კახა კალაძე – პატივს მივაგებთ იმ ახალგაზრდების ხსოვნას, რომლებმაც ყველაზე ძვირფასი, საკუთარი სიცოცხლე შესწირეს სამშობლოს დამოუკიდებლობას და თავისუფლებას

სერიული პედოფილი, რომელიც მსხვერპლს სოციალურ ქსელებში ეძებდა, ბავშვებთან ნდობაში შესვლის შემდეგ, მათ სექსუალურ თემებზე ელაპარაკებოდა და პორნოგრაფიულ ვიდეოებს უგზავნიდა. პედოფილი უკვე დაკავებულია - გამოძიების ინფორმაციით, მისი დანაშაულებრივი საქმიანობა თითქმის 5 წელს ითვლის. 40 წლის პედოფილის საქმე ერთ-ერთი ყველაზე მასშტაბურია, რაც აქამდე სპეციალურ საგამოძიებო სამსახურს გაუხსნია. მოახერხა თუ არა ინტერნეტსივრცის შემდეგ, რომელიმე მსხვერპლთან შეხვედრა და ფიზიკური ძალადობა - ამას მიმდინარე გამოძიება სწავლობს. მანამდე კი, "კურიერი P.S-მა" ერთ-ერთი მსხვერპლი ბავშვის ჩვენება მოიპოვა, რომელმაც პედოფილს მიზნის მიღწევა არ აცადა და მისგან თავის დახსნა მალევე შეძლო. გოგონა დაზარალებულად უკვე ცნეს. ადვოკატის ინფორმაციით, დაკავებული კაცის ქმედება ამ კონკრეტულ შემთხვევაში გარყვნილ ქმედებად შეფასდა. "კურიერი P.S-ის" ინფორმაციით, პედოფილმა სხვა ბავშვების მახეში გაბმა შეძლო, მათ აიძულა, რომ ინტიმური ვიდეოები გადაეღოთ და მისთვის გაეგზავნათ. გამომძიებლებმა, დაკავებულის სახლისა და მანქანის ჩხრეკისას, მოცულობითი ფაილები ამოიღეს. მიმოწერები ასობით ბავშვთან და ქალთან, ასევე - მსხვერპლთა ინტიმური კადრები. დაზარალებულების იდენტიფიცირება ამ დრომდე გრძელდება. "კურიერი P.S-მა" მასშტაბური საქმის გამომძიებელთან ვრცელი ინტერვიუ ჩაწერა. აღმოჩნდა, რომ პედოფილს სოციალურ ქსელებში ათამდე ყალბი გვერდი ჰქონდა შექმნილი, საიდანაც სპეციალური საგამოძიებო სამსახურის გამომძიებლებმა ასობით პირთან მიმოწერა ამოიღეს. სტატისტიკა მძიმეა - პედოფილებისთვის დანაშაულის მთავარი ლოკაცია სოციალური ქსელები გახდა. არასრულწლოვანებზე დაკარგული კონტროლი კი, დანაშაულებრივი ქმედებების საფრთხეს კიდევ უფრო ზრდის. ექსპერტების რეკომენდაციით, პრევენციისთვის ბავშვის ინფორმირება როგორც ოჯახის წევრებმა, ასევე სააღმზრდელო დაწესებულებებმა უნდა მოახდინონ. საინფორმაციო კამპანიას სპეციალური საგამოძიებო სამსახური სკოლებში უკვე ატარებს. პრევენციული მიზნებით, შეხვედრები 60-მდე სასწავლო დაწესებულებაში უკვე ჩატარდა. მსხვერპლ ბავშვებსა და მათ ოჯახებს დანაშაულის შესახებ შეუძლიათ, დარეკონ ცხელ ხაზზე, ან მიმართონ საქართველოს მასშტაბით, საგამოძიებო სამსახურის ოფისებს. სერიული პედოფილის სახელით დაკავებულ 40 წლის კაცს ადვოკატი არ ჰყავს. უცნობია, აღიარებს თუ არა დაკავებული უმძიმეს ბრალდებას. უკვე წარდგენილი გარყვნილი ქმედების ბრალის დამტკიცების შემთხვევაში, მას 9 წლამდე პატიმრობა ემუქრება, თუმცა არ არის გამორიცხული, გამოძიების ეტაპზე, გაცილებით მძიმე დანაშაული გამოიკვეთოს და მას ბრალი კიდევ უფრო დაუმძიმდეს.

შოლცი მიდის , მერცი მოდის-ბუნდესტაგის ვადამდელ არჩევნებში ფრიდრიხ მერცის კონსერვატიული ბლოკი 29 პროცენტით ლიდერობს გერმანიაში დასრულდა ფედერალურ არჩევნებზე ხმის მიცემის პროცედურა. ხმის მიცემის პროცედრის დასრულებისთანავე გამოქვეყნებული პირველი ეგზიტპოლების თანახმად, „ქრისტიან დემოკრატიული კავშირის“ და „ქრისტიან-სოციალური კავშირის“ გაერთიანება ხმების 29%-ს იღებს. მეორე ადგილზე გადის „ალტერნმატივა გერმანიისთვის – 19,5%. კანცლერ ოლაფ შოლცის „სოციალ-დემოკრატიული პარტია” 16%-ით მესამე ადგილზეა. ბარიერი ასევე გადალახეს მწვანეებმა (13,5%) და მემარცხენეებმა (8,5%)

ომის დასრულება ამ კვირაში შეუძლებელია, – ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა. ჟურნალისტმა ზელენსკის ჰკითხა აშშ-ის პრეზიდენტის განცხადებაზე, რომლის მიხედვითაც, ის „მზად იყო რუსებთან სამშვიდობო შეთანხმების დასასრულებლად ამ კვირაში“. „ამ კვირაში შეუძლებელია ომის დასრულება უკრაინისთვის გარანტიებით. ყოველ შემთხვევაში, მართლა არ ვიცი, როგორ შეიძლება, ეს დღეს გაკეთდეს ჩვენი შეხვედრების გარეშე“, – განაცხადა ზელენსკიმ. ასევე, ზელენსკიმ აღნიშნა, რომ აშშ-ის პირობები სასარგებლო წიაღისეულის შესახებ შეთანხმებაში ვალის ხასიათს ატარებდა, რომელიც უკრაინას აშშ-ისთვის უნდა გადაეხადა. „ვიცი, რომ ჩვენ გვქონდა 100 მილიარდი დოლარი აშშ-ისგან და არ ვაპირებ 500-ის აღიარებას, ვინც რას უნდა ამბობდეს“, – აღნიშნა ზელენსკიმ. მისივე თქმით, არ სურს 100 მილიარდის ოდენობის ვალის აღიარება, რადგან არ თვლის აშშ-ის ფინანსურ დახმარებას ვალად. ზელენსკის თქმით, აშშ-თან წიაღისეულის შესახებ შეთანხმების პირობები უკრაინას ავალდებულებს ორჯერ მეტი თანხის დაბრუნებას, ვიდრე აშშ უკრაინას მისცემს. უკრაინის პრეზიდენტმა შეადარა უკრაინისთვის გაწეული დახმარება ისრაელის შემთხვევას და აღნიშნა, რომ უკრაინის მიმართ უსამართლო მიდგომაა. „მე არ მოვაწერ ხელს იმას, რასაც უკრაინელების ათი თაობა გადაიხდის“, – აღნიშნა ზელენსკიმ.​​​​​ ამასთან, ზელენსკის სთხოვეს, კომენტარი გაეკეთებინა ტრამპის სიტყვებზე, რომელმაც მას „დიქტატორი“ უწოდა ომის დროს არჩევნების ჩატარებაზე უარის თქმის გამო. ზელენსკიმ განაცხადა, რომ არ არის ნაწყენი ამ განცხადების გამო და აღნიშნა, რომ ნამდვილად არ გახდება დიქტატორი. „აქ ემოციების ადგილი არ არის. მე პრაგმატული მიდგომა მაქვს აშშ-ის დღევანდელ ადმინისტრაციასთან ურთიერთობებში და ასე გავაგრძელებ. თუმცა, რა თქმა უნდა, პრეზიდენტ ტრამპის ამ სიტყვებს ჩემ მიმართ კომპლიმენტებს ვერ დავარქმევდი, რბილად რომ ვთქვათ. მე ასე მესმის ეს. მაგრამ რატომ უნდა გვეწყინოს? სიტყვა „დიქტატორი“ შეიძლება, მას ეწყინოს, ვინც დიქტატორია. მე კი ამას ასე აღვიქვამ – რა გაეწყობა, როგორღაც ვიცხოვრებთ აშშ-თან ერთად. დიქტატორები ნამდვილად არ გავხდებით. ეს უბრალოდ არ არის საინტერესო. მე კანონიერად არჩეული პრეზიდენტი ვარ, არანაირი ძალით არ მოვსულვარ ხელისუფლებაში. მე ამირჩია 73%-მა. სხვათა შორის, პარლამენტარებიც, რომლებიც იმავე დროს მოვიდნენ, არავის დაუნიშნავს, პარლამენტი აირჩია უკრაინის ხალხმა. სამხედრო მდგომარეობის დასრულების შემდეგ ჩატარდება არჩევნები და ხალხი გააკეთებს თავის არჩევანს“, – განაცხადა ზელენსკიმ. ზელენსკიმ ასევე აღნიშნა, რომ არ აპირებს ხელისუფლებაში იყოს „ათწლეულები“, მაგრამ არც რუსეთის მმართველს, ვლადიმერ პუტინს მისცემს საშუალებას, იყოს ხელისუფლებაში უკრაინის ტერიტორიაზე. „სიტყვები კი უბრალოდ გაივლის. შესაძლოა, ოდესმე რაიმე კარგიც თქვან“, – აღნიშნა ზელენსკიმ. უკრაინის პრეზიდენტის თქმით, მისთვის მნიშვნელოვანია, რას ფიქრობენ მასზე უკრაინელები, ისევე როგორც ტრამპისთვის მნიშვნელოვანია, რას ფიქრობენ მასზე ამერიკელები.

ხაშური-ახალციხე-ვალეს გზაზე მისაბმელიანი და ნახევრად მისაბმელიანი ავტოტრანსპორტის მოძრაობა აკრძალულია. საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის ინფორმაციით, თოვისა და ლიპყინულის გამო, საერთაშორისო მნიშვნელობის ხაშური-ახალციხე-ვალეს საავტომობილო გზაზე, დროებით იზღუდება მისაბმელიანი და ნახევრად მისაბმელიანი ავტოტრანსპორტის მოძრაობა, ხოლო დანარჩენი სახის ავტოტრანსპორტის მოძრაობა თავისუფალია.

აშშ-ის დახმარების გარეშე, უკრაინისთვის რთული იქნება აგრესორის შეკავება, განსაკუთრებით იმის გამო, რომ გარკვეული ტიპის შეიარაღებაზე საჭიროა ამერიკული ლიცენზია, – ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა. კერძოდ, ზელენსკის ჰკითხეს, რა მოხდება, თუ აშშ შეწყვეტს უკრაინის დახმარებას და საკმარისი იქნება თუ არა ევროკავშირის დახმარება. „აშშ არ არის მხოლოდ ფული. პოლიტიკური მხარდაჭერა ძალიან მნიშვნელოვანია, სანქციებით მხარდაჭერა ძალიან მნიშვნელოვანია. არის გარკვეული იარაღი, რომელსაც აშშ-ის ლიცენზია აქვს. მას ევროპელები გვაძლევენ, მაგალითად, იგივე Patriot-ები, რომლებსაც ვიღებთ. სხვათა შორის, გერმანიისგან მივიღეთ ყველაზე მეტი Patriot-ის სისტემა, ვიდრე ნებისმიერი სხვა ქვეყნისგან. მაგრამ მაინც ლიცენზიას ამაზე აშშ გასცემს. ამიტომ არ მინდა, რომ ამ დახმარების გარეშე ვიყოთ, აშშ-ს დახმარების გარეშე“, – განაცხადა უკრაინის პრეზიდენტმა. ამასთან, ზელენსკის თქმით, ამჟამად უკრაინამ შეძლო შესაბამისი შეიარაღების წარმოების გაზრდა, რაც ასევე აძლევს უკრაინას საშუალებას როგორღაც „გადარჩეს“. „ვნახოთ. ჯერჯერობით ახალი დახმარება არ არის, მაგრამ როგორღაც ვცხოვრობთ. იარაღი მოდის, ჩვენ სხვადასხვა ვარიანტებს ვეძებთ, წარმოება გავზარდეთ. გასულ წელს 154 საარტილერიო სისტემა შევქმენით ადგილობრივი წარმოებით. ეს რეკორდია, რადგან წლის განმავლობაში – 154, ჩვენი აზრით, მეტია, ვიდრე ყველა ნატო-ს ქვეყანამ ერთად გააკეთა იმავე წელს. ვთვლი, რომ ეს სერიოზული ნახტომია. წელს ვეცდებით მეტი გავაკეთოთ“, – განაცხადა ზელენსკიმ. ამასთან, უკრაინის პრეზიდენტმა ისაუბრა დრონების წარმოებაზეც. „ეს ვერ ჩაანაცვლებს აშშ-ის დახმარებას, მაგრამ ეს არც არის მიზანი. მიზანი არ არის პარტნიორების დახმარების ჩანაცვლება“, – განაცხადა ზელენსკიმ.. ისი აზრით, აშშ ყველაფერს გააკეთებს, რომ ომის ცხელი ფაზა წელს დასრულდეს. „ვთვლი, რომ ეს არის მათი მიზანი და ისინი ყველაფერს გააკეთებენ ამისთვის“, – განაცხადა უკრაინის პრეზიდენტმა.