ჩემი აზრით, კანდიდატის სტატუსთან დაკავშირებით პოზიტიურ მოლოდინებზე უფრო თამამად შეგვიძლია ვისაუბროთ. იქიდან გამომდინარე, რას სიტუაციაც დღეს არის, მე აღარ მგონია, რომ საქართველო კვლავ დაიჩაგროს და უსამართლო გადაწყვეტილების ობიექტი გახდეს, – ამის შესახებ ჟურნალისტებს პარტია „ქართული ოცნების“ აღმასრულებელმა მდივანმა, ფრაქცია „ქართული ოცნების“ თავმჯდომარემ მამუკა მდინარაძემ განუცხადა.
„ჩვენ აბსოლუტურად ყველაფერს ვაკეთებთ რეალურად იმისთვის, რომ საქართველომ სტატუსი მიიღოს, რომ რეკომენდაციები შესრულდეს. ზედმიწევნით მივყვებით თითოეულ პუნქტს. ჩვენი პატივცემული ოპოზიცია რომ ამაში ხელს არ გვიშლიდეს, კარგი იქნებოდა. მაგალითად, აგერ უკვე მე-7 დღეა, პრეზიდენტსაც კი ვერ დავაცდენინეთ კითხვაზე პასუხი, საქართველო დღევანდელი მოცემულობით იმსახურებს თუ არა კანდიდატის სტატუსს. და ის კი არა, რომ საქართველო იმსახურებს კანდიდატის სტატუსს, ჩვენი ოპონენტები მუშაობენ იმაზე, რომ რამენაირად სტატუსი არ მიიღოს ჩვენმა ქვეყანამ და ამ ბოლო დღეებში ცოტა ხასიათზეც ვერ არიან, რადგან კანდიდატის სტატუსის მიღების შანსები გაზრდილია“, – განმარტა მამუკა მდინარაძემ.