„ხაბეიშვილს მინდა მივმართო კიდევ ერთხელ, ჩემი მეგობრული რჩევაა, შეეშვი „ქართული ოცნების“ მხარდამჭერების ბულინგს და ასე მოხსენიებას.” განაცხადა “ქართული ოცნების” დეპუტატმა ირაკლი ზარქუამ პარლამენტის პლენარულ სხდომაზე და “ნაციონალური მოძრაობის” დეპუტატს მოუწოდა „ქართული ოცნების“ მხარდამჭერების ბულინგს თავი დაანებოს.
„ხაბეიშვილს მინდა მივმართო კიდევ ერთხელ, ჩემი მეგობრული რჩევაა, შეეშვი „ქართული ოცნების“ მხარდამჭერების ბულინგს და ასე მოხსენიებას. ბოლო გაფრთხილებაა ეს. ჩვენ არ შეურაცხვყობთ თქვენს ამომრჩეველს, იმიტომ, რომ ყველას პატივს ვცემთ, მაგრამ ის, ვინც ხართ მოკალათებული პოლიტიკაში, თქვენ გაქვთ მეტი პასუხისმგებლობა. რუსეთის ინტერესების გამტარებელს, ჩამოგითვლით, ვინ გაატარა და მერე თქვით, ვინ არის რუსეთუმე. 2008 წელს ომი რომ დაიწყო, 20% ვინ ჩააბარა, სტრატეგიული ობიექტები რუსებს ვინ ჩააბარა. აგერაა რომან გოცირიძე და ჰკითხეთ, რას ნიშნავს მაგ ობიექტების გადაცემა რუსებისთვის. ომიდან ცოტა ხანში, ორ წელში ვინ გაუხსნა უვიზო მიმოსვლა რუსებს, „ვეტეოში“ ვინ დაუჭირა მხარი რუსებს, ჩვენი ხმა იყო გადამწყვეტი. ვის უყვარდა ქვეყანა. დღეს გამოიტანა გადაწყვეტილება სასამართლომ და 20 მილიონით დააჯარიმა თქვენი თავდაცვის მინისტრი, ჯარს რომ ფული მოპარა იმიტომ. ეს არის რუსეთუმეობა, რასაც თქვენ ღირსეულად აკეთებთ და აკეთებდით“, – განაცხადა ირაკლი ზარქუამ.
დეპუტატის თქმით, „ქართული ოცნების“ ხელისუფლების დროს ქვეყანა დასავლეთს მეტად დაუახლოვდა.
„ჩვენი პოლიტიკა ის იყო, რომ ჩვენ მოსვლიდან ევროკავშირში უვიზო მიმოსვლა გვაქვს. ჩვენ ევროკავშირის ბაზარი ჩვენს ბიზნესს გავუხსენით. ჩვენ შევძელით ის, რომ ნატო ყველაზე უფრო ახლოს არის ჩვენთან და უამრავი ერთობლივი პროგრამაა. ჩვენ გავაკეთეთ ის, რომ რასმუსენმა თქვა, დიახ, საქართველო დღეს მზად არის ნატო-სთვის. ამიტომ, ფაქტები არის ფაქტები. ვერ გაექცევით, როგორც არ უნდა შეალამაზოთ შენ და შენმა ბელადმა. ამიტომ, კიდევ ერთხელ მოგიწოდებთ, ერთიანობა ნიშნავს, რომ საქართველოს ინტერესები დავიცვათ. ნუ იქნებით მე-5 კოლონა და აღარ დაგიძახებენ მერე. გამოდით და თქვით, რომ ის, რა განცხადებაც გააკეთა უკრაინის ერთ-ერთმა ჩინოსანმა, მიუღებელია. არც ერთს არ დაგცდენიათ, აქ გამოდიხართ და საქართველოს სიყვარულზე მელაპარაკებით. საკმარისია, ეს გამოიარა საქართველომ 2008 წელს. ჩვენს დედებს ჩააცვეს უკვე შავები რუსებმა, მეტი აღარ გვჭირდება. ჩვენ განვითარებაზე ვართ ორიენტირებული და თუ შეგწევთ ძალა, ამაში შემოგვეხიდეთ, გვერდში დაგვიდექით. თუ არადა, ჩუმად იყავით. მე მინდა ბატონ კირკიტაძეს გამოვეხმაურო. დიახ, კირკიტ ძმაო ძალიან რთულია, ყველას გვესმის და ვინმეს ურტყამს მაღალი ინფლაცია, საწვავი გაზრდილი, ეს არის მთავრობა და ხელისუფლება, მაგრამ ეს არის მოცემულობა. ეს არის მსოფლიო მოვლენა. სამწუხარო რეალობის წინაშე ვდგავართ“, – განაცხადა ირაკლი ზარქუამ.