უკრაინის პრეზიდენტის, ვოლოდიმირ ზელენსკის განცხადებით, მზადაა, დატოვოს თანამდებობა უკრაინაში მშვიდობის ან ნატო-ში გაწევრიანების სანაცვლოდ. ამის შესახებ ვოლოდიმირ ზელენსკიმ პრესსკონფერენციაზე განაცხადა.
„თუ ეს უკრაინისთვის მშვიდობას ნიშნავს, თუ თქვენ ძალიან გჭირდებათ, რომ მე დავტოვო ჩემი თანამდებობა, მაშინ მზად ვარ. მეორე ამბავი – შემიძლია, ეს ნატო-ზე გავცვალო, თუ ასეთი პირობები არსებობს. პირდაპირ ვამბობ, რომ ამაზე დიდხანს არ ვისაუბროთ“, – ასე უპასუხა ზელენსკიმ ჟურნალისტის კითხვას, მზად არის თუ არა, დატოვოს პრეზიდენტის პოსტი, თუ ეს მშვიდობას მოიტანს.
ზელენსკიმ ასევე ხაზი გაუსვა, რომ ის კონცენტრირებულია უკრაინის უსაფრთხოებაზე დღეს და არა 20 წლის შემდეგ და არ აპირებს ათწლეულების განმავლობაში ხელისუფლებაში ყოფნას.
„ამიტომ ეს, ალბათ, ჩემი ფოკუსი და სანუკვარი ოცნებაა“, – თქვა ზელენსკიმ.
ნატო-ზე საუბრისას მან აღნიშნა, რომ ალიანსის წევრობა უკრაინის უსაფრთხოების გარანტიების ყველაზე კარგი ვარიანტი იქნება.
„ნებისმიერ შემთხვევაში, ვიღაცას უნდა ეს თუ არ უნდა, მხარს უჭერს ამ იდეას თუ არა – მაგიდაზე ეს თემა დევს. და უსაფრთხოების გარანტიებისა და მოლაპარაკებების მაგიდაზე ეს თემა იქნება. არ ვიცი, რით დასრულდება მოლაპარაკებები, მაგრამ ნებისმიერ ფორმატში, ნებისმიერ შემთხვევაში მაგიდაზე ეს იქნება. ამის განხილვა, ალბათ, პარტნიორებთან ერთად მოგვიწევს. აქ ძალიან მნიშვნელოვანია, ყველამ გავიგოთ, რომ ეს არ არის მოლაპარაკებების მაგიდა, რომელზეც უკრაინას იწვევენ, ეს ჩვენი მაგიდაა, რადგან ომი უკრაინაშია. ეს ჩვენ ვიწვევთ პირველ რიგში ჩვენს ევროპელ ლიდერებს, რადგან ომი უკრაინაშია, და ჩვენ ვართ ამ კონტინენტის – ევროპის, ევროკავშირის მომავლის განუყოფელი ნაწილი”, – განაცხადა ზელენსკიმ.
მან ასევე აღნიშნა, რომ მშვიდობისა და უსაფრთხოების გარანტიებზე მოლაპარაკებების მაგიდასთან ევროპა და აშშ უნდა იყვნენ.
„ჩვენ გვსურს ომის დასრულება, და პარტნიორებსაც სურთ ეს. პარტნიორებს სურთ, რომ იქ რუსეთი იყოს, და რუსეთი იქ იქნება. მართლა მჯერა, რომ აშშ-ის პრეზიდენტ ტრამპს სურს და დაგვეხმარება ამ ომის დასრულებაში, მაგრამ მშვიდობა ძალის გამოყენებით უპირველეს ყოვლისა საკუთარი ძალის რუსეთისკენ მიმართვაა“,- აღნიშნა ზელენსკიმ.