დასავლეთის ქვეყნებს განსხვავებული ინტერესები აქვთ ომში, რომელიც რუსეთმა 24 თებერვალს დაიწყო უკრაინის წინააღმდეგ. ამის შესახებ უკრაინის პრეზიდენტმა ვოლოდიმირ ზელენსკიმ The Economist-თან ინტერვიუში განაცხადა. ზელენსკიმ ქვეყნები 5 ძირითადი მახასიათებლით განასხვავა, თუ ვის როგორ აწყობს უკრაინაში ომის წარმართვა.
❗ მისი თქმით, დასავლეთში არის ქვეყნები, რომლებსაც „არ ადარდებთ ხანგრძლივი ომი, რადგან ეს რუსეთის გამოფიტვას ნიშნავს, თუნდაც უკრაინის და უკრაინელების სიკვდილის ხარჯზე“.
❗ ამავდროულად, ზელენსკიმ აღნიშნა, რომ სხვა სახელმწიფოებისთვის უფრო მოგებიანია, რომ ომი სწრაფად დასრულდეს, რადგან რუსეთის ბაზარი დიდია და მათი ეკონომიკა ზარალდება ომის შედეგად, ამ ქვეყნებს „სურთ, რომ რუსეთმა გარკვეული ბაზრები შეინარჩუნოს“.
❗ ამავე დროს, მდიდარი ქვეყნები „აღიარებენ ნაციზმს რუსეთში“ და აუცილებლად სურთ უკრაინის გამარჯვება, დასძინა ზელენსკიმ.
❗ გარდა ამისა, როგორც უკრაინის სახელმწიფოს მეთაურმა ხაზგასმით აღნიშნა, არიან „პატარა ქვეყნები“, რომლებიც სრულად უჭერენ მხარს კიევს, მაგრამ „ისინი უფრო ლიბერალური სახელმწიფოები არიან და ჰუმანიტარული საკითხები აწუხებთ“. ისინი მომხრენი არიან ომის რაც შეიძლება მალე დასრულების „ნებისმიერ ფასად“. მიაჩნიათ, რომ „ხალხი პირველ ადგილზეა“, – განმარტა ზელენსკიმ.
❗ ასევე, პრეზიდენტის თქმით, არის მთელი რიგი სახელმწიფოები, რომლებსაც ნებისმიერი გზით სურთ ომის სწრაფად დასრულება უკრაინაში, რადგან ისინი შეიძლება ჩაითვალოს „რუსეთის ფედერაციის ოფისებად ევროპაში“.
ვოლოდიმირ ზელენსკიმ ინტერვიუში აღნიშნა, რომ გაერთიანებული სამეფო ნამდვილად არის კიევის მხარეს და მას სურს უკრაინის გამარჯვება. პრეზიდენტმა დასძინა, რომ შეერთებული შტატები ეხმარება უკრაინას და „ბევრ ქვეყანას უბიძგეს, რომ დაგვეხმარონ“, მაგრამ „ცოტა ნელა, ვიდრე გვჭირდება“ – შეაჯამა უკრაინის პრეზიდენტმა.