მართალი ადამიანის გარდაცვალებას თან სდევს ნუგეშიც და მომსწრენი გავხდით ნამდვილი სასწაულის. მთელი საქართველო ფეხზე ადგა და დაიძრა ილია მეორის მიმართ თაყვანისცემის, მადლიერების, სიყვარულის გამოსახატად. ეს სიყვარული, ერთიანობა გვაძლევს იმედს, რომ შევძლებთ, შევინარჩუნოთ დიდი ღირებულებები, რაც ჩვენამდე მოიტანეს ჩვენმა დიდმა პატრიარქებმა, – ამის შესახებ საპატრიარქო ტახტის მოსაყდრემ, სენაკისა და ჩხოროწყუს მიტროპოლიტმა შიომ (მუჯირი) სიონის ტაძარში ქადაგებისას განაცხადა.
მეუფე შიომ საზოგადოებას საქართველოს ეკლესიის ავტოკეფალიის აღდგენის დღე მიულოცა და ამ გზაზე ილია მეორის გაწეულ საქმეებზე ისაუბრა.
„მართალია, 1917 წელს ჩვენ გამოვაცხადეთ ავტოკეფალიის აღდგენა, მაგრამ საჭირო იყო ამის ცნობა მსოფლიოს კონსტანტინოპოლის საპატრიარქოს და მსოფლიოს მართლმადიდებელი ეკლესიების მიერ. ეს დიდი საქმე კი სრულიად საქართველოს კათოლიკოს-პატრიარქმა, ილია მეორემ ითავა. მან მრავალწლიანი შრომით, დიდი ავტორიტეტით მიაღწია იმას, რომ 1990 წელს მართლმადიდებლობის ზეიმზე, კონსტანტინოპოლში მსოფლიო პატრიარქმა, მისმა ყოვლად უწმინდესობამ, დიმიტრიოს პირველმა საქართველოს ეკლესიას გადასცა ჩვენი ეკლესიის უძველესი დროიდან არსებული ავტოკეფალიისა და საპატრიარქო ტიტულის ცნობის, მტკიცების სიგელები. შეიძლება ითქვას, კათოლიკოს-პატრიარქმა ილია მეორემ დააგვირგვინა ჩვენი წინაპრების შრომა და ბრძოლა ავტოკეფალიის მოპოვებისთვის.
დღეს ჩვენ ვიმყოფებით სიონის წმინდა ტაძარში და დიდი მოწიწებით, მადლიერებით ვართ გამსჭვალულნი ჩვენი წმინდა პატრიარქების, წინაპრებისადმი, რომლებიც არ შეეგუენ, არ შეჰგუებიან ავტოკეფალიის დაკარგვას. თავიანთი თავგანწირვით, შრომით, დიდი ღვაწლის ფასად კვლავ დაუბრუნეს და აღუდგინეს ძველად არსებული ისტორიული ავტოკეფალია ჩვენს ქვეყანას, ეკლესიას. ესენი იყვნენ წმინდა კათოლიკოს-პატრიარქები კირიონი, ამბროსი, კალისტრატე, ლეონიდე, ქრისტეფორე, მელქისედეკი, ეფრემი, სხვა სასულიერო და საერო პირები, მიტროპოლიტი ანტონ გიორგაძე და სხვები. კათოლიკოს-პატრიარქები აქ, ამ წმინდა ტაძარში განისვენებენ და მათ გვერდით უკვე სამუდამო ადგილი დაიმკვიდრა მათმა ღირსეულმა მემკვიდრემ, მათი საქმეების გამგრძელებელმა, კათოლიკოს-პატრიარქმა ილია მეორემ. როგორც სახარებაშია ნათქვამი, ყველანი ვხედავთ, რომ „ესრე ბრწყინავენ საქმენი მისნი წინაშე კაცთა, რომ ჩვენ ვადიდებთ მამასა ჩვენსა ზეცათას“.
ეს დღეები უმძიმესია ჩვენთვის. ამავე დროს, ვიცით, რომ წმინდა, მართალი ადამიანი როდესაც გარდაიცვლება, ამას თან სდევს სულიერი ნუგეშიც და სიხარულიც. ველოდებოდით, როგორ გამოვლინდებოდა ეს. მომსწრენი გავხდით ნამდვილი სასწაულის, მთელი საქართველო ფეხზე ადგა და დაიძრა მისი უწმინდესობისა და უნეტარესობის ნეშტისკენ თაყვანისცემის, მადლიერების, სიყვარულის გამოსახატად. იყო საოცარი ერთიანობა, სიყვარული ღვთისადმი და პირადად მისდამი. მასში ხომ ეკლესიას, ღმერთს განადიდებს ჩვენი ერი, ღმერთს უხდის მადლობას. ეს გამოვლენილი სიყვარული და ერთიანობა გვაძლევს დიდ სულიერ ძალას, ნუგეშს, რომ გადაგვეტანა ურთულესი დღეები. ასევე გვაძლევს დიდ იმედს, რომ ღვთის შეწევნით შევძლებთ, შევინარჩუნოთ ის დიდი ღირებულებები, რაც ჩვენამდე მოიტანეს ჩვენმა დიდმა პატრიარქებმა, წინაპრებმა, მათ შორის რაც სრულიად საქართველოს კათოლიკოს-პატრიარქმა, ილია მეორემ გვიანდერძა. ეს არის ჭეშმარიტი რწმენა ღვთისა, ერთგულება სამშობლოსი, სიყვარული ადამიანისა. ამას თუ შევინარჩუნებთ, ამისთვის თუ ვიბრძოლებთ და ვიშრომებთ, უფალი აუცილებლად შეგვეწევა, შეგვაძლებინებს შენარჩუნებას როგორც ჩვენი საეკლესიო ავტოკეფალიის, ასევე ჩვენი სახელმწიფოებრივი დამოუკიდებლობის, შეგვაძლებინებს ქვეყნის გამთლიანებასა და გაძლიერებას. კიდევ ერთხელ გილოცავთ საქართველოს ეკლესიის ავტოკეფალიის აღდგენის დღეს. ღმერთმა დაგლოცოთ და გაგაძლიეროთ. ღმერთმა დალოცოს, მოიხსენოს, შეიწყალოს და აცხონოს სრულიად საქართველოს კათოლიკოს-პატრიარქის, ილია მეორის უკვდავი სული. ღმერთმა დალოცოს, გაამთლიანოს და გადაარჩინოს საქართველო“, – განაცხადა მეუფე შიომ.
სრულიად საქართველოს კათოლიკოს-პატრიარქის, ილია მეორის გარდაცვალების მეცხრე და ავტოკეფალიის აღდგენის დღესთან დაკავშირებით სიონის საკათედრო ტაძარში საპატრიარქო ტახტის მოსაყდრემ, სენაკისა და ჩხოროწყუს მიტროპოლიტმა შიომ (მუჯირი), მღვდელმთავრებსა და სამღვდელოებასთან ერთად, პარაკლისი და პანაშვიდი გადაიხადა. სიონის ტაძარში პარაკლისს ესწრებოდნენ საქართველოს პრემიერ-მინისტრი ირაკლი კობახიძე, საქართველოს პრეზიდენტი მიხეილ ყაველაშვილი და საქართველოს პარლამენტის თავმჯდომარე შალვა პაპუაშვილი.
სრულიად საქართველოს 141-ე კათოლიკოს-პატრიარქი ილია მეორე 17 მარტს 93 წლის ასაკში გარდაიცვალა.
ილია მეორე 22 მარტს სიონის ტაძარში დაკრძალეს.