რატი იონათამიშვილი – ოპოზიციის კონფიგურაციას საზოგადოებისთვის არანაირი მნიშვნელობა არ აქვს, ისინი უკვე დამარცხებული არიან

პროტესტის ფორმებზე ასე ცალსახად ვერ ვისაუბრებთ, უბრალოდ, არ ვაპირებთ გაჩერებას და პროცესები თვითონ მიგვანიშნებს, როგორ უნდა წარვმართოთ ის, – ასე უპასუხა თეატრისა და კინოს სახელმწიფო უნივერსიტეტის სტუდენტმა, თემურ ვაჭარაძემ საქართველოს პირველი არხის გადაცემაში „აქტუალური თემა – მაკა ცინცაძესთან ერთად“ წამყვანის შეკითხვას, რა ფორმით აპირებენ სტუდენტები პროტესტის გაგრძელებას.„ჩვენთვის მთავარი არის, რომ გვაქვს მიზანი და ეს მიზანია, ამ ქვეყანაში უსამართლობა არ გახდეს ნორმალიზებული და ის ყველა უსამართლოდ დაპატიმრებული ადამიანი იყოს თავისუფალი. ეს არის ჩვენი მთავარი მიზანი“, – განაცხადა ვაჭარაძემ.თემურ ვაჭარაძემ ასევე განაცხადა, რომ სოლიდარობას უცხადებს ყველა ნაწამებ, აქციებზე უკანონოდ დაპატიმრებულ ადამიანს და მათთვის ბრძოლას არ შეწყვეტენ.სტუდენტმა ასევე განაცხადა, რომ მათი უნივერსიტეტში დაბრუნებით ვინმეს თუ ჰგონია, რომ პრობლემა აღმოფხვრილია და ამის გამო ისინი რამეს არ გააპროტესტებენ, ბოდიშს მოიხდიან, ან გაფრთხილებას მიიღებენ იმაზე, რაც არ ჩაუდენიათ, ძალიან ცდება.სტუდენტმა ასევე აღნიშნა, რომ კარის გაღების პრობლემა არ იყო იმ შემთხვევაში, თუ სტუდენტები გავიდოდნენ, მაგრამ იმაზე, რომ ჩანაცვლებოდნენ, ვინმე შესულიყო, ან საჭმელი შეეწოდებინათ, ამაზე პრობლემა იყო.„ბატონი გიორგი შაუტაშვილი იმას იძახის, რომ კარები იმიტომ არ იღებოდა, ისევ ბავშვების უსაფრთხოებაზე ზრუნავდა, რაც არის სიცრუე. იმიტომ, რომ როდესაც ჩვენ საჭმლის შემოტანას ვითხოვდით, გარეთ იყო ჩვენი ორი სტუდენტი, რომ უბრალოდ, საჭმელი შემოეწოდებინათ. ჩვენ თავიდან იმაზეც არ ვიყავით წინააღმდეგი, რომ უკანა კარიდან მომხდარიყო ეს ყველაფერი. იმ დღეს, როდესაც გვითხრა უარი დაცვის უფროსმა მამუკამ, რომ საჭმლის შემოწოდება და ჩანაცვლება არ მოხდებოდა, ხოლო თუ გასვლა გვინდოდა, კარი მხოლოდ მაგ შემთხვევაში გაიღებოდა, მხოლოდ ამის შემდეგ მოვიდა ბევრი ადამიანი კარებთან და ეს მოხდა ბანერების გამო, რადგან დავკიდეთ ბანერები, რომელზეც ეწერა „ხელახალი არჩევნები“. როდესაც ამბობს, რომ ჩვენ უსაფრთხოებაზე ზრუნავდა, ეგ არის სიცრუე და ტყუილი. არ მინდა, რომ ასე მიწევდეს საუბარი, მაგრამ ყველაფერს თავისი სახელი უნდა დაერქვას“, – განაცხადა ვაჭარაძემ.ამასთან, სტუდენტმა თქვა, რომ როდესაც დაცვის უფროსს ეკითხებოდნენ, ვისი დავალება იყო, რომ ჩანაცვლება და საჭმლის შეწოდება არ მომხდარიყო, ის ეუბნებოდა, რომ ეს რექტორის დავალებით იყო.„პოლიცია როდესაც გამოიძახეს გარედან, შემოვიდა პოლიცია, ვკითხეთ და გვითხრა, რომ ეს რექტორის გადაწყვეტილებაა, სხვა ამ გადაწყვეტილებას ვერ მიიღებდა. ამიტომ, რომ იძახის, მე ეს გადაწყვეტილება არ მიმიღიაო, ეგეც არის სიცრუე“, – განაცხადა ვაჭარაძემ.მისივე თქმით, რექტორს არ უზრუნია იმაზე, რომ სტუდენტებსა და მას შორის რაღაცნაირად, პრობლემები მოგვარებულიყო.„ჩვენ, რა თქმა უნდა, შეურაცხყოფების შემდეგ არანაირი სურვილი არ გვქონდა მასთან საუბრის. იმ ყველაფრის შემდეგ, როდესაც რექტორი საჭმლის შეწოდებაზე უარს გეუბნება, ჩანაცვლებაზე უარს გეუბნება, გათბობას არ გირთავს და გეუბნება, გათბობას ვერ ჩაგირთავთ, რადგან სპექტაკლების გამო ფული უნდა დავზოგოო, როცა ცალკე არის სპექტაკლების თანხა ბიუჯეტში და ცალკე გათბობის თანხა, კი ბატონო, ეგ არ არის არანაირი პრობლემა, მაგრამ როდესაც შენს გათბობას, შენს ნივთს არ გატანინებს, რომ გათბე დეკემბერში და იანვარში, ამის შემდეგ, რა თქმა უნდა, ჩვენ სურვილი არ გვქონდა, რომ გვესაუბრა“, – განაცხადა ვაჭარაძემ.გადაცემის წამყვანის შეკითხვაზე, როგორ უნდა გაგრძელდეს მათი ურთიერთობა, როგორ უნდა მოხდეს კომუნიკაცია, რომლის პრობლემაც ფაქტია, დგას და როგორ უნდა მოხდეს ისე, რომ ეს მოცემულობა აკადემიურ სივრცეს დაუბრუნდეს, სტუდენტმა განაცხადა, რომ ისინი სწავლის პროცესს და აკადემიურ პროცესს აქამდე, 83 დღის განმავლობაში, რაც უნივერსიტეტში იყვნენ, ხელს არ უშლიდნენ.შეკითხვაზე, რა კომენტარს გააკეთებს სირცხვილის დერეფნებთან დაკავშირებით, რომელიც როგორც რექტორმა გადაცემაში სტუმრობისას განაცხადა, სხვა სტუდენტებს მოუწყვეს, რის გამოც დანარჩენი სტუდენტები უხერხულობას გრძნობენ, თემურ ვაჭარაძემ თქვა, რომ მსგავსი ფაქტი არ არსებობს.„თუ ამბობს, რომ ასე იყო, მაშინ მოიყვანოს არგუმენტი, ან ფაქტი, როდესაც ჩვენ რომელიმე სტუდენტი სირცხვილის კორიდორში გავატარეთ. ჩვენ ყველა სტუდენტთან გვქონდა კომუნიკაცია, ჩვენი მეგობრები არიან, ძალიან პატარა უნივერსიტეტი გვაქვს, ასე თუ ისე, ყველას ვიცნობთ და ჩვენ არანაირი პრობლემა არ გვქონდა, რომ ისინი შესულიყვნენ და ესწავლათ“, – განაცხადა თემურ ვაჭარაძემ.

გერმანია უკრაინის დახმარებას სამი მილიარდი ევროთი გაზრდის. როგორც „დოიჩე ველე“ წერს, გერმანიის ოთხმა პარტიამ, რომლებმაც ისტორიულ შეთანხმებას მიაღწიეს „ვალის მუხრუჭის“ რეფორმასთან დაკავშირებით, მოლაპარაკებების დროს ასევე შეათანხმა უკრაინისთვის სამი მილიარდი ევროს ოდენობის სამხედრო დახმარების პაკეტის გამოყოფაც.შესაბამის შეთანხმებას მიაღწიეს „ქრისტიან-დემოკრატიული და ქრისტიან-სოციალური კავშირის“ კონსერვატიულმა ბლოკმა, გერმანიის „სოციალ-დემოკრატიულმა პარტიამ“ და პარტიამ „კავშირი 90“/„მწვანეებმა“.„ქრისტიან-დემოკრატიული და ქრისტიან-სოციალური კავშირის“ ლიდერმა, ფრიდრიხ მერცმა განაცხადა, რომ ფედერალური კანცლერი ოლაფ შოლცი აღნიშნული სახსრების გამოყოფას დათანხმდა.უკრაინის სამხედრო მხარდაჭერისთვის გამიზნული დამატებითი თანხა, შეიძლება, უკვე მომავალ კვირაში გამოყონ.ცნობისთვის, გერმანიაში საარჩევნო კამპანიის დროს ამ თანხის გამოყოფის შესახებ, რაც აუცილებელია კიევისთვის შეიარაღების მიწოდების გასაგრძელებლად, მწვავე დებატები მიმდინარეობდა.როგორც გერმანული მედია წერს, კანცლერი შოლცი დათანხმდა ამ ნაბიჯს იმ პირობით, რომ „ვალის მუხრუჭის“ პოლიტიკა შერბილდება გერმანიის თავდაცვითი ხარჯების გასაზრდელად. ეს რეფორმა საშუალებას იძლევა, თავდაცვითი ხარჯები გათავისუფლდეს გერმანიის კონსტიტუციაში გაწერილი „ვალის მუხრუჭისგან“ და შეიქმნას 500 მილიარდი ევროს ოდენობის სპეციალური ფონდი ინფრასტრუქტურაში ინვესტიციების დასაბანდებლად. პარტიებს შორის კომპრომისი ასევე ითვალისწინებს 100 მილიარდი ევროს გამოყოფას კლიმატისა და ტრანსფორმაციის ფონდისთვის.

განათლების მინისტრის ბრძანებით, ეთიკის კომისია არ წარმოადგენს უფლებამოსილ პირს, რომელსაც შეუძლია მიიღოს გადაწყვეტილება სტუდენტების დისციპლინარული პასუხისმგებლობის თაობაზე, – ამის შესახებ თეატრისა და კინოს სახელმწიფო უნივერსიტეტის სტუდენტმა, ნინო გოგიამ საქართველოს პირველი არხის გადაცემაში „აქტუალური თემა – მაკა ცინცაძესთან ერთად“ სტუმრობისას განაცხადა.„პირველ რიგში, ყველაზე დიდი პრობლემა ალბათ ეს არის“, – განაცხადა გოგიამ.მისი თქმით, როდესაც სტუდენტებს ელექტრონულ ფოსტაზე წერილი დაეგზავნათ, სადაც ნახსენები იყო, რომ იმართებოდა კომისიის სხდომა, რაზეც განიხილებოდა შეწამვლის საკითხი, დაკონკრეტებული არ იყო, ვის ეხებოდა და რა შეიძლებოდა ამ ყველაფერს მოჰყოლოდა, რომ მათ სტატუსი შეწყვეტოდათ და ა.შ.„გარდა ამისა, დაახლოებით საღამოს რვა საათისთვის მოვიდა ეს მეილი და ჩვენ დრო გვქონდა დილის 10:00 საათამდე, რაც გონივრული ვადა ნამდვილად არ არის. გარდა ამისა, მათ მიერ გამოგზავნილ მეილში არ არის დაკონკრეტებული, რომელმა ჩვენგანმა რა კოდექსი დავარღვიეთ. აქედან გამომდინარე, ჩვენ მოვითხოვეთ არაერთხელ და, მათ შორის, დღეს შევიტანეთ განცხადება, რომ მივიღოთ დასაბუთება, რას გვედავებიან კონკრეტულად. იმიტომ, რომ ამ განცხადების მერე რომ სტატუსი აღარ გვიწყდება, ამ განცხადებაში წერია ასევე ისიც, რომ მივიღეთ გაფრთხილება, თუმცა რასთან დაკავშირებით მივიღეთ ეს გაფრთხილება, დღემდე უცნობია ჩვენთვის და დღემდე ველოდებით უნივერსიტეტისგან, რომ ეს ყველაფერი მივიღოთ“, – განაცხადა გოგიამ.როგორც სტუდენტმა აღნიშნა, თავიდან თუ ისინი თვლიდნენ, რომ სტატუსი არ უნდა შეწყვეტოდათ, რა თქმა უნდა, ახლაც ასე თვლიან და არ იღებენ არც გაფრთხილებას, რადგან „ეს ქმედება სრულიად დაუსაბუთებელი და არალოგიკურია“.„დასაბუთებას ვიდრე არ მივიღებთ, მანამდე, რა თქმა უნდა, არ ვაპირებთ, თუნდაც ლექციებზე შევიდეთ, რადგან ეს ყველაფერი ეწინააღმდეგება, პირველ რიგში, კანონს და, მეორე რიგში, ჩვენს მორალს, რაც ყველაზე მაღლა დგას“, – განაცხადა გოგიამ.ნინო გოგიამ ასევე განაცხადა, რომ სოლიდარობას უცხადებს სინდისის ყველა პატიმარს.მისი თქმით, უნივერსიტეტში მომუშავე არაერთი ადამიანი მათ პროტესტს ყოველ ჯერზე უშლიდა ხელს.„თუნდაც პირველივე დღეებში, როდესაც გიორგი შალუტაშვილს ველოდებოდით, რომ მოსულიყო და კომუნიკაცია ჰქონოდა ჩვენთან, მოვიდა დილის 06:00 საათზე და გარეთ რამდენიმე ადამიანი, ჩვენი სტუდენტი რომ იმყოფებოდა, ის ამბობდა, რომ ეს არის ულტიმატუმი და არ შემოვუშვებო. იმის მიუხედავად, რომ ჩვენ ვეუბნებოდით, გარეთ იყინებიან ეს ბავშვები-თქო. ამის შემდეგ იყო შემთხვევა, როცა გვინდოდა, გამათბობლები შემოგვეტანა, რადგან უნივერსიტეტი არ რთავდა გათბობას და გვითხრეს ისიც, რომ ამით ფულს ზოგავენ ეს ადამიანები და ჩვენი გამათბობლების შემოტანის უფლებასაც არ გვაძლევდნენ. გიორგი ფხაკაძე იყო ის ადამიანი, რომელმაც თქვა, თქვენ პროტესტიც გინდათ და გათბობაც, ეს ყველაფერი ერთად ვერ იქნებაო“, – განაცხადა გოგიამ.სტუდენტმა ასევე განაცხადა, რომ მათთვის საჭმლის მიწოდებაც პრობლემა იყო.„ბანერები როცა ჩამოვკიდეთ, იყო შემთხვევა, როცა ჩაკეტეს კარი. მე და თემო შიგნით ვიყავით მაგ პერიოდში, დაახლოებით 72 ან 70 საათი და საჭმლის შემოწოდებაზე გვითხრეს, რომ ამის უფლებას არ მოგვცემდნენ და არც ერთმანეთის ჩანაცვლების უფლებას არ მოგვცემდნენ. გვითხრეს, ზუსტად ვციტირებ, ღრიჭოდან შემოგაწვდით საჭმელსო, კარის ღრიჭოზე იყო საუბარი“, – განაცხადა გოგიამ.

აშშ-ის სახელმწიფო მდივანმა მარკო რუბიომ განაცხადა, რომ ვაშინგტონი „ფრთხილი ოპტიმიზმით“ აფასებს უკრაინაში ცეცხლის შეწყვეტის თაობაზე რუსეთთან გამართულ მოლაპარაკებებს.„ჩვენი აზრით, გუშინ ძალიან პოზიტიური და ნაყოფიერი კონტაქტები იყო პრეზიდენტ პუტინსა და აშშ-ის პრეზიდენტის სპეციალურ წარმომადგენელს, სტივ უიტკოფს შორის.უიტკოფი ბრუნდება აშშ-ში. როდესაც ის დაბრუნდება, იმედი მაქვს, შევიკრიბებით ამ შაბათ-კვირას. ჩვენ უფრო საფუძვლიანად შევაფასებთ რუსეთის პოზიციას. შემდეგ პრეზიდენტი შეაფასებს, რა იქნება შემდეგი ნაბიჯები“, – განაცხადა რუბიომ პრესკონფერენციაზე, რომელიც კანადის კვებეკის პროვინციაში, G7-ის საგარეო საქმეთა მინისტრების შეხვედრის შემდეგ გაიმართა.აშშ-ის სახელმწიფო მდივანის თქმით, „არსებობს საფუძველი ფრთხილი ოპტიმიზმისთვის, მაგრამ ეს რთული და კომპლექსური სიტუაციაა“.„ეს არ იქნება მარტივი, მაგრამ, რა თქმა უნდა, ვთვლით, რომ ახლა, სულ მცირე, რამდენიმე ნაბიჯით მივუახლოვდით ომის შეწყვეტასა და მშვიდობის დამყარებას, თუმცა, კიდევ გრძელი გზა გვაქვს გასავლელი“, – თქვა რუბიომ.მისი თქმით, რუსეთთან მოლაპარაკების დროს გამოიკვეთა „დადებითი დინამიკა“.„ჩვენ, რა თქმა უნდა, ვნახავთ, რისი გაკეთება სურს რუსეთს. საქმე მხოლოდ რუსეთში არ არის. რა თქმა უნდა, ეს მისაღები უნდა იყოს უკრაინისთვისაც“, – აღნიშნა აშშ-ის სახელმწიფო მდივანმა.ჟურნალისტის კითხვაზე, ენდობა თუ არა პუტინს, რუბიომ უპასუხა, რომ ეს არარელევანტური კითხვაა, რადგანაც საქმე ეხება არა ნდობას, არამედ ქმედებებს.კითხვაზე, ხომ არ ცდილობს პუტინი, დრო მოიგოს, რუბიომ განაცხადა, რომ ამერიკა არ მიიღებს საგარეო პოლიტიკურ გადაწყვეტილებებს იმ განცხადებების საფუძველზე, რასაც რომელიმე ქვეყნის ლიდერი აკეთებს პრესკონფერენციაზე ან სოციალურ მედიაში.რუბიომ განაცხადა, რომ „ომის დასრულების ერთადერთი გზა მოლაპარაკებების პროცესია“. მისივე თქმით, ორივე მხარე უნდა წავიდეს დათმობებზე.„ის, რისი დათმობისა და მიღებისთვისაც მზადაა თითოეული მხარე, არის ის, რაც დაასრულებს უკრაინაში ომს. ხალხი როდესაც ჯდება და მოლაპარაკებით ცდილობს ომის დასრულებას, ჩვეულებრივ ხდება გაცემაც და მიღებაც. რა იქნება ეს კონკრეტული დათმობები, დამოკიდებულია მაგიდასთან მყოფ მხარეებზე. ჩვენ არაფერს წინასწარ არ განვსაზღვრავთ, მაგრამ ეს არის ის, რაც საჭიროა ომის დასასრულებლად“, – განაცხადა რუბიომ პრესკონფერენციის დასასრულს.

რუსეთის პრეზიდენტმა, ვლადიმირ პუტინმა განაცხადა, რომ გაეცნო აშშ-ის პრეზიდენტის, დონალდ ტრამპის მოწოდებას კურსკის ოლქში ბლოკირებული უკრაინის შეიარაღებული ძალების ჯარისკაცების დანდობაზე.„იარაღის დაყრისა და ჩაბარების შემთხვევაში, უკრაინის ჯარებს კურსკის ოლქში გარანტირებული ექნებათ სიცოცხლე და ღირსეული მოპყრობა საერთაშორისო სამართლისა და რუსეთის კანონების შესაბამისად“, - აღნიშნა ვლადიმირ პუტინმა.აშშ-ის პრეზიდენტმა, დონალდ ტრამპმა თავის სოციალურ ქსელში დაწერა, რომ ტელეფონით რუსეთის ლიდერს, ვლადიმერ პუტინს ესაუბრა, რა დროსაც მას კურსკის ოლქში ალყაში მყოფი უკრაინელი სამხედროებისთვის სიცოცხლის შენარჩუნება სთხოვა.