კახა კალაძე – როგორ შეიძლება, ბავშვი გამოიყვანო და ასროლინო პოლიციელის ან თუნდაც ნებისმიერი ადამიანის მისამართით საგნები, ყველანაირი ზღვარი გადალახეს

"ძალადობის ახალ ეტაპს, რასაც ჩვენ ველოდით თვითმარქვია რეჟიმის მხრიდან, ვუპირისპირებთ ერთიანობას", - ამის შესახებ "ერთიანობა - ნაციონალური მოძრაობის" ერთერთმა ლიდერმა გიორგი ვაშაძემ სასტუმრო "ქორთიარდ მარიოტში" ოთხი ოპოზიციური პარტიის ლიდერების კონსულტაციების დასრულების შემდეგ ჟურნალისტებს განუცხადა. გიორგი ვაშაძის თქმით, ახლა საჭიროა, რომ მთელი ქვეყნის მასშტაბით საყოველთაო დაუმორჩილებლობა/გაფიცვა მოხდეს და ხალხმა "ოცნება" ერთიანი ბრძოლით დაასრულოს. "ძალადობის ახალ ეტაპს, რასაც ჩვენ ველოდით თვითმარქვია რეჟიმის მხრიდან, ვუპირისპირებთ ერთიანობას. დავიცავთ ყველა ახალგაზრდას ყველა მექანიზმით. დარწმუნებული ვარ, საბოლოო გამარჯვებამდე მივალთ. რაც მთავარია, ჩვენ უნდა მივიდეთ იმ ნიშნულამდე, რომ არა მხოლოდ გავაგრძელოთ პროტესტი, არამედ საყოველთაო დაუმორჩილებლობა/გაფიცვა მოხდეს მთელს საქართველოში. ეს არის ჩვენი ამოცანა, რაც ყველამ კოორდინირებულად უნდა შევასრულოთ. სულ რომ ყველა დაგვიჭირონ, მზად უნდა ვიყოთ, ბრძოლა ბოლომდე მივიყვანოთ", - განაცხადა გიორგი ვაშაძემ.

სამართალდამცველებმა ოფისებიდან და დაკავებული პირების პირადი ჩხრეკის შედეგად ნივთმტკიცებად ამოიღეს: ჩაფხუტები, აირწინაღები, დიდი რაოდენობით პიროტექნიკა, ელექტროგადამცემი მოწყობილობები, კომპიუტერული ტექნიკა, ე. წ. მოლოტოვის კოქტეილები, საღებავები, სხვადასხვა სახის ხსნარები, რომლებზეც დანიშნულია შესაბამისი ექსპერტიზები, - ამის შესახებ ცენტრალური კრიმინალური პოლიციის დეპარტამენტის დირექტორმა თეიმურაზ კუპატაძემ შსს-ში გამართულ ბრიფინგზე განაცხადა. შსს ვიდეო მტკიცებულებებს აქვეყნებს:

ევროპის საბჭოს გენერალური მდივანი ალენ ბერსეტი ყურადღებით აკვირდება საქართველოში მიმდინარე მოვლენებს. ბოლო 24 საათის განმავლობაში ის ტელეფონით ესაუბრა პრეზიდენტ სალომე ზურაბიშვილს და პრემიერ-მინისტრ ირაკლი კობახიძეს, – ინფორმაციას ამის შესახებ საქართველოში ევროპის საბჭოს ოფისი ავრცელებს. როგორც გავრცელებულ ინფორმაციაშია ნათქვამი, დაძაბული მდგომარეობისა და მიმდინარე დაპირისპირებების ფონზე, გენერალურმა მდივანმა ევროპის საბჭოს სახელით შეშფოთება გამოთქვა პოლარიზაციის გაღრმავებისა და მოვლენების პოლიტიკურ ჩიხში შესვლის გამო. „მან ასევე ყველა შესაბამის მხარეს მოუწოდა, თავი შეიკავონ შემდგომი ესკალაციისგან. გენერალურმა მდივანმა აგრეთვე ხაზი გაუსვა დემონსტრაციების დროს სამართალდამცავების მხრიდან ძალის გადამეტების შემთხვევების გამოძიების აუცილებლობას. ვინაიდან საქართველო ევროპის საბჭოს წევრია, გენერალურმა მდივანმა კიდევ ერთხელ ხაზგასმით აღნიშნა ორგანიზაციის როლი, მოუსმინოს ყველა მხარეს და ქვეყნის ვალდებულებაა, პატივი სცენ ევროპის საბჭოს ღირებულებებსა და სტანდარტებს, მათ შორის, გამოხატვის თავისუფლებისა და მშვიდობიანი შეკრების უფლებას, რაც როგორც ქართველი ხალხის, ასევე მთლიანად ქვეყნისა და მისი სტაბილურობის ინტერესშია. გენერალურმა მდივანმა ხაზი გაუსვა თავის მზადყოფნას, გააგრძელოს საქართველოს მხარდაჭერა ევროპულ მისწრაფებებში და უზრუნველყოს ქვეყნის დემოკრატიული უსაფრთხოება. მან ასევე მზადყოფნა გამოხატა, არსებული კრიზისის დასაძლევად აწარმოოს კონსტრუქციული დიალოგი ყველა შესაბამის პარტნიორთან, მათ შორის, სამოქალაქო საზოგადოებასთან. ევროპის საბჭო მზად არის, გააგრძელოს საქართველოს მხარდაჭერა, მათ შორის, მიმდინარე სამოქმედო გეგმის ფარგლებში, რომელიც ქვეყანას ევროპული მისწრაფებების მიღწევის პროცესში დაეხმარება. ამ მიზნით გენერალური მდივანი უახლოეს მომავალში საქართველოში ვიზიტს გეგმავს“, – ნათქვამია გავრცელებულ ინფორმაციაში.

შსს-მ ჯგუფური ძალადობის ორგანიზებისა და ჯგუფურ ძალადობაში მონაწილეობის ფაქტებზე შვიდი პირი დააკავა, საგამოძიებო მოქმედებები მოძრაობა „ჯიუტების“, პარტია „დროასა“ და პარტია „გირჩის“ ოფისებში, ასევე, პარტია „ერთიანი ნაციონალური მოძრაობის“ ახალგაზრდულ ოფისში, – ამის შესახებ ცენტრალური კრიმინალური პოლიციის დეპარტამენტის დირექტორმა, თეიმურაზ კუპატაძემ განაცხადა. მისივე თქმით, ჯგუფური ძალადობის ორგანიზება და ხელმძღვანელობა, ჯგუფურ ძალადობაში მონაწილეობა ცხრა წლამდე ვადით თავისუფლების აღკვეთას ითვალისწინებს. „მაღალი საზოგადოებრივი ინტერესიდან გამომდინარე, გვსურს, საზოგადოებას მივაწოდოთ ინფორმაცია შინაგან საქმეთა სამინისტროში, ჯგუფური ძალადობის ორგანიზების ხელმძღვანელობის ან მასში მონაწილეობის და ძალადობრივი ქმედებისაკენ საჯაროდ მოწოდების ფაქტზე მიმდინარე გამოძიების შესახებ. 2024 წლის 28 ნოემბრიდან, რუსთაველის გამზირზე, პარლამენტის შენობის მიმდებარე ტერიტორიაზე მიმდინარე საპროტესტო აქცია გასცდა მანიფესტაციის და გამოხატვის კანონით დადგენილ ნორმებს და მიიღო ძალადობრივი ხასიათი, რაც ამ დრომდე ატარებს ორგანიზებულ და ინტენსიურ ხასიათს. პირდაპირი ეთერების საშუალებით საზოგადოება თვალს ადევნებს მოძალადე ჯგუფების აგრესიულ და დესტრუქციულ ქმედებებს, რაც გამოიხატება, როგორც ადამიანების ჯანმრთელობის სხვადასხვა სიმძიმის დაზიანებებში, ასევე, ინფრასტრუქტურის დაზიანებებში. ძალადობრივი ქმედებების შედეგად, ჯანმრთელობის დაზიანება მიიღო პოლიციის 150-ზე მეტმა თანამშრომელმა, არაერთმა მოქალაქემ და მედიის წარმომადგენელმა, დაზიანდა როგორც ფიზიკური, ასევე იურიდიული პირების ქონება, დაზიანებულია თბილისის მერიის ბალანსზე არსებული ინფრასტრუქტურა. მომხდარ ძალადობრივ ფაქტებთან დაკავშირებით გამოძიება საქართველოს სისხლის სამართლის კოდექსის 225-ე და 239-ე პრიმა მუხლებით მიმდინარეობს. მიმდინარე გამოძიების ფარგლებში, მოსამართლის განჩინების საფუძველზე, სამართალდამცავებმა 4 დეკემბრის დილიდან დაიწყეს საგამოძიებო მოქმედებების ჩატარება თბილისსა და საქართველოს სხვადასხვა რეგიონებში. პოლიციამ ოპერატიული ღონისძიებებისა და საგამოძიებო მოქმედებების შედეგად, ჯგუფური ძალადობის ორგანიზების და ხელმძღვანელობის, ჯგუფურ ძალადობაში მონაწილეობის ფაქტებზე 7 პირი დააკავა: 1990 წელს დაბადებული ი.ა., 1999 წელს დაბადებული თ.გ., 2005 წელს დაბადებული ი.მ., 2004 წელს დაბადებული გ.გ., 2005 წელს დაბადებული ზ.ც., ასევე წარსულში ნასამართლევები: 1971 წელს დაბადებული ვ.კ. და 1974 წელს დაბადებული ვ.კ. ჩადენილი დანაშაულები 9 წლამდე ვადით თავისუფლების აღკვეთას ითვალისწინებს. ასევე, გადაუდებელი აუცილებლობიდან გამომდინარე ჩატარდა 6 პირის პირადი და საცხოვრებელი სახლების ჩხრეკები. მოსამართლის განჩინების საფუძველზე მიმდინარეობს საგამოძიებო მოქმედებები მოძრაობა „ჯიუტების“, პარტია „დროასა“ და პარტია „გირჩის“ ოფისებში, ასევე, პარტია „ერთიანი ნაციონალური მოძრაობის“ ახალგაზრდულ ოფისში. სამართალდამცველებმა ოფისებიდან და დაკავებული პირების პირადი ჩხრეკის შედეგად ნივთმტკიცებად ამოიღეს: ჩაფხუტები, აირწინაღები, დიდი რაოდენობით პიროტექნიკა, ელექტროგადამცემი მოწყობილობები, კომპიუტერული ტექნიკა, ე. წ. მოლოტოვის კოქტეილები, საღებავები, სხვადასხვა სახის ხსნარები, რომლებზეც დანიშნულია შესაბამისი ექსპერტიზები. გვსურს საზოგადოებას ვაცნობოთ, რომ შინაგან საქმეთა სამინისტროში, მიმდინარე აქციების ფარგლებში, ძალადობრივი ჯგუფების მხრიდან ჩადენილ დანაშაულებრივ ქმედებაზე ასევე მიმდინარეობს გამოძიება საქართველოს სისხლის სამართლის კოდექსის 187-ე და 353-ე პრიმა მუხლებით, რომლის ფარგლებშიც ამ დროისთვის დაკავებულია 6 პირი. ჩადენილი დანაშაულები 7 წლამდე ვადით თავისუფლების აღკვეთას ითვალისწინებს. გამოძიება გრძელდება დანაშაულის ჩამდენი ყველა პირის დადგენისა და დაკავების მიზნით. ნებისმიერ კანონსაწინააღმდეგო ქმედებას, პოლიციის მხრიდან შესაბამისი სამართლებრივი რეაგირება მოჰყვება“, – განაცხადა თეიმურაზ კუპატაძემ.

„როიტერის“ ცნობით, ტრამპის გეგმის მიხედვით, უკრაინას სთავაზობენ, რუსეთის მიერ მიტაცებულ მიწებსა და ნატო-ზე უარი თქვას. როგორც სააგენტო წერს, ჟურნალისტებმა გააანალიზეს აშშ-ის არჩეული პრეზიდენტის, დონალდ ტრამპის მრჩევლების წინადადებები, რომლებიც უკრაინის სამშვიდობო გეგმას ეხება. პუბლიკაციაში ნათქვამია, რომ დონალდ ტრამპის მრჩევლები, საჯაროდ და კერძო საუბრებში, უკრაინაში ცეცხლის შეწყვეტის წინადადებებზე საუბრობენ, რომლებიც უახლოეს მომავალში უკრაინის მნიშვნელოვანი ნაწილის რუსეთისთვის გადაცემას გამოიწვევს. როგორც იუწყებიან, ტრამპის მრჩევლები ცდილობენ, აიძულონ მოსკოვი და კიევი, დაიწყონ მოლაპარაკებები და ამას ე.წ. მათრახისა და თაფლაკვერის ტაქტიკის გამოყენებით ცდილობენ. ეს მოიცავს უკრაინისთვის სამხედრო დახმარების შეჩერებას, თუ ისინი არ დათანხმდებიან მოლაპარაკებებს და ასევე კიევისთვის დახმარების გაზრდასაც, თუ პუტინი უარის იტყვის მაგიდასთან დაჯდომაზე. სააგენტოს ცნობით, ტრამპის მრჩევლების განცხადებები იძლევა წარმოდგენას არჩეული პრეზიდენტის გეგმის კონტურების შესახებ. როგორც „როიტერი“ წერს, ვოლოდიმირ ზელენსკი, რომელიც ადამიანური რესურსის დანაკლისს განიცდის და პარალელურად კარგავს ტერიტორიებს, უკვე გასაგებს ხდის, რომ ის შეიძლება მზად იყოს მოლაპარაკებებისთვის. „როიტერი“ იუწყება, რომ, საბოლოო ჯამში, ყველაფერი მაინც დამოკიდებული იქნება ტრამპის, ზელენსკისა და პუტინის პირად ურთიერთქმედებაზე. სააგენტო აცხადებს, რომ ახლა არსებობს სამი გეგმა. პირველი ეკუთვნის უკრაინის საკითხებში ტრამპის სპეციალურ წარმომადგენელ კელოგს, მეორე ვიცე-პრეზიდენტ ჯეი დი ვენსს და მესამე რიჩარდ გრენელს, რომელიც ტრამპის პირველი ვადის დროს სადაზვერვო სამსახურს ხელმძღვანელობდა. კელოგის გეგმა ითვალისწინებს უკრაინის ომში არსებული ფრონტის ხაზის გაყინვას და უკრაინისთვის მეტი შეიარაღების გადაცემას, თუ კიევი სამშვიდობო მოლაპარაკებებს დათანხმდება. ამავე დროს, ის გააფრთხილებს მოსკოვს, რომ გაზრდის უკრაინის დახმარებას, თუ რუსეთი უარს იტყვის მოლაპარაკებებზე. ხოლო უკრაინის ნატო-ში გაწევრიანება იქნება შეჩერებული. ამავე დროს უკრაინას ასევე შესთავაზებენ უსაფრთხოების გარანტიებს, რაც მოიცავს აშშ-ის მხრიდან შეიარაღების მიწოდების გაზრდას, თუ კიევი ხელს მოაწერს შეთანხმებას. ვიცე-პრეზიდენტის გეგმა კი ითვალისწინებს დემილიტარიზებული ზონის შექმნას ფრონტის არსებულ ხაზზე, რომელიც იქნება გამაგრებული, რათა თავიდან იყოს აცილებული რუსეთის შემდგომი შეჭრა უკრაინაში. ეს წინადადებაც ასევე მოიცავს უკრაინის ნატო-ში წევრობაზე უარის თქმას. გრენელის გეგმა კი გამოდის ე.წ. ავტონომიური ზონების შექმნის ინიციატივით. ის ასევე ამბობს, რომ უკრაინის ნატო-ში გაწევრიანება აშშ-ის ინტერესებში არ შედის. „როიტერი“ ასევე აღნიშნავს, რომ ტრამპის მრჩევლების ზოგიერთ წინადადებას წინააღმდეგობა შეხვდება უკრაინის პრეზიდენტისგან, რომლის „გამარჯვების გეგმის“ ნაწილი უკრაინის ნატო-ში მიწვევაა, ასევე ზოგიერთი გეგმის წინააღმდეგ გამოვლენ აშშ-ის ევროპელი მოკავშირეები და ზოგიერთი ამერიკელი კანონმდებელიც.