ლევან კობიაშვილი მეგობარს გიორგი ნემსაძეს ემშვიდობება-“ყოველთვის გამორჩეული იყავი, როგორც თანაგუნდელი, როგორც კაპიტანი და როგორც ადამიანი”

პარლამენტის ვიცე-სპიკერი, პარტია „ხალხის ძალის“ თავმჯდომარე სოზარ სუბარი აცხადებს, რომ რადიკალურმა ოპოზიციამ არაერთხელ უღალატა საკუთარ ამომრჩეველს, უარი თქვა დემოკრატიულ პროცესში მონაწილეობაზე და კონსტიტუციურ წესრიგს დაუპირისპირდა.მისი შეფასებით, ევროპული ქვეყნების მაგალითები ადასტურებს, რომ დემოკრატიული სახელმწიფოს პრინციპების წინააღმდეგ მოქმედი პოლიტიკური ძალების აკრძალვა დემოკრატიული პროცესის ნაწილია.დეპუტატის განცხადებით, ოპოზიციურმა პარტიებმა 2024 წლის საპარლამენტო არჩევნების შემდეგ უარი თქვეს მანდატებზე, რითაც საკუთარ ამომრჩეველს უღალატეს, ახლა კი საკონსტიტუციო სასამართლოში მიმდინარე პროცესში მონაწილეობით იმ სტრუქტურების ლეგიტიმაციას აღიარებენ, რომლებსაც მანამდე არალეგიტიმურად აცხადებდნენ.„ის, რაც დემოკრატიული პროცესია გერმანიაში, ჩეხეთში, პოლონეთში, მოლდოვაში, ესპანეთში, საბერძნეთსა თუ სხვა ევროპულ ქვეყნებში, ბუნებრივია, დემოკრატიული პროცესი იქნება საქართველოშიც. აღარაფერს ვამბობ მოლდოვაზე, სადაც ბოლო წლებში 4 პარტია აკრძალეს და ეს მთელმა ევროპულმა პოლიტიკურმა ელიტამ მოიწონა, ან კიდევ უკრაინაზე, სადაც 18 პარტია აიკრძალა, თითქოს ომის საბაბით.მაგრამ ომი არაფერ შუაშია დემოკრატიული საზოგადოების ფუნქციონირებასთან. დემოკრატია ომის დროსაც დემოკრატიაა და მშვიდობის დროსაც. პარტია თუ არის დემოკრატიული, ის ომის დროსაც უნდა ფუნქციონირებდეს და მშვიდობის დროსაც, ხოლო თუ პარტია თავისი ქმედებებით, მიზნებით, მოწოდებებით, მოქმედების ფორმებითა და შინაარსით ეწინააღმდეგება დემოკრატიული სახელმწიფოს პრინციპებს და საფრთხეს უქმნის სახელმწიფოს ნორმალურ და მშვიდობიან ფუნქციონირებას, ასეთი პოლიტიკური ძალის ადგილი არ არის დემოკრატიულ საზოგადოებაში არც ომის და არც მშვიდობიანობის დროს. საქართველოს კონსტიტუცია პირდაპირ განსაზღვრავს, რომ ასეთი პოლიტიკური ძალა უნდა აიკრძალოს.როდესაც პოლიტიკური პარტიები და პოლიტიკური ლიდერები პირდაპირი ტექსტით მოუწოდებენ საზოგადოებას, რომ ხელისუფლება უნდა დაამხონ (მაგალითად, შარშანდელი 4 ოქტომბრის მოვლენები საქართველოში) და შესაბამის მობილიზებასაც ეწევიან, ბუნებრივია, ეს არ არის დემოკრატიული პროცესი. რადიკალებმა მოიფიქრეს ტერმინი „მშვიდობიანი დამხობა“ – თითქოს სიტყვა „მშვიდობიანის“ გამოყენებით სცადეს თავიანთი დანაშაულებრივი გეგმებისა და განზრახვების შეფუთვა, მაგრამ როდესაც პრეზიდენტის სასახლეში სცადეს შეჭრა, ამით მათი გეგმები ყველასთვის გამოაშკარავდა. ყველასთვის ცხადი გახდა, რომ მათ არ უნდათ დემოკრატიული პროცესი. დემოკრატიულ სახელმწიფოში კი, თუ არ გინდა დემოკრატიული არჩევნები და კონსტიტუციური ჩარჩოებიდან გადიხარ, ე.ი. შენი ადგილი, როგორც პოლიტიკური ძალის, იმ დემოკრატიულ საზოგადოებაში არ არის.პოლიტიკური პარტიებისა და ენჯეოების სახელით მოქმედი უცხოური აგენტურა 2016 წლიდან მოყოლებული, საბოტაჟითა და დემოკრატიული პროცესის უგულებელყოფით ცდილობდა ნებისმიერი არჩევნების დელეგიტიმაციას. ასე იყო 2016 წლის არჩევნების შემდეგ. იგივე გაგრძელდა 2018 წლის საპრეზიდენტო არჩევნების, 2020 და 2024 წლების საპარლამენტო და 2021 და 2025 წლების თვითმმართველობის არჩევნების პერიოდში.2024 წლის არჩევნების შემდეგაც მათ მორიგ ჯერზე უღალატეს საკუთარ ამომრჩეველს და უარი თქვეს საპარლამენტო მანდატებზე. არადა, რადიკალებს, ჯამში, საპარლამენტო მანდატების 2/5-ზე მეტი ჰქონდათ, რაც ძალიან მაღალი წარმომადგენლობაა. მათ შეეძლოთ, უმაღლეს საკანონმდებლო ორგანოში, კონსტიტუციური პროცესის ფარგლებში, ებრძოლათ საკუთარი პოლიტიკური ხედვების განხორციელებისთვის.დღეს იგივე პარტიები საკონსტიტუციო სასამართლოში არიან და დაობენ იმ დოკუმენტის წინააღმდეგ, რომელიც მათ მიერ არალეგიტიმურად გამოცხადებული პარლამენტის მიერ შექმნილმა, ასევე არალეგიტიმურად გამოცხადებულმა კომისიამ მიიღო. დაობენ საკონსტიტუციო სასამართლოს იმ მოსამართლეების წინაშე, რომელთაგან ორი სულ რაღაც რამდენიმე დღის წინ დანიშნა მათ მიერვე არალეგიტიმურად გამოცხადებულმა პრეზიდენტმა. იმას კი ვერ აცნობიერებენ, რომ ამით ისინი, ნებსით თუ უნებლიეთ, აღიარებენ ამ სტრუქტურების ლეგიტიმაციას.მაშინ ჩნდება ლოგიკური კითხვა: თუ ყველა ეს სტრუქტურა და საკონსტიტუციო სასამართლოში მიმდინარე პროცესიც ლეგიტიმურია, თვითონ პერმანენტულად რატომ გადიან ხოლმე კონსტიტუციისა და კანონის ჩარჩოებიდან? ეს ფაქტი და ეს პროცესი კიდევ ერთხელ აჩვენებს, რომ ამ რადიკალური დაჯგუფებების მიზანი კონსტიტუციური ჩარჩოებიდან გასვლაა. ვფიქრობ, ამას საკონსტიტუციო სასამართლოს მოსამართლეებიც კარგად დაინახავენ.როდესაც მათ უარი თქვეს პარლამენტში შესვლაზე და დახიეს მანდატები, ამითაც უარი თქვეს დემოკრატიულ პროცესში მონაწილეობაზე. მათ, პირველ რიგში, სწორედ საკუთარ ამომრჩეველს, იმ 800 000 კაცს უღალატეს, რომელთა სახელითაც და რომელთა ინტერესებზეც ახლა დაიწყეს აპელირება.დღეს სასამართლო პროცესზე, თუ არ ვცდები, ნიკა გვარამია ჩვენ, პარლამენტში მყოფ პარტიებს, გვსაყვედურობდა, რომ მათი კატეგორიული მოთხოვნის მიუხედავად, შეგვეძლო, არ შეგვეწყვიტა მათთვის მანდატები, რადგან ეს ჩვენი „ექსკლუზიური“ უფლება იყო და თავად უნდა გადაგვეწყვიტა, შევუწყვეტდით თუ არა მათ მანდატებს. მისი თქმით, არ უნდა გაგვეთვალისწინებინა მათი მოთხოვნა. თითქოს ნანობს, რომ უარი თქვეს პარლამენტში შესვლაზე, თითქოს შეცდომად მიაჩნია ეს ნაბიჯი. თუ ასეა, აღიარონ, რომ შეცდნენ, ბოდიში მოუხადონ საკუთარ ამომრჩეველს, იმ 800 000 კაცს, რომელთა სახელითაც ახლა მანიპულირებენ.არადა, 2020 წლის მოწვევის პარლამენტში, როდესაც მაშინაც უარი თქვეს პარლამენტში შესვლაზე და ჩვენ უარი ვთქვით მათი მანდატების შეწყვეტაზე, საკონსტიტუციო სასამართლოშიც კი ჩიოდნენ: ძალით გვამუშავებენ, არ გვიწყვეტენ მანდატებსო, და თავს ტრეფიკინგის მსხვერპლებად აცხადებდნენ.როდესაც ერთხელ უღალატებ შენს ამომრჩეველს, უღალატებ მეორედ, მესამედაც. როდესაც არ ცნობ და უპირისპირდები კონსტიტუციურ წესრიგს, ამით საკუთარ თავს კონსტიტუციური წესრიგის მიღმა აყენებ და დარწმუნებული ვარ, სასამართლოს გადაწყვეტილებაც შესაბამისი იქნება,”- განაცხადა სოზარ სუბარმა.

საქართველოს ტექნიკურ უნივერსიტეტში ბიზნესტექნოლოგიების ფაკულტეტის, ღია დიპლომატიის ასოციაციისა და სამეცნიერო ჟურნალის – „ხელისუფლება და საზოგადოება – ისტორია, თეორია, პრაქტიკა“ ორგანიზებით, ყოველწლიური, რიგით XX საერთაშორისო სამეცნიერო კონფერენცია – „ხელისუფლება და საზოგადოება – 2026“ გაიხსნა, რომელშიც მონაწილეობდნენ სტუ-ის სამეცნიერო-აკადემიური წრეები, ბიზნესტექნოლოგიების ფაკულტეტის პროფესორ-მასწავლებლები, სტუდენტები, ასევე, ზაარლანდის ტექნიკისა და ეკონომიკის უნივერსიტეტის სტუდენტებისა და პროფესორებისგან შემდგარი დელეგაცია.ინფორმაციას საქართველოს ტექნიკური უნივერსიტეტი ავრცელებს.მისივე ცნობით, საერთაშორისო კონფერენცია საქართველოს ტექნიკური უნივერსიტეტის ვიცე-რექტორმა გახსნა. პროფესორმა თამარ წერეთელმა საქართველოს ტექნიკური უნივერსიტეტისა და მისი რექტორის, აკადემიკოს დავით გურგენიძის სახელით, მადლობა გადაუხადა ზაარლანდის ტექნიკისა და ეკონომიკის უნივერსიტეტის დელეგაციასა და მის ხელმძღვანელს, პროფესორ ვილჰელმ ჰაუზერს. ვიცე-რექტორი კონფერენციის მონაწილეებსა და ორგანიზატორებს მიესალმა, წარმატებული და ნაყოფიერი მუშაობა უსურვა და ხაზი გაუსვა საქართველოს ტექნიკურ უნივერსიტეტსა და ზაარლანდის ტექნიკისა და ეკონომიკის უნივერსიტეტს შორის არსებულ მრავალწლიან პარტნიორობას.თავის გამოსვლაში სტუ-ის ვიცე-რექტორმა, პროფესორმა თამარ წერეთელმა ყურადღება გაამახვილა კონფერენციის - „ხელისუფლება და საზოგადოება“ - მნიშვნელობაზე. მან აღნიშნა, რომ ინტელექტუალური კაპიტალი არის უნივერსიტეტის მთავარი ფასეულობა და მსგავსი მაღალი რანგის საერთაშორისო პლატფორმები საუკეთესო შესაძლებლობაა თანამედროვე გლობალური გამოწვევების სამეცნიერო ჭრილში გასაანალიზებლად. ვიცე-რექტორის განცხადებით, საქართველოს ტექნიკური უნივერსიტეტი მყარად ინარჩუნებს ლიდერის პოზიციებს ქვეყნის მასშტაბით საერთაშორისო სამეცნიერო გრანტებისა და კვლევითი პროექტების მოცულობით, მათ შორის, Horizon Europe-ის ფარგლებში, რაც ნათლად ადასტურებს, რომ უნივერსიტეტის სამეცნიერო-საინჟინრო და ტექნოლოგიური პოტენციალი სრულად პასუხობს საერთაშორისო კვლევით სტანდარტებს. მან იმედი გამოთქვა, რომ კონფერენციის მუშაობა, რომელიც რამდენიმე მიმართულებით მიმდინარეობს, საჯარო მმართველობის, ბიზნესტექნოლოგიებისა და საერთაშორისო ურთიერთობების სფეროში ახალ თეორიულ და პრაქტიკულ ხედვებს ჩამოაყალიბებს და საფუძველს ჩაუყრის კიდევ ბევრ ერთობლივ აკადემიურ პროექტს.„საერთაშორისო კონფერენციის ჩატარების მრავალწლიანი უწყვეტი დინამიკა ადასტურებს მის აქტუალობასა და წონას თანამედროვე სამეცნიერო სფეროში. გლობალიზაციისა და ბიზნესტექნოლოგიების სწრაფი განვითარების ფონზე, საჯარო მმართველობისა და სოციალურ-ეკონომიკური გამოწვევების კომპლექსური ანალიზი მოითხოვს მრავალმხრივ ინტერდისციპლინურ მიდგომებს. ამ თვალსაზრისით, უმნიშვნელოვანესია გერმანელი კოლეგების ჩართულობა. ზაარლანდის ტექნიკისა და ეკონომიკის უნივერსიტეტის დელეგაციის მონაწილეობა ფორუმს არა მხოლოდ მაღალ ევროპულ აკადემიურ სტანდარტს სძენს, არამედ ქმნის ეფექტურ მექანიზმს ქართულ და გერმანულ საუნივერსიტეტო წრეებს შორის ცოდნისა და კვლევითი მეთოდოლოგიების პირდაპირი გაზიარებისთვის, რაც საფუძვლად უდევს ერთობლივი საგანმანათლებლო სივრცის გაძლიერებას”, - განაცხადა ვიცე-რექტორმა.ღონისძიებაზე შეკრებილ საზოგადოებას სიტყვით მიმართა ბიზნესტექნოლოგიების ფაკულტეტის დეკანმა. პროფესორმა რუსუდან ქუთათელაძემ დეტალურად ისაუბრა იმ აკადემიურ სიკეთეებზე, რასაც აღნიშნული საერთაშორისო პლატფორმა ფაკულტეტის განვითარებისა და ინტერნაციონალიზაციისთვის უზრუნველყოფს.„ბიზნესტექნოლოგიების ფაკულტეტისთვის ეს კონფერენცია უმნიშვნელოვანესი მოვლენაა, რადგან იგი პირდაპირ პასუხობს ჩვენს სტრატეგიულ მიზანს ინტეგრირებულ ვიყოთ საერთაშორისო საგანმანათლებლო და სამეცნიერო სივრცეში. განსაკუთრებით აღსანიშნავია ზაარლანდის ტექნიკისა და ეკონომიკის უნივერსიტეტის დელეგაციის ჩართულობა, რაც ჩვენს სტუდენტებსა და ახალგაზრდა მკვლევრებს აძლევს უნიკალურ შესაძლებლობას, ჩაერთონ ინტერდისციპლინურ დისკუსიებში და გაეცნონ გერმანულ გამოცდილებას ბიზნესის, მენეჯმენტისა და თანამედროვე ტექნოლოგიების სინერგიის მიმართულებით. კონფერენციის ფარგლებში წარმოდგენილი სამეცნიერო ნაშრომები და სექციური მუშაობა მნიშვნელოვნად შეუწყობს ხელს ინოვაციური ხედვების ჩამოყალიბებას და საფუძველს ჩაუყრის ახალ, ერთობლივ ქართულ-გერმანულ კვლევით პროექტებს“, - განაცხადა დეკანმა.სტუ-ის ინფორმაციით, XX საერთაშორისო სამეცნიერო კონფერენციის - „ხელისუფლება და საზოგადოება - 2026“, მუშაობა სამ სექციად გაგრძელდა: საჯარო მმართველობის და საჯარო პოლიტიკის თეორია, პრაქტიკა და მეთოდოლოგია; პოლიტიკა და კულტურა; საჯარო მმართველობის ეკონომიკური საკითხები და სამართლებრივი ბაზა.სამეცნიერო ღონისძიების დასასრულს, მონაწილეებს გადაეცემათ სერტიფიკატები, გამოიცემა საკონფერენციო ნაშრომების კრებული, მინიჭებული საერთაშორისო ინდექსით.

ჯუმბერ კირვალიძე სოციალურ ქსელში პოსტს აქვეყნებს, რომელსაც უცვლელად გთავაზობთ.”❤გული არ გაიტეხო, ხვიჩა, გამაგრდი, ჩვენო იმედო, იცოდე, უფრო ძლიერი დაგვიბრუნდები❗❗❗ 🔴წინა ჯვარედინი იოგის (ACL) გაწყვეტა უმძიმესი ტრავმაა, თუმცა არაერთი მაგალითი არსებობს, რომ ამ ტრავმის შემდეგ შესაძლებელია არა მხოლოდ დაბრუნება, არამედ მსოფლიო ფეხბურთის მწვერვალზე დარჩენაც❗ აი, ტოპფეხბურთელები, რომლებმაც „ჯვარედინი იოგების“ გაწყვეტის შემდეგ ფორმა სრულად აღიდგინეს და თამაში უმაღლეს დონეზე გააგრძელეს:🔻რონალდო (ფენომენო) — რკინის ნებისყოფის მაგალითი. ბრაზილიელმა „ინტერში“ თამაშისას ზედიზედ ორჯერ გადაიტანა მუხლის იოგების საშინელი გაწყვეტა (1999 და 2000 წლებში) და ჯამში თითქმის სამი წელი გამოტოვა. ამის შემდეგ იგი ტრიუმფით დაბრუნდა, გახდა 2002 წლის მსოფლიო ჩემპიონატის საუკეთესო ბომბარდირი და გამარჯვებული, ასევე მოიგო თავისი მეორე „ოქროს ბურთი“.🔻ვირჯილ ვან დეიკი — 2020 წლის ოქტომბერში „ლივერპულის“ დაცვის ლიდერმა „ევერტონის“ მეკარესთან უხეში შეჯახების შემდეგ ACL გაიწყვიტა. 9-თვიანი უქმობის შემდეგ, ჰოლანდიელი მოედანს დაუბრუნდა, კვლავ მსოფლიოს ერთ-ერთ საუკეთესო ცენტრალურ მცველად იქცა, კლუბთან ერთად ახალი ტიტულები მოიგო და FIFA-ს სიმბოლურ ნაკრებში მოხვდა.🔻რობერტო ბაჯო — ლეგენდარულმა იტალიელმა მარჯვენა მუხლის ჯვარედინი იოგები კარიერის დასაწყისშივე, 18 წლის ასაკში გაიწყვიტა (მას 200-ზე მეტი ნაკერი დაადეს). ექიმები ამბობდნენ, რომ ის სიარულსაც ვერ შეძლებდა, თუმცა ბაჯომ ბრწყინვალე კარიერა ჩაატარა, 1993 წელს „ოქროს ბურთი“ მოიპოვა და მსოფლიო ფეხბურთის ლეგენდა გახდა.🔻ზლატან იბრაჰიმოვიჩი — შვედმა ფორვარდმა „ჯვარედინები“ 2017 წელს, „მანჩესტერ იუნაიტედის“ მატჩში, 35 წლის ასაკში გაიწყვიტა, როდესაც ბევრი მას კარიერის დასრულებას უწინასწარმეტყველებდა. ზლატანმა სარეკორდო 7 თვეში აღიდგინა ძალები, აშშ-ში გაემგზავრა, შემდეგ კი ევროპაში დაბრუნდა და 40 წლის ასაკში „მილანს“ იტალიის ნანატრი ჩემპიონობის მოპოვებაში დაეხმარა.🔻ალესანდრო დელ პიერო — 1998 წელს, ფორმის პიკში მყოფმა „იუვენტუსის“ სიმბოლომ ACL-ის მძიმე გაწყვეტა მიიღო. აღდგენას თითქმის ერთი წელი დასჭირდა და დაბრუნების შემდეგ მან კლუბის ყველა რეკორდი მოხსნა და 2006 წელს მსოფლიო ჩემპიონი გახდა.🔻ტიბო კურტუა — მადრიდის „რეალის“ მეკარემ იოგები 2023/24 წლების სეზონის დაწყების წინ გაიწყვიტა. ბელგიელი მოედანს 2024 წლის მაისში დაუბრუნდა და მაშინვე უგოლოდ ჩაატარა ჩემპიონთა ლიგის ფინალი „ბორუსიას“ წინააღმდეგ, რითაც თავისი ელიტური სტატუსი დაამტკიცა.🔻როი კინი — „მანჩესტერ იუნაიტედის“ კაპიტანმა „ჯვარედინები“ 1997 წლის სექტემბერში, „ლიდსის“ წინააღმდეგ მატჩში გაიწყვიტა და სეზონის დარჩენილი ნაწილი სრულად გამოტოვა. დაბრუნების შემდეგ მან კარიერაში საუკეთესო სეზენი (1998/99) ჩაატარა და „მანჩესტერ იუნაიტედს“ ისტორიული ტრებლი (ჩემპიონთა ლიგა, პრემიერ ლიგა და ასოციაციის თასი) მოუტანა.🔻ჩავი ერნანდესი — 2005 წლის დეკემბერში „ბარსელონას“ საკვანძო ნახევარმცველმა ACL გაიწყვიტა. თავდაუზოგავი შრომის წყალობით მან სულ რაღაც 5 თვეში აღიდგინა ფორმა, მოასწრო 2006 წლის მსოფლიო ჩემპიონატზე გამგზავრება და ჩემპიონიც გახდა, მომდევნო წლებში კი პეპ გვარდიოლას დიდებული „ბარსელონასა“ და ესპანეთის ნაკრების გამარჯვებების მთავარი არქიტექტორი იყო.🔻როდრი — “ოქროს ბურთის” მფლობელი, „მანჩესტერ სიტისა“ და ესპანეთის ნაკრების საყრდენი ნახევარმცველი, რომელმაც ჯვარედინი იოგი 2024 წლის სექტემბერში, „არსენალთან“ მატჩში გაიწყვიტა, 1 წლის შემდეგ დაბრუნდა და 2026 წელს მსოფლიო ჩემპიონი და ჩემპიონატის საუკეთესო ფეხბურთელი გახდა.🔻ნეიმარი — ბრაზილიელმა ფორვარდმა ბრაზილიის ნაკრებში თამაშისას, 2023 წლის ოქტომბერში, ACL-ისა და მენისკის გაწყვეტა მიიღო, რის გამოც 1 წელი გამოტოვა და მაინც დაბრუნდა.🔻გავი — „ბარსელონასა“ და ესპანეთის ნაკრების ახალგაზრდა ნახევარმცველმა „ჯვარედინები“ 2023 წლის ნოემბერში, საქართველისთან მატჩში გაიწყვიტა და 2024 წლის შემოდგომაზე დაბრუნდა.🔴თანამედროვე სპორტული მედიცინა და ქირურგია ფეხბურთელებს საშუალებას აძლევს, დაბრუნდნენ სიჩქარისა და სიმკვეთრის დაკარგვის გარეშე, რაც ხვიჩა კვარაცხელიას აძლევს შესანიშნავ შანსს, სრულად აღდგეს და ძველ დონეს დაუბრუნდეს. ამ ტოპფეხბურთელების მაგალითები აჩვენებს, რომ სწორი რეაბილიტაციის პირობებში ხვიჩას აქვს ყველა შანსი, დაიბრუნოს თავისი ძველი სიჩქარე, დრიბლინგი და კვლავაც იბრწყინოს ტოპ-დონეზე❗❗❗”

არჩევნების გაყალბების, საგარეო კურსის ცვლილებისა და სექსუალური უმცირესობის ჩაგვრის შესახებ უტიფარად შეთხზული ბრალდებების საფუძველზე, ანალოგიური ვითარების შექმნას ცდილობენ პოლიტიკურ პარტიებად წოდებული ჯგუფები საქართველოში, ეს ფაქტია, – ამის შესახებ საპარლამენტო უმრავლესობის წევრი გია ვოლსკი სოციალურ ქსელში წერს.მისივე თქმით, ამ ჯგუფების მცდელობებს, სახელმწიფო მართვის სისტემის საბოტაჟს, აგრესიული აქციებისა და რევოლუციების თანხლებით, აქვს ორგანიზებული და სისტემური ხასიათი.„მთელი ევროპა შეძრულია სისხლისმღვრელი, დაუნდობელი ომით, მისი მასშტაბის გაფართოების რეალური საშიშროებით, ისევე როგორც უკიდურესად სახიფათო პროცესებით, რომლებიც წამყვან ქვეყნებში მიმდინარეობს. შემზარავია საერთო სურათი, რასაც ყოველდღიურად ვადევნებთ თვალყურს ტელეეკრენებით თუ სხვა მედიასაშუალებებით.ასეთ ვითარებაში, არჩევნების გაყალბების, საგარეო კურსის ცვლილებისა და სექსუალური უმცირესობის ჩაგვრის შესახებ უტიფარად შეთხზული ბრალდებების საფუძველზე, ანალოგიური ვითარების შექმნას ცდილობენ პოლიტიკურ პარტიებად წოდებული ჯგუფები საქართველოში, ეს ფაქტია! ვხედავთ და არც მალავენ. მათ ამ მცდელობებს, სახელმწიფო მართვის სისტემის საბოტაჟს, აგრესიული აქციებისა და რევოლუციების თანხლებით, აქვს ორგანიზებული და სისტემური ხასიათი!ასეთივე ხასიათისაა შიდა და გარე აქტორების მხრივ კარგად კოორდინირებული პროპაგანდა საქართველოში „დემოკრატიისაგან უკუსვლის“ შესახებ, როდესაც თავად შექმნეს დამნაშავეები და მათ ქმედებაზე კანონიერი რეაგირება ევროპული სტანდარტებისაგან გადაცდომად შეაფასეს; ითხოვენ სანქციების დაწესებას, რაც ქვეყნის საზოგადოებას დააზარალებს და, მათი აზრით, რევოლუციურ მუხტს გაზრდის. საქართველოს წინააღმდეგ მომართულ ამ შეთქმულებაში მეთაურებად მონაწილეობენ 2012 წლამდე სახელმწიფოს მმართველობის სადავეების მქონე პირები, რომლებმაც უკიდურესი სისასტიკით მართეს ქვეყანა, ფიზიკურად გაანადგურეს, აწამეს და უფლებები აჰყარეს საქართველოს ათასობით მოქალაქეს, წინაპირობები შეუქმნეს ქვეყნის დიდი ნაწილის ოკუპაციას და დღესაც ცდილობენ, გლობალური დაპირისპირების სამსხვერპლოზე მიიტანონ საქართველო საზარბაზნე ხორცად, ეკონომიკურად მოშლილი და უფლებააყრილი. ესაა კონკრეტული ფაქტებით დადასტურებული რეალობა, რის გამოც მივმართეთ საკონსტიტუციო სასამართლოს.რასაკვირველია, მოსალოდნელი იყო თავდასხმებიც, საკვირველი ისაა, რომ შეტევის ავანგარდში ევროსტრუქტურების და ზოგიერთი ქვეყნის პოლიტიკური ლიდერები დგანან, რომლებიც სულ ახლახან ფინანსურად და პოლიტიკური მხარდაჭერით ახალისებდნენ „მოლოტოვის კოქტეილების“ და პიროტექნიკის სროლას საქართველოში, თანაც ახლა მაინც ხომ ნათლად ხედავენ ადრე უხილავ ძაფებს მართულ ქაოსსა და ევროპისათვის მწვავე პრობლემების გაჩენას შორის. გველაპარაკეთ კონკრეტული არგუმენტებით, თუ რომელი ჩვენი ბრალდებაა უსაფუძვლო, რატომაა საქართველოსათვის სასარგებლო ეკონომიკურ ან, მით უმეტეს, სამხედრო დაპირისპირებაში შესვლა ან რომელი ევროპული სახელმწიფო დაუშვებს ქვეყნის დესტაბილიზაციისათვის მომართული ორგანიზებული სტრუქტურის საქმიანობასთან შეგუებას“, – წერს ვოლსკი.ცნობისთვის, ეუთო-ს საპარლამენტო ასამბლეის ვიცე-პრეზიდენტმა, გუდრუნ კუგლერმა საქართველოს ხელისუფლებას მოუწოდა, უკან გაიწვიოს სარჩელი ხუთი ოპოზიციური პარტიის აკრძალვის შესახებ და დემოკრატიის გზას დაუბრუნდეს.

საქართველოს ტექნიკური უნივერსიტეტის ენერგეტიკის ფაკულტეტზე საგანმანათლებლო პროექტი - „ენერგეტიკის ღია სივრცე“ განახლდა. პროექტი, რომლის პირველი ეტაპი გასული წლის მეორე სასწავლო სემესტრის განმავლობაში განხორციელდა და ენერგეტიკის აქტუალურ საკითხებზე საჯარო ლექციების ციკლს მოიცავდა, მიზნად ისახავს სტუდენტებისთვის დარგის პრაქტიკული გამოცდილების გაზიარებას, პროფესიული ცოდნის გაღრმავებასა და ენერგეტიკის სფეროში მიმდინარე პროცესების შესახებ ცნობიერების ამაღლებას.ინფორმაციას საქართველოს ტექნიკური უნივერსიტეტი ავრცელებს.უნივერსიტეტის ცნობით, განახლებული პროექტის ფარგლებში პირველი საჯარო ლექცია საქართველოს სახელმწიფო ელექტროსისტემის დირექტორმა ოპერატიული რეჟიმისა და დისპეტჩერიზაციის საკითხებში, გიორგი ამუზაშვილმა, გამართა. ლექციის თემა იყო „ოპერატიული მართვა და სისტემური ავარიები“, რომლის ფარგლებშიც განხილული იქნა ელექტროენერგეტიკული სისტემის საიმედო და სტაბილური ფუნქციონირების უზრუნველყოფასთან დაკავშირებული საკითხები.სტუ-ის ენერგეტიკის ფაკულტეტის დეკანის თქმით, საჯარო ლექცია სტუდენტებს შესაძლებლობას აძლევს, უფრო ღრმად გაეცნონ ელექტროენერგეტიკული სისტემის ოპერატიული მართვის პრინციპებს, დისპეტჩერიზაციის მნიშვნელობასა და იმ პროცესებს, რომლებიც ენერგოსისტემის მდგრადი მუშაობის შენარჩუნებას ემსახურება. როგორც პროფესორი ქეთი ქუთათელაძე აცხადებს, ელექტროენერგეტიკული სისტემის მართვა მოითხოვს სხვადასხვა კომპონენტის კოორდინირებულ მუშაობას, რეჟიმული პარამეტრების მუდმივ კონტროლსა და შესაძლო დარღვევებზე დროულ რეაგირებას. ამ პროცესში განსაკუთრებული მნიშვნელობა ენიჭება ოპერატიული მართვის ეფექტიანობას, სისტემური რისკების შეფასებასა და ავარიული სიტუაციების პრევენციას.„სისტემური ავარიების საკითხი თანამედროვე ენერგეტიკის ერთ-ერთი მნიშვნელოვანი მიმართულებაა. ელექტროენერგეტიკული სისტემის მასშტაბისა და ურთიერთდაკავშირებული ინფრასტრუქტურის გათვალისწინებით, ცალკეულ ელემენტებში წარმოქმნილმა დარღვევებმა შესაძლოა გავლენა იქონიოს სისტემის სხვა კომპონენტების მუშაობაზეც. შესაბამისად, ენერგეტიკული უსაფრთხოებისა და უწყვეტი ელექტრომომარაგების უზრუნველსაყოფად აუცილებელია ოპერატიული მართვის გამართული მექანიზმები, პროცესების ზუსტი მონიტორინგი და ტექნიკურად დასაბუთებული გადაწყვეტილებების დროულად მიღება. აღნიშნული საკითხების პრაქტიკული ჭრილით განხილვა სტუდენტებს საშუალებას აძლევს, უკეთ გაიაზრონ ენერგოსისტემის მართვის სირთულეები და ამ მიმართულებით სპეციალისტების პასუხისმგებლობა.პროექტის „ენერგეტიკის ღია სივრცე“ ერთ-ერთი მნიშვნელოვანი დანიშნულებაა აკადემიური განათლებისა და დარგობრივი პრაქტიკის დაახლოება. მოწვეული სპეციალისტების მონაწილეობით ორგანიზებული საჯარო ლექციები სტუდენტებს საშუალებას აძლევს, უშუალოდ პროფესიონალებისგან მიიღონ ინფორმაცია ენერგეტიკის სფეროში არსებული გამოწვევების, ტექნოლოგიური პროცესებისა და პრაქტიკაში გამოყენებული მართვის მიდგომების შესახებ. მსგავსი შეხვედრები ხელს უწყობს სასწავლო პროცესის გამრავალფეროვნებას, სტუდენტთა პროფესიული ინტერესების გაღრმავებასა და თეორიული ცოდნის პრაქტიკულ გამოცდილებასთან დაკავშირებას.ენერგეტიკა თანამედროვე ეკონომიკისა და ქვეყნის სტრატეგიული განვითარების ერთ-ერთი მნიშვნელოვანი საფუძველია. ენერგოსისტემის საიმედოობა, ელექტროენერგიის უწყვეტი მიწოდება და ინფრასტრუქტურის უსაფრთხო ფუნქციონირება მნიშვნელოვანწილად არის დამოკიდებული კვალიფიციურ სპეციალისტებზე, თანამედროვე ტექნოლოგიების გამოყენებასა და ეფექტიან მართვაზე. შესაბამისად, დარგის მომავალი პროფესიონალებისთვის პრაქტიკული გამოცდილების გაზიარება და რეალური სამუშაო პროცესების გაცნობა განსაკუთრებულ მნიშვნელობას იძენს“, - აცხადებს ქეთევან ქუთათელაძე.უნივერსიტეტის ცნობით, საქართველოს ტექნიკური უნივერსიტეტის ენერგეტიკის ფაკულტეტზე პროექტის განახლება სტუდენტებისთვის დამატებითი საგანმანათლებლო შესაძლებლობების შექმნას ემსახურება. ენერგეტიკის აქტუალურ საკითხებზე საჯარო ლექციების ციკლი ხელს უწყობს დარგობრივი ცოდნის გაღრმავებას, პროფესიული კომპეტენციების განვითარებასა და უნივერსიტეტსა და ენერგეტიკის სექტორში მოქმედ ორგანიზაციებს შორის თანამშრომლობის გაძლიერებას. „ენერგეტიკის ღია სივრცე“ ქმნის შესაძლებლობას, სტუდენტებმა აკადემიური განათლების პარალელურად მიიღონ პრაქტიკაზე დაფუძნებული ცოდნა და უკეთ მოემზადონ იმ პროფესიული გამოწვევებისთვის, რომლებიც თანამედროვე ენერგეტიკის სფეროში მუშაობას უკავშირდება.