდელი გენერალური პროკურორი. ზურაბ ადეიშვილი, რომელიც იყო და არის უსამართლო სისტემის მთავარი შემოქმედი და არქიტექტორი, სისტემის, სადაც სიმართლე არ არსებობდა და მხოლოდ ერთი პარტიის ძალადობა მძვინვარებდა, – ამის შესახებ პარტიის „გახარია საქართველოსთვის“ წევრმა, დეპუტატმა სოფო ხორგუანმა განაცხადა.მისი თქმით, ამით „ოცნებამ“ კიდევ ერთხელ ომი გამოუცხადა ყველა იმ მოქალაქეს, ვინც რეჟიმს ებრძოდა.„ყველა იმ მოქალაქეს, ვისაც დაგვპირდა სამართლიანობის აღდგენას და მოგვატყუა: „ოცნებამ“ დასცინა რეჟიმის ყველა მსხვერპლსა და მათ ოჯახებს. ყველას, ვისაც სიმართლის იმედი გვაქვს და სამართლის აღსრულება გვჭირდება: სწორედ ზურაბ ადეიშვილის შექმნილი ძალადობრივი და უსამართლო სისტემა „ოცნებამ“ გადმოიბარა სრულად, მოირგო და დღესაც იმავე სისტემასა და იმავე ადამიანებს ეყრდნობა. იგივე სისტემა დღესაც ერთი პარტიის სამსახურშია. ამასთან, „ოცნება“ ამუშავებს პროპაგანდას, რომ საქართველოს მოქალაქეებმა მუდმივ შიშში ვიცხოვროთ; შიშსა და ტყუილში. ფაქტია, 2025 ნოემბერში „ოცნება“ ამართლებს ზურაბ ადეიშვილს, რეჟიმის ავტორს. 2025 ნოემბერში ბრალს სდებს გიორგი გახარიას, საქართველოს მიწის დამცველს. ეს არის „ოცნების“ დღევანდელი სახე, ფლიდი და ფარისეველი სახე. საქართველოს მოქალაქეები იმსახურებენ სიმართლეს, იმსახურებენ სამართლიანობას. მივმართავ თითო-ოროლა შემორჩენილს „ოცნებაში“, ვინც იბრძოდით მაშინ, ნუ გეშინიათ, სიმართლის მხარეს დადექით, დასვით კითხვები“, – განაცხადა სოფო ხორგუანმა.

საქართველოს ტექნიკური უნივერსიტეტის ინფორმატიკისა და მართვის სისტემების ფაკულტეტმა საჯარო სკოლების მოსწავლეებს უმასპინძლა და მოზარდების ინტერესების გათვალისწინებით სახალისო-შემეცნებითი ღონისძიება - „ინტერნეტის სუპერსაიდუმლოებები“ გამართა.ინფორმაციას საქართველოს ტექნიკური უნივერსიტეტი ავრცელებს.სტუ-ის ცნობით, ღონისძიება, რომელშიც თბილისის მე-2, 160-ე, 161-ე, 181-ე, გოგიტა კიკნაძის სახელობის 182-ე და წეროვანის მე-3 საჯარო სკოლების მოსწავლეები მონაწილეობდნენ, მსოფლიო ბავშვთა დღის ეგიდით გაიმართა. საქართველოს ტექნიკური უნივერსიტეტის მიზანი კიბერუსაფრთხოების მიმართულებით მოზარდების ცნობიერების ამაღლება, ასევე, ციფრულ სამყაროში უსაფრთხო ნავიგაცია იყო.ინფორმატიკისა და მართვის სისტემების ფაკულტეტის ასოცირებულმა პროფესორმა ავთანდილ ბიჩნიგაურმა საჯარო სკოლების მოსწავლეებს წაუკითხა საინტერესო ლექცია კიბერუსაფრთხოების ტენდენციებისა და სტატისტიკის შესახებ, ესაუბრა კიბერუსაფრთხოების ტიპებზე, როგორიცაა: ფიშინგი, მავნე პროგრამები, ვირუსები, ტროიანები, ასევე, გამოსასყიდი პროგრამები, რომლებითაც სისტემის დაზიანება, მონაცემების მოპარვა, ან გამოსასყიდის სანაცვლოდ დაბლოკილი მონაცემების განბლოკვა ხდება; განუმარტა DDOS შეტევების პრინციპი, ესაუბრა შიდა საფრთხეებზე და კიბერშეტევებისგან დაცვის მეთოდებზე. გარდა ამისა, მოზარდებმა ავთანდილ ბიჩნიგაურისგან მიიღეს მნიშვნელოვანი პრაქტიკული რეკომენდაციები და მარტივად შესასრულებელი რჩევები თავიანთი ციფრული სივრცის დაცვის შესახებ.ინფორმატიკისა და მართვის სისტემების ფაკულტეტის დოქტორანტმა გიორგი ფაცაციამ მოსწავლეებს სახალისო ვიქტორინა ჩაუტარა და 3 გამარჯვებული გამოავლინა: ნატალი ნატროშვილი - გოგიტა კიკნაძის სახელობის თბილისის 182-ე საჯარო სკოლიდან, ნიკა ხაბულიანი - თბილისის 160-ე საჯარო სკოლიდან და მარიამ ჯაშიაშვილი - წეროვანის მე-3 საჯარო სკოლიდან.როგორც სტუ-ის ინფორმატიკისა და მართვის სიტემების ფაკულტეტის დეკანი, პროფესორი თალიკო ჟვანია აღნიშნავს, მოსწავლეებთან შეხვედრა გაჯერებული იყო ახალი ცოდნის მიღების სურვილითა და ინტერაქტიულობით, რითაც რეალურად გახდა შესაძლებელი მოზარდების ციფრული უსაფრთხოების გაძლიერება.„სასიხარულოა, რომ მსოფლიო ბავშვთა დღის ეგიდით, შესაძლებლობა მოგვეცა საჯარო სკოლების მოსწავლეებისთვის კიბერუსაფრთხოებასა და ციფრულ სამყაროში უსაფრთხო ნავიგაციის შესახებ ჩაგვეტარებინა სახალისო და ამავდროულად შემეცნებითი ღონისძიება. საგულისხმოა, რომ თემატიკა მოზარდების ინტერესებიდან გამომდინარე შევარჩიეთ. შესაბამისად - ლექცია, მსჯელობა, ვიქტორინა თუ პრაქტიკული მაგალითები მიზნად ისახავდა მოსწავლეებისთვის იმ მნიშვნელოვანი საკითხების გაცნობას, რომლებიც ციფრულ ეპოქაში მათი ყოველდღიურობის განუყოფელი ნაწილია. მოსწავლეები აქტიურად ერთვებოდნენ დისკუსიებში, გვიზიარებდნენ თავიანთ დაკვირვებებს, ინტერესით ისმენდნენ ინფორმაციას კიბერუსაფრთხოების თანამედროვე გამოწვევების შესახებ. ვფიქრობთ, მსგავსი ინიციატივები ხელს შეუწყობს მოზარდებში ცოდნის გაღრმავებას, პასუხისმგებლიანი ქცევების ჩამოყალიბებასა და იმ უნარების განვითარებას, რომლებიც უსაფრთხო ინფორმაციით სარგებლობისთვის არის აუცილებელი. თავის მხრივ, საქართველოს ტექნიკური უნივერსიტეტი, რექტორის, აკადემიკოს დავით გურგენიძის დიდი მხარდაჭერით, ყოველთვის მზად არის, საჯარო სკოლების მოსწავლეებს და შესაბამისად, მომავალ თაობას შესთავაზოს ინტერაქტიული და მაღალ სტანდარტებზე დაფუძნებული საგანმანათლებლო-კვლევითი სივრცეები, სადაც შესაძლებელი იქნება ახალი ცოდნის მიღება. დარწმუნებული ვართ, ინფორმატიკისა და მართვის სისტემების ფაკულტეტის მიერ მომზადებული „ინტერნეტის სუპერსაიდუმლოებები“ მრავალ მოსწავლეს მისცემს მოტივაციას, გაიღრმავოს ცოდნა ტექნოლოგიებისა და კიბერუსაფრთხოების სფეროში“, - ამბობს თალიკო ჟვანია.სტუ-ის ინფორმაციით, საჯარო ლექციისა და ვიქტორინის შემდეგ მოსწავლეებმა დაათვალიერეს საქართველოს ტექნიკური უნივერსიტეტის სასწავლო და კვლევითი ინფრასტრუქტურა, აუდიტორიები, ინფორმატიკისა და მართვის სისტემების ფაკულტეტის ჟიული შარტავას სახელობის ტექნიკისა და ტექნოლოგიების უნიკალური სასწავლო-კვლევითი ლაბორატორიული კომპლექსი, მუზეუმი, ასევე, საპრეზენტაციო, ინოვაციურ პროექტებზე სამუშაო და სხვა დამხმარე სივრცეები, რომლებიც სტუდენტებისთვის არის განკუთვნილი.

2026 წლის 12 იანვრიდან ქუთაისის საერთაშორისო აეროპორტს ახალი ევროპული მიმართულება ემატება და მგზავრებს საშუალება ექნებათ, სლოვაკეთის დედაქალაქ ბრატისლავაში პირდაპირი რეისით იმგზავრონ, – ამის შესახებ ინფორმაციას საქართველოს აეროპორტების გაერთიანება ავრცელებს.მათივე ცნობით, ევროპის ეკოლოგიურად ყველაზე მდგრადი ავიაკომპანია Wizz Air-ი ბრატისლავა-ქუთაისი-ბრატისლავის მიმართულებაზე ოპერირებას კვირაში ოთხჯერ: ორშაბათს, ოთხშაბათს, პარასკევსა და კვირას განახორციელებს და ფრენები თანამედროვე Airbus A321neo ტიპის საჰაერო ხომალდით შესრულდება.„ახალი მიმართულების დამატება შესაძლებელი გახდა საქართველოს აეროპორტების გაერთიანებასა და Wizz Air-ს შორის ინტენსიური და წარმატებული მოლაპარაკებების შედეგად. ავიაბილეთების შეძენა ავიაკომპანიის ოფიციალურ ვებგვერდზე უკვე შესაძლებელია.ბრატისლავა ცენტრალურ ევროპაში ერთ-ერთი მნიშვნელოვანი ჰაბია, რომელიც ვენასა და ბუდაპეშტთან უმოკლეს დისტანციაზე მდებარეობს. ამის გამო ახალმა მიმართულებამ ქართველი მოგზაურებისთვის, შეიძლება, დამატებითი კულტურული და ტურისტული შესაძლებლობები შექმნას როგორც დასვენებისთვის, ისე მრავალმხრივი ევროპული აღმოჩენებისთვის.Wizz Air-ი ქუთაისის საერთაშორისო აეროპორტიდან 12 ქვეყნის 23 მიმართულებით ოპერირებს. მათ შორის, ზაფხულში დამატებული ლიონის მიმართულებით. ხოლო 2 დეკემბრიდან ავიაკომპანია პირდაპირ ფრენებს ვენეციის მიმართულებითაც იწყებს. 2012 წელს, საქართველოს ბაზარზე ოპერირების დაწყებიდან დღემდე Wizz Air-მა საქართველოდან და პირიქით თითქმის 9 მილიონი მგზავრი გადაიყვანა“, – აღნიშნულია ინფორმაციაში.

ვისურვებდი, საქართველოს იმ კრიმინალურ-მოღალატეთა ბანდა კი არ მართავდეს, რომელიც ომში ჩვენი მტრული სახელმწიფოს მხარეს არის, არამედ მართავდეს ძალა, რომელიც თავისუფალი სამყაროს და თავისუფლებისთვის მებრძოლი უკრაინელი ხალხის მხარეს არის, – ამის შესახებ „ნაციონალური მოძრაობის“ თავმჯდომარემ, თინა ბოკუჩავამ ჟურნალისტებს განაცხადა.ბოკუჩავას კითხვა დაუსვეს პარლამენტის თავმჯდომარის, შალვა პაპუაშვილის იმ განცხადებაზე, სადაც პაპუაშვილი ამბობს: „ევროკავშირმა 120 მილიარდით მეტი მისცა რუსეთს, ვიდრე უკრაინას და ეს ხალხი ჩვენ გვეუბნება რამეს? ლიეტუვა, რომელსაც ჩვენზე მეტი ღვინო შეაქვს რუსეთში, ჩვენ გვეუბნება რამეს?“.„შალვა პაპუაშვილმა ძალადობრივი ხასიათი გამოავლინა უმაღლეს ტრიბუნაზე, მორალზე საუბარი ტრაგიკომიკურია. რაც შეეხება დასავლეთის და კონკრეტული წევრი ქვეყნების დამოკიდებულებას, განსაკუთრებით ნავთობპროდუქტების ნაწილში რუსეთზე, ეს იყო ძალიან სერიოზული პრობლემა და გეოსტრატეგიული შეცდომა, რომლის გამოსწორების პროცესშიც არის ახლა ევროკავშირი. ვიცით, რომ მათი უმრავლესობა რუსეთის ფედერაციისგან ახლა სრულიად ენერგოდამოუკიდებელი ხდება ან უკვე გახდა, რაც არის რუსეთის და მისი ომის მანქანის დასუსტების მთავარი საფუძველი.ეს არის ნათელი მაგალითი, რომ რუსეთი უკრაინასთან ამ ომში აუცილებლად დამარცხდება და უფრო დასუსტებული თუ არა, იმაზე დანაწევრებული გამოვა, ვიდრე ის იყო მაშინ, როდესაც უკრაინის წინააღმდეგ ეს ომი დაიწყო. ამიტომ, როგორც საქართველოს მოქალაქე, ვისურვებდი, საქართველოს დღეს იმ კრიმინალურ-მოღალატეთა ბანდა კი არ მართავდეს, რომელიც ომში ჩვენი მტრული სახელმწიფოს მხარესაა, არამედ ის ძალა მართავდეს, რომელიც თავისუფალი სამყაროს და თავისუფლებისთვის მებრძოლი უკრაინელი ხალხის მხარეს არის, რადგან ეს საქართველოს ეროვნულ ინტერესშია“, – განაცხადა თინა ბოკუჩავამ.

ბიძინა ივანიშვილი, მისი ოჯახი აგრძელებს ყველანაირ საქმიანობას, მათ შორის ქველმოქმედებას. ასე რომ, ის ნაწილია თანხის, რომლის განკარგვაშიც ხელს უშლიან, თუმცა ბიძინა ივანიშვილი სრული მოცულობით ახორციელებს და აგრძელებს იმ საქველმოქმედო საქმიანობას, რომელსაც ის აქამდე ეწეოდა, - განაცხადა საქართველოს პარლამენტის თავმჯდომარე შალვა პაპუაშვილმა.ჟურნალისტმა ჰკითხა, სად ჩანს, რომ კონკრეტული თანხები ბიძინა ივანიშვილმა ვერ მიიღო იმის გამო, მას სთხოვდნენ საქართველოს ომში ჩართვას, რა მტკიცებულება არსებობს.„რაც შეეხება თავად დავის შინაარსს, მათ შორის ადვოკატების განცხადებებშიც იყო ეს მოცემული, იმდენად მარტივი და არაიურისტისთვისაც გასაგები საკითხია და ამას რომ წლების განმავლობაში სხვადასხვა ინსტანციის გავლა უწევს, თავად ეს ფაქტიც აჩვენებს, რომ ეს არის ხელოვნური პროცესი იმისთვის, რომ მოხდეს ზეგავლენა ადამიანზე. ერთ-ერთმა პოლიტიკოსმა ადრე თქვა, ადამიანს თავი მხოლოდ იმიტომ არ აქვს, რომ ბალიშზე დადოსო. ლოგიკური დასკვნებიც უნდა გამოვიტანოთ იმ პროცესებიდან, რომელიც საქართველოში მიდიოდა. ესეც საკმარისია დასკვნის გამოსატანად ყოველგვარი კულისებში არსებული ინფორმაციის ცოდნის გარეშეც. ჩემს კაბინეტში იჯდა აშშ-ის ყოფილი ელჩი დეგნანი, რომელიც მეუბნებოდა, რომ ახლა ესკალაციაზე უნდა წახვიდეთ რუსეთთანო და გადაწყვიტეთ ნათელ მხარეს ხართ, თუ ბოროტ მხარესო. შტერები და მარიონეტები რომ არ დახვდნენ საქართველოს ხელისუფლებაში, ამიტომაც გაბრაზდა ბევრი მერე საქართველოზე.გავლენა რომ ჰქონოდა, საქართველო დღეს იქნებოდა ნაომარი, დანგრეული ქვეყანა, რისთვისაც სინამდვილეში ხდებოდა ზეწოლა ბიძინა ივანიშვილზე. ზეწოლა ხდებოდა არა მასზე პიროვნულად, რომ მის მიმართ პიროვნული ინტერესი ჰქონდათ, ხდებოდა ზეწოლა, რომ გამოეწვიათ საქართველოს ხელისუფლების პოლიტიკური გადაწყვეტილებები, რომელიც დაგვირგვინდებოდა ნაომარ ქვეყნის სტატუსით. ვიქნებოდით 90-იანი ქვეყნის მდგომარეობაში.გუშინ განცხადებაშიც ნახეთ, რომ ბატონი ბიძინა ივანიშვილი შეგუებულია იმას, რომ იმ უსამართლო გარემოში, რომელიც დღეს დასავლეთში სუფევს, არაფორმალური მმართველობის პირობებში, არანაირი მოლოდინი არ აქვს, რომ მისი თანხების განკარგვის საშუალებას მისცემენ. ბიძინა ივანიშვილი, მისი ოჯახი აგრძელებს ყველანაირ საქმიანობას, მათ შორის ქველმოქმედებას. ასე რომ, ის ნაწილია თანხის, რომლის განკარგვაშიც ხელს უშლიან, თუმცა ბიძინა ივანიშვილი სრული მოცულობით ახორციელებს და აგრძელებს იმ საქველმოქმედო საქმიანობას, რომელსაც ის აქამდე ეწეოდა“, - აღნიშნა პაპუაშვილმა.რამდენიმე დღეში ბრიტანული სასამართლო საბოლოო გადაწყვეტილებას გამოიტანს იმ დავის შესახებ, რომელიც წლებია, გრძელდება და მოსარჩელეს ყველა წინა პროცესი მოგებული აქვს, - ინფორმაციას ქართული ოცნების საპატიო თავმჯდომარის ადვოკატი ავრცელებს. ბიძინა ივანიშვილის უფლებადამცველი ასევე დეტალურად საუბრობს, 2008 წლიდან განვითარებულ მოვლენებზე.