პირობა დავდე, რომ არცერთი სამშენებლო სამუშაო არ განხორციელდებოდა სკვერების, რეკრეაციული სივრცეებისა და სტადიონების ხარჯზე, – ამის შესახებ თბილისის მერმა, კახა კალაძემ „იმედის“ გადაცემა „დედაქალაქში“ განაცხადა.
მისი თქმით, არ იყო სასიამოვნო, როდესაც წლების განმავლობაში ვხედავდით სკვერებისა და პარკების ადგილზე სამშენებლო სამუშაოებს.
„ურბანული პოლიტიკა ასევე ერთ-ერთი მნიშვნელოვანია. ნამდვილად არ იყო სასიამოვნო, როდესაც წლების განმავლობაში სკვერებისა და პარკების ადგილზე სამშენებლო სამუშაოებს ვხედავდით და ძირითადად ეს იყო საცხოვრებელი კორპუსები. ასევე ხდებოდა სტადიონების ადგილზე. ეს მიდგომა და დამოკიდებულება ჩემთვის კატეგორიულად მიუღებელი იყო და თბილისელებისთვის ჩემი საარჩევნო დაპირება 2017 წელს, როდესაც კამპანიაში ვიყავი ჩართული, ეს იყო ერთ-ერთი მიმართულება. პირობა დავდე, რომ არც ერთი სამშენებლო სამუშაო არ განხორციელდებოდა სკვერების, რეკრეაციული სივრცეებისა და სტადიონების ხარჯზე. ჩვენ ამ დაპირებას ვასრულებთ, პირველი რაც მოვაწესრიგეთ, ეს ქაოტური განაშენიანება იყო, რაც ქალაქში ხდებოდა და რაც სერიოზულ პრობლემას წარმოადგენდა, შევაჩერეთ. მივიღეთ ქალაქის განაშენიანების რეგულირების გენერალური გეგმა, რომლის მიხედვითაც ხდება ქალაქის განვითარება. მინდა, მადლობა გადავუხადო გენგეგმაზე მომუშავე ჯგუფს. კიდევ ერთხელ მინდა, ხაზი გავუსვა, რომ სანამ დედაქალაქის მერი ვარ, ამ ქალაქში ვერავინ გაბედავს რეკრეაციული სივრცეებისა და სტადიონების ხარჯზე საცხოვრებელი კორპუსების აშენებას. ჩვენ რა თქმა უნდა, მშენებლობას არ ვეწინააღმდეგებით, ყველანაირად შევუწყობთ ხელს და დავეხმარებით, იმიტომ, რომ ეკონომიკაში მნიშვნელოვანი კონტრიბუცია შეაქვს სამშენებლო სექტორს, მაგრამ ქალაქის განაშენიანება უნდა მოხდეს გენერალური გეგმის ფარგლებში და ურბანულად სწორად დაგეგმარებით“, – განაცხადა კახა კალაძემ.